1 Ma ou te toe fai atu, o’u uso e, ou te fia faatepa o outou mafaufau i le taimi na tuu mai ai e le Alii le Atua nei poloaiga i ana fanau; ma ou te manao ia outou manatua na faauu e le Alii le Atua o faitaulaga, e tusa ma lana faatulagaga paia, lea na tusa ma le faatulagaga a lona Alo, e a’oa’o atu nei mea i tagata.

2 Ma o na faitaulaga sa faauuina e tusa ma le faatulagaga a lona Alo, i se auala e mafai ai e tagata ona iloa le ala latou te tepa taulai ai i luma i lona Alo mo le togiolaina.

3 Ma o le ala lenei sa faauuina ai i latou—sa valaauina ma saunia i latou mai le faavaega o le lalolagi e tusa ma le muai silafia o le Atua, ona o lo latou faatuatua tele ma a latou galuega lelei; o le mea muamua i le tuuina atu o i latou e filifili i le lelei po o le leaga; o lea ona sa latou filifili le lelei, ma faaaoga le faatuatua tele nauā, ua valaauina ai i latou i se valaauga paia, ioe, i lena valaauga paia lea na saunia faatasi, ma e tusa ma se togiolaina sauniuni mo e faapena.

4 Ma sa faapea ona valaauina i latou i lenei valaauga paia ona o lo latou faatuatua, a’o isi sa latou teena le Agaga o le Atua ona o le maaa o o latou loto ma le tauaso o o latou mafaufau, ae, a na leai lenei mea, po ua mafai foi ona latou maua se avanoa tele faapea e pei o o latou uso.

5 Po o i se aotelega, o le mea muamua sa i ai i latou i le tulaga e tasi faatasi ma o latou uso; o lea o lenei valaauga paia na saunia mai le faavaega o le lalolagi mo i latou o e e lē faamaaaina o latou loto, ua i ai ma ala mai i le togiola a le Atalii Pele e Toatasi, o lē na saunia—

6 Ma sa faapea ona valaauina i latou i lenei valaauga paia, ma faauuina i latou i le perisitua maualuga o le faatulagaga paia a le Atua, e aoao atu ana poloaiga i le fanauga a tagata, ina ia mafai foi ona latou ulu atu i lona malologa—

7 O lenei perisitua maualuga ua tusa ma le faatulagaga a lona Alo, o le faatulagaga lea sa i ai mai le faavaega o le lalolagi; po o i ni isi upu, ua leai se amataga o ona aso po o se gataaga o ona tausaga, ona ua saunia mai le vavau e oo i le faavavau atoa, e tusa ma lona muai silafia o mea uma—

8 O lenei sa faauuina i latou e tusa ma le ala lenei—sa valaauina i latou i se valaauga paia, ma faauuina i se sauniga paia, ma latou ave ai i o latou luga le perisitua maualuga o le faatulagaga paia, o lea valaauga, ma le sauniga, ma le perisitua maualuga, ua leai sona amataga po o sona gataaga—

9 Ua faapea ona avea ai i latou ma faitaulaga sili e faavavau, e tusa ma le faatulagaga a le Alo, o le Toatasi na Fanaua e le Tamā, o lē ua leai se amataga o ona aso po o se gataaga o ona tausaga, o lē ua tumu i le alofa tunoa, fai mea tutusa, ma le upumoni. Ma ua faapea lava. Amene.

10 O lenei, e pei ona ou fai atu e uiga i le faatulagaga paia, po o lenei perisitua maualuga, e toatele i latou o e sa faauuina ma avea ma faitaulaga sili a le Atua; ma sa faauuina i latou i lenei tofi ona o lo latou faatuatua tele ma lo latou salamo, ma lo latou amiotonu i luma o le Atua, ona sa latou filifili e salamo ma fai le amiotonu nai lo le fano;

11 O lea na valaauina ai i latou i lenei faatulagaga paia, ma sa faapaiaina i latou, ma sa faasinasina o latou ofu e ala i le toto o le Tamai Mamoe.

12 O lenei o i latou, ina ua uma ona faapaiaina e le Agaga Paia, ina ua faasinasinaina o latou ofu, ua mamā ma ua lē pisipisia i luma o le Atua, sa lē mafai ona latou vaai atu i le agasala e aunoa ma le inoino i ai; ma sa i ai le toatele, sa matua toatele lava, o e sa faamamāina ma ulu atu i le malologa o le Alii lo latou Atua.

13 Ma o lenei, o’u uso e, ou te manao ia outou faalotomaualalalo outou lava i luma o le Atua, ma aumai fua e tatau ai mo le salamo, ina ia mafai foi ona outou ulu atu i lena malologa.

14 Ioe, ia outou faamaualalalo outou lava e pei o tagata i ona po o Mekisateko, o lē foi sa avea ma faitaulaga sili e tusa ma lenei lava faatulagaga paia na ou tautala atu ai, o lea foi sa ia ave i ona luga le perisitua maualuga e faavavau.

15 Ma o Mekisateko lava lenei na totogi atu i ai e Aperaamo o sefuluai; ioe, e oo i lo tatou tamā o Aperaamo sa ia totogi sefuluai o le tasi vaesefulu o mea uma na ia maua.

16 O lenei o nei sauniga sa tuuina mai e tusa ma lenei ala, ina ia mafai ai e tagata ona tepa taula’i i luma i le Alo o le Atua, o se faatusa lea o lana faatulagaga, po o lana faatulagaga lava lea, ma sa faia lenei mea ina ia mafai ona latou tepa taula’i atu ai i luma ia te ia mo se faamagaloga o a latou agasala, ina ia mafai ona latou ulu atu i le malologa o le Alii.

17 O lenei o Mekisateko lenei sa avea o se tupu i le laueleele o Salema; ma o ona tagata sa faateteleina le malosi i le faia o le amioletonu ma mea inosia; ioe, sa latou sē ese uma lava; sa tumu i latou i ituaiga o amioleaga eseese uma;

18 Peitai ona sa faatinoina e Mekisateko le faatuatua tele, ma ia maua le tofi o le perisitua maualuga e tusa ma le faatulagaga paia a le Atua, sa ia tala’i atu ai le salamo i ona tagata. Ma faauta, sa latou salamo; ma sa faatuina e Mekisateko le filemu i le laueleele i ona aso; o lea na ta’ua ai o ia o le aloalii o le filemu, ona o ia sa avea ma tupu o Salema; ma sa nofotupu o ia i lalo o lona tamā.

19 O lenei, e toatele sa i luma atu o ia, ma e toatele foi sa i tua mai o ia, peitai e leai se tasi na sili atu ia te ia; o lea, ua latou ta’ua faapitoa mai ai lava o ia.

20 O lenei e lē manaomia ona ou faamatala tele atu le mataupu; atonu ua lava mea ua ou fai atu ai. Faauta, ua i ai i o outou luma tusitusiga paia; afai tou te faauigaeseina i latou o le a avea ma o outou lava faaumatiaga.

21 Ma o lenei sa oo ina ua uma ona fai atu e Alema o nei upu ia te i latou, sa ia faaloaloa atu lona lima ia te i latou ma alaga atu ma le leo tele, e faapea: O le taimi lenei e salamo ai, ona ua latalata mai le aso o le faaolataga;

22 Ioe, ma o le siufofoga o le Alii, e ala i fofoga o agelu, ua alagaina atu lenei mea i atunuu uma; ioe, ua latou alagaina atu, ina ia mafai ona latou maua tala fiafia o le olioli tele; ioe, ma ua ia logo atu nei tala fiafia i totonu o ona tagata uma, ioe, e oo lava ia i latou o e ua faataapeapeina i luga o le fogaeleele; o le mea lea ua oo mai ai nei tala fiafia ia te i tatou.

23 Ma ua faailoa mai nei tala fiafia ia i tatou i upu manino, ina ia mafai ona tatou malamalama, e lē mafai ona tatou sesē; ma ua faia lenei mea ona o le avea o i tatou ma tagata maumausolo i se laueleele ese; o lea, ua faapea ona matuā faapitoa ai lava o i tatou, ona ua alaga mai ia i tatou nei tala fiafia i vaega uma o lo tatou tovine.

24 Auā faauta, o loo alaga atu e agelu lenei mea i le toatele i le taimi nei i lo tatou laueleele; ma ua faia lenei mea mo le faamoemoe o le sauniaina o loto o le fanauga a tagata e talia lana afioga i le taimi o lona afio mai i lona mamalu.

25 Ma o lenei ua na’o na tatou faatalitali e faalogo i tala fiafia e alaga mai ia i tatou e fofoga o agelu, e uiga i lona afio mai; ona e oo mai le taimi, tatou te lē iloa po o le a le vave mai. Ou te moomoo i le Atua ma’umau pe a na oo mai i o’u aso; peitai ia tuu ia pe vave mai pe tuai mai, ae o le a ou olioli ai.

26 Ma o le a faaalia ia mea i tagata amiotonu ma paia, e fofoga o agelu, i le taimi o lona afio mai, ina ia mafai ona faataunuuina upu a o tatou tamā, e tusa ma mea na latou tautalagia e uiga ia te ia, e tusa ai ma le agaga o valoaga sa ia te i latou.

27 Ma o lenei, o’u uso e, ou te moomoo mai le totonugalemu o lo’u loto, ioe, ma le atuatuvale tele e oo lava i le tigā, ina ia outou faalogo mai i a’u upu, ma lafoa’i ese a outou agasala, ma aua le faatuai le aso o lo outou salamo;

28 Ae ia outou faamaualalalo outou lava i luma o le Alii, ma valaau atu i lona suafa paia, ma mataala ma tatalo e lē aunoa, ina ia lē faaosoosoina outou i luga atu o le mea e mafai ona outou lavatia, ma faapea ona ta’ita’iina ai e le Agaga Paia, ia lotomaualalo, agamalu, usiusitai, onosai, tumu i le alofa ma le tali-tigā atoa;

29 O le i ai o le faatuatua i le Alii; o le i ai o se faamoemoe o le a outou maua le ola e faavavau; o le i ai o le alofa o le Atua e le aunoa i o outou loto, ina ia mafai ona siitia a’e outou i le aso gataaga ma ulufale atu ai i lona malologa.

30 Ma tau ina ia tuuina mai e le Alii ia te outou le salamo, ina ia outou le ave ifo i o outou luga lona to’asā, ina ia le noatia outou i lalo i filifili o seoli, ina ia outou le mafatia i le oti faalua.

31 Ma e tele lava upu sa tautala atu ai Alema i tagata, ia ua le tusia i lenei tusi.