1 Ket napasamak kalpasan ti panangigibusna iti panagsaona kadagiti tattao adu kadakuada ti namati kadagiti balikasna, ket rinugianda ti agbabawi, ken agsukimat kadagiti nasantuan a kasuratan.

2 Ngem ad-adu kadakuada ti nagtarigagay a mangdadael kada Alma ken Amulek; agsipud ta kapungtotda ni Alma, gapu iti kinalawag dagiti balikasna ken ni Zeezrom; ken kinunada pay a nagulbod kadakuada ni Amulek, ken linaesna ti lintegda ken kasta pay a maibusor kadagiti abogado ken ukomda.

3 Ken kinapungtotda pay da Alma ken Amulek; ket gapu ta nalawag a pinaneknekanda ti maibusor iti kinadakesda, inkagumaanda a palimed a papatayen ida.

4 Ngem napasamak a saanda inaramid; ngem tiniliwda ida ken pinungoda ida iti nalagda a tali, ket insaklangda ida iti sanguanan ti pangulo nga ukom iti daga.

5 Ket napan dagiti tattao ken nagsaksida maibusor kadakuada—pinaneknekanda a linaisda ti linteg, ken dagiti abogadoda ken dagiti ukom iti daga, ken kasta met dagiti amin a tao nga adda iti daga; ken pinaneknekanda pay a maymaysa laeng ti Dios, ken nasken nga ibaonna ti Anakna kadagiti tattao, ngem saanna nga isalakan ida; ken adu ti kasta a bambanag ti impaneknek dagiti tattao a maibusor kada Alma ken Amulek. Ita napasamak daytoy iti sanguanan ti pangulo nga ukom iti daga.

6 Ket napasamak a nasdaaw ni Zeezrom kadagiti balikas a naisao; ken ammona met ti maipanggep iti kinabulsek dagiti panunot, a naaramidna kadagiti tattao babaen dagiti inuulbod a balikasna; ket nangrugi a maburiburan ti kararuana babaen ti pannakabigbigna iti biddutna; wen, nangrugi a napalawlawan ti saem ti impierno.

7 Ket napasamak a rinugianna ti agriaw kadagiti tattao, a kunana: Kitaen, nakabasolak, ket awan mulit dagitoy a tao iti sanguanan ti Dios. Ket rinugianna ti nagpakaasi kadakuada manipud iti dayta a kanito; ngem linaisda, a kunada: Sinerreknaka kadi metten ti sairo? Ket tinupraanda, ket pinatalawda kadakuada, ken kasta met dagiti namati kadagiti balikas nga insao da Alma ken Amulek; ket pinatalawda ida, ket nangbilinda iti tattao a mangbato kadakuada.

8 Ket sangsangkamaysa nga innalada dagiti assawa ken annakda, ket imbilinda nga ipurwak iti apuy uray siasinoman a namati wenno nasuruan a mamati iti balikas ti Dios; kasta innalada pay dagiti kasuratanda a naglaon kadagiti nasantuan a kasuratan, ket impuruakda met iti apuy, tapno mauram ken madadaelda iti apuy.

9 Ket napasamak nga innalada da Alma ken Amulek, ket inawitda ida iti lugar a pakatayan ti martir, tapno saksianda ti pannakadadael dagidiay inibus ti apuy.

10 Ket idi nakita ni Amulek dagiti saem dagiti babbai ken ubbing nga ibibusen ti apuy, nasaktan met; ket kinunana ken ni Alma: Kasano a saksiantayo daytoy nakaam-amak a buya? Ngarud itag-aytayo dagiti imatayo, ket aramatentayo ti bileg ti Dios nga adda kadatayo, ket isalakantayo ida manipud iti apuy.

11 Ngem kinuna ni Alma kenkuana: Impaganetget kaniak ti Espiritu a saanko itag-ay ti imak; ta kitaen awaten ida a mismo ti Apo, a naglorian; ket impalubosna nga aramidenda daytoy a banag, wenno aramiden dagiti tattao daytoy a banag kadakuada, a mayannurot iti kinatangken dagiti pusoda, tapno nainkalintegan dagiti aramatento a pangngeddengna kadakuada iti pungtotna; ket sitatalinaedto a saksi ti dara ti awanan iti basol maibusor kadakuada, wen, ket umararawdanto a sipapasnek maibusor kadakuada iti maudi nga aldaw.

12 Ita kinuna ni Amulek ken ni Alma: Kitaen, nalabit a puorandata met.

13 Ket kinuna ni Alma: Mapasamak daytoy a mayannurot iti pagayatan ti Apo. Ngem, kitaen, saan pay a nalpas ti trabahota; ngarud saandata a puoran.

14 Ita napasamak nga idi naibus dagiti bagi dagiti naipuruak iti apuy, kasta met dagiti kasuratan a naipasurot a naipurwak kadakuada, dimteng ti pangulo nga ukom iti daga ket nagtakder iti sanguanan da Alma ken Amulek, a sipupungo; ket dinangranna dagiti pinpingda babaen iti imana, ket kinunana kadakuada: Kalpasan ti nakitayo, mangasabakayonto kadi pay kadagitoy a tao, tapno maipuruakdanto iti dan-aw ti apuy ken asupre?

15 Kitaen, napaneknekanyo nga awan ti bilegyo a mangisalakan kadagiti naipuruak iti apuy; saan met nga insalakan ida ti Dios agsipud ta kaduayo iti pammati. Ket dinangran manen ti ukom dagiti pingpingda, ket sinaludsodna: Ania ti masaoyo iti bagbagiyo?

16 Ita kameng daytoy nga ukom ti orden ken pammati ni Nehor, a nangpapatay ken ni Gideon.

17 Ket napasamak nga awan ti insungbat da Alma ken Amulek kenkuana; ket dinangranna manen ida, ket inyawatna ida kadagiti opisial tapno maipanda iti pagbaludan.

18 Ket idi naipanda iti pagbaludan iti tallo nga aldaw, adu ti immay nga abogado, ken uk-ukom, ken saserdote, ken mamaestro, a kas iti propesion ni Nehor; ket immayda iti pagbaludan tapno kitaenda ida, ket sinaludsodda ida maipanggep iti adu a balikas; ngem awan ti insungbatda kadakuada.

19 Ket napasamak a nagtakder ti ukom iti sanguananda, ket kinunana: Apay a saanyo sungbatan dagiti balikas dagitoy a tao? Saanyo kadi ammo nga adda bilegko a mangipuruak kadakayo iti apuy? Ket binilinna ida nga agsao; ngem awan ti insungbatda.

20 Ket napasamak a pimmanawda ket nagsisinada, ngem immayda manen iti kabigatanna; ket dinangran manen ti ukom ti pingpingda. Ken adu met ti napan, ket dinangranda ida, a kunada: Tumakderkayonto kadi manen ket ukomenyo dagitoy a tao, ken kednganyo ti lintegmi? No adda kasta a bilegyo apay a saanyo wayawayaan ti bagbagiyo?

21 Ken adu a banag ti imbagada kadakuada, agngaretngetda kadakuada, ken tuptupraanda ida, ken kunkunada: Kasano ti pannakakitami no nailunodkami?

22 Ken adu pay a banag, wen, adu a kita ti kasta a bambanag ti imbagada kadakuada; ket kasta ti pananglaisda kadakuada iti adu nga aldaw. Ket pinaidamanda ida iti makan tapno mabisinanda, ken danum tapno mawawda; ket kasta met nga innalada dagiti lupotda tapno aglamulamoda; kasta met a pinungoda ida kadagiti nalagda a tali, ken impupokda ida iti pagbaludan.

23 Ket napasamak kalpasan ti pannakaparigatda iti adu nga aldaw, (ket maika sangapulo ket dua nga aldaw idi, iti maika sangapulo a bulan, iti maika sangapulo a tawen a panagturay dagiti ukom kadagiti tattao ni Nephi) a napan ti pangulo nga ukom ti daga ti Ammonihah ken adu kadagiti maestro ken abogadoda iti pagbaludan nga ayan da Alma ken Amulek a nakapunguanda iti tali.

24 Ket nagtakder ti pangulo nga ukom iti sanguananda, ket dinangranna manen ida, ket kinunana kadakuada: No adda kadakayo ti bileg ti Dios wayawayaanyo ti bagbagiyo kadagitoy a pungo, ket isunto laeng ti panamatimi a dadaelento ti Apo dagitoy a tao a mayannurot kadagiti balikasyo.

25 Ket napasamak a napanda amin a nangdangran kadakuada, ulitulitenda dagiti isu met laeng a balikas, uray pay agingga ti naudi; ket idi nakapagsaon ti naudi kadakuada simrek ti bileg ti Dios kada Alma ken Amulek, ket bimmangon ken timmakderda.

26 Ket immawag ni Alma, a kunana: Kasano ti kapaut ti panagibturmi kadagitoy nakaro a rigat, O Apo? O Apo, ikkannakami iti pigsa a mayannurot iti pammatimi ken ni Cristo, uray pay ti pannakaisalakan. Ket pinugsatda ti tali a nangpungo kadakuada; ket idi nakita daytoy dagiti tattao, rinugianda ti nagtaray, agsipud ta dimteng kadakuada ti buteng ti pannakadadael.

27 Ket napasamak a kasta unay ti butengda isu a naidalupoda iti daga, ket saanda nasurotan ti akinruar a ridaw ti pagbaludan; ket nagunggon ti daga iti kasta unay, ket nagbirri a nagudua ti pader ti pagbaludan, isu a narpuogda iti daga; ket natay ti pangulo nga ukom, ken dagiti abogado, ken dagiti saserdote, ken dagiti maestro, a nangdangran kada Alma ken Amulek, iti pannakarpuog dagitoy.

28 Ket rimmuar da Alma ken Amulek iti pagbaludan, ket saanda a nadangran; agsipud ta inikkan ida ti Apo iti bileg, a mayannurot iti pammatida nga adda ken ni Cristo. Ket dagus a rimmuarda iti pagbaludan; ket nakaruk-atda iti pannakapungoda; ket narpuog ti pagbaludan iti daga, ken natay ti tunggal kararua nga adda iti uneg dagiti pader sadiay, malaksid kada Alma ken Amulek; ket dagus a napanda iti siudad.

29 Ita gapu ta nangngeg dagiti tattao ti napigsa a danarudor nagtatarayda nga immay kas sangsangkamaysa nga ummong tapno maammuan iti gapuna daytoy; ket idi nakitada da Alma ken Amulek a rumrummuar iti pagbaludan, ken narpuogen iti daga dagiti pader sadiay, nakariknada iti nalaus a buteng, ket nagtatarayda a nanglibas kada Alma ken Amulek a kas iti kalding nga agtaray a kadua iti urbonna kadagiti dua a leon; ket iti kasta a nagtataray manipud iti ayan da Alma ken Amulek.