1 Ut kik’ulman naq chirix wiib’ kutan ut wiib’ q’ojyin okeb’ raj re chixk’amb’al xtib’el ut chixyokob’ankil sa’ jun li muqleb’aal, li ke’xyiib’ choq’ re xmuqb’aleb’ lix kamenaq.

2 Anajwan li rixaqil li rey, rik’in naq rab’ihom resil laj Ammon naq na’no ru, jo’kan naq kixtaqla xtz’aamankil chiru naq taachalq rik’in.

3 Ut kik’ulman naq laj Ammon kixb’aanu jo’ chanru taqlanb’il, ut ki’ok wan wi’ li rixaqil li rey, ut kixpatz’ re k’a’ru taaraj naq tixb’aanu.

4 Ut a’an kixye re: Eb’ lix moos inb’eelom xe’xk’e chinnaw naq laa’at xprofeet jun li santil Dios, ut naq wan aawankil chixb’aanunkil k’iila xninqal ru k’anjel sa’ lix k’ab’a’;

5 Jo’kan ut, wi jo’kan wan, nawaj raj naq tat-ok ut taawil lin b’eelom, xb’aan naq a’an yokob’anb’il sa’ xb’een xch’aat chiru xnumik wiib’ kutan ut wiib’ q’ojyin; ut wankeb’ neke’yehok re naq moko kamenaq ta, a’b’anan jalaneb’ chik neke’xye naq ak kamenaq ut naq chu chik, ut naq tento raj xk’eeb’al sa’ li muqleb’aal kamenaq; a’b’an choq’ we laa’in, moko chu ta.

6 Anajwan, a’in li kiraj laj Ammon, xb’aan naq naxnaw naq li rey aj Lamoni wan rub’el lix wankil li Dios; naxnaw naq li q’ojyin ruhil tz’apleb’ t’ikr li wan wi’ chi maak’a’ xpaab’aal yoo chaq chi isiik sa’ xk’a’uxl, ut li saqen li nasaqenob’resink re lix k’a’uxl, a’an xsaqenkil lix loq’al li Dios, a’an jun sachb’a-ch’oolejil saqen re lix chaab’ilal—relik chi yaal, li saqen a’in k’a’jo’ naq kiroksi sahil ch’oolejil sa’ li raam, ut oso’jenaq li choql re q’ojyin, ut naq ak lochb’il sa’ raam lix saqenkil li yu’am li junelik nakana; relik chi yaal, kixnaw naq a’in kinumta chaq sa’ xb’een lix xaqalil re ruchich’och’, ut k’amb’il chaq xb’aan li Dios—

7 Jo’kan ut, li k’a’ru kiraj li rixaqil li rey rik’in, a’an tz’aqal li kiraj a’an. Jo’kan naq ki’ok chirilb’al li rey jo’ chanru kixtz’aama li rixaqil li rey chiru; ut kiril li rey, ut kixnaw naq moko kamenaq ta.

8 Ut kixye re li rixaqil li rey: Moko kamenaq ta, warenaq b’an rik’in li Dios, ut sa’ li kutan wulaj taawakliiq wi’chik; jo’kan ut, maamuq.

9 Ut laj Ammon kixye re: Ma nakapaab’ a’in? Ut a’an kixye re: Maajun xk’utb’al xyaalal xink’ul, ka’ajwi’ laa waatin, ut li raatineb’ li qamoos; a’b’anan laa’in ninpaab’ naq taawanq jo’ chanru xaye.

10 Ut laj Ammon kixye re: Osob’tesinb’ilat laa’at xb’aan xnumtajenaqil laa paab’aal; ninye aawe, at ixq, moko wanjenaq ta xkomon a’ nimla paab’aal a’in sa’ xyanqeb’ chixjunil lix tenamiteb’ laj Nefita.

11 Ut kik’ulman naq a’an kixk’aak’ale lix ch’aat lix b’eelom, chirix a’ hoonal a’an toj sa’ li hoonal wulajaq chik li kixye chaq laj Ammon naq taawakliiq wi’.

12 Ut kik’ulman naq kiwakli, jo’ chanru li raatin laj Ammon; ut naq yoo chi wakliik, kixye’ li ruq’ re li ixq ut kixye: Osob’tesinb’ilaq taxaq xk’ab’a’ li Dios, ut osob’tesinb’ilat laa’at.

13 Xb’aan naq jo’ naq ch’olch’o naq yo’yookat laa’at, k’e reetal, wilom laj Tojol wix, ut a’an taachalq, ut taayo’laaq rik’in jun li ixq, ut tixtojeb’ rix chixjunileb’ li winq li neke’paab’ank re lix k’ab’a’. Anajwan, chirix naq kixye li aatin a’in, kireek’a chi numtaak xch’ool, ut kilukta wi’chik rik’in sahil ch’oolejil, ut jo’kan ajwi’ li rixaqil kilukta, chi numtajenaq li Musiq’ej rik’in.

14 Anajwan laj Ammon rik’in rilb’al lix Musiq’ li Dios chi hoyb’il jo’ chanru lix tij sa’ xb’eeneb’ laj Lamanita, li ras riitz’ineb’, li ke’k’amok chaq re naab’al li rahil ch’oolejil sa’ xb’eeneb’ laj Nefita, malaj sa’ xb’eeneb’ chixjunil lix tenamit li Dios xb’aan xmaa’usilaleb’, ut li na’leb’ kanab’anb’il chaq reheb’, a’an kit’ane’ chi wiq’wo, ut ki’ok chixhoyb’al li raam rik’in tijok ut b’antioxink chiru li Dios xb’aan li k’a’ru kixb’aanu chaq choq’ reheb’ li ras riitz’in; ut a’an ajwi’ kinumta li sahil ch’oolejil sa’ xb’een; ut chi jo’kan sa’ oxib’al luktajenaqeb’ chi ch’och’.

15 Anajwan, naq ke’ril lix moos li rey naq t’anenaqeb’, ke’ok ajwi’ chi elajink chiru li Dios, xb’aan naq kichal xxuwankil ru li Qaawa’ sa’ xb’eeneb’ ajwi’ a’an, xb’aan naq a’aneb’ li ke’xaqli chaq chiru li rey ut ke’xch’olob’ chaq chiru xyaalal lix nimal ru xwankil laj Ammon.

16 Ut kik’ulman naq ke’xpatz’ xk’ab’a’ li Qaawa’, rik’in xmetz’eweb’, toj reetal naq chixjunileb’ t’anenaqeb’ chi ch’och’, ka’ajwi’ jun reheb’ li ixq aj Lamanita ink’a’, li xAbix xk’ab’a’, a’an ak naab’al chihab’ xjalb’al chaq xch’ool choq’ re li Qaawa’, xb’aan jun li chaq’al ru k’utb’esinb’il matk’ re lix yuwa’—

17 Ut chi jo’kan kijale’ chaq xch’ool choq’ re li Qaawa’, ut maajun wa chaq kixk’e chi nawe’k; jo’kan ut, naq kiril naq chixjunileb’ lix moos laj Lamoni t’anenaqeb’ chi ch’och’, ut jo’kan ajwi’ laj eechal re, a’an rixaqil li rey, ut li rey, ut laj Ammon huphuukeb’ chi ch’och’, kixnaw naq a’an xwankil li Dios, ut kixk’oxla naq a’in li xk’e rib’ chiru, wi tixk’e chixnaweb’ li tenamit k’a’ru xk’ulman sa’ xyanqeb’, naq rik’in rilb’al a’in li k’utk’u, xb’aan a’an te’xpaab’ lix wankil li Dios, jo’kan naq xko’o sa’ aanil sa’ li junjunq chi ochoch, ut kixk’e chixnaweb’ li tenamit.

18 Ut ke’ok chixch’utub’ankil rib’ aran sa’ rochoch li rey. Ut ke’chal jun ch’uut li tenamit, ut sachsookeb’ xch’ool naq ke’ril li rey, ut li rixaqil li rey, ut eb’ lix moos chi huphu sa’ xb’een li ch’och’, ut chixjunileb’ huphuukeb’ aran chanchan naq kamenaqeb’; ut ke’ril ajwi’ laj Ammon, ut k’ehomaq reetal, a’an aj Nefita.

19 Ut anajwan eb’ li tenamit ke’ok chi wech’ok chirib’ileb’ rib’; wankeb’ ke’yehok re naq a’an jun nimla maa’usilal li kichal chaq sa’ xb’eeneb’, malaj sa’ xb’een li rey ut lix junkab’al, xb’aan naq kixkanab’ naq taakanaaq laj Nefita sa’ li ch’och’.

20 A’b’anan jalaneb’ chik ke’xch’iilaheb’, ut ke’xye: Li rey xk’amok chaq re li maa’usilal a’in sa’ xb’een lix junkab’al, xb’aan naq kixkamsiheb’ lix moos li ke’jek’iik xketomq sa’ li ha’ Sebus.

21 Ut eb’ a’an ke’ch’iilaak ajwi’ xb’aaneb’ li winq a’an li ke’xaqli chaq sa’ li ha’ Sebus ut ke’xjek’i chaq li ketomq li reheb’ li rey, xb’aan naq yookeb’ xjosq’il rik’in laj Ammon xb’aan xnimal rajlankil li ras riitz’ineb’ li kixkamsi chaq sa’ li ha’ Sebus, naq yoo chixkolb’al rix lix ketomq li rey.

22 Anajwan jun reheb’, li kamsinb’il chaq li ras xb’aan xyok’leb’ ch’iich’ laj Ammon, rik’in naq numtajenaq xjosq’il rik’in laj Ammon, kixb’otz’ lix yok’leb’ ch’iich’ ut xko’o chi uub’ej re taaruuq tixk’e chi t’ane’k sa’ xb’een laj Ammon, re xkamsinkil; ut naq kixtaqsi li yok’leb’ ch’iich’ re xsak’b’al, k’ehomaq reetal, kit’ane’ a’an chi kamenaq.

23 Anajwan naqil naq ink’a’ kiru kikamsiik laj Ammon, xb’aan naq li Qaawa’ kixye chaq re laj Mosiah lix yuwa’: Laa’in tinkol xyu’am, ut taa’uxq re jo’ chanru laa paab’aal—jo’kan naq laj Mosiah kixkanab’ sa’ ruq’ li Qaawa’.

24 Ut kik’ulman naq chirix naq eb’ li ch’utch’uukil tenamit ke’ril naq li winq kit’ane’ chi kamenaq, li kitaqsink chaq re xyok’leb’ ch’iich’ re xkamsinkil laj Ammon, kichal li xiw sa’ xb’eeneb’ chixjunil, ut maak’a’eb’ xch’ool chixye’b’al li ruq’eb’ re xch’e’b’al a’an chi moko ani chik reheb’ li ke’t’ane’ chaq; ut ke’ok wi’chik chi chalk xk’a’uxl chirib’ileb’ rib’ chirix k’a’ru kichal wi’ li nimla wankilal a’in, malaj ut k’a’ raj ru xyaalal chixjunil li k’a’aq re ru a’in.

25 Ut kik’ulman naq ke’wan naab’al sa’ xyanqeb’ li ke’yehok re naq laj Ammon a’an li Xnimal ru Musiq’ej, ut jalaneb’ chik ke’xye naq taqlanb’il xb’aan li Xnimal ru Musiq’ej;

26 A’b’an jalaneb’ chik ke’xch’iilaheb’ chixjunil, ut ke’xye naq a’an jun xik’ob’aal xul, li kitaqlaak chaq xb’aaneb’ laj Nefita re xrahob’tesinkileb’.

27 Ut wankeb’ li ke’yehok re naq laj Ammon taqlanb’il chaq xb’aan li Xnimal ru Musiq’ej re xtawasinkileb’ sa’ xk’ab’a’ lix maa’usilaleb’; ut naq a’an li Xnimal ru Musiq’ej li junelik kik’aak’alenk chaq reheb’ laj Nefita, li junelik kixkoleb’ chaq sa’ ruq’eb’ a’an; ut ke’xye naq a’ li Xnimal ru Musiq’ej a’an li kisachok chaq re xk’ihaleb’ li ras riitz’in aj Lamanita.

28 Ut chi jo’kan q’axal ki’ok chi kawuk li wech’ok-ib’ sa’ xyanqeb’. Ut naq yookeb’ chixwech’b’al rib’ chi jo’kan, kichal li moos ixq li kixb’oqeb’ chaq re te’ch’utlaaq li k’iila tenamit, ut naq kiril li wech’ok-ib’ li wan sa’ xyanq li ch’utch’uukil tenamit kiraho’ xch’ool chi numtajenaq, toj reetal naq ki’el xya’al ru.

29 Ut kik’ulman naq xko’o ut kixchap chi ruq’ li rixaqil li rey, re naq maare taaruuq chixwaklesinkil chaq chi ch’och’; ut naq kixch’e’ li ruq’, tikto kiwakli ut kixaqli chiroq, ut kixjap re chi kaw xyaab’ xkux chixyeeb’al: At usilanb’il Jesus, li katkolok we chiru jun li xuwajel xb’alb’a! At usilanb’il Dios, chawuxtaana ru li tenamit a’in!

30 Ut chirix naq kixye a’in, kixchap rib’ li ruq’, chi nujenaq rik’in sahil ch’oolejil, ut kixye k’iila aatin li moko kitawman ta ru; ut chirix naq kixb’aanu a’in, kixchap chi ruq’ li rey, aj Lamoni, ut k’ehomaq reetal naq a’an kiwakli ut kixaqli chiroq.

31 Ut chi tikto a’an, naq kiril li wech’ok-ib’ sa’ xyanq lix tenamit, xko’o ut ki’ok chixch’iilankileb’, ut chixk’utb’al chiruheb’ li aatin li kirab’i chaq sa’ xtz’uumal re laj Ammon; ut jo’ k’ihaleb’ li ke’ab’ink re li raatin ke’paab’an, ut ke’jale’ xch’ool choq’ re li Qaawa’.

32 A’b’an ke’wan naab’al sa’ xyanqeb’ li ink’a’ ke’ajok re rab’inkil li raatin; jo’kan naq ke’xchap lix b’eheb’.

33 Ut naq kiwakli laj Ammon kik’ulman naq a’an ajwi’ kik’anjelak chiruheb’, ut jo’kan ajwi’ ke’xb’aanu chixjunileb’ lix moos laj Lamoni; ut juntaq’eet li na’leb’ ke’xch’olob’ chixjunileb’ chiru li tenamit—naq ke’jale’ li raameb’, jo’kan naq ink’a’ chik neke’raj xb’aanunkil li maa’usilal.

34 Ut k’ehomaq reetal, naab’aleb’ ke’xch’olob’ chiruheb’ li tenamit naq rilomeb’ chaq li anjel ut ke’aatinak chaq rik’ineb’; ut chi jo’kan ke’xye chaq reheb’ li k’a’aq re ru chirix li Dios, ut chirix lix tiikilal.

35 Ut kik’ulman naq ke’wan naab’al li ke’paab’ank re li raatineb’; ut jo’ k’ihaleb’ li ke’paab’ank re ke’kub’e xha’; ut ke’ok choq’ jun tenamit tiik xch’ool, ut ke’xxaqab’ jun li iglees sa’ xyanqeb’.

36 Ut chi jo’kan kitikla lix k’anjel li Qaawa’ sa’ xyanqeb’ laj Lamanita; chi jo’kan li Qaawa’ ki’ok chixhoyb’al lix Musiq’ sa’ xb’eeneb’; ut naqil naq ye’b’il li ruq’ reheb’ chixjunil li tenamit li te’jaloq re xk’a’uxl ut te’xpaab’ lix k’ab’a’.