Ti Libro ni Mormon
ti Lalaki nga Anak ni Alma

1 Ita napasamak nga iti umuna a tawen ti panangituray dagiti ukom kadagiti tattao ni Nephi, agtultuloy manipud itoy a panawen, gapu ta pimmanawen ni ari Mosiah ditoy daga, a nakigubat iti nasayaat a pannakigubat, a nagna a sililinteg iti imatang ti Dios, nga awan ti imbatina a mangisuno kenkuana nga agturay; nupay kasta nangipaulog kadagiti linteg, ket binigbig ida dagiti tattao; ngarud napilitanda nga agtungpal kadagiti linteg nga inaramidna.

2 Ket napasamak nga iti immuna a tawen iti panagturay ni Alma iti pangukoman, adda maysa a lalaki a naisaklang kenkuana tapno makedngan, dakkel a tao, ken nalatak iti kinapigsana.

3 Ket napan kadagiti tattao, a mangikaskasaba kadakuada iti inawaganna a balikas ti Dios, a mangsupring maibusor iti simbaan; a mangipakdaar kadagiti tattao a rumbeng nga agbalin a ti tunggal saserdote ken maestro a natalak; ken rumbeng a saanda nga agtrabaho kadagiti imada, ngem rumbeng a suportaran ida dagiti tattao.

4 Ken impaneknekna met kadagiti tattao a nasken a maisalakan ti amin a sangkatauan iti maudi nga aldaw, ken saanda nga agbuteng ken agpigerger, ngem yangadda ketdi dagiti uloda ket agrag-oda; agsipud ta pinarsua ti Apo ti amin a tao, ken kasta met a sinubbotna amin a tao; ken, iti udina, nasken a maaddaan amin a tao iti agnanayon a biag.

5 Ket napasamak nga insurona dagitoy a banag a sipapasnek isu nga adu ti namati kadagiti balikasna, aduda unay isu nga inrugida ti nangsuportar kenkuana ket inikkanda iti kuarta.

6 Ket rinugianna a timmangig iti kinapalangguad ti pusona, ket nagkawes iti nakanginngina a kawes, wen, ken uray pay nga inrugina ti nangbangon iti simbaan a mayannatup iti panangakaskasabana.

7 Ket napasamak bayat ti ipapanna, a mangasaba kadagiti namati iti balikasna, a nasabatna ti maysa a lalaki a kameng ti simbaan ti Dios, wen, maysa kadagiti mannursuroda; ket rinugianna a nakisinnupiat iti kasta unay kenkuana, tapno bareng mayadayona dagiti tattao iti simbaan; ngem binalusingsing isuna ti lalaki, imbalakadna kenkuana dagiti balikas ti Dios.

8 Ita ti nagan ti lalaki ket Gideon; ket isu ti inaramat dagiti ima ti Dios iti pannakawayawaya dagiti tattao ni Limhi iti pannakaadipen.

9 Ita, gapu ta pinarmek ni Gideon kadagiti balikas ti Dios kinapungtotna ni Gideon, ket inasutna ti espadana sana rinugian a dinangran. Ita gapu ta lakayen ni Gideon, ngarud saanna a nasarkedan dagiti tagbatna, ngarud napapatay babaen ti espada.

10 Ket tiniliw dagiti tattao ti simbaan ti lalaki a nangpapatay kenkuana, ket naidatag iti imatang ni Alma, tapno maukom a mayannurot kadagiti naaramidna a krimen.

11 Ket napasamak a nagtakder iti imatang ni Alma ket situtured nga impakpakaasina ti bagina.

12 Ngem kinuna ni Alma kenkuana: Kitaem, daytoy ti umuna a gundaway a naiyam-ammo ti panaginsasaserdote kadagiti tattao. Ket kitaen, saan laeng a nakabasolka iti panaginsasaserdote, ngem inkagumaanam pay nga ipaalagad daytoy babaen ti espada; ket no ipatungpal ti panaginsasaserdote kadagitoy a tao mapaneknekan ti sapasap a pannakadadaelda.

13 Ket no pinagsayasaymo ti dara ti nalinteg a lalaki, wen, ti lalaki nga adu ti naaramidna a kinaimbag kadagitoy a tao; ket ta no ispalendaka umay kadakami ti darana para iti panangibales.

14 Ngarud makednganka a matay, a mayannurot iti linteg nga inted kadakami ni Mosiah, ti maudi nga arimi; ken nabigbig daytoy babaen dagitoy a tao; ngarud nasken nga agtungpal dagitoy a tao iti linteg.

15 Ket napasamak a tiniliwda; ket ti naganna ket Nehor; ket insang-atda iti tuktok ti turod a Manti, ket nabilin sadiay, wenno bigbigenna, iti nagbaetan ti langit ken daga, a maisuppiat iti balikas ti Dios ti insurona kadagiti tattao; ket napasaranna sadiay ti nakababain nga ipapatay.

16 Nupay kasta, saan a daytoy ti nagpatinggaan ti panagsaknap ti panaginsasaserdote iti daga; agsipud ta adu ti nangipateg iti awan kaes-eskanna a banag iti lubong, ket intuloyda ti nangikasaba kadagiti ulbod a doktrina; ket inaramidda daytoy para iti kinabaknang ken dayaw.

17 Nupay kasta, saanda a naitured nga agulbod, no naammuan daytoy, gapu iti buteng iti linteg, gapu ta nadusa dagiti ulbod; ngarud nagpammarangda a nangasaba a mayannurot iti pammatida; ket ita awan ti bileg ti linteg iti asinoman a tao gapu iti pammatina.

18 Ket saanda naitured nga agtakaw, gapu iti butengda iti linteg, gapu ta madusa ti kasta; wenno saanda agtakaw, wenno mamapatay, gapu ta isu a namapatay nadusa iti patay.

19 Ngem napasamak a rinugian ti siasino man saan a kameng ti simbaan nga idadanes dagidiay kameng ti simbaan ti Dios, ken nangawat iti nagan ni Cristo.

20 Wen, indadanesda ida, ken pinarigatda ida iti amin a kita ti balikas, ket gapu daytoy iti kinapakumbabada; gapu ta saanda a napalangguad iti imatangda, ken gapu ta imburayda ti balikas ti Dios, iti tunggal maysa, nga awan ti kuarta ken awan ti gatadna.

21 Ita adda naiget a linteg kadagiti tattao ti simbaan, a nasken nga awan ti asino a tao, a kameng ti simbaan, a mangrugi a mangidadanes kadagidiay saan a kameng ti simbaan, kasta met nga awan ti panagidadanes iti tunggal maysa kadakuada.

22 Nupay kasta, adu kadakuada ti nagbalin a napalangguad, ken nangrugi a sibabara a nakisuppiat kadagiti kabusorda, agingga a nagdidinnanogda; wen, nagdidinnangran ti tunggal maysa babaen dagiti gemgemda.

23 Ita daytoy daydi maikadua a tawen ti panagturay ni Alma, ket daytoy ti gapuanan ti adu a rigat ti simbaan; wen, daytoy ti namunganayan ti adu a pannubok iti simbaan.

24 Agsipud ta adu ti timmangken ti panagpuspuso, ket napunas dagiti nagnagganda, isu a saanen a pulos a nalagip pay ida dagiti tattao ti Dios. Kasta met nga adu ti simmina kadakuada.

25 Ita dakkel a pannubok daytoy kadagidiay nagtalinaed iti pammati; nupay kasta, natibkerda ken saanda a maisin iti panangtungpalda kadagiti bilin ti Dios, ket siaanus a sinagrapda ti panangidadanes a naigabsuon kadakuada.

26 Ket no panawan dagiti saserdote ti trabahoda tapno ibingayda kadagiti tattao ti balikas ti Dios, panawan met dagiti tattao dagiti trabahoda tapno dumngegda iti balikas ti Dios. Ket idi naibingay dagiti saserdote ti balikas ti Dios kadakuada nagsublida amin manen a sireregta kadagiti trabahoda; ket ti saserdote, saanna nga ibilang ti bagina a nangatngato ngem kadagiti dumngeg kenkuana, agsipud ta saan a nalalaing ti mangaskasaba kadagiti dumdumngeg; ket ngarud agpapadada amin, ket nagtrabahoda amin, tunggal tao a mayannurot iti pigsana.

27 Ket imbingayda ti sanikuada, tunggal tao a maibatay iti adda kenkuana, iti napanglaw, ken iti agkasapulan, ken iti masakit, ken iti marigatan; ket saanda a nagaruat iti nangina a kawes, ngem nadalus ken makaay-ayoda.

28 Ket kasta ti panangbangonda kadagiti aramid ti simbaan; ket isu a nangrugida a naaddaan manen iti agtultuloy a kappia, iti laksid ti amin a pannakaidadanesda.

29 Ket ita, gapu iti kinatibker ti simbaan nangrugi ti napalaus a panagbaknangda, addaan ti kinawadwad iti amin a banag iti ania man a kasapulanda—kinawadwad ti arban ken pangenda, ken urbon ti nadumaduma a kita, kasta met ti kinawadwad ti bukbukel, ken balitok, ken pirakda, ken dagiti napapateg a banag, ken kinawadwad ti seda ken napino ti pannakaabelna a lino, ken amin a kita ti nasayaat a simple a lupot.

30 Ket iti kasta, iti narang-ay a kasasaadda, saanda pinapanaw ti asino man a lamulamo, wenno mabisin, wenno mawaw, wenno masakit, wenno ti saan pay a nataraken; ken insaadda ti puspusoda kadagiti kinabaknang; ngarud naparaburda iti amin, iti nataengan ken iti ubing, iti adipen ken iti nawaya, iti lalaki ken iti babai, iti ruar man ti simbaan wenno iti uneg ti simbaan, awan ti paboranda kadagiti tattao a kas kadagidiay agkasapulan.

31 Ket isu a rimmang-ayda ken nagbalinda a nabakbaknang nga amang ngem kadagiti saan a kameng ti simbaanda.

32 Ta pinanuynoyan dagiti saan a kameng ti simbaan ti bagbagida kadagiti panagan-anito, ken iti panagrukbab kadagiti didiosen wenno kinasadut, ken kadagiti tantanawtaw, ken kadagiti innapal ken panagririri; panagaruat iti nangina a kawes; napangato iti kinapalangguad iti panangkita ti bagbagida; panagidadanes, panagulbod, panagtakaw, panagarang, kadagiti kinabalangkantis nga aramid, ken panagpapatay, ken amin a kita ti kinadakes; nupay kasta, naipataw ti linteg kadagiti amin a naglabsing, agingga a mabalin.

33 Ket napasamak nga iti kasta a pannakaipatungpal ti linteg kadakuada, umawat iti dusa ti tunggal tao mayannurot ti ania man a naaramidna, nagbalinda a nataltalna, ket saanda naitured a nagaramid iti ania man a kinadakes no ammoda la koma; ngarud, nagpaut ti kappia kadagiti tattao ni Nephi agingga iti maikalima a tawen ti panagturay dagiti ukom.