1 Ita idi nagsisina da Ammon ken dagiti kabsatna kadagiti nagbedngan ti daga dagiti Lamanita, kitaen nagdaliasat ni Aaron nga agturong iti daga a ninaganan dagiti Lamanita iti Jerusalem, ninagananda daytoy manipud iti daga a nakayanakan dagiti ammada; ket adayo daytoy iti nagsasaupan dagiti beddeng ti Mormon.

2 Ita nangbangon dagiti Lamanita ken dagiti Amalekita ken dagiti tattao ni Amulon iti dakkel a siudad, a nanaganan iti Jerusalem.

3 Ita naan-anay ti panangpatangken dagiti Lamanita iti bagbagida, ngem natangtangken pay laeng dagiti Amalekita ken dagiti Amulonita; ngarud imbilinda kadagiti Lamanita a nasken a patangkenenda dagiti pusoda, a nasken a napigpigsada iti kinadangkes ken kadagiti kinarimonda.

4 Ket napasamak a dimteng ni Aaron iti siudad ti Jerusalem, ket immuna a kinasabaanna dagiti Amalekita. Ket rinugianna ti mangasaba kadakuada kadagiti sinagogada, agsipud ta nangbangonda iti sinagoga babaen ti orden dagiti Nehor; agsipud ta adu kadagiti Amalekita ken kadagiti Amulonita ti kameng iti orden dagiti Nehor.

5 Ngarud, bayat iti iseserrek ni Aaron iti maysa kadagiti sinagogada a mangakasaba kadagiti tattao, ken bayat iti panagsaona kadakuada, kitaen adda timmakder nga Amalekita ket rinugianna ti nangsuppiat kenkuana, a kinunana: Ania dayta pampaneknekam? Nakakitaka kadin iti anghel? Apay a saan nga agparang kadakami dagiti anghel? Kitaen saan kadi met a nasayaat dagitoy a tattao a kas kadagiti tattaom?

6 Kinunam pay, maungawkami malaksid no agbabawikami. Kasano ti pannakaammom ti pampanunot ken gagem ti puspusomi? Kasano ti pannakaammom nga adda ti gapuna nga agbabawi? Kasano ti pannakaammom a saankami a nalinteg a tao? Kitaen, nagbangonkami iti santuario, ket naguummongkami nga agdaydayaw iti Dios. Mamatikami nga isalakan ti Dios ti amin a tao.

7 Ita kinuna ni Aaron kenkuana: Mamatika kadi nga umayto ti Anak ti Dios a mangsubbot iti sangkataoan manipud iti basbasolda?

8 Ket kinuna ti lalaki kenkuana: Saanmi a patien nga adda ammom iti kasta a banag. Saanmi a patien dagitoy minamaag a kaugalian. Saankami a mamati nga adda ammom kadagiti banag a dumteng, wenno mamatikami nga ammo dagiti ammam ken dagiti ammami ti maipanggep kadagiti banag nga insaoda, iti dayta a dumtengto.

9 Ita rinugian ni Aaron a lukatan dagiti nasantuan a kasuratan iti sangoda iti maipanggep iti yaay ni Cristo, ken kasta met ti panagungar dagiti natay, ken awanto ti pannakasubbot para iti sangkataoan malaksid iti ipapatay ken panagsagaba ni Cristo, ken ti pannakasubbot ti darana.

10 Ket napasamak a kinapungtotda bayat a rinugianna nga ilawlawag kadakuada dagitoy a banag, ket rinugianda a laisen; ket saanda a denggen dagiti balikas nga insaona.

11 Ngarud, idi makitana a saanda a denggen dagiti balikasna, pimmanaw iti sinagogada, ket napan iti purok a managanan iti Ani-Anti, ket sadiay nakitana ni Muloki a mangikaskasaba iti balikas kadakuada; kasta met ni Ammah ken dagiti kabsatna. Ket nakisinnuppiatda iti adu maipanggep iti balikas.

12 Ket napasamak a nakitada a patangkenen dagiti tattao ti puspusoda, ngarud pimmanawda ket napanda iti daga ti Middoni. Ket inkasabada ti balikas iti adu, ket bassit ti namati kadagiti balikas nga insuroda.

13 Nupay kasta, natiliw ken naibalud ni Aaron ken ti sumagmamano a kakabsatna, ket naglibas ti nabati kadakuada iti daga ti Middoni kadagiti lugar iti aglawlaw.

14 Ket nagsagaba iti adu a bambanag dagiti naibalud, ket winayawayaan ida ti ima da Lamoni ken Ammon, ket napakan ken nabaduanda.

15 Ket napanda manen inwaragawag ti balikas, ket kasta ti pannakawayawayada iti pagbaludan iti umuna a gundaway; ket kasta a nagsagabada.

16 Ket napanda iti sadino man a nangiturongan kadakuada ti Espiritu ti Apo, a mangikasaba iti balikas ti Dios iti tunggal sinagoga dagiti Amalekita, wenno iti tunggal paguummongan dagiti Lamanita a pakaawatanda.

17 Ket napasamak a rinugian ti Apo a binendisionan ida, isu nga adu ti naiturongda iti pannakaammo iti kinapudno; wen, adu ti napapatida kadagiti basolda, ken kadagiti kaugalian dagiti ammada, a saan nga umno.

18 Ket napasamak a nagsubli manipud iti daga ti Maddoni da Ammon ken Lamoni iti daga ti Ismael, a tinawidda a daga.

19 Ket saan nga impalubos ni ari Lamoni nga agserbi kenkuana ni Ammon, wenno agbalin a katulonganna.

20 Ngem imbilinna nga adda koma sinagoga a mabangon iti daga ti Ismael; ken imbilinna a nasken nga aguummong nga agkaykaysa dagiti taona, wenno dagiti tattao nga iturayanna.

21 Ket nagrag-o kadakuada, ket adu a banag ti insurona kadakuada. Kasta met nga inwaragawagna kadakuada a taoda nga adda iti babaenna, ket nawayada a tattao, a nawayada manipud kadagiti panangirurumen ti ari, nga amana; agsipud ta impalubos kenkuana ti amana a mabalinna nga iturayan dagiti tattao nga adda iti daga ti Ismael, ken iti amin a daga iti aglawlaw.

22 Kasta met nga inwaragawagna kadakuada nga addaanda iti wayawaya nga agdaydayaw iti Apo a Diosda a mayannurot iti tarigagayda, iti sadino man a yanda, no adda da la ket iti daga a pagturayan ni ari Lamoni.

23 Ket nangasaba ni Ammon kadagiti tattao ni ari Lamoni; ket napasamak nga insurona kadakuada ti amin a banag a maipanggep kadagiti banag ti kinalinteg. Ket inaldaw a ginutugotna ida, iti amin a kinapasnek; ket ipangagda ti balikasna, ket naregtada a nangtungpal kadagiti bilin ti Dios.