1 Nao taem we Amon mo ol brata blong hem oli seperet oli go wanwan long ol boda long graon blong Ol Man blong Leman, luk Eron i tekem rod blong hem i go long graon ia we Ol Man blong Leman oli singaotem, Jerusalem; oli singaotem ples ia folem graon we ol papa blong olgeta oli bon long hem; mo hem i longwe i go, i joenem ol boda blong Momon.

2 Nao Ol Man blong Leman mo Ol Man blong Amalekae, mo ol pipol blong Amulon, oli bin bildim wan bigfala bigtaon, we oli singaotem Jerusalem.

3 Nao Ol Man blong Leman, olgeta bakegen, hat blong olgeta i kam strong finis, be Ol Man blong Amalekae mo Ol Man blong Amulon hat blong olgeta i kam moa strong nao; from hemia, oli mekem se Ol Man blong Leman oli mekem hat blong olgeta i kam strong, blong oli save kam strong long fasin nogud mo long ol rabis sin blong olgeta.

4 Mo i bin hapen se, Eron i bin kam long bigtaon blong Jerusalem, mo fas samting, i stat blong prij long Ol Man blong Amalekae. Mo hem i stat blong prij long olgeta long ol haos blong prea blong olgeta, from oli bildim ol haos blong prea folem oda blong Ol Nehor; from plante long Ol Man blong Amalekae mo Ol Man blong Amulon oli bin folem oda blong ol Nehor.

5 From hemia, taem we Eron i go insaed long wan blong ol haos blong prea blong olgeta blong prij long ol pipol, mo taem we hem i stap toktok long olgeta, luk wan long Ol Man blong Amalekae i bin girap, mo i stat blong rao wetem hem, i talem: “?Wanem ia we yu stap testifae long hem? ?Yu, yu bin luk wan enjel? ?From wanem ol enjel oli no kamaot long mifala? ?Luk ol pipol ia oli nogud semmak olsem ol pipol blong yu?

6 Yu talem tu se, sapos mifala i no sakem sin, bae mifala i ded. ?Olsem wanem nao yu save tingting mo ol samting we hat blong mifala i wantem blong mekem? ?Olsem wanem nao yu save se mifala i gat nid blong sakem sin? ?Olsem wanem nao yu save se mifala i no wan stret mo gud pipol? Luk, mifala i bin bildim ol ples blong wosip, mo mifala i kam tugeta blong wosipim God. Mifala i biliv se God bae i sevem evri man.”

7 Nao Eron i talem long hem: “?Yu biliv se Pikinini blong God bae i kam blong pemaot evri man long ol sin blong olgeta?”

8 Mo man ia i talem long hem: “Mifala i no biliv se yu save eni samting olsem. Mifala i no biliv long ol krangke kastom ia. Mifala i no biliv se yu save ol samting we bae oli kam, mo tu, mifala i no biliv se ol papa blong yu, mo tu, ol papa blong mifala oli bin save long saed blong ol samting we oli bin tokbaot, long saed blong samting we bae i kam yet.”

9 Nao Eron i stat blong openem ol skripja long olgeta long saed blong taem we Kraes bae i kam, mo tu, long saed blong laef bakegen long ded blong ol dedman, mo se bae i no gat fasin ia blong pemaot man, sapos i no kam tru long ded mo ol safaring blong Kraes, mo atonmen blong blad blong hem.

10 Mo i bin hapen se, taem we hem i stat blong eksplenem ol samting ia long olgeta, oli kros long hem, mo oli stat blong jikim hem; mo oli no wantem harem ol toktok we hem i stap talemaot.

11 From hemia, taem we hem i luk se oli no wantem harem ol toktok blong hem, hem i aot long haos blong prea blong olgeta, mo i go long wan vilej we oli singaotem Anae-Antae. Mo long ples ia hem i faenem Myulakae i stap prijim trutok long olgeta; wetem Ama mo ol brata blong hem tu. Mo oli toktok raon wetem plante long saed blong trutok.

12 Mo i bin hapen se, oli luk se ol pipol bae oli mekem hat blong olgeta i kam strong, from hemia, oli aot mo go long graon blong Midonae. Mo oli prijim toktok long plante, mo smol nomo i bilivim ol toktok we oli tijim.

13 Be, Eron mo samfala brata blong hem, ol pipol blong Midonae oli tekem olgeta mo sakem olgeta i go long kalabus, mo smol haf blong olgeta we i bin stap i ronwe long graon blong Midonae, oli go long ol eria raonabaot.

14 Mo olgeta we oli sakem olgeta i go long kalabus, oli safa long plante samting, mo oli go fri tru long han blong Lamonae mo Amon, mo oli givim kaekae mo klos long olgeta.

15 Mo oli go aot bakegen blong talemaot trutok, mo olsem ia nao oli kamaot long kalabus blong fas taem; mo olsem ia nao oli bin safa.

16 Mo oli bin go aot long eni ples we Spirit blong Lod i lidim olgeta blong oli go long hem, oli prijim toktok blong God long evri haos blong prea blong Ol Man blong Amalekae, o long evri miting blong Ol Man blong Leman we i save akseptem olgeta blong go insaed.

17 Mo i bin hapen se, Lod i stat blong blesem olgeta, inaf blong mekem se oli karem plante oli kam kasem save blong trutok; yes, oli helpem plante blong luksave ol sin blong olgeta mo ol kastom blong ol papa blong olgeta, we oli no stret.

18 Mo i bin hapen se, Amon mo Lamonae i lego graon blong Midonae mo oli gobak long graon blong Ismael, we i graon blong olgeta we i kam long ol papa blong olgeta.

19 Mo king Lamonae i no wantem letem Amon blong wok blong hem, o kam wokman blong hem.

20 Be hem i mekem se oli mas bildim ol haos blong prea long graon blong Ismael; mo hem i mekem ol man blong hem, o ol pipol we hem i rulum olgeta, blong oli kam tugeta.

21 Mo king i bin glad from olgeta, mo hem i tijim olgeta plante samting. Mo tu, hem i talemaot long olgeta se oli wan pipol we hem i rulum olgeta, se oli wan fri pipol, se oli fri long ol nogud fasin blong king, papa blong hem; from se papa blong hem i letem hem blong save rul ova long ol pipol ia we oli stap long graon blong Ismael, mo long ol graon we oli stap raonabaot.

22 Mo tu, hem i talemaot long olgeta se oli save jusum blong wosipim Lod, God blong olgeta folem tingting blong olgeta, long eni ples we oli stap long hem, sapos i wan graon we king Lamonae i rul long hem.

23 Mo Amon i prij long ol man blong king Lamonae; mo i bin hapen se, hem i tijim olgeta evri samting long saed blong stret mo gud fasin. Mo hem i leftemap tingting blong olgeta evri dei, wetem fasin ia blong wok strong oltaem; mo oli folem gud ol toktok blong hem, mo ol pipol oli gat strong tingting blong obei ol komanmen blong God.