1 Kiiō, ke Ammōn eaar āindein katakin armej ro an Lamonai im jab jem̧ļo̧k, jenaaj ro̧o̧lļo̧k n̄an bwebwenato eo kōn Aron im ļōm̧aro jein im jatin; bwe ālikin an kar ilo̧k jān āneen Middonai kar tōlļo̧ke n̄an āneen Nipai, em̧ool n̄an m̧weo im̧ōn kiin̄ eo eaar ioon aolepān āneo ijello̧kun wōt āneen Ishmael; im eaar jemān Lamonai.

2 Im ālikin men kein eaar deļo̧n̄ļo̧k n̄an e ilo m̧weo im̧ōn kiin̄ eo, ippān ļōm̧aro jein im jatin, im bun̄badik im̧aan kiin̄ eo im ba n̄an e: Lo, O kiin̄, kōmij ļōm̧aro jein im jatin Ammōn, eo kwaar kōtļo̧ke jān kalbuuj.

3 Im kiiō, O kiin̄, eļan̄n̄e kwōnaaj dāpij mour kein am, kōm naaj am̧ rijerbal. Im kiin̄ eo eba n̄an er: Kom̧in jerkak, bwe inaaj lewōj mour ko ami, im ijjamin kōtļo̧k bwe kom̧in ro aō rijerbal; a inaaj akweļap bwe kom̧in jipan̄ eō; bwe epok ļōmņak eo aō kōnke jouj im ļap eo an naan ko an ļeo jeiūm̧i Ammōn; im ikōņaan jeļā unin etke eaar jab wanlōn̄tak jān Middonai ippemi.

4 Im Aron eba n̄an kiin̄ eo: Lo, Jetōb eo an Irooj eaar kūr e ilo bar juon iaļ; eaar ilo̧k n̄an āneen Ishmael, n̄an katakin armej ro an Lamonai.

5 Kiiō kiin̄ eo eba n̄an er: Ta in kom̧ eaar ba kōn Jetōb eo an Irooj? Lo, en̄in men eo ej kainepataik eō.

6 Im barāinwōt, ta in men eo Ammōn eaar ba—Eļan̄n̄e kwōnaaj ukeļo̧k kwōnaaj mour, im eļan̄n̄e kwōj jamin ukeļo̧k, naaj joļo̧k eok ilo raan eo āliktata?

7 Im Aron eaar uwaake im ba n̄an e: Kwōj tōmak ke bwe ewōr juon Anij? Im kiin̄ eo eaar ba: Ijeļā bwe riAmalekai ro rej ba bwe ewōr juon Anij, im iaar kōmaron̄ er n̄an kalōki im̧ōn jar ko, bwe ren maron̄ kuktok ippān doon n̄an kabun̄-jar n̄an e. Im kiiō kwōj ba ewōr juon Anij, lo inaaj tōmak.

8 Im kiiō ke Aron eaar ron̄ men in, būruōn eaar jino m̧ōņōņō, im eba: Lo, lukkuun āinwōt am̧ mour, O kiin̄, ewōr juon Anij.

9 Im kiin̄ eo eba: Anij ej ke Jetōb Eļap eo eaar bōktok ro jemād jān āneen Jerusalem?

10 Im Aron eba n̄an e: Aaet, E ej Jetōb Eļap in, im Eaar kōm̧anm̧an men ko otemjeļo̧k jim̧or ilo lan̄ im ilo laļ. Kwōj tōmak ke men in?

11 Im eba: Aaet, ij tōmak bwe Jetōb Eļap in eaar kōm̧anm̧an men ko otemjeļo̧k, im ikōņaan bwe kwōn jiron̄ eō kōn aolep men kein, im inaaj tōmak naan ko am̧.

12 Im ālikin men kein ke Aron eaar lo bwe kiin̄ eo enaaj kar tōmak naan ko an, eaar jino jān kōm̧anm̧ane Adam, kōnono jān jeje ko rekwōjarjar n̄an kiin̄ eo—ekōjkan Anij Eaar kōm̧anm̧an armej ilo nemāmeen wōt E, im bwe Anij eaar leļo̧k n̄an armej kien ko, im bwe kōnke jero̧wiwi, armej eaar wōtlo̧k.

13 Im Aron eaar tipdiki n̄an e jeje ko rekwōjarjar jān kōm̧anm̧ane Adam, erļo̧ke wōtlo̧k an armej im̧aan mejān, im jekjekier ilo kanniōk im barāinwōt karōk in lo̧mo̧o̧r, eo kar kōpooje jān pedped ko an laļ, kōn Kraist, n̄an aolep jabdewōt enaaj tōmak ioon Etan.

14 Im kōnke armej eaar wōtlo̧k eaar jamin maron̄ kōn emake jolōt, a en̄taan ko im mej an Kraist ej pinmuur kōn jero̧wiwi ko aer, kōn tōmak im ukeļo̧k, im men ko uwaanļo̧k wōt; im bwe E ej mejaļ to ko an mej, bwe lōb en jamin wōr an anjo̧, im bwe metak an mej ren wōran̄ļo̧k ilo kōjatdikdik ko an wōj; im Aron eaar tipdiki aolep men kein n̄an kiin̄ eo.

15 Im ālikin men kein ke em̧ōj an Aron kar tipdiki men kein n̄an e, kiin̄ eo eba: Ta inaaj kōm̧m̧ane bwe in maron̄ bōk mour indeeo in eo kwaar kōnono kake? Aaet, ta inaaj kōm̧m̧ane bwe in maron̄ ļotak ilo Anij, im loļo̧k jetōb nana in ekōlibaakļo̧k ilo ānbwinnū, im bōk Jetōb eo An, bwe in maron̄ obrak kōn lan̄lōn̄, bwe maron̄ in jamin joļo̧k eō ilo raan eo āliktata? Lo, eba, inaaj juļo̧k aolep m̧weiuk ko aō, aaet, inaaj eļļo̧k jān aelōn̄ in kiin̄ eo aō, bwe in maron̄ bōk lan̄lōn̄ in eļap.

16 A Aron eba n̄an e: Eļan̄n̄e kwōj kōņaan men in, eļan̄n̄e kwōnaaj bun̄ badik im̧aan Anij, aaet, eļan̄n̄e kwōnaaj ukeļo̧k jān aolep jero̧wiwi ko am̧, im naaj bun̄ badik im̧aan Anij, im kūr ioon Etan ilo tōmak, im tōmak bwe kwōnaaj bōk, innām kwōnaaj bōk kōjatdikdik eo kwōj kōņaan.

17 Im ālikin men kein ke Aron eaar ba naan kein, kiin̄ eo eaar bun̄ badik im̧aan Irooj, ioon bukien; aaet, em̧ool eaar erļo̧kleplep ioon laļ, im kar kūr ilo kajoor, im ba:

18 O Anij, Aron eaar jiron̄ eō bwe ewōr Anij; im eļan̄n̄e ewōr Anij, im eļan̄n̄e kwe kwōj Anij, kwōj kwaļo̧k Eok n̄an eō, im inaaj juļo̧k aolep jero̧wiwi ko aō n̄an jeļā Kwe, im bwe imaron̄ jerkak jān ro remej, im mour ilo raan eo āliktata. Im kiiō ke kiin̄ eo eaar ba naan kein, kar jebōke āinwōt n̄e eaar mej.

19 Im ālikin men kein eo rikarejeran eaar ettōr im ba n̄an lerooj eo aolep men ko raar waļo̧k n̄an kiin̄ eo. Im lio eaar itok n̄an ippān kiin̄ eo; im ke lio eaar lo ej babu āinwōt n̄e eaar mej, im barāinwōt Aron im ļōm̧aro jein im jatin rej jutak āinwōt n̄e er ro raar unin an wōtlo̧k, lio eaar illu ippāer, im jiron̄ bwe ro rikarejeran, ak ro rikarejeran kiin̄ eo, ren bōk er im m̧an er.

20 Kiiō ro rikarejeran raar lo unin wōtlo̧k eo an kiin̄ eo, kōn menin raar mijak in likūt peier ioon Aron im ļōm̧aro jein im jatin; im raar akweļap ippān lerooj eo im ba: Etke kwōj jiron̄ kōm bwe kōmin m̧an ļōm̧arein, bwe lo juon iaer ekajoorļo̧k jān aolep kōj? Kōn menin kōm naaj wōtlo̧k im̧aer.

21 Kiiō ke lerooj eo eaar lōļn̄o̧n̄ eo an ro rikarejeran lio eaar barāinwōt jino lōļn̄o̧n̄ otem lōļn̄o̧n̄, n̄e ab itok jet nana ioon e. Im lio eaar jiron̄ ro rikarejeran bwe ren ilo̧k im kūrtok armej ro, bwe ren maron̄ m̧an Aron im ļōm̧aro jein im jatin.

22 Kiiō ke Aron eaar kōttōpar eo an lerooj eo, e, barāinwōt kōnke eaar jeļā pen in būruōn armej ro, eaar ekkōl n̄e jarlepju eo enaaj kuktok ippān doon, im enaaj wōr juon aitwerōk eļap im juon poktak ilubwiljier; kōn menin eaar erļo̧ke pein im kōjerkak kiin̄ eo jān laļ, im eaar ba n̄an e: Jutak. Im eaar jutak ioon neen, im kar bōk an kajoor.

23 Kiiō men in eaar kōm̧m̧an im̧aan mejān lerooj eo im elōn̄ iaan ro rikarejeran. Im ke raar lo e raar kanooj bwilōn̄, im jino lōļn̄o̧n̄. Im kiin̄ eo eaar jutakļo̧k, im kar jino jipan̄ er. Im eaar jipan̄ er, jon̄an aolepān m̧weo im̧ōn raar oktak n̄an Irooj.

24 Kiiō eaar wōr juon jarlepju kar kuktok kōnke naan in jiron̄ an lerooj eo, im eaar jino ļap alin̄ūrn̄ūr ilubwiljier kōn Aron im ļōm̧aro jein im jatin.

25 A kiin̄ eo eaar jutakļo̧k ilubwiljier im jipan̄ er. Im raar aenōm̧m̧an kōn Aron im ro raar ippān.

26 Im ālikin men kein ke kiin̄ eo eaar lo bwe armej ro raar aenōm̧m̧an, eaar kōm̧m̧an bwe Aron im ļōm̧aro jein im jatin ren jutakļo̧k ilo ioļapān jarlepju eo, im bwe ren kwaļo̧k naan n̄an er.

27 Im ālikin men kein kiin̄ eo eaar jilkinļo̧k juon kean̄ iaolepān āneo, ilubwiljin aolep armej ro an ro raar pād iaolepān āneo, ro raar pād ijoko ipeļaakin, ko raar tōrerein ko em̧ool n̄an lo̧jet, ilo rear im ilo rilik, im eo eaar ajej jān āneen Zaraemla kōn juon āne jem̧aden eaidik, eo eaar ettōr jān lo̧jet irear em̧ool n̄an lo̧jet irilik, im jepooļe tōrerein ko an parijet, im tōrerein ko an āne jem̧aden eo eaar pād ituiōn̄ iturin āneen Zaraemla, deblo̧ke tōrerein ko an Mantai, iturin bōran reba Sidon, im ettōr jān rear n̄an rilik—im āindein riLeman ro im riNipai ro raar ajej.

28 Kiiō, m̧ōttan eo ejowanļo̧k in riLeman ro eaar jokwe ilo āne jem̧aden eo, im raar jokwe ilo em̧ kōppād ko; im raar ejjeplōklōk iaolepān āne jem̧aden eo irilik, ilo āneen Nipai; aaet, im barāinwōt irilikin āneen Zaraemla, im ilo tōrerein ko iturin parijet in lo̧jet, im irilikin āneen Nipai, ilo jikin jolōt eo an ro jemāer m̧oktata, im āindein jepelļo̧k itōrereinļo̧k parijet eo.

29 Im barāinwōt eaar wōr elōn̄ riLeman ro irear iturin parijet in lo̧jet, ijo riNipai ro raar lukwarkwar er n̄an e. Im āindein riNipai ro renan̄in kar jepooļ kōn riLeman ro; mekarta riNipai ro raar bōk aolepān āneo ilo m̧ōttan ko iōn̄ in āneo itōrerein āne jem̧aden eo, ijo bōran reba Sidon, jān rear n̄an rilik, ijoko ipeļaakin āne jem̧aden eo; ijo iōn̄, em̧ool m̧ae aer kar itok n̄an āneo raar ņa etan Bun̄-pāļo̧k.

30 Im eaar itaak ippān āneo raar ņa etan Āneen Mej, kōnke di ko dier kōm ar kōnono, eo armej in Zaraemla raar loe, kōnke eaar jikin eo raar jikrōkļo̧k.

31 Im raar itok jān ijo lōn̄ļo̧k n̄an āne jem̧aden eo iturōk. Āindein āneo ituiōn̄ kar ņa etan Āneen Mej, im āneo iturōk kar ņa etan Bun̄-pāļo̧k, kōnke eaar āne jem̧aden eo eaar obrak kōn mennin mour ko rawiia otemjeļo̧k, eo m̧ōttan eaar itok jān āneo ituiōn̄ kōn m̧ōn̄ā.

32 Im kiiō, eaar ettoļo̧k in wōt juon raan im jimattan ito-itak n̄an juon riNipai, ioon lain eo Bun̄-pāļo̧k im āneo Āneen Mej, jān rear n̄an lo̧jet irilik; im āindein āneen Nipai im āneen Zaraemla renan̄in kar jepooļ kōn dān, kōnke eaar wōr juon jidik in āne ikōtaan āneo ituiōn̄ im āneo iturōk.

33 Im ālikin men kein riNipai ro raar pād ilo āne Bun̄-pāļo̧k, em̧ool jān rear n̄an lo̧jet irilik, im āindein riNipai eo ilo jeļāļo̧kjeņ eo aer, kōn ribaar ro aer im jarin tariņae ko aer, raar kapooļ riLeman ro n̄an rak, bwe ren jab bōk jabdewōt ilo iōn̄, bwe ren maron̄ jab kobrak āneo ituiōn̄.

34 Kōn menin riLeman ro eaar jab ļapļo̧k jikier ilo wōt āneen Nipai, im āne jem̧aden eo ipeļaakin ijo. Kiiō men in eaar jeļāļo̧kjeņ ilo riNipai ro—kōnke riLeman ro raar rikōjdat n̄an er, raar jab kōtļo̧k kaen̄taan ko aer ianmiin̄ im ianbwijmaron̄, im barāinwōt bwe ren maron̄ wōr juon laļ ijo remaron̄ ko n̄an e, ekkar n̄an kōņaan ko aer.

35 Im kiiō n̄a, ālikin aō ba men in, ij bar ro̧o̧l n̄an bwebwenato in Ammōn im Aron, Omner im Himnai, im ļōm̧aro jeir im jatier.