1 Ut anajwan, a’in li raatin laj Ammon reheb’ lix komon, li naxye chi jo’ka’in: Ex was wiitz’in ut ex inkomon, k’ehomaq reetal ninye eere, k’a’jo’ naq wan rajb’al naq taasaho’q qach’ool; xb’aan naq ma kiru tab’i’ kiqak’oxla naq koo’el chaq sa’ li ch’och’ Tzarahemla naq li Dios tixk’e chaq qe xninqal li osob’tesink a’in?

2 Ut anajwan, ninpatz’, k’a’ru li ninqi osob’tesink kixk’e sa’ qab’een? Ma naru nekeye?

3 K’ehomaq reetal, tinchaq’oq choq’ eere, xb’aan naq eb’ li qas qiitz’in aj Lamanita ke’wan chaq sa’ q’ojyin, relik chi yaal, toj sa’ li jul q’axal q’ojyin xsa’, a’b’an k’ehomaq reetal jo’ k’ihaleb’ li k’amb’ileb’ chirilb’al lix sachb’a-ch’oolejil saqen li Dios! A’in ut li osob’tesink li k’eeb’il sa’ qab’een, naq oksinb’ilo choq’ k’anjeleb’aal sa’ ruq’ li Dios re xk’eeb’al chi uxmank li nimla k’anjel a’in.

4 K’ehomaq reetal, eb’ a’an chi mil neke’saho’ sa’ xch’ool, ut k’amb’ileb’ sa’ xkorral li Dios.

5 K’ehomaq reetal, q’an ru naq kiwan li awimq, ut osob’tesinb’ilex, xb’aan naq kech’ik lee setleb’ ch’iich’, ut kexq’olok rik’in xnimal lee metz’ew, relik chi yaal, chiru chixjunil li kutan kexk’anjelak; ut k’ehomaq reetal li rajlankil lee q’olom! Ut eb’ a’an te’xoke’q sa’ li xokleb’aal re naq ink’a’ te’sachq.

6 Relik chi yaal, moko te’rume’q ta xb’aan li kaq-sut-iq’ sa’ roso’jik li kutan; relik chi yaal, chi moko t’anlenb’ilaqeb’ xb’aaneb’ li sut iq’; naq taachalq b’an li kaq-sut-iq’ xokb’ilaqeb’ sa’ junajil sa’ xna’ajeb’, re naq ink’a’ taaruuq taa’ok li kaq-sut-iq’ rik’ineb’; relik chi yaal, chi moko te’tiikisiiq xb’aaneb’ li kawil iq’ a’ yaal b’ar naraj xk’amb’aleb’ laj xik’ ilonel.

7 K’ehomaq b’an reetal, wankeb’ sa’ ruq’ li Qaawa’ re li q’olom, ut eechaninb’ileb’ xb’aan; ut a’an tixwaklesiheb’ sa’ roso’jik li kutan.

8 Usilanb’ilaq taxaq xk’ab’a’ li qaDios; choob’ichanq re xnimankil ru, relik chi yaal, choob’antioxinq re lix santil k’ab’a’, xb’aan naq a’an naxk’anjela li tiikilal chi junelik.

9 Xb’aan naq wi ta ink’a’ xootaqe’ chaq sa’ li ch’och’ Tzarahemla, eb’ li qas qiitz’in a’in q’axal raarookeb’ qab’aan, li q’axal koohe’xra ajwi’ laa’o, toj yot’b’ilaqeb’ raj rik’in xik’b’al qilb’al, relik chi yaal, ut ink’a’ ajwi’ raj ke’xnaw ru li Dios.

10 Ut kik’ulman naq chirix naq laj Ammon kixye li aatin a’in, laj Aaron li ras kixch’iila, ut kixye: At Ammon, ninxuwa naq k’amb’ilat xb’aan xsahil aach’ool chixnimankil aawib’.

11 A’b’an laj Ammon kixye re: Moko ninnima ta wib’ rik’in inmetz’ew laa’in, chi moko rik’in xchaab’ilal inna’leb’; a’b’anan k’ehomaq reetal, numtajenaq xsahil inch’ool, relik chi yal, lin ch’ool nujenaq rik’in xsahil, ut taasaho’q inch’ool rik’in inDios.

12 Relik chi yaal, ninnaw naq laa’in maak’a’ nin’ok wi’; chirix inmetz’ew, q’unin; jo’kan naq moko injunes ta tinnima wib’; tinnima b’an wib’ rik’in lin Dios, xb’aan naq sa’ xmetz’ew a’an tinruuq chixb’aanunkil chixjunil li k’a’aq re ru; relik chi yaal, k’ehomaq reetal, k’iila xninqal ru sachb’a-ch’oolej kiqak’anjela sa’ li ch’och’ a’in, li taqanima wi’ ru lix k’ab’a’ chi junelik.

13 K’ehomaq reetal jo’ k’ihal chi mil reheb’ li qas qiitz’in kirach’ab’ chaq chiru xrahil xb’alb’a; ut k’amb’ileb’ chixb’ichankil li rahok li natojok ix, ut a’in xb’aan lix wankilal li raatin li wan qik’in, jo’kan ut, ma ink’a’ tab’i’ wan nimla ajom naq taasaho’q qach’ool?

14 Relik chi yaal, wan ajom naq taqanima ru chi junelik, xb’aan naq a’an li Dios Q’axal Taqenaq, ut xrach’ab’eb’ li qas qiitz’in chiru lix b’ak’leb’ ch’iich’ li xb’alb’a.

15 Relik chi yaal, sutsuukeb’ chaq rik’in q’ojyin ut sache’k, li junelik wan; a’b’an k’ehomaq reetal, a’an kixk’ameb’ sa’ lix saqen li junelik taakanaaq, relik chi yaal, sa’ li kolb’a-ib’ junelik taakanaaq; ut sutsuukeb’ xb’aan xnaab’alil lix rahom li maak’a’ xjuntaq’eetankil; relik chi yaal, ut wanjenaqo choq’ k’anjeleb’aal sa’ ruq’ a’an re xb’aanunkil li xnimal ru ut sachb’a-ch’oolejil k’anjel a’in.

16 Jo’kan ut, chiqanimahaq qaloq’al, relik chi yaal, taqanima qaloq’al rik’in li Qaawa’; relik chi yaal, taasaho’q qach’ool, xb’aan naq numtajenaq xsahil qach’ool; relik chi yaal, taqanima ru li qaDios chi junelik. K’ehomaq reetal, ani tab’i’ taaruuq chixnimankil xloq’al rik’in li Qaawa’ toj reetal naq ink’a’ chik na’ajman? Relik chi yaal, ani tab’i’ taaruuq chixyeeb’al chi numtajenaq resil lix nimal ru xwankil, ut resil li ruxtaan, ut resil xnajtil li royb’enihom choq’ reheb’ li ralal xk’ajoleb’ li winq? K’ehomaq reetal, ninye eere, moko naru ta ninye yal ta jun miin raqal li naweek’a.

17 Ani raj kiru chi k’oxlank re naq li qaDios kiwan ta xnimal ruxtaan re raj qaxokb’al chaq chiru li xuwajelil, li maak ut li tz’ajnil koowan wi’ chaq?

18 K’ehomaq reetal, koxoo’elq toj rik’in josq’il, rik’in xyeechi’inkil ninqi rahilal re xsachb’al lix iglees.

19 Jo’kan ut, k’a’ put naq ink’a’ kooxq’axtesi chiru jun li xuwajel sache’k, relik chi yaal, k’a’ut naq ink’a’ kixkanab’ li yok’leb’ ch’iich’ re lix raqb’a-aatin chi t’ane’k sa’ qab’een, ut chixsachb’al li qayo’onihom chi junelik?

20 Aay, li waam chanchan naq na’eelelik rik’in xk’oxlankil. K’ehomaq reetal, moko kixk’anjela ta lix raqb’a-aatin sa’ qab’een; rik’in b’an xnimal li ruxtaan kooxnumsi chixb’een li jul a’an li junelik taawanq re kamk ut rahilal, toj sa’ lix kolb’al li qaam.

21 Ut anajwan k’ehomaq reetal, ex was wiitz’in, k’a’ru chi ruchich’och’il winq wan li nanawok re li k’a’aq re ru a’in? Ninye eere, maajun wan li nanawok re li k’a’aq re ru a’in, ka’ajwi’ li yot’b’il xch’ool.

22 Relik chi yaal, li ani naxjal xk’a’uxl ut naxk’anjela li paab’aal, ut na’uuchin rik’in chaab’il k’anjel ut junelik natijok chi ink’a’ naxkanab’—re xkomon a’an k’eeb’il xnawb’al lix muqmuukil na’leb’ li Dios; relik chi yaal, re xkomon a’an k’eeb’ilaq xk’utb’esinkil li k’a’aq re ru maajun wa k’utb’esinb’il; relik chi yaal, ut k’eeb’ilaq re xkomon a’an xk’amb’al li aamej chi mileb’ sa’ li jalb’a-k’a’uxlej, jo’ chanru ajwi’ xk’ehe’ qe laa’o xk’amb’aleb’ li qas qiitz’in a’in sa’ li jalb’a-k’a’uxlej.

23 Anajwan ma jultik eere, ex was wiitz’in, naq kiqaye reheb’ li qas qiitz’in sa’ li ch’och’ Tzarahemla, xik qe taqe’q sa’ li ch’och’ Nefi, re jultikank aatin chiruheb’ li qas qiitz’in aj Lamanita, ut koohe’xse’e?

24 Xb’aan naq ke’xye qe: Ma nekek’oxla tab’i’ naq texruuq chixk’amb’aleb’ laj Lamanita chixnawb’al li yaal? Ma nekek’oxla tab’i’ naq texruuq chixq’unb’esinkileb’ xch’ool laj Lamanita chirix naq moko yaal ta li na’leb’ kanab’anb’il chaq xb’aaneb’ lix yuwa’eb’, naq a’aneb’ jun tenamit jipeb’ tz’aqal xch’ooleb’; li neke’saho’ raameb’ rik’in xhoyb’al li kik’; li numsinb’ileb’ xkutan rik’in li maa’usilal q’axal nim; ut lix b’eheb’, a’an xb’ehil aj q’etol aatin chalen chaq sa’ xtiklajik? Anajwan ex was wiitz’in, jultik eere naq jo’ka’in chaq li raatineb’.

25 Ut jo’kan ajwi’ ke’xye: Chiqachap qak’anjeleb’aal re pleet chiruheb’, re taqasacheb’ chaq rochb’een lix maa’usilaleb’ sa’ li ch’och’, maare anchal tole’numtaaq sa’ qab’een ut toohe’xsach.

26 A’b’anan k’ehomaq reetal, ex was wiitz’in raarookex inb’aan, koochal sa’ li yamyookil ch’och’ moko re ta xsachb’aleb’ li qas qiitz’in, re b’an naq maare tooruhanq chixkolb’al junjunq reheb’ li raam.

27 Anajwan naq luktajenaq li qach’ool, ut naq ok raj qe chi sutq’iik, k’ehomaq reetal, li Qaawa’ kixk’ojob’ qach’ool ut kixye: Ayuqex sa’ xyanqeb’ lee ras eeriitz’in aj Lamanita, ut numsihomaq rik’in kuyuk lee ch’a’ajkilal, ut laa’in texink’e chi usaak.

28 Ut anajwan k’ehomaq reetal, koochal, ut koowulak sa’ xyanqeb’; ut kiwan qakuyum sa’ li rahilal kiqak’ul, ut kiqanumsi li k’iila paay xtoq’ob’al li qu; relik chi yaal, ut koowulak sa’ li junjunq chi ochoch, ut kiqakanab’ qib’ chiru li ruxtaan li ruchich’och’—moko ka’aj ta wi’ chiru ruxtaan li ruchich’och’, chiru aj b’an wi’ li ruxtaan li Dios.

29 Ut koo’ok sa’ rochocheb’ ut kiqatzoleb’, ut kiqatzoleb’ sa’eb’ lix b’e; relik chi yaal, ut kiqatzoleb’ chiruheb’ lix tzuul; ut koo’ok ajwi’ sa’ lix santil ochocheb’ ut lix ch’utleb’aaleb’ ut kiqatzoleb’; ut koo’isiik chaq, ut koo’eetz’uuk, ut koochuub’aak, ut koosak’e’ chixk’atq li qe; ut kookute’ chi pek, ut kook’ame’ ut koob’ak’e’ rik’in kawil k’aam, ut kootz’ape’ sa’ tz’alam; ut rik’in xwankil ut xchaab’ilal xna’leb’ li Dios kookole’ wi’chik.

30 Ut kiqanumsi li k’iila paay chi ch’a’ajkilal, ut chixjunil a’in, re naq maare toowanq choq’ k’anjeleb’aal re xkolb’al junaq aamej; ut kiqak’oxla naq numtajenaqaq xsahil qach’ool wi taawanq anihaq tooruuq tana’ chi k’anjelak re xkolb’al.

31 Anajwan k’ehomaq reetal, naru noko’ilok ut naqil li x’uuchin wi’ li qak’anjel; ut ma ka’ch’in rajlankileb’? Ninye eere, Ink’a’, k’iheb’ b’an; relik chi yaal, ut naru naqak’e reetal lix anchalileb’ xch’ool, xb’aan lix rahomeb’ choq’ reheb’ li ras riitz’ineb’ ut choq’ qe ajwi’ laa’o.

32 Xb’aan naq k’ehomaq reetal, q’axal wi’chik te’raj xmayejankil lix yu’ameb’ chiru risinkil xyu’am li xik’ na’ilok reheb’; ut ke’xmuq lix k’anjeleb’aal re pleet sa’ xchamal li ch’och’, xb’aan xrahomeb’ choq’ reheb’ li ras riitz’ineb’.

33 Ut anajwan k’ehomaq reetal ninye eere, ma wanjenaq tab’i’ xkomon xnimal li rahok a’in sa’ chixjunil li ch’och’? K’ehomaq reetal, ninye eere, Ink’a’, moko wanjenaq ta, chi moko sa’ xyanqeb’ ta laj Nefita.

34 Xb’aan naq k’ehomaq reetal, eb’ a’an te’xchap li k’anjeleb’aal re pleet chiruheb’ li ras riitz’ineb’; moko te’xkanab’ ta rib’ chi kamsiik. A’b’anan k’ehomaq reetal jo’ k’ihaleb’ a’in ke’xq’axtesi xyu’ameb’; ut naqanaw naq xikenaqeb’ rik’in lix Dios, xb’aan lix rahomeb’ ut xb’aan naq xik’ neke’ril li maak.

35 Anajwan ma maak’a’ tab’i’ rajb’al naq taasaho’q qach’ool? Relik chi yaal, ninye eere, maajun wa wanjenaqeb’ li winq li wan xnimal rajb’al re te’saho’q xch’ool jo’ laa’o, chalen chaq naq kitikla li ruchich’och’; relik chi yaal, ut numtajenaq xsahil inch’ool, toj reetal ninnima wib’ rik’in lin Dios; xb’aan naq a’an wan rik’in chixjunil li wankilal, chixjunil li chaab’il na’leb’, ut chixjunil li na’leb’ank; a’an naxtaw xyaalal chixjunil li k’a’aq re ru, ut a’an jun Dios aj uxtaan, toj sa’ li kolb’a-ib’, choq’ reheb’ li te’xjal xk’a’uxl ut te’paab’anq re lix k’ab’a’.

36 Anajwan wi nimank-ib’ a’in, tinnima ajwi’ wib’; xb’aan naq a’in lin yu’am ut lin saqen, xsahil lin ch’ool ut lin kolb’al, ut li tojb’il wi’ wix chiru li rahilal li junelik taawanq. Relik chi yaal, osob’tesinb’il xk’ab’a’ lin Dios, li xk’oxlank re li tenamit a’in, a’an jun ruq’ lix toon che’ re Israel, ut sachenaq chaq chiru xtoonal sa’ jun jalanil ch’och’; relik chi yaal, ninye, osob’tesinb’ilaq taxaq xk’ab’a’ lin Dios, li xk’oxlank qe laa’o, aj b’ehenel sa’ jun jalanil ch’och’.

37 Anajwan ex was wiitz’in, naqil naq li Dios naxk’oxla li junjunq chi tenamit, sa’ b’araq chi ch’och’ wankatqeb’ wi’; relik chi yaal, naxk’eheb’ sa’ ajl lix tenamit, ut lix sa’ xch’ool aj uxtaan wan sa’ xb’een chixjunil li ruchich’och’. Anajwan a’in lix sahil inch’ool, ut lin nimla b’antioxihom; relik chi yaal, ut tinb’antioxinq chiru lin Dios chi junelik q’e kutan. Amen.