1 Nao i bin hapen se, taem we Ol Man blong Leman ia we oli go blong faet agensem Ol Man blong Nifae oli faenem se afta plante hadwok blong olgeta blong kilimded olgeta, hem i blong nating nomo blong lukaotem ded blong olgeta, nao oli gobak bakegen long graon blong Nifae.

2 Mo i bin hapen se Ol Man blong Amalekae, from ol ded blong olgeta, oli kros tumas. Mo taem we oli luk se oli no save givimbak long Ol Man blong Nifae, oli stat blong stikim tingting blong mekem ol man oli kros agensem ol brata blong olgeta, ol pipol blong Antae-Nifae-Lihae; from hemia, oli stat bakegen blong kilim olgeta oli ded.

3 Nao ol pipol ia oli no bin wantem blong tekem bakegen ol tul blong faet blong olgeta, mo oli letem olgeta bakegen blong ded folem tingting blong ol enemi blong olgeta.

4 Nao taem we Amon mo ol brata blong hem oli luk fasin ia blong kilimded man long medel blong ol pipol ia we oli lavem tumas, mo long medel blong pipol ia we i lavem olgeta tumas—from oli mekem long olgeta i olsem se oli ol enjel we God i bin sendem olgeta blong sevem olgeta long ded we i no gat en—from hemia, taem we Amon mo ol brata blong hem oli luk bigfala fasin ia blong kilimded man, oli gat lav mo oli sore tumas, mo talem long king se:

5 “Bae yumi karem ol pipol ia blong Lod oli kam tugeta, mo bae yumi go daon long graon blong Sarahemla long ol brata blong yumi Ol Man blong Nifae, mo ronwe mo aot long han blong ol enemi blong yumi, blong mekem se oli no kilimded yumi.”

6 Be king i talem long olgeta: “Luk, Ol Man blong Nifae bae oli prapa spolem gud mifala from plante man we mifala i kilimded mo from ol sin we mifala i bin mekem agensem olgeta.”

7 Mo Amon i talem: “Bae mi go mo askem Lod, mo sapos hem i talem long yumi, go daon long ol brata blong yufala, ?bae yufala i go?”

8 Mo king i talem long hem: “Yes, sapos Lod i talem long mifala, go, bae mifala i go daon long ol brata blong mifala, mo bae mifala i kam ol slef blong olgeta kasem taem we mifala i pembak long olgeta hamas man we mifala i kilimded mo hamas sin we mifala i bin mekem agensem olgeta.”

9 Be Amon i talem long hem: “Hem i agensem loa blong ol brata blong mifala, we papa blong mi i bin stanemap, se bae i gat ol slef long medel blong olgeta; from hemia bae yumi go daon mo dipen long ol sore blong ol brata blong yumi.”

10 Be king i talem long hem: “Askem Lod, mo sapos hem i talem long mifala, go, bae mifala i go; sapos no, bae mifala i ded long graon ia.”

11 Mo i bin hapen se Amon i go mo askem Lod, mo Lod i talem long hem se:

12 “Tekemaot ol pipol ia long graon ia, blong mekem se oli no ded; from Setan i gat bigfala paoa long hat blong Ol Man blong Amalekae, we oli stikim Ol Man blong Leman blong oli kros long ol brata blong olgeta, mo kilim olgeta oli ded; from hemia, tekemaot ol pipol ia long graon ia; mo mi blesem pipol ia long jeneresen ia, from bae mi sevem olgeta.”

13 Mo nao i bin hapen se, Amon i go mo talem long king evri toktok we Lod i talem long hem.

14 Mo oli karem evri pipol blong olgeta oli kam tugeta, yes, evri pipol blong Lod, mo oli karem i kam tugeta evri grup blong animol blong olgeta mo ol buluk, mo oli aot long graon, mo oli go long waelples we i seraotem graon blong Nifae long graon blong Sarahemla, mo oli kam kolosap long ol boda blong graon.

15 Mo i bin hapen se Amon i talem long olgeta: “Luk, mi mo ol brata blong mi bae mifala i go long graon blong Sarahemla, mo bae yufala i stap long ples ia kasem taem we mifala i kambak; mo bae mifala i traem hat blong ol brata blong mifala, blong faenemaot sapos oli save letem yufala i kam long graon blong olgeta.”

16 Mo i bin hapen se taem we Amon i stap go long graon, hem mo ol brata blong hem i mitim Alma, long ples we oli bin tokbaot, mo luk, hemia i wan hapi miting blong olgeta.

17 Nao glad blong Amon i bin bigwan tumas mekem se hem i fulap; yes, glad blong God i kavremap hem go kasem we paoa blong hem i nomo strong; mo hem i foldaon bakegen long graon.

18 ?Nao hemia i no wan bigbigfala glad? Luk, hemia i glad we i no gat man i kasem, sapos nomo man ia i wan man we i sakem sin, mo tingting blong hem i stap daon blong lukaotem glad.

19 Nao glad blong Alma, long taem we hem i bin mitim ol brata blong hem i bigwan tumas, mo tu, glad blong Eron, blong Omna, mo Himnae; be luk, glad blong olgeta i no blong mekem se i moa bitim paoa blong olgeta.

20 Mo nao i bin hapen se Alma i lidim ol brata blong hem i gobak long graon blong Sarahemla, go kasem long haos blong hem. Mo oli go mo oli talem long jif jaj abaot evri samting we i bin hapen long olgeta long graon blong Nifae, long medel blong ol brata blong olgeta, Ol Man blong Leman.

21 Mo i bin hapen se jif jaj ia i sendemaot wan ofisol toktok i go long pablik truaot long evri ples long graon, mo i wantem harem voes blong ol pipol long saed blong letem ol brata blong olgeta oli kam insaed, we oli ol pipol blong Antae-Nifae-Lihae.

22 Mo i bin hapen se voes blong ol pipol i kam, i talem: “Luk, bae mifala i lego graon blong Jerson, we i stap long Is kolosap long solwota, we i joenem graon Plante, we i stap long Saot blong graon Plante; mo graon ia Jerson, hem i graon we bae mifala i givim long ol brata blong mifala blong stap long hem blong laen blong olgeta.

23 Mo luk, bae mifala i putum ol ami blong mifala bitwin long graon blong Jerson mo graon blong Nifae, blong mekem se mifala i save lukaot long ol brata blong mifala long graon blong Jerson; mo mifala i mekem samting ia blong ol brata blong mifala, from we oli fraet blong tekem ol tul blong faet blong olgeta agensem ol brata blong olgeta, from mifala i fraet se bae oli mekem sin; mo hemia bigfala fraet blong olgeta, i bin kam from strongfala fasin blong sakem sin blong olgeta we oli bin gat, from plante fasin blong kilimded man we oli bin mekem mo fasin nogud blong olgeta we i rabis stret.

24 Mo nao luk, bae mifala i mekem samting ia long ol brata blong mifala, blong oli save stap long graon blong Jerson, mo bae mifala i gad long olgeta from ol enemi blong olgeta, wetem ol ami blong mifala, hemia nomo sapos oli givim wan pat blong ol samting blong olgeta, blong helpem mifala, blong mifala i save holemtaet ol ami blong mifala.”

25 Nao, i bin hapen se taem we Amon i harem samting ia, hem i gobak long ol pipol blong Antae-Nifae-Lihae, wetem Alma tu, long waelples, long ples we oli stanemap ol tenet blong olgeta, mo oli talemaot ol samting ia long olgeta. Mo tu, Alma i talem bakegen long olgeta olsem wanem hem i bin jenisim laef blong hem, wetem Amon mo Eron, mo ol brata blong hem.

26 Mo i bin hapen se samting ia i mekem bigfala glad long medel blong olgeta. Mo oli go daon long graon blong Jerson, mo oli stap long graon blong Jerson; mo Ol Man blong Nifae oli singaotem olgeta ol pipol blong Amon; from hemia, oli save olgeta long nem ia stat long tetaem ia i go.

27 Mo oli bin stap wetem ol pipol blong Nifae, mo tu, oli kaontem olgeta wetem olgeta pipol we oli blong jos ia blong God. Mo tu, oli save olgeta from sapot blong olgeta long God, mo tu, long ol man; from oli ones evriwan oltaem mo wokbaot stret long evri samting; mo oli strong long fet blong Kraes, go kasem en.

28 Mo oli no laekem nating blong mekem blad blong ol brata blong olgeta i ron; mo i no gat wan man we i save mekem olgeta blong tekem ol tul blong faet blong olgeta agensem ol brata blong olgeta; mo oli neva luk long ded wetem eni pat blong fraet, from hop mo ol save blong olgeta long Kraes mo laef bakegen long ded; from hemia, ded i no bin gat mining long olgeta, from Kraes i winim ded.

29 From hemia, bae oli harem nogud long ded long wan fasin we i rabis olgeta mo i soa plante we ol brata blong olgeta i save mekem long olgeta, bifo oli save tekem naef blong faet o huknaef blong kilim olgeta.

30 Mo olsem ia nao oli bin wan pipol we i wok strong tumas, mo wan pipol we oli lavem olgeta tumas, wan pipol blong Lod we oli laekem olgeta plante.