1 Ita napasamak nga idi naammuan dagidiay Lamanita a nakigubat maibusor kadagiti Nephita, kalpasan ti adu a risiris tapno dadaelenna ida, nga awan ti nagmamaayan a panggependa ti pannakadadaelda, nagsublida manen iti daga ti Nephi.

2 Ket napasamak a dagiti Amalekita, gapu iti pannakaabakda, nalaus ti pungtotda. Ket idi nakitada a saanda mabales dagiti Nephita, rinugianda a sinugsogan dagiti tattao nga agpungtot maibusor kadagiti kabsatda, dagiti tattao nga Anti-Nephi-Lehi; ngarud rinugianda manen a dadaelen ida.

3 Ita nagkedked manen dagitoy a tao nga agarmasda, impalubosda ti bagbagida a mapapatay a maitutop iti tarigagay dagiti kabusorda.

4 Ita idi nakita ni Ammon ken dagiti kabsatna daytoy aramid a panangdadael kadagiti ipatpateg nga ay-ayatenda, ken kadagiti nangipateg a nangayat unay kadakuada—agsipud ta natratoda ida na kas kadagiti anghel a naibaon manipud iti Dios tapno maisalakan ida manipud iti awan inggana a pannakadadael—ngarud, idi nakita ni Ammon ken dagiti kabsatna daytoy naindaklan nga aramid ti panangdadael, naasianda kadakuada, ket kinunada iti ari:

5 Ummongentayo a sangsangkamaysa dagitoy tao ti Apo, ket intayo iti daga ti Zarahemla kadagiti kabsattayo a Nephita, ket aglibastayo kadagiti ima dagiti kabusortayo, tapno saantayo a madadael.

6 Ngem kinuna ti ari kadakuada: Kitaen, dadaelendatayo dagiti Nephita, gapu iti adu a pammapatay ken basbasol a naaramidtayo maibusor kadakuada.

7 Ket kinuna ni Ammon: Mapanak agsaludsod iti Apo, ket no kunana kadatayo, mapankayo kadagiti kabsatyo, mapantayo kadi?

8 Ket kinuna ti ari kenkuana: Wen, no kuna ti Apo a mapantayo, mapantayo kadagiti kabsattayo, ket agbalintayo nga adipenda agingga a masubadantayo ti adu a pammapatay ken basbasol a naaramidtayo kadakuada.

9 Ngem kinuna ni Ammon kenkuana: Maisuppiat iti linteg dagiti kabsattayo, nga impaulog ti amak, nga adda ti agbalin nga adipen kadakuada; ngarud mapantayo ket agtalektayo iti kaasi dagiti kabsattayo.

10 Ngem kinuna ti ari kenkuana: Agsaludsodka iti Apo, ket no kunana a mapantayo, mapantayo; wenno maungawtayo iti daga.

11 Ket napasamak a napan ni Ammon nagsaludsod iti Apo, ket kinuna ti Apo kenkuana:

12 Yadayom dagitoy a tao ditoy a daga, tapno saanda a maungaw; agsipud ta napigsa ti pananggemgem ni Satanas iti puspuso dagiti Amalekita, a nangsugsog kadagiti Lamanita nga agpungtot kadagiti kabsatda tapno patayenda ida; ngarud yadayom ida iti daytoy a daga; ket mabendisionan dagitoy a tao iti daytoy a sangkaputotan, agsipud ta taginayonek ida.

13 Ket ita napasamak a napan ni Ammon ket imbaga iti ari ti amin a balikas nga imbaga kenkuana ti Apo.

14 Ket inummongda a sangsangkamaysa amin dagiti tattaoda, wen, amin dagiti tattao ti Apo, ken inummongda a sangsangkamaysa amin dagiti arban ken dinguenda, ket pimmanawda iti daga, ket dimtengda iti langalang a namaglasin iti daga ti Nephi ken iti daga ti Zarahemla, ket immasidegda iti nagbeddengan ti daga.

15 Ket napasamak a kinuna ni Ammon kadakuada: Kitaen, mapankami kadagiti kabsatko iti daga ti Zarahemla, ket agbatikayo ditoy agingga nga agsublikami; ket ammuentayo ti puspuso dagiti kabsattayo, no palubosandatayo a mapan iti dagada.

16 Ket napasamak a bayat iti ipapan ni Ammon iti daga, a nakasabetda kadagiti kabsatna ni Alma, iti lugar a nasaon; ket kitaen, naragsak daytoy a panagkikita.

17 Ita napnuan rag-o ni Ammon nga uray la a napnek; wen, inalimon ti rag-ona iti Dios, nga uray la a nauyos ti pigsana; ket naglusdoy manen iti daga.

18 Ita saan kadi nga aglaplapusanan daytoy a rag-o? Kitaen, rag-o daytoy nga awan ti mabalin nga umawat malaksid ti napudno nga agbabawi a silaladingit ken napakumbaba a manggun-od iti ragsak.

19 Ita pudno a napnuan rag-o ni Alma a nakasabet dagiti kabsatna, kasta met ti rag-o ni Aaron, ken ni Omner, ken ni Himni; ngem kitaen saan a rinimbawan ti rag-oda ti pigsada.

20 Ket ita napasamak nga indauluan ni Alma dagiti kabsatna nga agsubli iti daga ti Zarahemla; uray pay iti balayna. Ket napanda imbaga iti pangulo nga ukom ti amin a napasamak kadakuada iti daga ti Nephi, kadagiti kabsatda, dagiti Lamanita.

21 Ket napasamak a nangipatulod ti pangulo nga ukom iti pakdaar iti intero a daga, a tarigagayanna ti timek dagiti tattao maipanggep iti panangawatda kadagiti kabsatda, a tattao dagiti Anti-Nephi-Lehi.

22 Ket napasamak a dimteng ti timek dagiti tattao, a nagkuna: Kitaen, itedmi ti daga ti Jershon, nga adda iti daya nga asideg ti baybay, a nayariping iti daga ti Bountiful, nga adda iti abagatan ti daga ti Bountiful; ket daytoy daga a Jershon ti daga nga itedmi a tawiden dagiti kabsattayo.

23 Ket kitaen, ikabiltayo dagiti buyottayo iti nagbaetan ti daga ti Jershon ken ti daga ti Nephi, tapno masalaknibantayo dagiti kabsattayo iti daga ti Jershon; ket aramidentayo daytoy para kadagiti kabsattayo, gapu iti butengda nga agarmas a maibusor kadagiti kabsatda wenno makaaramidda iti basol; ket napasamak daytoy nalaus a butengda gapu iti napasnek a panagbabawida, a gapu iti adu a pammapatayda ken nakaam-amak a kinadakesda.

24 Ket ita kitaen, kastoy ti aramidentayo kadagiti kabsattayo, tapno matawidda ti daga ti Jershon; ket salaknibantayo ida kadagiti kabusorda kadagiti buyottayo, no la ketdi ibingayandatayo iti taraonda a pangtulongda kadatayo a pangtaginayontayo kadagiti buyottayo.

25 Ita, napasamak nga idi nangngeg daytoy ni Ammon, nagsubli kadagiti tattao nga Anti-Nephi-Lehi, ken kasta met a kimmuyog ni Alma, iti langalang, a nagipatakderanda kadagiti toldada, ket impakaammoda kadakuada amin dagitoy a banag. Ken kasta met nga insarita ni Alma kadakuada ti panamalbaliwna, a kaduana da Ammon ken Aaron, ken dagiti kabsatna.

26 Ket napasamak a nangipaay daytoy iti dakkel a rag-o kadakuada. Ket bimmabada iti daga ti Jershon, ket tinagikuada ti daga ti Jershon; ket inawagan ida dagiti Nephita iti tattao ni Ammon; ngarud naam-ammoda iti kasta a nagan sipud idi.

27 Ket karamanda kadagiti tattao ni Nephi, kasta met a naibilangda kadagiti tattao nga adda iti simbaan ti Dios. Kasta met a naam-ammoda babaen iti kinareggetda iti Dios, ken kasta met iti tattao; ta naan-anay ti kinapudnoda ken nalintegda iti amin a banag; ken natibker ti pammatida ken ni Cristo, agingga iti panungpalan.

28 Ket karurodda la unay ti pannakasayasay iti dara dagiti kabsatda; ket saandanto a pulos kabaelan ti agarmas a maibusor kadagiti kabsatda; ket pulos a saanda kinita ti patay iti nakaam-amak a kasasaad, gapu iti namnama ken paniriganda ken ni Cristo ken ti panagungar; ngarud, inalimonda ti patay babaen ti balligi ni Cristo iti daytoy.

29 Ngarud, sagabaenda ni patay iti kadagsenan ken katuokan a wagas a mabalin nga ipaay dagiti kabsatda, sakbay a mangalada iti espada ken kampilan a pangdangranda kadakuada.

30 Ket kasta ti karegta ken pannakaay-ayatda a tao, ti naparaburan unay a tattao ti Apo.