1 O ta anghelak man koma, ket magun-odko ti tarigagay ti pusok, tapno makapanak koma ken agsao babaen ti trumpeta ti Dios, nga addaan iti timek a mangdayyeg iti daga, ken ibunannagko ti panagbabawi ti tunggal tao!

2 Wen, iwaragawagko iti tunggal kararua, a kas iti timek ti gurruod, panagbabawi ken ti plano ti pannakasubbot, ta nasken nga agbabawi ket umayda iti Diostayo, tapno awanton ti ladingit iti intero a rabaw ti daga.

3 Ngem kitaen, maysaak a tao, ket agbasolak iti tarigaygayko; agsipud ta rumbeng a mapnekakon kadagiti bambanag nga inlatang ti Apo kaniak.

4 Saan koma a rumbeng a mariribukak kadagiti kalikagumko iti napinget nga impaulog ti nalinteg a Dios, agsipud ta ammok nga ipaayna kadagiti tattao ti mayannurot iti kalikagumda, no para iti patay man wenno biag; wen, ammok nga inlatanganna iti tattao, wen, ipaulogna dagiti paulog a saan a mabaliwan, a mayannurot iti pagayatanda, no para iti pakaisalakananda man wenno pakadadaelanda.

5 Wen, ken ammok a dumteng iti tao ti naimbag ken dakes; awan ti pakababalawan ti saan a makaammo ti naimbag iti dakes; ngem ti makaammo iti naimbag ken dakes, maited kenkuana ti mayannurot iti kalikagumna, no kaligagumanna man ti naimbag wenno dakes, biag wenno patay, rag-o wenno ladingit iti konsiensia.

6 Ita, iti pannakakitak nga ammok dagitoy a bambanag, apay a kalikagumak ti nasursurok pay ngem iti panangaramidko iti aramid a nakaawagak?

7 Apay pay a kalikagumak nga anghelak koma, a makapagsaoak kadagiti amin a pungto ti daga?

8 Agsipud ta kitaen, ipaay ti Apo kadagiti amin a pagilian, iti bukodda a pagilian ken pagsasao, a mangisuro iti balikasna, wen, a nainsiriban, amin a makitana a mainugot a nasken nga adda kadakuada; ngarud makitatayo a nainsiriban ti panagbalakad ti Apo, a mayannurot iti dayta nalinteg ken pudno.

9 Ammok dayta nga imbilin ti Apo kaniak, ket idaydayawko. Saanko idaydayaw ti bagik, ngem idaydayawko dayta imbilin kaniak ti Apo; wen, ket daytoy ti idaydayawko, ta nalabit a siak ti ramit dagiti ima ti Dios a mamagbabawi iti sumagmamano a kararua; ket daytoy ti rag-ok.

10 Ket kitaen, no makitak nga adu kadagiti kakabsatko ti sipupudno nga agbabawi, ken umasideg iti Apo a Diosda, isunto iti pannakapno ti kararuak iti rag-o; isunto iti pannakalagipko no ania ti naaramid kaniak ti Apo, wen, uray pay a nangngegna ti kararagko; wen, isunto ti pannakalagipko ti manangngaasi a takiagna a naitanggaya kaniak.

11 Wen, ken kasta met a malagipko ti pannakabalud dagiti ammak; agsipud ta talaga nga ammok a winayawayaan ida ti Apo iti pannakaadipen, ket babaen iti daytoy binangonna ti simbaanna; wen, ti Apo a Dios, ti Dios ni Abraham, ti Dios ni Isaac, ken ti Dios ni Jacob, winayawayaanna ida iti pannakaadipen.

12 Wen, kanayon a malaglagipko ti pannakabalud dagiti ammak; ken dayta met laeng a Dios a nangwayawaya kadakuada kadagiti ima dagiti Egipto ti nangwayawaya kadakuada iti pannakaadipen.

13 Wen, ket dayta met la a Dios ti nangbangon iti simbaan a para kadakuada; wen, ket dayta met la a Dios ti nangawag kaniak iti nasantuan a pagrebbengan, a mangikasaba iti balikas kadagitoy a tao, ken nangted kaniak iti napalalo a balligi, gapu iti daytoy ti rag-ok ket napnuan.

14 Ngem saanak nga agrag-o iti bukodko laeng a balligi, ngem ad-adda a naan-anay ti rag-ok gapu iti balligi dagiti kabsatko, a napan iti daga ti Nephi.

15 Kitaen, napalaus ti panagtrabahoda, ket nakapataud iti adu a bunga; ket anian a nagdakkel ti gunggonada!

16 Ita, no panunotek ti balligi dagitoy a kakabsatko nalapunos ti kararuak, uray pay a kas man iti pannakaisinana manipud iti bagi, a kas arigna, isu a napalalo ti rag-ok.

17 Ket ita ipaay koma ti Dios kadagitoy, dagiti kabsatko, a makatugawdanto iti pagarian ti Dios; wen, ken kasta met kadakuada a bunga ti panagtrabahoda tapno saandanton a rummuar, ngem dayawendanto ketdi iti agnanayon. Ket sapay koma ta ipaay ti Dios a maaramid a mayannurot kadagiti balikasko, uray pay a kas iti nasaokon. Amen.