1 !O mi wantem kam wan enjel, mo save gat hop blong hat blong mi, blong mi save go mo toktok, wetem bigfala pupu blong God, wetem wan voes blong mekem wol i seksek, mo taltalemaot fasin blong sakem sin long evri pipol!

2 Yes, bae mi talemaot long evri sol wetem wan voes olsem blong tanda, fasin blong sakem sin mo plan blong fasin blong pemaot man, se oli mas sakem sin mo kam long God blong yumi, blong mekem se i nomo save gat plante harem nogud long evri fes blong wol.

3 Be luk, mi mi wan man, mo mi mekem sin long hop blong mi ia; from mi sapos blong glad nomo wetem ol samting we Lod i bin givim long mi.

4 Mi no sapos blong jenisim, folem samting we mi wantem, strong toktok blong wan stret God, from mi save se hem i givim long ol man, folem wanem oli wantem, sapos i lid i go long ded o long laef; yes, mi save se hem i givim long ol man, yes, i talemaot long olgeta ol toktok we i no save jenis, folem ol samting we oli wantem, nomata ol samting ia i lidim olgeta i go long fasin blong sevem man o long ded.

5 Yes, mo mi save se gud mo nogud i kam long fored blong evri man; hem we i no save samting we i gud aot long samting we i nogud, i no gat rong; be hem we i save samting we i gud mo samting we i nogud, long hem, God i givim folem wanem we hem i wantem, nomata sapos hem i wantem samting we i gud o nogud, laef o ded, glad o trabol long tingting.

6 Nao, from mi luk se mi save ol samting ia, ?from wanem nao mi mas wantem moa bitim blong mekem wok ia we hem i bin singaotem mi blong mekem?

7 ?From wanem nao mi mas wantem se mi mi wan enjel, blong mi save toktok i go long evri en blong wol?

8 From luk, Lod i givim long evri kantri, samfala pipol blong kantri blong olgeta nomo, mo lanwis blong olgeta nomo, blong tijim toktok blong hem, yes, wetem waes tingting, evri samting we hem i luk se i stret blong oli mas kasem; from hemia, yumi luk se Lod i givim oda wetem waes tingting, folem samting we i stret mo i tru.

9 Mi save samting ia we Lod i bin givim oda long mi, mo mi glad tumas long hem. Mi no givim glori abaot miwan, be mi karem glori blong mi long samting we Lod i givim oda long mi; yes, mo hemia glori blong mi, se maet mi save kam wan tul long ol han blong God blong tekem sam sol oli kam blong sakem sin; mo hemia i glad blong mi.

10 Mo luk, taem we mi luk plante long ol brata blong mi oli sakem sin long tru fasin, mo oli kam long Lod, God blong olgeta, ale sol blong mi i fulap long glad; ale mi tingbaot wanem we Lod i bin mekem blong mi, yes, mo tu, hem i bin harem prea blong mi; yes, ale mi tingbaot han blong sore blong hem, we hem i stretem i kam long mi.

11 Yes, mi tingbaot tu taem we ol papa blong mi oli bin stap long kalabus; from mi save gud se Lod i mekem olgeta oli kamaot long slef, mo tru long wei ia nao hem i stanemap jos blong hem; yes, Lod God, God blong Ebraham, God blong Aesak, mo God blong Jekob, i mekem olgeta oli kamaot long slef.

12 Yes, mi tingbaot oltaem, we ol papa blong mi oli bin stap long kalabus; mo semfala God we i mekem olgeta oli go fri oli kamaot long han blong Ol Man Ijip, i bin mekem olgeta oli kamaot long slef.

13 Yes, mo semfala God ia i bin stanemap jos blong hem long medel blong olgeta; yes, mo semfala God ia i singaotem mi tru long wan tabu koling, blong prijim toktok long pipol ia, mo i givim mi plante sakses, we glad blong mi i fulap from.

14 Be mi no glad long sakses blong miwan nomo, be glad blong mi i moa bigwan from sakses blong ol brata blong mi, we oli bin go antap long graon blong Nifae.

15 Luk, oli bin wok plante tumas, mo oli bin karem plante frut i kam; !mo presen blong olgeta bae i bigwan!

16 Nao, taem we mi tingbaot sakses blong olgeta ia, we oli ol brata blong mi, glad blong mi i tekem mi i go bitim mak we i olsem se hem i kamaot long bodi blong mi, from glad blong mi i bigwan tumas.

17 Mo nao, bae God i givim long olgeta ia, we oli ol brata blong mi, blong oli save sidaon long kingdom blong God; yes, wetem tu olgeta evriwan we oli ol frut blong ol wok blong olgeta, blong oli nomo save go aot, be blong oli save presem hem blong oltaem. Mo bae God i letem samting ia i save hapen folem ol toktok blong mi, olsem we mi bin talemaot. Amen.