1 Mo i bin hapen se, long stat blong nambafaef yia we ol jaj oli stap rul long hem, i stat blong gat rao long medel blong olgeta pipol; from wan man, we oli singaotem hem Amlisae, hem i wan man blong giaman, yes, wan waes man we i gat gudfala save long saed blong wol, hem i wan man we hem i blong oda blong man we i kilim Gidion i ded wetem naef blong faet, we oli bin kilim hem i ded folem loa—

2 Nao Amlisae ia, wetem giaman blong hem, i pulum plante pipol oli go blong oli folem hem; oli kam plante tumas mekem se oli stat blong kam strong; mo oli stat traem blong putum Amlisae i kam king blong olgeta pipol.

3 Nao samting ia i mekem ol man blong jos oli fraet, mo tu, olgeta evriwan we oli no folem ol toktok we Amlisae i yusum blong winim olgeta; from oli bin save se, folem loa blong olgeta, ol samting olsem, voes blong ol pipol nao i mas putum olgeta.

4 From hemia, sapos i save hapen, se Amlisae i save kasem voes blong ol pipol, hem we i wan nogud man, bae hem i tekemaot ol raet blong olgeta mo ol raet blong jos; from i plan blong hem blong prapa spolem gud jos ia blong God.

5 Mo i bin hapen se olgeta pipol oli kam tugeta long ol ples blong ful graon, evri man i folem tingting blong hem, sam long olgeta oli sapotem Amlisae, ol narafalawan oli agensem Amlisae, oli stap long ol defren grup, mo i gat plante rao mo ol sapraes faet wan wetem narawan.

6 Mo olsem ia nao oli kam tugeta blong givim voes blong olgeta long saed blong samting ia; mo oli bin stanap long fored blong ol jaj.

7 Mo i bin hapen se voes blong ol pipol i go agensem Amlisae, mekem se oli no mekem hem i kam king ova long ol pipol.

8 Nao samting ia i mekem hat blong olgeta we oli agensem hem i glad; be Amlisae i mekem olgeta we oli sapotem hem blong oli kros long olgeta we oli no sapotem hem.

9 Mo i bin hapen se oli kam tugeta, mo oli konsekretem Amlisae blong kam king blong olgeta.

10 Nao, taem we oli mekem Amlisae i king blong olgeta, hem i talem long olgeta blong oli tekem ol tul blong faet mo go agensem ol brata blong olgeta; mo hem i mekem olsem blong hem i save kontrolem olgeta.

11 Nao ol pipol blong Amlisae, oli bin save olgeta folem nem blong Amlisae, from oli singaotem olgeta Ol Man blong Amlisae; mo ol narafala we oli stap, oli singaotem olgeta Ol Man blong Nifae, o ol pipol blong God.

12 From hemia, ol pipol blong Nifae oli bin save plan blong Ol Man blong Amlisae, mo from hemia, oli mekem olgeta oli rere blong mitim olgeta; yes, oli karem wetem olgeta ol naef blong faet, mo wetem ol huknaef, mo wetem ol bonara, mo wetem ol ara, mo wetem ol ston, mo wetem ol sling, mo wetem evri kaen tul blong faet, blong evri kaen stael.

13 Mo olsem ia nao oli bin mekem olgeta oli rere blong mitim Ol Man blong Amlisae long taem we bae oli kam. Mo oli bin jusum ol kapten, mo ol kapten we oli moa hae, mo ol jif kapten folem ol namba blong olgeta.

14 Mo i bin hapen se Amlisae i mekem ol man blong hem oli tekem evri kaen tul blong faet blong evri kaen stael; mo hem i jusum ol man blong rul mo ol lida blong rulum ol man blong hem, blong lidim olgeta i go blong faet agensem ol brata blong olgeta.

15 Mo i bin hapen se ol man blong Amlisae oli go antap long hil blong Amnaehu, we i stap long Is blong reva Saedon, we i ron kolosap long graon blong Sarahemla, mo long ples ia nao oli stat blong mekem faet wetem Ol Man blong Nifae.

16 Nao, Alma, from hem i jif jaj mo gavna blong ol pipol blong Nifae, nao hem i go antap wetem ol pipol blong hem, yes, wetem ol kapten blong hem, mo ol jif kapten, yes, long fored blong ol ami blong hem, agensem ol man blong Amlisae blong faet.

17 Mo oli stat blong kilimded Ol Man blong Amlisae long hil long Is blong Saedon. Mo Ol Man blong Amlisae oli faet wetem Ol Man blong Nifae wetem bigfala paoa, inaf blong mekem se plante long Ol Man blong Nifae oli bin foldaon long fored blong Ol Man blong Amlisae.

18 Be Lod i bin mekem han blong Ol Man blong Nifae i kam strong moa, mekem se oli kilimded Ol Man blong Amlisae mo prapa spolem gud olgeta, mekem se oli stat blong ronwe long fes blong olgeta.

19 Mo i bin hapen se Ol Man blong Nifae oli ronem Ol Man blong Amlisae long ful dei, mo oli kilimded olgeta, oli prapa spolem gud olgeta, inaf blong mekem se long olgeta Man blong Amlisae, twelef taosen faef handred teti mo tu sol oli bin kilimded olgeta; mo long olgeta Man blong Nifae, sikis taosen faef handred siksti mo tu sol oli bin ded.

20 Mo i bin hapen se taem we Alma i nomo save ronem Ol Man blong Amlisae, hem i mekem ol man blong hem blong oli stanemap tenet blong olgeta long vale blong Gidion, vale ia we oli bin singaotem, Gidion, folem nem blong man ia we Nehor i bin kilim hem i ded wetem naef blong faet; mo long vale ia, Ol Man blong Nifae oli stanemap ol tenet blong olgeta blong pasem naet long hem.

21 Mo Alma i sendem ol spae blong folem smol haf ia blong Ol Man blong Amlisae, blong hem i save ol plan mo ol nogud sikret plan blong olgeta, we tru long samting ia, hem i save lukaotem gud hemwan agensem olgeta, blong hem i save sevem ol pipol blong hem blong oli no prapa spolem gud olgeta.

22 Nao, olgeta ia we hem i bin sendemaot blong go wajem kamp blong Ol Man blong Amlisae, oli singaotem olgeta Seram, mo Amnor, mo Mantae, mo Limha; olgeta ia, oli olgeta we oli bin go aot wetem ol man blong olgeta blong wajem kamp blong Ol Man blong Amlisae.

23 Mo i bin hapen se long nekis dei oli kambak long kamp blong Ol Man blong Nifae kwiktaem nomo, oli sapraes bigwan, mo bigfala fraet i kasem olgeta, oli talem:

24 “Luk, mifala i bin folem kamp blong Ol Man blong Amlisae, mo long bigfala sapraes blong mifala, long graon blong Maenon, antap long graon blong Sarahemla, long rod we i go long graon blong Nifae, mifala i bin luk wan bigfala ami blong Ol Man blong Leman; mo luk, Ol Man blong Amlisae oli joenem olgeta;

25 Mo oli stap atakem ol brata blong yumi long graon ia; mo oli stap ronwe long fes blong olgeta wetem olgeta grup blong animol blong olgeta, mo ol waef blong olgeta, mo ol pikinini blong olgeta, oli stap ronwe i kam long bigtaon blong yumi; mo hemia nomo, sapos yumi no hariap, bae oli tekem bigtaon blong yumi, mo bae ol papa blong yumi, mo ol waef blong yumi, mo ol pikinini blong yumi, bae oli kilim olgeta i ded.”

26 Mo i bin hapen se ol pipol blong Nifae oli tekem ol tenet blong olgeta, mo oli aot long vale blong Gidion, oli gobak long bigtaon blong olgeta, we hem i bigtaon blong Sarahemla.

27 Mo luk, taem we oli stap krosem reva blong Saedon, Ol Man blong Leman mo Ol Man blong Amlisae, we oli plante i stap, kolosap semmak long sanbij blong solwota, oli kam long olgeta blong prapa spolem gud olgeta evriwan.

28 Be, han blong Lod i mekem Ol Man blong Nifae oli kam strong moa, from oli bin prea strong tumas long hem blong bae hem i mekem olgeta oli fri, oli kamaot long ol han blong ol enemi blong olgeta; from hemia Lod i harem ol prea blong olgeta, mo i mekem olgeta oli kam strong moa, mo olgeta Man blong Leman mo olgeta Man blong Amlisae oli foldaon long fes blong olgeta.

29 Mo i bin hapen se Alma mo Amlisae tufala i faet wetem naef blong faet, tufala i fesem tufala; mo tufala i faet strong tumas, wan wetem narawan.

30 Mo i bin hapen se Alma, from hem i wan man blong God, from hem i gat plante fet, i prea, i talem: “O Lod, gat sore long mi mo sevem laef blong mi, blong mi save kam wan tul long han blong yu, blong sevem mo holemtaet ol pipol ia.”

31 Nao, taem we Alma i talem ol toktok ia, hem i faet bakegen wetem Amlisae; mo hem i kasem moa paoa, inaf blong mekem se hem i kilimded Amlisae wetem naef blong faet.

32 Mo tu, hem i faet wetem king blong Ol Man blong Leman; be king blong Ol Man blong Leman i ronwe long Alma, mo hem i sendem ol gad blong hem blong faet wetem Alma.

33 Be Alma wetem ol gad blong hem, oli faet wetem ol gad blong king blong Ol Man blong Leman kasem taem we hem i prapa spolem gud olgeta mo i ronemaot olgeta.

34 Mo olsem ia nao hem i klinim graon, o long ol narafala toktok, graon long saed reva, we i stap long Wes blong reva Saedon; hem i sakem ol bodi blong Ol Man blong Leman we oli ded i go long wota blong Saedon, blong mekem se ol man blong hem oli save gat spes blong go kros mo faet wetem Ol Man blong Leman mo Ol Man blong Amlisae long Wes saed blong reva blong Saedon.

35 Mo i bin hapen se taem olgeta evriwan oli go krosem reva blong Saedon, Ol Man blong Leman mo Ol Man blong Amlisae oli stat blong ronwe long fes blong olgeta, i nomata we oli plante tumas mekem se oli no save kaontem olgeta.

36 Mo oli ronwe long fes blong Ol Man blong Nifae oli go long waelples we i stap long Wes mo Not, longwe long ol boda blong graon; mo Ol Man blong Nifae oli folem olgeta wetem strong paoa, mo oli kilimded nogud olgeta.

37 Yes, oli mitim olgeta long evri saed, mo kilimded nogud mo ronemaot olgeta, kasem taem we oli seraot i go long Wes, mo long Not, kasem taem we oli kasem ol waelples, we oli bin singaotem Hemans; mo hem i pat blong waelples ia we i gat fulap wael animol mo ol rabis wael animol we oli hanggri gud.

38 Mo i bin hapen se plante oli ded long waelples ia from ol kil we oli bin kasem, mo ol wael animol wetem ol pijin blong skae oli kakae olgeta; mo oli faenem ol bun blong olgeta we oli hivap long graon.