1 Lo, ālikin men kein ke em̧ōj an kar armej in Ammōn tōt ilo āneen Jersōn, aaet, im barāinwōt ālikin kar lukwarkwareļo̧k riLeman ro jān āneo, im rimej ro aer kar kalbwin er jān armej in āneo—

2 Kiiō rimej ro aer kar jab bwine er kōnke jon̄an ļap in oraer; im jab kar bwine rimej ro an riNipai ro—a ālikin men kein ālikin aer kar kalbwin rimej ro aer, im barāinwōt ālikin raan ko in jitlo̧k, im būrom̧ōj, im jar, (im eaar ilo jon̄ouljiljino iiō in tōl an riekajet ro ioon armej in Nipai) eaar jino aenōm̧m̧an iaolepān āneo.

3 Aaet, im armej ro raar lale n̄an kōjparok kien ko an Irooj; im raar kanooj jejjet ilo kōjparok kain̄i ko an Anij, ekkar n̄an kien Moses; bwe kar katakin er n̄an kōjparok kien Moses m̧ae iien ej kūrm̧ool.

4 Im āindein armej ro raar jab poktak ilo aolepān iiō eo kein kajon̄ouljiljino in iien tōl an riekajet ro ioon armej in Nipai.

5 Im ālikin men kein ilo jinoin iiō eo kein kajon̄ouljiljilimjuon in iien tōl an riekajet ro, eaar wōr wōt aenōm̧m̧an.

6 Ak ālikin men kein ilo jem̧ļo̧kin iiō eo kein kajon̄ouljiljilimjuon, eaar wōr juon em̧m̧aan eaar itok n̄an Zaraemla, im eaar rijum̧ae Kraist, bwe eaar jino n̄an kwaļo̧k n̄an armej ro ņae kanaan ko kar kōnono kaki jān rikanaan ro, kōn itok eo an Kraist.

7 Kiiō eaar ejjeļo̧k kien ņae tōmak an juon armej; bwe eaar kanooj in jejjet ilo jum̧ae naan in jiron̄ ko an Anij bwe en wōr juon kien eo ej bōktok armej n̄an oņaake eo āinjuon.

8 Bwe āindein jeje eo ekwōjarjar ej ba: Kom̧in kāālet rainin wōn eo kom̧ naaj jerbal n̄an e.

9 Kiiō eļan̄n̄e juon armej eaar kōņaan jerbal n̄an Anij, eaar an utiej; ak ilo jim̧we in, eļan̄n̄e eaar tōmak ilo Anij eaar an utiej n̄an jerbal n̄an E, a eļan̄n̄e eaar jab tōmak ilo E, eaar ejjeļo̧k kien n̄an kaje e.

10 A eļan̄n̄e eaar uror kar kaje e n̄an mej; im eļan̄n̄e eaar rakim eaar barāinwōt kaje; im eļan̄n̄e eaar ko̧o̧t eaar barāinwōt kaje; im eļan̄n̄e eaar lōn̄ eaar barāinwōt kaje; aaet, n̄an aolep nana kein kar kaje er.

11 Bwe eaar wōr juon kien bwe armej eaikuj ekajet ekkar n̄an men ko ruweer. Mekarta, eaar ejjeļo̧k kien ņae an juon armej tōmak; kōn menin, juon armej kar kaje e wōt kōn men ko ruōn ko eaar kōm̧m̧ani; kōn menin aolep armej eaar āier wōt juon.

12 Im rijum̧ae Kraist in eo etan ar Korior, (im kien eo ejamin kar maron̄ jibwe e) eaar jino n̄an kwaļo̧k n̄an armej ro bwe enaaj ejjeļo̧k Kraist. Im ilo wāween eaar kwaļo̧k, im ba:

13 O kom̧ ro rej lokjak ium̧win juon kōjatdikdik ebwebwe im waan, etke kom̧ij kaddoik kom̧ kōn men kein rebwebwe? Etke kom̧ij pukot juon Kraist? Bwe ejjeļo̧k juon armej emaron̄ jeļā kōn jabdewōt men ej itok.

14 Lo, men kein ko kom̧ij ba kanaan, ko kom̧ij bar kar lilaļtak jān rikanaan ro rekwōjarjar, lo, rej imminene ko an ro jemāmi rebwebwe.

15 Ekōjkan ami jeļā kōn aer m̧ool? Lo, kom̧ij jab maron̄ jeļā kōn men ko kom̧ij jab maron̄ loi; kōn menin kom̧ij jab jeļā bwe enaaj wōr juon Kraist.

16 Kom̧ij reim̧aanļo̧k im ba bwe kom̧ij lo juon jeorļo̧k in jero̧wiwi ko ami. A lo, ej waļo̧kin juon koļmānļo̧kijeņ ebwebwe; im jorrāān in koļmānļo̧kijeņ kein ami ej itok kōnke imminene ko an ro jemāmi, ko rej tōlļo̧k kom̧ n̄an juon tōmak in men ko rejjab m̧ool.

17 Im elōn̄ļo̧k men kein eaar ba n̄an er, im jiron̄ er bwe ejjāmin wōr juon pinmuur kōm̧m̧an n̄an jero̧wiwi ko an armej, a armej otemjej ej iioon jabdewōt ilo mour ekkar n̄an wāween kajeikik ānbwinnin; kōn menin jabdewōt armej ej jeraam̧m̧an ekkar n̄an jeļāļo̧kjeņ eo an, im bwe jabdewōt armej ej anjo̧ ioon ekkar n̄an an kajoor; im jabdewōt men eo armej ej kōm̧m̧an ejjeļo̧k ruōn.

18 Im āindein eaar kwaļo̧k n̄an er, im tōlļo̧k būruōn elōn̄, im kōm̧m̧an bwe ren kotak bōraer ilo aer nana, aaet, im tōlļo̧k elōn̄ kōrā ro, im barāinwōt em̧m̧an, n̄an kōm̧m̧an mennin juwaļōn̄ļōn̄ ko—im jiron̄ er bwe n̄e juon armej ej mej, en̄in eaar jem̧ļo̧k eo.

19 Kiiō ļein eaar ilo̧k n̄an āneen Jersōn barāinwōt, n̄an kwaļo̧k naan kōn men kein ilubwiljin armej in Ammōn, ro raar juon iien armej in riLeman.

20 A lo raar mālōtlōtļo̧k jān elōn̄ iaan riNipai ro; bwe raar bōke, im liāpe e, im bōkļo̧k im̧aan Ammōn, eo eaar pris eutiej ioon armej rein.

21 Im ālikin men kein eaar kōm̧m̧an bwe ren bōkļo̧k e jān āneo. Im eaar itok n̄an āneen Gideon, im kar jino kwaļo̧k naan n̄an er barāinwōt; im ijin eaar jab lo eļap tōprak, bwe kar bōke im liāpe im bōktok im̧aan pris eo eutiej, im barāinwōt riekajet eo eutiejtata ioon āneo.

22 Im ālikin men kein pris eo eutiej eaar ba n̄an e: Etke kwōj ilo̧k im kaankeke iaļ ko an Irooj? Etke kwōj katakin armej rein bwe enaaj jamin wōr Kraist, n̄an kabbōjrak aer m̧ōņōņō? Etke kwōj kōnono ņae aolep kanaan ko an rikanaan ro rekwōjarjar?

23 Kiiō pris utiej in etan eaar Kiddona. Im Korior eaar ba n̄an e: Kōnke ijjab katakin imminene ko rebwebwe an ro jemāmi, im kōnke ijjab katakin armej rein n̄an lukwōj er ium̧win kain̄i ko rebwebwe im jerbal ko kar likūti jān pris ro etto, n̄an ankoņake kajoor im maron̄ eo ioer, n̄an dāpij wōt er ilo jajeļo̧kjeņ, bwe ren maron̄ jab kotak bōraer, ak bōk laļtak er ekkar n̄an am̧ innaan.

24 Kom̧ij ba bwe armej rein rej juon armej eanemkwōj. Lo, ij ba rej pād ilo kōm̧akoko. Kom̧ij ba bwe kanaan in etto kein rem̧ool. Lo, ij ba bwe kom̧ij jab jeļā bwe rem̧ool.

25 Kom̧ij ba bwe armej rein ej juon armej rebōd im juon armej raar wōtlo̧k, kōnke bōd eo an jemān ak jinen. Lo, ij ba bwe juon ajri ejjeļo̧k ruōn kōnke jemān im jinen.

26 Im kom̧ij barāinwōt ba bwe Kraist enaaj itok. A lo, ij ba bwe kom̧ij jab jeļā bwe enaaj wōr juon Kraist. Im kom̧ij ba barāinwōt bwe naaj m̧an E kōn jero̧wiwi ko an laļ—

27 Im āindein kom̧ij tōlļo̧k armej rein ilo̧kan imminene ko rebwebwe an ro jemāmi, im ekkar n̄an kōņaan ko ami make; im kom̧ij jipedlaļļo̧k er, em̧ool āinwōt n̄e eaar ilo kōm̧akoko bwe kom̧in maron̄ kōjeban kom̧ make kōn jerbal ko an peier, bwe ren eppāt in reilōn̄ļo̧k kōn peran, im bwe ren eppāt in jab m̧ōņōņō kōn jim̧we ko im jeraam̧m̧an ko aer.

28 Aaet, reban kōjerbale men eo ej aer make n̄e reab kainepataik pris ro aer, ro rej kaddoik er ekkar n̄an kōņaan ko aer, im kar bōktok er n̄an tōmaki imminene ko aer im ettōņak ko aer im bōklōkōt ko aer im visōn ko aer im men in ittino ko ļōkōm̧i, bwe ren aikuj, eļan̄n̄e raar jab kōm̧m̧an ekkar n̄an naan ko aer, kainepataik juon rejjab jeļā kake, eo rej ba ej Anij—juon eo jan̄in kar lo ak jeļā kake, eo E jan̄in kar im Ejjāmin naaj.

29 Kiiō ke pris eo eutiej im riekajet eo eutiejtata raar lo pen in būruōn, aaet, ke raar lo bwe enaaj kar kōnono ņae Anij, raar jab kōm̧m̧an oktan naan ko an; a raar kōm̧m̧an bwe en kar lokjak; im raar leļo̧ke ilo pein rijerbal in kien ro, im jilkinļo̧ke n̄an āneen Zaraemla, bwe ren maron̄ bōkļo̧k im̧aan Alma, im riekajet eo eutiej eo eaar kabna ioon aolepān āneo.

30 Im ālikin men kein ke raar bōkļo̧k im̧aan Alma im riekajet eo eutiej, eaar wōnm̧aanļo̧k ilo wāween eo eaar kōm̧m̧an ilo āneen Gideon; aaet, eaar wōnm̧aanļo̧k ilo blaspim.

31 Im eaar jutak im kōnono naan ko reļļaaj im̧aan Alma, im kōnono ņae pris ro im rikaki ro im ņa ruweer kōn tōlļo̧k armej ro ilo̧kan imminene ko rekōjak an ro jemāer, kōn un eo n̄an kōjeban er kōn jerbal ko an armej ro.

32 Kiiō Alma eaar ba n̄an e: Kwojeļā bwe kōmij jab kōjerbal kōm ioon jerbal ko an armej rein; bwe lo iaar jerbal em̧ool jān jinoin iien tōl an riekajet ro m̧ae kiiō, kōn pein make n̄an oņaake eō, mekarta ito-itak ko aō rellōn̄ ipeļaakin āneen n̄an kwaļo̧k naan in Anij n̄an armej rein aō.

33 Im mekarta jerbal ko aō rellōn̄ ko iaar kōm̧m̧ani ilo kabun̄, ijjan̄in kar bōk jon̄an in em̧ool juon sinain kōn aō jerbal; im bar jabdewōt iaan ro jeiū im jatū, ijello̧kun wōt ilo jea eo an riekajet; im kōm ar bōk wōt ekkar n̄an kien eo an iien eo am.

34 Im kiiō, eļan̄n̄e kōmij jab bōk jabdewōt kōn jerbal ko am ilo kabun̄, ta ej ļapļo̧k eo am n̄an jerbal ilo kabun̄ ijello̧kun wōt n̄e eaar n̄an kajeeded m̧ool eo, bwe kōmin maron̄ lan̄lōn̄ ilo m̧ōņōņō eo an ro jeiūm̧ im jatūm̧?

35 Innām etke kwōj ba n̄an armej rein bwe kōmij kwaļo̧k naan n̄an er n̄an bōk ļapļo̧k, ke kwe, jān kwe make, kwo jeļā bwe kōmij jab bōk ļapļo̧k? Im kiiō, kwōj tōmak ke bwe kōmij m̧oņ armej rein, ro rej kōm̧m̧an bwe en wōr m̧ōņōņō in iburueer?

36 Im Korior eaar uwaak e, Aaet.

37 Im Alma eaar ba n̄an e: Kwōj tōmak ke bwe ewōr juon Anij?

38 Im eaar uwaak, Jaab.

39 Kiiō Alma eaar ba n̄an e: Kwōn ke bar kariab ke ewōr juon Anij, im barāinwōt kariab Kraist? Bwe lo, ij ba n̄an eok, ijeļā ewōr Anij, im barāinwōt bwe Kraist enaaj itok.

40 Im kiiō ta kein kam̧ool ippam̧ ke ejjeļo̧k Anij, ak bwe Kraist ej jamin naaj itok? Ij ba n̄an eok ke ejjeļo̧k ippam̧, ijello̧kun wōt am̧ innaan wōt.

41 A, lo, ippa ewōr men otemjeļo̧k āinwōt juon kam̧ool ke men kein rem̧ool; im barāinwōt ewōr ippam̧ men otemjeļo̧k āinwōt juon kam̧ool n̄an eok bwe rem̧ool; im kwōnaaj kariabi ke? Kwōj tōmak ke bwe men kein rem̧ool?

42 Lo, ijeļā bwe kwōj tōmak, ak kwo juk kōn jitōbōn m̧oņ, im kwaar likūtļo̧k Jitōbōn Anij bwe en ejjeļo̧k jikin ilo kwe; a devil ewōr an kajoor ioom̧, im ej bōkto-bōktak eok, im jerbale kapo ko bwe en ko̧kkure ro nejin Anij.

43 Im kiiō Korior eba n̄an Alma: Eļan̄n̄e kwōnaaj kwaļo̧k n̄an eō juon kakōļļe, bwe in maron̄ reel buruō bwe ewōr juon Anij, aaet, kwaļo̧k n̄an eō ke ewōr an kajoor, innām inaaj reel buruō kōn m̧ool in naan ko am̧.

44 A Alma eba n̄an e: Kwaar lo ebwe kakōļļe ko; kwōn kapo ke am̧ Anij? Kwōn ba ke, Kwaļo̧k n̄an eō juon kakōļļe, n̄e ewōr ippam̧ kam̧ool an aolep rein jeiūm̧ im jatūm̧, im barāinwōt aolep rikanaan ro rekwōjarjar? Jeje ko rekwōjarjar repād im̧aam̧, aaet, im men otemjeļo̧k rej kam̧ool ewōr juon Anij; aaet, em̧ool laļ in, im aolep men otemjeļo̧k ioon mejān, aaet, im an m̧akūtkūt, aaet, im barāinwōt aolep planet rej em̧m̧akūt ilo iaļ ko karōki rej kam̧ool bwe ewōr juon Rikōm̧anm̧an Ekajoor Bōtata.

45 Im ijello̧kun in kwōj ke ito-itak, im tōlļo̧k būruōn armej rein, im kam̧ool n̄an er ejjeļo̧k Anij? Im kwōn ke kam̧ool ņae aolep kein kam̧ool kein? Im eba: Aaet, inaaj kariabe, ijello̧kun wōt n̄e kwōnaaj kwaļo̧k n̄an eō juon kakōļļe.

46 Im kiiō ālikin men kein Alma eba n̄an e: Lo, ibūrom̧ōj kōnke pen in buruōm̧, aaet, bwe kwōnaaj wōt jum̧ae jetōb in m̧ool, bwe am̧ en maron̄ in ko̧kkure.

47 A lo, em̧m̧anļo̧k n̄e am̧ enaaj jako jān n̄e kwōj wāween bōktok elōn̄ armej n̄an ko̧kkure, jān am̧ riab im jān am̧ naan in m̧oņ; kōn menin eļan̄n̄e kwōnaaj bar kariabe, lo Anij Enaaj im̧ōk eok, bwe kwo jaje kōnono, bwe kwōj jab naaj bar kōpeļļo̧k lo̧n̄im̧, bwe kwōn jab naaj bar m̧oņļo̧k armej rein.

48 Kiiō Korior eba n̄an e: Ijjab kariab wōr eo an juon Anij, a ijjab tōmak ke ewōr juon Anij; im ij ba barāinwōt, bwe kwōj jab jeļā bwe ewōr juon Anij; im ijello̧kun wōt n̄e kwōj kwaļo̧k n̄an eō juon kakōļļe, ij jamin tōmak.

49 Kiiō Alma eba n̄an e: Inaaj lewōj n̄an eok juon kakōļļe, bwe naaj im̧ōk eok bwe kwōn jab kōnono, ekkar n̄an naan ko aō; im ij ba, bwe ilo etan Anij, kwōnaaj jab maron̄ kōnono, bwe kwōj jab naaj bar maron̄ wōr ainikiōm.

50 Kiiō ke Alma eaar ba naan kein, Korior kar im̧ōke bwe en jab kōnono, bwe en jab maron̄ wōr ainikien, ekkar n̄an naan ko an Alma.

51 Im kiiō ke riekajet eo eutiej eaar lo men in, eaar lem̧aanļo̧k pein im jeje n̄an Korior, im ba: E po ke buruōm̧ kōn kajoor in Anij? Eo ilo e kwaar kōņaan bwe Alma en kwaļo̧k juon kakōļļe? Kwaar kōņaan ke bwe en kaen̄taan ro jet, n̄an kwaļo̧k n̄an eok juon kakōļļe? Lo, eaar kwaļo̧k n̄an eok juon kakōļļe; im kiiō kwōn ke bar aoļļo̧k wōt?

52 Im Korior eaar lem̧aanļo̧k pein im eaar jeje, im ba: Ijeļā bwe ijaje kōnono, bwe ijjab maron̄ kōnono; im ijeļā bwe ejjeļo̧k juon ijello̧kun wōt kajoor in Anij emaron̄ bōktok men in ioō; aaet, im iaar jeļā iien otemjej bwe ewōr juon Anij.

53 A lo, devil eaar m̧oņe eō; bwe eaar waļo̧k n̄an eō ilo nemāmeen juon enjeļ, im ba n̄an eō: Ilo̧k im bar bōktok armej raņ, bwe raar aolep jebwābwe ilo̧kan juon Anij rejaje kake. Im eaar ba n̄an eō: Ejjeļo̧k Anij; aaet, im eaar katakin eō ta ij aikuj in ba. Im iaar katakin kōn naan ko an; im iaar katakin kaki kōnke rekāitoktok-limo n̄an ļōmņak an kanniōk; im iaar katakin kaki, em̧ool m̧ae aō lo tōprakin, jon̄an iaar kanooj tōmak bwe raar m̧ool; im kōn menin iaar jutak ņae m̧ool eo, em̧ool m̧ae iien iaar bōktok lia in eļap ioō.

54 Kiiō ālikin an ba men in, eaar akweļap bwe Alma en jar n̄an Anij, bwe lia eo en maron̄ jako jān e.

55 A Alma eba n̄an e: Eļan̄n̄e lia in naaj bōk jān eok kwōnaaj bar tōlļo̧k būruōn armej rein; kōn menin, enaaj pād wōt ippam̧ em̧ool āinwōt an Irooj kōņaan.

56 Im ālikin men kein lia eo kar jab bōkļo̧k jān Korior; a kar kadiwōjļo̧ke, im kar ilo̧k jān em̧ n̄an em̧ im un̄n̄ar n̄an kijen m̧ōn̄ā.

57 Kiiō jeļā eo kōn ta eaar waļo̧k n̄an Korior em̧ōkaj an ajeeded iaolepān āneo; aaet, kean̄ eo kar jilkinļo̧k jān riekajet eo eutiej n̄an aolep armej in āneo, im kwaļo̧k n̄an ro raar tōmak ilo naan ko an Korior bwe rej aikuj kaiur im ukeļo̧k, n̄e ejja ekajet kein wōt ab itok ioer.

58 Im ālikin men kein raar aolep po burueer aolep kōn nana eo an Korior; kōn menin raar aolep bar oktaktok n̄an Irooj; im men in eaar kōm̧m̧an jem̧ļo̧k n̄an nana ilo̧kan wāween ko ko Korior. Im Korior eaar ilo̧k jān em̧ n̄an em̧, im un̄n̄ar m̧ōn̄ā n̄an rejetake.

59 Im ālikin men kein ke eaar ilo̧k ilubwiljin armej ro, aaet, ilubwiljin armej ro raar kōjepelļo̧k er make jān riNipai ro im likūt etaer riZoram, kōnke kar tōl er jān juon em̧m̧aan etan Zoram—im ke eaar ilo̧k ilubwiljier, lo, ekar ettōr ioon im jujuri ioon laļ, em̧ool m̧ae ke eaar mej.

60 Im āindein jej lo jem̧ļo̧kin e eo eaar kaankeke iaļ ko an Irooj; im āindein jej lo bwe devil ejjāmin naaj rejetake ro nejin ilo raan eo āliktata, a ej kaiur im iperļo̧k er laļļo̧k n̄an hell.