1 Afei Alma kãa dɛm nsɛm yi n’ekyir no, wɔsomaa ma wɔkɔr ne nkyɛn kɛsee no dɛ wɔpɛ dɛ wohu dɛ sɛ wɔngye Nyankopɔn kor pɛr ndzi ama hɔn nsa aakã dɛm eduaba yi a ɔakã ho asɛm yi, anaadɛ wonsi dɛn ndua aba no, anaa asɛm no a ɔakã ho asɛm no, dza ɔkãa dɛ ɔsɛ dɛ wodua wɔ hɔn akoma mu no; anaadɛ wonsi dɛn nhyɛ ase mfa hɔn gyedzi nyɛ edwuma.

2 Na Alma see hɔn dɛ: Hwɛ, hom akã dɛ hom runntum nnsom hom Nyankopɔn osiandɛ wɔapam hom efi hom nhyiamudan mu. Na mbom hwɛ, mese hom dɛ, sɛ hom kã dɛ hom runntum nnsom Nyankopɔn a, nna hom fom kɛsenara, na ɔsɛ dɛ hom hwehwɛ kyerɛwsɛm no mu yie; sɛ hom dwen dɛ iyi na wɔdze kyerɛkyerɛɛ hom a, nna ɔno hom nntse ase.

3 Ana hom kaa dɛ hom akenkan dza Zenos, tsetse nkɔnhyɛnyi no kãe a ɔfa mpaabɔ anaa ɔsom ho no?

4 Na ɔkãa dɛ: Eyɛ mbɔbɔrhufo, O Nyankopɔn, osiandɛ ɔwo itsie me mpaabɔ, ber a mowɔ sar no do no mpo; nyew, ihun me mbɔbɔr ber a mobɔɔ mpaa wɔ hɔn a wɔyɛ m’atamfo ho no, ɔwo edan hɔn maa me.

5 Nyew, O Nyankopɔn, na ihun me mbɔbɔr ber a mosũi frɛɛ wo wɔ me kwã mu no; ber a mosũi frɛɛ wo wɔ me mpaabɔ mu no, na ɔwo itsiee me.

6 Na bio, O Nyankopɔn, ber a mesaan m’ekyir kɔr me fie no ɔwo itsiee me mpaabɔ.

7 Na ber a mesanee kɔr me pia mu no, O Ewuradze, na mobɔɔ mpaa maa wo no, ɔwo itsiee me.

8 Nyew, ɔwo ihu wo mba mbɔbɔr, sɛ wosũ frɛ wo a dɛ, ɔwo ibetsie hɔn na nnyɛ nyimpa bi a, ɔwo ibetsie hɔn.

9 Nyew, O Nyankopɔn, ɔwo ihun me mbɔbɔr, na itsiee mo sufrɛ wɔ mboanofo mu.

10 Nyew, na ɔwo so itsiee me ber a woyii me tokyen na m’atamfo buu me enyimtsia; nyew, itsiee mo sufrɛ, na wo bo fuuw m’atamfo, na ɔwo edze ebufuw sɛɛ hɔn ntsɛntsɛm.

11 Na ɔwo itsiee me osian m’amandzehu nye mo nokwardzi ntsi; na osian wo Ba no ntsi na ihun me mbɔbɔr dɛm, dɛm ntsi mobosũ afrɛ wo wɔ m’amandzehu nyina mu, na wo mu na m’enyigye wɔ; na ɔwo eyi w’atsɛmbu efi mo do osian wo Ba no ntsi.

12 Na afei Alma see hɔn dɛ: Ana hom gye kyerɛwsɛm no a tsetsemba kyerɛwee no dzi?

13 Hwɛ, sɛ hom gye dzi a, nna ɔsɛ dɛ hom gye dza Zenos kãe no dzi; na hwɛ, ɔsee dɛ: Ɔwo eyi w’atsɛmbu kɔ osian wo Ba no ntsi.

14 Afei hwɛ, m’enuanom, mepɛ dɛ mibisa hom dɛ hom akenkan kyerɛwsɛm no? Sɛ hom akenkan a, nna ɔyɛ dɛn na hom nngye Nyankopɔn ne Ba no nndzi?

15 Na wɔannkyerɛw dɛ Zenos nko na ɔkãa dɛm ndzɛmba yi ho nsɛm, na mbom Zenock so kãa dɛm ndzɛmba yi ho nsɛm—

16 Na hwɛ, ɔkãa dɛ: O Ewuradze, wo bo efuw nkorɔfo yi, osiandɛ wɔnntse w’ehumbɔbɔr a ɔwo osian wo Ba no ntsi edze ama hɔn no ase.

17 Na afei, mo nuanom, hom ehu dɛ tsetse nkɔnhyɛnyi a otsĩa ebien no so gyee Nyankopɔn ne Ba no ho dase, na osiandɛ nkorɔfo no enntum anntse ne nsɛm no ase ntsi wosiiw no abo ma owui.

18 Mbom hwɛ, nnyɛ ne nyinara nye iyi; nnyɛ dɛm nkorɔfo yinom nko na wɔkãa nsɛm a ɔfa Nyankopɔn ne Ba no ho no kyerɛɛ hɔn.

19 Hwɛ, Moses so kãa noho asɛm; nyew, na hwɛ wɔmaa ngyinahɔmadze bi do sii hɔ wɔ sar no do dɛ, obiara a ɔbɔhwɛ no obenya nkwa. Na dodowara hwɛe na wonyaa nkwa.

20 Mbom kumaabi na wɔtsee dɛm ndzɛmba no ase, osian hɔn akomadzen ntsi. Na mbom dodowara wɔ hɔ a hɔn akoma yɛɛ dzen araa ma wɔannhwɛ, ma dɛm ntsi wɔherae. Afei siantsir a ɔnam do ma wɔannhwɛ nye dɛ wɔanngye enndzi dɛ ɔbɛsa hɔn yarba.

21 O m’enuanom, sɛ hom ma hom enyi do hwɛ ara gyan na sɛ hom benya ayarsa a, ebɛnadze ntsi na hom nnhwɛ no ntsɛm, anaa hom pɛ dɛ hom dze ekyingye pirim hom akoma, yɛ akwadwer, ma dɛm ntsi hom mma hom enyi do nnhwɛ, amma hom annhera?

22 Sɛ dɛm a, mbusu bɛba hom do; na sɛ nnyɛ dɛm a, ɔno hom mma hom enyi do na hom nhyɛ ase ngye Nyankopɔn ne Ba no ndzi, ama ɔaaba abɔpon no nkorɔfo, na ɔbɛba ebohu amandze na oewu dze noho abɔ werdam etua hɔn bɔn; na dɛ ɔbɔsoɛr bio efi owu mu a ɔbɛma owusoɛr aba, ama adasa nyina aaba ebegyina n’enyim, ma oebu hɔn atsɛn dɛ mbrɛ hɔn ndwuma tse wɔ atsɛmbu da a odzi ewiei no mu.

23 Na afei, m’enuanom, mepɛ dɛ hom dua asɛm yi wɔ hom akoma mu, na sɛ ɔhyɛ ase dɛ ɔreyeyer a hom mfa hom gyedzi nkora do yie. Na hwɛ, ɔbɛyɛ dua, na oenyin wɔ hom mu dze akɔ daapem nkwa mu. Na Nyankopɔn ndua ne Ba no n’enyigye do mma hom adzesoa nyɛ har. Na sɛ hom pɛ nkotsee dze a hom botum mpo ayɛ iyi nyinara. Amen.