1 Anakko, denggem dagiti balikasko; ta isapatak kenka, a no la ketdi tungpalem dagiti bilin ti Dios rumang-aykanto iti daga.

2 Kayatko nga aramidem ti kas iti naaramidko, a manglagip iti pannakaadipen dagiti ammatayo; agsipud ta naadipenda, ket awan ti mabalin a mangwayawaya kadakuada malaksid iti Dios ni Abraham, ken ti Dios ni Isaac, ken ti Dios ni Jacob; ket pudno nga insalakanna ida kadagiti rigrigatda.

3 Ket ita, O anakko a Helaman, kitaem, addaka iti kinaagtutubom, ket ngarud, dawatek kenka a denggem dagiti balikasko ken agsursuroka kaniak; agsipud ta ammok nga asino man nga agtalek iti Dios matarabayandanto kadagiti pannubokda, ken kadagiti parikutda, ken kadagiti rigrigatda, ket maitan-okdanto iti maudi nga aldaw.

4 Ket saankko kayat a panunotem nga ammok iti bagik—saan nga iti naindagaan ngem ketdi iti naespirituan, saan nga iti nailubongan ngem iti Dios.

5 Ita, kitaem, kunak kenka, no saanak a nayanak iti Dios saanko koma naammuan dagitoy a bambanag; ngem ti Dios, babaen ti ngiwat ti naespirituan nga anghelna impakaammona dagitoy a bambanag kaniak, saan a gapu ti ania man a pannakaikari iti bagik;

6 Agsipud ta napanak a kaduak dagiti lallaki nga annak ni Mosiah, ikagumaak a dadaelen ti simbaan ti Dios; ngem kitaem, imbaon ti Dios ti nasantuan nga anghelna a mamagsardeng kadakami iti dalan.

7 Ket kitaem, nagsao kadakami, a kas man la gurruod, ket nagkintayeg ti intero a daga a paypayatenmi; ket nadalupokami amin iti daga, gapu ta naringbawankami iti buteng iti Apo.

8 Ngem kitaem, kinuna kaniak ti timek: Bumangonka. Ket bimmangon ken timmakderak, ket nakitak ti anghel.

9 Ket kinunana kaniak: No kayatmo a saan a madadael ti bagim, saanmon a gandaten a dadaelen ti simbaan ti Dios.

10 Ket napasamak a nadalupoak iti daga; ket saanko a naungap ti ngiwatko iti uneg ti tallo nga aldaw ken tallo a rabii, wenno naaramatko dagiti sakak ken imak.

11 Ket ad-adu pay a bambanag ti imbaga kaniak ti anghel, a nangngegan dagiti kakabsatko, ngem saanko nangngeg ida; agsipud ta idi nangngegko dagiti balikas a—no kayatmo a saan a madadael ti bagim, saanmon a gandaten a dadaelen ti simbaan ti Dios—kinayammetannak ti nakaro a buteng ken pannakasdaaw ta nalabit a kurang la a madadaelak, isu a nadalupoak iti daga ket saanakon a makangngeg.

12 Ngem nairakeddak iti agnanayon a pannakatuok, agsipud ta naburiboran ti kararuak agingga iti kakaruan a kasasaad ken naraked iti amin a basbasolko.

13 Wen, nalagipko amin dagiti basolko ken ti kinadangkesko, gapuna a natutuokak iti saem ti impierno; wen, nakitak nga immalsaak a maibusor iti Diosko, ken saanko a natungpal dagiti nasantuan a bilinna.

14 Wen, ken adu ti pinapatayko kadagiti annakna, wenno insungsongko ida iti pannakadadael; wen, ken iti pakagupgupanna adu unay ti kinadangkesko, nga iti laeng panangpanunotko a sumaklang iti sanguanan ti Dios nairaked ti kararuak iti saan a mayebkas a panagamak.

15 O, napanunotko, a mabalinnak a mapapanaw ken agbalin a maungaw agpadpada a karuruak ken bagik, tapno saanak a maidatag iti sanguanan ti Diosko, a maukom kadagiti aramidko.

16 Ket ita, narakeddak iti uneg ti tallo nga aldaw ken tallo a rabii, uray pay kadagiti saem ti nailunod a kararua.

17 Ket napasamak a bayat a narakeddak iti iti panagtutuok, bayat ti pannakaburiborko babaen iti lagip ti adu a basbasolko, kitaem, nalagipko met a nangngegko a nagpadto ti amak kadagiti tattao maipanggep iti yaay ti maysa a Jesucristo, ti Anak ti Dios, a mangsubbot kadagiti basbasol ti lubong.

18 Ita, bayat a nakemmeg ti panunotko iti daytoy a panunot, inyararaw ti pusok: O Jesus, sika nga Anak ti Dios, kaasiannak koma, siak nga adda iti lungog ti kinapait, ken napalawlawanak kadagiti awan inggana a kawar ni patay.

19 Ket ita, kitaem, idi mapanunotko daytoy, saankon a malagip dagiti saemko; wen, saanakon a nariribukan ti lagip dagiti basbasolko.

20 Ket o, anian a rag-o, ken anian a nakaskasdaaw a lawag ti nakitak; wen, napno ti kararuak iti rag-o a nalinab-awan a kas iti saemko!

21 Wen, kunak kenka, anakko, nga awan ti mabalin a nain-inaka ken napapait pay ngem kadagiti saemko. Wen, ket kunak manen kenka, anakko, nga iti sabali a bangir, awanen ti napalaus ken nasamsam-it pay ngem iti rag-ok.

22 Wen, impapanko a nakitak, uray ti kas nakita ni Lehi nga amatayo, a nakatugaw ti Dios iti tronona, a napalawlawan iti saan a mabilang a rimmuong dagiti anghel, iti galad nga agkankanta ken agdaydayaw iti Dios; wen, ket kinalikaguman ti kararuak nga adda koma sadiay.

23 Ngem kitaem, napasubli manen ti pigsa dagiti imak ken sakak, ket timmakderak, ket impakitak kadagiti tattao a nayanakak iti Dios.

24 Wen, ket manipud iti dayta a kanito agingga ita, awan ressatna ti panagtrabahok, tapno bareng adda karkararua a mapagbabawik; tapno maiparamanko met kadakuada ti napalaus a rag-o a naramanak; tapno mayanakda met iti Dios, ken mapno iti Espiritu Santo.

25 Wen, ket ita kitaem, O anakko, inikkannak ti Apo iti napalaus a rag-o iti bunga dagiti trabahok;

26 Ta gapu iti balikas nga imbingayna kaniak, kitaem, adu ti nayanak iti Dios, ken nakaraman iti naramanak, ken nakapagsinnarang a sangunsango a kas iti nakitak; ngarud ammoda dagitoy banag nga imbagak, a kas iti pannakaammok; ken iti Dios ti pannakaammo nga adda kaniak.

27 Ket napannaranayan iti nadumaduma a pannubok ken parikut, wen, ken amin a kita ti panagsagaba; wen, winayawayaannak ti Dios iti pagbaludan, ken kadagiti pannakaadipen ken manipud iti patay; wen, ket nagtalekak kenkuana, ket wayawayaannakto pay laeng.

28 Ket ammok nga pagungarennakto iti maudi nga aldaw, a makipagtaeng kenkuana nga addaan iti dayag; wen, ket dayawekto iti agnanayon, agsipud ta inruarna dagiti ammatayo iti Egipto, ken linemmesna dagiti Egipsio iti Nalabaga a Baybay; ket inturongna ida babaen ti bilegna iti naikari a daga; wen, winayawayaanna ida manipud iti pannakaadipen ken pannakabalud iti nadumaduma a panawen.

29 Wen, ken kasta met nga inruarna dagiti ammatayo iti daga ti Jerusalem; ken kasta met a, babaen ti awan inggana a bilegna, winayawayaanna ida iti pannakaadipen ken pannakabalud, manipud iti nadumaduma a panawen agingga iti agdama; ket kanayon a pinagtalinaed a manglaglagip iti pannakabaludda; wen, ken nasken a pagtalinaeddem koma met a manglaglagip, a kas iti inaramidko, ti pannakabaludda.

30 Ngem kitaen, anakko, saan la a daytoy; agsipud ta nasken nga ammom koma a kas iti pannakaammok, a no la ketdi tungpalem dagiti bilin ti Dios rumang-ayka iti daga; ket nasken nga ammom koma met a no dimo tungpalen dagiti bilin ti Dios maisinakanto iti imatangna. Ita mayannurot daytoy iti balikasna.