1 Anakko, denggem dagiti balikasko, ta kunak kenka, a kas iti imbagak ken ni Helaman, a no la ketdi tungpalem dagiti bilin ti Dios rumang-aykanto iti daga; ken no saanmo tungpalen dagiti bilin ti Dios mailaksidkanto iti imatangna.

2 Ket ita, anakko, agtalekak a napalalonto ti rag-ok kenka, gapu iti kinatibker ken kinapudnom iti Dios; agsipud ta inrugim iti kinaagtutubom nga agtalek iti Apo a Diosmo, kasta met a namnamaek nga ituloymo ti panagtungtungpalmo kadagiti bilinna; agsipud ta nagasat ti makaibtur agingga iti panungpalan.

3 Kunak kenka, anakko, a napalalon ti rag-ok kenka, gapu iti kinapudnom ken kinaregtam, ken ti kinaanusmo ken ti naunday a panagituredmo kadagiti tattao dagiti Zoramita.

4 Agsipud ta ammok a naadipenka; wen, ken kasta met nga ammok a nabatoka gapu iti balikas; ken inibturam amin dagitoy a banag a siaanus gapu ta ti Apo adda kenka; ket ita ammom nga isalakannaka ti Apo.

5 Ket ita anakko, a Shiblon, kayatko a laglagipem, nga agingga nga adda panagtalekmo iti Dios kasta met ti pannakawayawayam kadagiti pannubok, ken ti parparikutmo, ken ti rigrigatmo, ket maitan-okkanto iti maudi nga aldaw.

6 Ita, anakko, saanko kayat a panunotem nga ammok dagitoy a banag iti bagbagik laeng, ngem ti Espiritu ti Dios nga adda kaniak ti nangipakaammo kadagitoy a banag kaniak; agsipud ta no saanak koma a nayanak iti Dios saanko naammuan dagitoy a banag.

7 Ngem kitaem, iti naindaklan a kaasi ti Apo imbaonna ti anghel a mangipakdaar kaniak a nasken nga isardengko ti aramid a panagdadael kadagiti taona; wen, ket nakitak ti anghel iti sangon-sango, ket nakisao kaniak, ket kasla gurruod ti timekna, ket dinayyegna ti intero a daga.

8 Ket napasamak a tallo nga aldaw ken tallo a rabii a nagsagabaak iti kapaitan a saem ken sanaang iti kararuak; ket iti kaano man, agingga nga immawagak iti Apo a Jesucristo iti kaasina, a naawatko ti pannakaugas dagiti basolko. Ngem kitaen, immawagak kenkuana ket nasarakak ti kappia ti kararuak.

9 Ket ita, anakko, naibagakon kenka daytoy tapno masursurom ti pagsiriban, tapno masursurom kaniak nga awan ti sabali a wagas wenno pamuspusan ti pakaisalakanan ti tao, iti ken babaen laeng ni Cristo. Kitaem, isu ti biag ken silaw ti lubong. Kitaem, isu ti balikas ti kinapudno ken kinalinteg.

10 Ket ita, iti pannakairugimon a mangisuro iti balikas kayatko met unay nga ituloymo ti mangisuro; ken kayatko a naregta ken nateppelka iti amin a bambanag.

11 Kitaem a saanka napangato iti kinapalangguad; wen, kitaem a saanka agpasindayag iti bukodmo a pagsiriban, wenno ti nalaus a pigsam.

12 Aramatem ti kinabatad, ngem saan nga aglablabes a panangipaawat; ken kasta met a kitaem a pengdam amin a riknam, tapno mapnoka iti ayat; kitaem a liklikam ti kinasadut.

13 Saanka agkararag a kas iti aramid dagiti Zoramita, ta nakitamon nga agkararagda tapno mangngeg dagiti tattao, ken tapno maidaydayaw iti kinasiribda.

14 Saanmo kunaen: O Dios, agyamanak ta nalalaingkami ngem dagiti kabsatmi; ngem kunam ketdi: O Apo, pakawanem ti saan a pannakaikarik, ken laglagipem a kaasian dagiti kabsatko—wen, awatem ti saanmo pannakaikari iti sango ti Dios iti amin a kanito.

15 Ket sapay koma ta bendisionan ti Apo ti kararuam, ken awatennaka iti pagarianna iti maudi nga aldaw, nga agtugaw a sikakappia. Ita mapanka, anakko, ket isurom ti balikas kadagitoy a tao. Agparbengka. Anakko, agpakadaakon.