1 Me babanyin, tsie me nsɛm, na mekã dza mekãa kyerɛɛ Helaman no, kyerɛ wo so dɛ susuampaara dɛ ibedzi Nyankopɔn ne mbrasɛm do no, ebɛyɛ prɔmprɔm wɔ asaase yi do; na susuampaara dɛ innkedzi Nyankopɔn ne mbrasɛm do no, wobotwa wo efi n’enyim akyen.

2 Na afei me babanyin, megye dzi dɛ mibenya enyigye kɛse wɔ woho, osiandɛ egyina pintsinn na edze nokwar ama Nyame; na dɛ mbrɛ wo mberantsɛber mu ebɔkɔ do adan Ewuradze wo Nyankopɔn no, dɛmara mpo so na mowɔ enyidado dɛ ebɔkɔ do edzi ne mbrasɛm do; na nhyira akã nyia obetsim ekodu ewiei.

3 Me ba, mese wo dɛ, menya enyigye wɔ woho dada, osian wo nokwardzi nye wo mbɔdzembɔ nye w’abotar, nye wo penkyɛr a inyae wɔ ber a ewɔ Zoramfo mu no ntsi.

4 Na minyim dɛ wɔkyekyeer wo; nyew, na minyim so dɛ wosiiw wo abo wɔ asɛm no ntsi; na inyaa abotar dze sɔɔw dɛm ndzɛmba yinom nyina osiandɛ nna Ewuradze kã woho; na afei inyim dɛ Ewuradze na oyii wo fii mu.

5 Na afei me babanyin, Shiblon, mepɛ dɛ ekaa dɛ mber dodow a edze wo werɛ twer Nyame mu no dɛmara so mpo na obeyi wo efi wo nsɔhwɛ, nye wo haw, nye w’amandzehu mu, na ɔbɛma wo do wɔ da a odzi ewiei no mu.

6 Afei, me babanyin, memmpɛ dɛ ebɔdwen dɛ emi mankasa na minyim dɛm ndzɛmba yinom, mbom Nyankopɔn no Sunsum a ɔwɔ mo mu no nna ɔma muhu dɛm ndzɛmba yinom; na sɛ Nyankopɔn annwo me a nkyɛ murunnhu dɛm ndzɛmba yinom.

7 Mbom hwɛ, Ewuradze nam n’ehumbɔbɔr do somaa no bɔfoe dɛ ɔmbɛkã nkyerɛ me dɛ mingyaa ɔsɛɛ ndwuma no wɔ no dɔm mu; nyew, na mehu ɔbɔfo enyim na enyim, na ɔnye me kasae, na ne ndze tse dɛ mbrɛ sor repaapaa mu, na ɔwosoow asaase nyinara.

8 Na ɔbaa dɛ nda ebiasa nye adzesaa ebiasa nyinara mu nna me kra ruhu amandze yaayaw ma ɔrepen; na oenngyaa da, kesii dɛ musũi frɛɛ Ewuradze Jesus Christ dɛ onhu me mbɔbɔr, no mu na minyaa me a bɔnfakyɛ. Mbom hwɛ, musũi frɛɛ no na me kra nyaa asomdwee.

9 Na afei, me babanyin, makã akyerɛ wo dɛ sũa nyansa, ama esũa efi mo hɔ dɛ kwan fofor bi nnyi hɔ anaadɛ biribiara nnyi hɔ a wobodua do dze agye nyimpa nkwa, gyedɛ wɔnam Christ nko do. Hwɛ, ɔno nye nkwa nye wiadze kan no. Hwɛ, ɔno nye nokwar nye tsenenee asɛm no.

10 Na afei, dɛ mbrɛ ahyɛ ase rekyerɛkyerɛ asɛm no, dɛmara so mpo na mepɛ dɛ ebɔsɔw do akyerɛkyerɛ; na mepɛ dɛ ebɔ mbɔdzen na eyɛ botoo so wɔ adze nyina mu.

11 Hwɛ ma ammema woho do wɔ ahantanyɛ mu; nyew, hwɛ ma enntuw wɔ w’ankasa wo nyansaa mu, anaa wɔ w’ahoɔdzen kɛse mu.

12 Fa ndamyɛ, na mbom mma ɔnntra do; na hwɛ na hom w’adwen mu nkã tse so do aama ɔdɔ aahyɛ wo mã; hwɛ na yi enyihaw akwa.

13 Mma mmbɔ mpaa dɛ mbrɛ Zoramfo no yɛ no, na ehu dɛ wɔbɔ mpaa ma nyimpa atse ma wɔaakamfo hɔn nyansaa.

14 Mma nnkã dɛ: O Nyankopɔn, meda wo ase dɛ yeye sen hɛn enuanom; na mbom kã dɛ: O Ewuradze, fa m’esintɔ kyɛ me, na hu m’enuanom mbɔbɔr—nyew, hu w’esintɔ wɔ Nyame enyim aber nyina.

15 Na ma Ewuradze nhyira wo kra, na ɔngye wo nkɔ n’ahenman mu wɔ da a odzi ewiei no mu, ama aakɛtsena hɔ asomdwee mu. Afei kɔ, me babanyin, na kɛkyerɛkyerɛ dɔm no asɛm no. Yɛ botoo. Me babanyin, nantseyie.