1 Ket ita, anakko, ad-adu ti ibagak kenka ngem iti naibagak iti kabsatmo; ta kitaen, saanmo kadi a napaliiw ti kinatibker ti kabsatmo, ti kinapudnona, ken ti kinaregtana a mangtungpal kadagiti bilin ti Dios? Kitaem, saan kadi nga impakitana ti nasayaat a pagulidanan kenka?

2 Agsipud ta saanmo nga ipangag unay dagiti balikasko a kas iti kabsatmo, kadagiti Zoramita. Ita daytoy ti busorek kenka; nagtultuloyka a nagpasindayag iti pigsa ken siribmo.

3 Ket saan la a daytoy, anakko. Nagaramidka iti nakapaldaang kaniak; agsipud ta binaybay-am ti naespirituan a panagserbim ket napanka idiay ili ti Siron a sakup dagiti Lamanita, a nangsurot ti balangkantis a ni Isabel.

4 Wen, inagawna ti adu a puso, ngem saanmo maipambar daytoy, anakko. Inkasom koma ti naespirituan a panagserbi a naitalek kenka.

5 Saanmo kadi ammo, anakko, a makarimon dagitoy a bambanag iti imatang ti Apo; wen, narimrimon ngem iti amin a basol malaksid iti panangsayasay iti awanan basol a dara wenno panangilibak iti Espiritu Santo?

6 Agsipud ta kitaen, no ilibakmo ti Espiritu Santo nga idi naminsan addaan iti lugar kenka, ket ammom nga inlibakmo, kitaem, daytoy ti basol a saan a mapakawan; wen, ken siasino man a mamapatay a maibusor iti silaw ken pannakaammo iti Dios, saan a nalaka kenkuana ti manggun-od iti pammakawan; wen, kunak kenka, anakko, a saan a nalaka kenkuana ti manggun-od iti pammakawan.

7 Ket ita, anakko, sapay koma iti Dios ta saanka a nakabasol iti kasta ti kadagsenna a basol. Saanko a dakamaten dagiti basolmo, a mangriribuk iti kararuam, no saan nga agpaay iti pagimbagam.

8 Ngem kitaen, saan a mabalin nga ilemmengmo ti basolmo iti Dios; ket malaksid no agbabawika agbalindanto a pammaneknek a maibusor kenka iti kamaudianan nga aldaw.

9 Ita anakko, kayatko nga agbabawika ken iwaksim dagiti basolmo, ket saanmo nga ikaso ti paggarteman dagita matam; ngem yadayom ti bagim kadagitoy amin a bambanag; agsipud ta malaksid no aramidem daytoy saanmo a matawid ti pagarian ti Dios. O, laglagipem, ken awatem, ken yadayom ti bagim kadagitoy a bambanag.

10 Ket bilinenka nga awatem ti pammalakad dagiti in-inauna a lallaki a kakabsatmo kadagiti ar-aramidmo; ta kitaen, addaka iti kinaagtutubom, ket kasapulam ti kibin dagiti kakabsatmo. Ken ipangagmo ti pammalakadda.

11 Saanmo palugodan ti bagim a maallilaw iti uray ania nga ubbaw wenno minamaag a banag; saanmo palugodan ti sairo a maallilaw manen iti pusom kadagidiay dakes a balangkantis. Kitaen, O anakko, anian a nalaus a kinadangkes ti inyegmo kadagiti Zoramita; gapu ta idi nakitada ti kababalinmo saandan a namati kadagiti balikasko.

12 Ket ita kinuna kaniak ti Espiritu ti Apo: Bilinem dagiti annakmo nga agaramid iti nasayaat, amangan no allilawenda ti puso ti adu a tattao iti pannakadadael; ngarud, bilinenka, anakko, nga agbutengka iti Dios, nga isardengmo dagiti kinadangkesmo;

13 Ta agkamangka iti Apo iti amin a panunot, kabaelan, ken pigsam; tapno saanmonto pulos nga allilawen dagiti puso ti dadduma pay nga agaramid iti dakes; ngem agsublika ketdi kadakuada, ket akuem dagiti basol ken biddut a naaramidmo.

14 Saanmo a sapulen ti kinabaknang wenno dagiti ubbaw a bambanag iti daytoy a lubong; gapu ta kitaen, saanmo a maitugot ida.

15 Ket ita anakko, ibagak kenka ti maipapan iti yaay ni Cristo. Kitaem, kunak kenka, pudno nga umayto a mangikkat kadagiti basol ti lubong; wen, umayto a mangiwaragawag ti naragsak a damag iti pannakaisalakan dagiti taona.

16 Ket ita, anakko, daytoy ti nakaayabam a naespirituan a panagserbi, ti mangiwaragawag ti naragsak a damag kadagitoy a tattao, a mangisagana kadagiti panunotda; wenno tapno dumteng ti pannakaisalakan kadakuada, tapno maisaganada ti pampanunot dagiti annakda a dumngeg ti balikas iti panawen ti yaayna.

17 Ket ita paginanaek ti panunotmo iti daytoy a banag. Kitaen, masdaawka no apay a masapul a maammuan dagitoy a bambanag iti nasaksakbay pay. Kitaen, kunak kenka, saan kadi a napateg iti Dios ti kararua iti daytoy a panawen a kas met iti kararua iti panawen ti yaayna?

18 Saan kadi a nasken a maipakaammo kadagitoy a tattao ken kasta met kadagiti annakda ti plano ti pannakasubbot?

19 Saan kadi a kas iti kalaka iti daytoy a panawen ti panangibaon ti Apo iti anghelna a mangiwaragawag kadagitoy naragsak a damag kadatayo ken kadagiti annaktayo, wenno kas iti panawen kalpasan ti yaayna?