1 Ut anajwan, at walal, nink’e reetal naq wan chik k’a’ruhaq li naxik wi’ aach’ool chi k’oxlak, li ink’a’ nakatru chixtawb’al ru—a’an chirix xtiikal ru lix na’leb’ li Dios rik’in xk’eeb’al laj maak chixtojb’al lix maak; xb’aan naq nakayal xk’oxlankil naq moko tiik ta naq laj maak taateneb’aaq chi wank sa’ rahilal.

2 Anajwan k’e reetal, at walal, tinch’olob’ chawu li na’leb’ a’in. Xb’aan naq k’e reetal, chirix naq li Qaawa’ Dios kixtaqla li xb’een qana’ qayuwa’ chi elk chaq sa’ li awimq Eden, re xk’anjelankil li ch’och’ li ke’isiik wi’ chaq—relik chi yaal, kirisi li winq, ut kixk’e sa’ releb’ saq’e sa’ li awimq Eden li anjel aj k’aak’alenel, ut jun li lochlookil yok’leb’ ch’iich’ li naxsuti rib’ yalaq b’ar, re xk’aak’alenkil li che’ re li yu’am—

3 Anajwan, naqil naq okenaq li winq jo’ chanru li Dios, chi naxnaw li us ut li ink’a’ us; ut re naq ink’a’ tixye’ li ruq’, ut tixchap ajwi’ ru li che’ re li yu’am, ut taawa’aq ut taawanq chi yo’yo chi junelik, li Qaawa’ Dios kixk’e li anjel aj k’aak’alenel ut li lochlookil yok’leb’ ch’iich’, re naq ink’a’ tixyal li ru che’—

4 Ut chi jo’kan naqil, naq kiwan jun kutan k’eeb’il re li winq re tixjal xk’a’uxl, relik chi yaal, jun kutan re xyalb’al rix, jun kutan re xjalb’al xk’a’uxl ut k’anjelak chiru li Dios.

5 Xb’aan naq k’e reetal, wi ta laj Adan tikto kixye’ li ruq’, ut kixyal li ru li che’ re li yu’am, kiwan raj chi yo’yo chi junelik, jo’ chanru li raatin li Dios, ut maak’a’aq raj xnumik li kutan re xjalb’al xk’a’uxl; relik chi yaal, ut jo’kan ajwi’ li raatin li Dios sachsooq raj xyaalal, ut li nimla k’uub’anb’il na’leb’ re li kolb’a-ib’ kisachman raj xwankil.

6 A’b’an k’e reetal, kiteneb’aak sa’ xb’een li winq naq taakamq—jo’kan ut, jo’ chanru naq eb’ a’an ke’isiik chaq chiru li che’ re li yu’am, jo’kan ajwi’ te’isiiq chaq sa’ xb’een li ch’och’—ut li winq ki’ok chi sachenaq chi junelik, relik chi yaal, ke’ok choq’ t’anenaqil winq.

7 Anajwan ut, nakawil rik’in a’in naq li xb’een qana’ qayuwa’ ke’isiik chaq chiru li Qaawa’, jo’ chanru li yu’am a’in jo’ ajwi’ chanru li musiq’ej, ut chi jo’kan naqil naq ke’ok chi taqlaak xb’aan xtaaqenkil li rajomeb’ a’an.

8 Anajwan k’e reetal, moko aajel ta ru naq li winq taakole’q chiru xnumsinkil li kamk re li yu’am a’in, xb’aan naq a’an tixsach raj li nimla k’uub’anb’il na’leb’ re sahil ch’oolejil.

9 Jo’kan ut, rik’in naq li aamej maajo’q’e naru nakam, ut li t’ane’k kixk’am sa’ xb’eeneb’ chixjunil li winq jun li musiq’ejil kamk, xkomon li re li yu’am a’in, malaj ut, ke’isiik chaq chiru li Qaawa’, jo’kan naq ki’aje’ ru naq eb’ li winq te’kole’q chiru xnumsinkil li musiq’ejil kamk a’in.

10 Jo’kan ut, rik’in naq okenaqeb’ choq’ aj rahol tz’ejwalej, aj atawinel, ut jo’eb’ aj tza, chi akeb’ re chi jo’kan, li wanjik a’in re yalok-ix ki’ok choq’ jun wanjik re xkawresinkileb’ rib’; ki’ok choq’ jun kawresink-ib’.

11 Ut anajwan chijultiko’q aawe, at walal, wi ta maak’a’ li k’uub’anb’il na’leb’ re li tojb’al-ix, (wi ta tz’eqb’il) naq kamenaqeb’, tikto ke’wan raj li raam sa’ rahil ch’oolejil, rik’in naq isinb’ileb’ chaq chiru li Dios.

12 Ut anajwan, maajun na’leb’ kiwan taaruuq te’kole’q wi’ li winq chiru li t’anenaqil wanjik a’in, li kixk’am chaq li winq sa’ xb’een xb’aan li q’etok chaq’rab’ kixb’aanu chaq a’an;

13 Jo’kan naq jo’ chanru li tiik ruhil na’leb’, ink’a’ raj taaruuq taak’ehe’q chi uxmank li k’uub’anb’il na’leb’ re li tojb’al-ix, ka’ajwi’ wi eb’ li winq te’xjal xk’a’uxl sa’ li yalok-ix wanjik a’in; relik chi yaal, li kawresink-ib’ wanjik a’in; xb’aan naq wi ta moko jo’kan ta taateneb’aaq, li uxtaan ink’a’ raj taaruuq chi k’anjelak chi ink’a’ tixsach xk’anjel li tiik ruhil na’leb’. Anajwan, lix k’anjel li tiik ruhil na’leb’ ink’a’ taaruuq taasachmanq; wi ta jo’kan, li Dios tixkanab’ raj wank choq’ Dios.

14 Ut chi jo’kan naqil naq chixjunileb’ li winq t’anenaqeb’ chaq, ut ke’wan chi chapb’il xb’aan li k’a’ru tiik ru; relik chi yaal, lix tiik ruhil na’leb’ li Dios, li kixteneb’ sa’ xb’eeneb’ chi junajwa naq te’isiiq chaq chiru.

15 Ut anajwan, ink’a’ raj taaruuq taak’ehe’q chi uxmank li k’uub’anb’il na’leb’ re uxtaan wi ta ink’a’ taa’uxq jun xtojb’al rix li maak; jo’kan naq li Dios ajwi’ naxtoj rix lix maak li ruchich’och’, re xk’eeb’al chi uxmank li k’uub’anb’il na’leb’ re uxtaan, re xk’eeb’al jo’ nimal elajinb’il xb’aan li tiik ruhil na’leb’, re naq li Dios a’anaq jun li Dios tz’aqal re ru ut tiik xna’leb’, ut jo’kan ajwi’ jun li Dios aj uxtaan.

16 Anajwan, ink’a’ raj taaruuq taachalq li jalb’a-k’a’uxlej reheb’ li winq wi ta maak’a’ jun tojb’a-maak, li wan chi junelik jo’ chanru taawanq xyu’am li aamej, xaqab’anb’il chi junpak’al li k’uub’anb’il na’leb’ re sahil ch’oolejil, li wan ajwi’ chi junelik jo’ chanru xyu’am li aamej.

17 Anajwan, chan raj ru taaruuq junaq winq chixjalb’al xk’a’uxl wi ta ink’a’ namaakob’? Chan raj ru taaruuq chi maakob’k wi ta maak’a’ li chaq’rab’? Chan raj ru taaruuq taawanq junaq chaq’rab’ wi ta maak’a’ jun li tojb’a-maak?

18 Anajwan, wan jun li tojb’a-maak xaqab’anb’il, ut jun li chaq’rab’ tiik ru k’eeb’il, li kixk’am xyot’ik li reek’ob’aal xch’ool li winq.

19 Anajwan, wi ta maajun chaq’rab’ k’eeb’il—wi taakamsinq junaq winq, a’an taakamq—ma tixxuwa raj naq taakamq wi tixb’aanu li kamsink?

20 Ut jo’kan ajwi’, wi ta maajun chaq’rab’ k’eeb’il chirix li maak, eb’ li winq ink’a’ raj te’xxuwa maakob’k.

21 Ut wi ta maajun chaq’rab’ k’eeb’il, wi te’maakob’q li winq k’a’ raj ru taaruuq tixb’aanu li tiik ruhil na’leb’, ut jo’kan ajwi’ li uxtaan, xb’aan naq maajun xwankileb’ taawanq raj sa’ xb’een ani li yo’ob’tesinb’il.

22 A’b’anan, k’eeb’il jun li chaq’rab’, ut xaqab’anb’il jun li tojb’a-maak, ut kanab’anb’il jun li jalb’a-k’a’uxlej; ut a’ jalb’a-k’a’uxlej a’an, eechaninb’il xb’aan li uxtaan; wi ut ink’a’, li k’a’ru tiik ru nareechani li ani yo’ob’tesinb’il ut naxk’anjela li chaq’rab’, ut li chaq’rab’ naxk’e li tojb’a-maak; wi ta ink’a’ jo’kan, taasachmanq raj xk’anjel li tiik ruhil na’leb’, ut li Dios tixkanab’ raj wank choq’ Dios.

23 A’b’an li Dios moko naxkanab’ ta wank choq’ Dios, ut li uxtaan nareechani li yot’b’ileb’ xch’ool; ut nachal li uxtaan xb’aan lix tojb’al rix li maak, ut lix tojb’al rix li maak naxk’e chi uxmank lix waklijikeb’ li kamenaq chi yo’yo; ut lix waklijikeb’ li kamenaq chi yo’yo naxk’ameb’ wi’chik li winq chiru li Dios; ut chi jo’kan k’ojob’anb’ileb’ wi’chik chi wank chiru, re taaraqe’q aatin chirixeb’ jo’ chanru xk’anjeleb’, jo’ chanru li chaq’rab’ ut li tiik ruhil na’leb’.

24 Xb’aan naq k’e reetal, li tiik ruhil na’leb’ naxk’e chi k’anjelak chixjunil li elajinb’il xb’aan, ut jo’kan ajwi’ li uxtaan nareechani chixjunil li k’a’ru re; ut chi jo’kan, maa’ani chik nakole’, ka’ajeb’ wi’ li yot’b’ileb’ xch’ool chi yaal.

25 K’a’ put ru, ma nakak’oxla naq li uxtaan naru chi elq’ak chiru li k’a’ru tiik ru? Ninye aawe, Ink’a’, maamin taaruuq. Wi ta jo’kan, li Dios tixkanab’ raj wank choq’ Dios.

26 Ut chi jo’kan li Dios naxk’e chi uxmank xnimal ru li rajom re junelik, li kawresinb’il chalen chaq sa’ xk’ojlajik li ruchich’och’. Ut chi jo’kan nachal lix kolb’aleb’ ut lix tojb’aleb’ rix li winq, ut jo’kan ajwi’ lix sachlijikeb’ ut lix rahileb’ xch’ool.

27 Jo’kan ut, at walal, ani na’ajok re chalk naru chi chalk ut chixyalb’al xha’il li yu’amej chi moko ramb’il ta; ut yalaq ani ink’a’ na’ajok re chalk, a’an moko minb’il ta ru chi chalk; a’b’anan sa’ roso’jik li kutan taak’ojob’aaq wi’chik re jo’ chanru lix b’aanuhom.

28 Wi xrataw xb’aanunkil li ink’a’ us, ut ink’a’ xjal xk’a’uxl chiru lix kutan, k’e reetal, taab’aanumanq li ink’a’ us re, jo’ chanru lix k’ojob’ahom wi’chik li Dios.

29 Ut anajwan, at walal, nawaj naq ink’a’ chik taakanab’ li k’a’aq re ru a’in chach’a’ajkilankil, ut ka’ajwi’ laa maak chakanab’ chach’a’ajkilankil, rik’in li ch’a’ajkilank a’an li taakub’sinq aawe sa’ li jalb’a-k’a’uxlej.

30 At walal, nawaj naq ink’a’ chik taatz’eqtaana xtiikal ru lix na’leb’ li Dios. Maak’oxla xk’ulb’al yal ta ka’ch’in xtiikilal aach’ool chirixeb’ laa maak, rik’in xtz’eqtaanankil xtiikal ru lix na’leb’ li Dios; kanab’ b’an laa’at naq lix tiikal ru xna’leb’ li Dios, ut li ruxtaan, ut xnajtil li royb’enihom taawanq anchal xwankil sa’ laa ch’ool, ut kanab’ a’an chakub’sinkil sa’ poqs sa’ li tuulanil ch’oolej.

31 Ut anajwan, at walal, b’oqb’ilat xb’aan li Dios chixjultikankil li aatin chiru li tenamit a’in. Ut anajwan, at walal, k’am laa b’e, jultika li aatin rik’in li yaal ut li tiikal k’a’uxlej, re naq taak’ameb’ li aamej sa’ li jalb’a-k’a’uxlej, re naq li nimla k’uub’anb’il na’leb’ re uxtaan taaruuq chireechaninkileb’ a’an. Ut li Dios chixk’ehaq taxaq aawe jo’ chanru ajwi’ li waatin. Amen.