1 Vakai, ko ʻeni naʻe hoko ʻo pehē naʻe fuʻu fiefia ʻaupito ʻa e kakai ʻo Nīfaí, koeʻuhi ko hono toe fakahaofi ʻa kinautolu ʻe he ʻEikí mei he nima ʻo honau ngaahi filí; ko ia naʻa nau ʻoatu ʻa e fakafetaʻi ki he ʻEiki ko honau ʻOtuá; ʻio, naʻa nau ʻaukai lahi mo lotu lahi, pea nau hū ki he ʻOtuá ʻi he fuʻu fiefia lahi.

2 Pea naʻe hoko ʻo pehē ʻi hono hongofulu mā hiva ʻo e taʻu ʻo e pule ʻa e kau fakamāú ki he kakai ʻo Nīfaí, naʻe haʻu ʻa ʻAlamā ki hono foha ko Hilamaní, ʻo ne pehē kiate ia: ʻOkú ke tui koā ki he ngaahi lea ʻa ia naʻá ku lea ʻaki kiate koe ʻo kau ki he ngaahi lekooti kuo tauhí?

3 Pea pehē ange ʻe Hilamani kiate ia: ʻIo, ʻoku ou tui.

4 Pea toe pehē ange ʻe ʻAlamā: ʻOkú ke tui koā kia Sīsū Kalaisi, ʻa ia ʻe hāʻele maí?

5 Pea ne pehē ange: ʻIo, ʻoku ou tui ki he ngaahi lea kotoa pē kuó ke leaʻakí.

6 Pea toe pehē ange ʻe ʻAlamā kiate ia: Te ke tauhi koā ʻa ʻeku ngaahi fekaú?

7 Pea ne pehē: ʻIo, te u tauhi hoʻo ngaahi fekaú ʻaki hoku lotó kotoa.

8 Pea toki pehē ange ʻe ʻAlamā kiate ia: ʻOkú ke monūʻia koe; pea ʻe fakatuʻumālieʻi koe ʻe he ʻEikí ʻi he fonuá ni.

9 Kae vakai, ʻoku ʻi ai haʻaku ngaahi meʻa ʻe niʻihi ke u kikite ʻaki kiate koe; ka ko e meʻa te u kikite ʻaki kiate koé ke ʻoua naʻá ke fakahā; ʻio, ko e meʻa te u kikite ʻaki kiate koé ʻe ʻikai fakahā ia, kae ʻoua ke fakahoko ʻa e kikité; ko ia tohi pē ʻa e ngaahi lea te u leaʻakí.

10 Pea ko e ngaahi leá ʻeni: Vakai, ʻoku ou ʻiloʻi ko e kakai ko ʻení, ʻa ia ko e kau Nīfaí, ʻo fakatatau ki he laumālie ʻo e fakahā ʻoku ʻiate aú, ʻe ʻosi atu ʻa e taʻu ʻe fāngeau hili ʻa e taimi ʻe fakahā ai ʻe Sīsū Kalaisi ia kiate kinautolú, te nau fakaʻauʻauhifo ʻi he taʻetui.

11 ʻIo, pea te nau toki mamata ki he ngaahi tau mo e ngaahi fakaʻauha, ʻio, ko e ngaahi honge mo e lilingi ʻo e toto, kae ʻoua ke ʻosiʻosingamālie ʻa e kakai ʻo Nīfaí—

12 ʻIo, pea ʻe hoko ʻeni koeʻuhi ko ʻenau fakaʻauʻauhifo ʻi he taʻetuí pea hinga ki he ngaahi ngāue ʻo e fakapoʻulí, mo e holi koví, mo e ngaahi faʻahinga angahala kotoa pē; ʻio, ʻoku ou pehē kiate koe, koeʻuhi ko ʻenau fai angahala ki he fuʻu maama mo e ʻilo lahi pehē, ʻio, ʻoku ou pehē kiate koe, ʻe kamata mei he ʻaho ko iá, ʻio ʻe ʻikai ke ʻosi ange ʻa e toʻu tangata hono faá kuo hoko ʻa e fuʻu angahala lahí ni.

13 Pea ʻo ka hokosia ʻa e fuʻu ʻaho lahi ko iá, vakai, ʻe vave mai ʻa e taimi ʻa ia ʻe ʻikai toe lau fakataha mo e kakai ʻo Nīfai ʻa e faʻahinga ko ia ʻoku nau lolotonga kau ki aí, pe ko e hako ʻo e faʻahinga ʻoku lolotonga lau fakataha mo e kakai ʻo Nīfaí.

14 Kae ʻilonga ʻa kinautolu ʻe kei toe, ʻa ia naʻe ʻikai fakaʻauha ʻi he fuʻu ʻaho lahi mo fakamanavahē ko iá, ʻe lau ʻa kinautolu fakataha mo e kau Leimaná, pea te nau hoko kotoa pē ʻo tatau mo kinautolu, tuku kehe pē ʻa e tokosiʻi, ʻa ia ʻe ui ko e kau ākonga ʻa e ʻEikí; pea ʻe tuli holo ʻa kinautolu ʻe he kau Leimaná kae ʻoua ke nau ʻauha ʻo ʻosiʻosingamālie. Pea ko ʻeni, koeʻuhi ko e angahalá ʻe fakahoko ai ʻa e kikité ni.

15 Pea ko ʻeni naʻe hoko ʻo pehē ʻi he hili ʻa e lea ʻaki ʻe ʻAlamā ʻa e ngaahi meʻá ni kia Hilamaní, naʻá ne tāpuakiʻi ia, kae ʻumaʻā foki hono ngaahi foha kehé; peá ne tāpuakiʻi foki mo e fonuá koeʻuhi ko e kau māʻoniʻoní.

16 Peá ne pehē: ʻOku folofola peheni ʻe he ʻEiki ko e ʻOtuá—ʻE malaʻia ʻa e fonuá, ʻio, ʻa e fonuá ni, ki he puleʻanga, faʻahinga, lea, mo e kakai fulipē, ke nau ʻauha, ʻa ia ʻoku fai angahalá, ʻo ka kakato ʻenau fai angahalá; pea hangē ko e meʻa kuó u leaʻakí kuo pau ke hoko ia; ko e fakamalaʻia mo e tāpuaki ʻeni ʻa e ʻOtuá ki he fonuá, he ʻoku ʻikai lava ʻe he ʻEikí ke ʻafio ki he angahalá ʻo momoʻi fakaʻatuʻi ia.

17 Pea ko ʻeni, ʻi he ʻosi lea ʻaki ʻe ʻAlamā ʻa e ngaahi lea ní, naʻá ne tāpuakiʻi ʻa e siasí, ʻio, ʻa kinautolu kotoa pē ʻe tuʻu maʻu ʻi he tui ʻo fai atu ai pē mei he taimi ko iá.

18 Pea ʻi he ʻosi fai ʻeni ʻe ʻAlamaá naʻá ne ʻalu mei he fonua ko Seilahemalá, ʻo hangē ko haʻane ʻalu ki he fonua ko Mīlekí. Pea naʻe hoko ʻo pehē naʻe ʻikai ke toe fanongo kiate ia; pea ko e meʻa ki heʻene pekiá, pe ko hono tanú, ʻoku ʻikai te mau ʻilo ki ai.

19 Vakai, ko e meʻa ʻeni ʻoku mau ʻiloʻí, ko ha tangata māʻoniʻoni ia; pea naʻe mafola atu ʻa e talá ʻi he siasí kuo ʻave ia ʻe he Laumālié, pe kuo tanu ia ʻe he toʻukupu ʻo e ʻEikí ʻo hangē ko Mōsesé. Kae vakai, ʻoku fakahā mai ʻe he folofolá naʻe ʻave ʻe he ʻEikí ʻa Mōsese kiate ia; pea ʻoku mau mahalo kuó ne maʻu maʻana foki mo ʻAlamā ʻi he laumālie; ko ia, ko hono ʻuhinga ʻeni ʻoku ʻikai ai te mau ʻiloʻi ha meʻa ʻo kau ki heʻene pekiá mo e telió.

20 Pea ko ʻeni naʻe hoko ʻo pehē ʻi he kamataʻanga ʻo hono hongofulu mā hiva ʻo e taʻu ʻo e pule ʻa e kau fakamāú ki he kakai ʻo Nīfaí, naʻe ʻalu atu ʻa Hilamani ʻi he lotolotonga ʻo e kakaí ʻo fakahā ʻa e folofolá kiate kinautolu.

21 He vakai, ko e meʻa ʻi heʻenau ngaahi tau mo e kau Leimaná pea mo e fanga kiʻi fakakikihi mo e ngaahi maveuveu ʻa ia kuo hoko ʻi he vahaʻa ʻo e kakaí, naʻe hoko ʻo ʻaonga ai ke malanga ʻaki ʻa e folofola ʻa e ʻOtuá ʻiate kinautolu, ʻio, pea ke kamata hano fokotuʻu ha tuʻutuʻuni maau ʻi hono kotoa ʻo e siasí.

22 Ko ia, naʻe ʻalu atu ʻa Hilamani mo hono kāingá ke toe fokotuʻu ʻa e siasí ʻi hono kotoa ʻo e fonuá, ʻio, ʻi he kolo kotoa pē ʻi hono kotoa ʻo e fonuá ʻa ia naʻe maʻu ʻe he kakai ʻo Nīfaí. Pea naʻe hoko ʻo pehē naʻa nau fakanofo ha kau taulaʻeiki mo ha kau akonaki ʻi hono kotoa ʻo e fonuá ki he ngaahi siasí kotoa pē.

23 Pea ko ʻeni naʻe hoko ʻo pehē ʻi he hili ʻa e fili ʻe Hilamani mo hono kāingá ha kau taulaʻeiki mo e kau akonaki ki he ngaahi siasí naʻe kamata ha fekeʻikeʻi ‘iate kinautolu, pea naʻe ʻikai te nau fie tokanga ki he ngaahi lea ʻa Hilamani mo hono kāingá;

24 Ka naʻa nau fakaʻau ke pōlepole, he kuo nau fielahi ʻi honau lotó, koeʻuhi ko ʻenau ngaahi koloa lahi ʻaupitó: ko ia naʻa nau fakaʻau ʻo koloaʻia ʻi heʻenau fakakaukaú, ʻo ʻikai te nau fie tokanga ki heʻenau ngaahi leá, ke ʻaʻeva angatonu ʻi he ʻao ʻo e ʻOtuá.