1 Ita agsublikami iti kasuratanmi ken ni Amalickiah ken dagidiay kaduana a naglibas iti let-ang; gapu ta, kitaen, innalana dagiti nakikuyog kenkuana, ket simmang-at iti daga ti Nephi kadagiti Lamanita, ket talaga a sinugsoganna dagiti Lamanita nga agpungtot kadagiti tattao ni Nephi, isu a nangipatulod ti ari dagiti Lamanita iti proklamasion iti intero a dagana, kadagiti amin a taona, a kasapulan nga agtitiponda manen tapno mapan makigubat kadagiti Nephita.

2 Ket napasamak a napalalo ti butengda idi naiwaragawag ti proklamasion kadakuada; wen, nagbutengda a mapapungtot iti ari, ken nagbutengda pay a mapan makigubat kadagiti Nephita ta amangan no mapukawda ti biagda. Ket napasamak a saanda a kinayat, wenno ti ad-adu a pasetda ti saan a mangayat, a mangtungpal kadagiti bilbilin ti ari.

3 Ket ita napasamak a nakapungtot ti ari gapu iti saanda panagtungpal; ngarud intedna ken Amalickiah ti autoridad iti dayta a paset ti soldadona a natulnog kadagiti bilbilinna ket imbilinna kenkuana a kasapulan a mapan isuna ken pilitenna ida nga ag-armas.

4 Ita kitaen, daytoy ti tarigagay ni Amalickiah; gapu ta maysa isuna a manangallilaw unay a lalaki nga agaramid iti dakes gapuna nangpartuat isuna iti plano iti pusona a mangikkat iti trono ti ari dagiti Lamanita.

5 Ket ita nagun-odna ti autoridad kadagidiay paset dagiti Lamanita a pabor iti ari; ket inkagumaanna a gun-oden ti pabor dagiti saan a natulnog; ngarud napan isuna iti lugar a naawagan iti Onidah, gapu ta sadiay a naglibas amin dagiti Lamanita; gapu ta natakuatanda nga umay ti soldado, ken, gapu ta impagarupda nga umayda a mangdadael kadakuada, ngarud nagtalawda idiay Onida, iti lugar nga ayan dagiti armas.

6 Ket nangdutokda iti maysa a lalaki nga agbalin nga ari ken mangidaulo kadakuada, a natibker iti panunotda nga addaan iti determinado a resolusion a saanda a paiturayan a makilaban maibusor kadagiti Nephita.

7 Ket napasamak nga inummongda ti bagbagida iti tuktok ti bantay a naawagan nga Antipas, kas panagsagana a makigubat.

8 Ita saan a panggep ni Amalickiah a makilaban kadakuada sigun kadagiti bilbilin ti ari; ngem kitaen, panggepna ti makagun-od iti pabor kadagiti soldado dagiti Lamanita, tapno ikabilna ti bagina a panguloda ken mangikkat ti ari iti tronona ken tagikuaenna ti pagarian.

9 Ket kitaen, napasamak nga imbilinna iti soldadona a mangpatakder kadagiti tuldada iti tanap nga asideg iti bantay Antipas.

10 Ket napasamak nga idi rabiin nangibaon isuna iti nalimed nga embahada iti bantay Antipas, a tinarigagayanna a ti pangulo dagidiay adda iti bantay, a Lehonti ti naganna, a masapul a bumaba iti sakaanan ti bantay, gapu ta tinarigagayanna ti makisarita kenkuana.

11 Ket napasamak nga idi naawat ni Lehonti ti mensahe saanna a naitured ti bumaba iti sakaanan ti bantay. Ket napasamak a nangipatulod manen ni Amalickias iti mensahe iti maikadua a gundaway, a tinarigagayanna a bumaba isuna. Ket napasamak a saan a kayat ni Lehonti; ket nangipatulod manen iti maikatlo a gundaway.

12 Ket napasamak nga idi naammuan ni Amalickias a saanna a maguyugoy a bumaba ni Lehonti manipud iti bantay, simmang-at isuna iti bantay, iti asideg iti kampo ni Lehonti; ket nangipatulod manen ti mensahe iti maikapat a gundaway ken ni Lehonti, a tinarigagayanna a bumaba isuna, ken ta ikuyogna dagiti guardiana.

13 Ket napasamak nga idi simmalog ni Lehonti a kaduana dagiti guardiana a mapan ken ni Amalickiah, tinarigagayan ni Amalickiah a bumaba isuna a kaduana ti soldadona iti rabii, ket palawlawanna dagidiay lallaki kadagiti kampoda a nangiteddanna iti nangato nga autoridad, ken ta iyawatnana ida iti sidong ti bileg ni Lehonti, no pagbalinenna (ni Amalickiah) a maikadua a lider iti intero nga soldado.

14 Ket napasamak a bimmaba ni Lehonti a kaduana dagiti taona ket pinalawlawana dagiti tattao ni Amalickias, isu a sakbay a nariingda iti parbangon napalawlawanda kadagiti soldado ni Lehonti.

15 Ket napasamak nga idi nakitada a napalawlawanda, nagpakaasida ken ni Amalickiah a palubosanna ida a makikadua kadagiti kakabsatda, tapno saanda a madadael. Ita daytoy ti mismo a banag ti tinarigagayan ni Amalickias.

16 Ket napasamak nga inyawatna dagiti taona, a maisuppiat kadagiti bilbilin ti ari. Ita daytoy ti banag ti tinarigagayan ni Amalickias, tapno matungpalna dagiti panggepna a panangikkatna ti ari iti trono.

17 Ita kaugalian kadagiti Lamanita, a no mapapatay ti hepe a liderda, a mangdutok iti maikadua a lider nga agbalin a hepe a liderda.

18 Ket napasamak nga imbilin ni Amalickias iti maysa kadagiti katulonganna nga in-inut a mangted iti sabidong ken ni Lehonti, isu a natay isuna.

19 Ita, idi natayen ni Lehonti, dinutokan dagiti Lamanita ni Amalickiah nga agbalin a liderda ken hepe a komandanteda.

20 Ket napasamak a nagmartsa ni Amalickiah a kaduana dagiti soldadona (ta nagun-odna dagiti tarigagayna) iti daga ni Nephi, iti siudad ni Nephi, nga isu ti kapatgan a siudad.

21 Ket rimmuar ti ari tapno makilaban a kaduana dagiti guardiana, ta impagarupna a natungpal ni Amalickiah dagiti bilbilinna, ken ta napagtipon ni Amalickiah ti nakadakdakkel a bilang iti soldado a mapan makigubat kadagiti Nephita.

22 Ngem kitaen, bayat ti iruruar ti ari tapno sabtenna isuna imbilin ni Amalickias a mapan sabten dagiti katulonganna ti ari. Ket napanda ket nagruknoyda iti sanguanan ti ari, a kasla raemenda isuna gapu iti kinaindaklanna.

23 Ket napasamak nga intag-ay ti ari ti imana a mangpatakder kadakuada, a kas iti kaugalian dagiti Lamanita, a kas tanda ti kappia, a kaugalian a natawidda manipud kadagiti Nephita.

24 Ket napasamak nga idi napatakderna ti immuna manipud iti daga, kitaen binagsolna ti ari iti pusona; ket nadalupo isuna iti daga.

25 Ita naglibas dagiti katulongan ti ari; ket impukkaw dagiti katulongan ni Amalickiah, a kunada:

26 Kitaen, binagsol dagiti katulongan ti ari iti pusona, ket nadalupo isuna ket naglibasda; kitaen, umaykayo ket kitaenyo.

27 Ket napasamak a binilin ni Amalickiah nga agmartsa dagiti soldadona ket kitaenda no ania ti napasamak iti ari; ket idi dimtengda iti lugar, ket nasarakanda ti ari a nakaidda iti darana, nagpammarang ni Amalickiah a makapungtot, ket kinunana: Siasinoman nga agayat iti ari, mapan koma, ket kamatenna dagiti katulonganna tapno mapapatayda.

28 Ket napasamak nga amin dagiti nagayat iti ari, idi nangngegda dagitoy a balikas, napanda ket kinamatda dagiti katulongan ti ari.

29 Ita idi nakita dagiti katulongan ti ari ti soldado a mangkamkamat kadakuada, nagbutengda manen, ket naglibasda iti let-ang, ket nagdaliasatda iti daga ti Zarahemla ket nakikaduada kadagiti tattao ti Ammon.

30 Ket nagsubli ti soldado a nangkamkamat kadakuada, kalpasan iti awan mamaayna a kinamatda ida; ket iti kasta ni Amalickiah, babaen ti panangallilawna, nagun-odna ti puspuso dagiti tattao.

31 Ket napasamak iti kabigatanna simrek isuna iti siudad ni Nephi a kaduana dagiti soldadona, ket tinagikuada ti siudad.

32 Ket ita napasamak a ti reyna, idi nangngegna a napapatay ti ari—gapu ta nangibaon ni Amalickias kadagiti opisial a mensaheros iti reyna a mangipakaammo kenkuana a pinatay dagiti katulonganna ti ari, a kinamatna ida a kaduana ti soldadona, ngem awan mamaayna daytoy, ket nakapaglibasdan—

33 Ngarud, idi naawat ti reyna daytoy a mensahe nga impatulodna ken ni Amalickiah, a tinarigagayanna a kaasianna dagiti tattao ti siudad; ken tinarigagayanna met nga umayna kitaen isuna; ken tinarigagayanna pay a masapul nga itugotna dagiti saksi a kaduana tapno mangpaneknek maipanggep iti ipapatay ti ari.

34 Ket napasamak nga innala ni Amalickiah ti isu met laeng nga katulongan a nangpapatay iti ari, ken amin a kaduana, ket napanda iti reyna, iti lugar a nagtugawanna; ket pinaneknekanda amin kenkuana a dagiti bukodna katulongan ti nangpapatay ti ari; ket imbagada pay a: Naglibasda; saan kadi a daytoy ti mangpaneknek maibusor kadakuada? Ket kasta ti panangpennekda iti reyna maipanggep iti ipapatay ti ari.

35 Ket napasamak a pinadas ni Amalickiah a magun-od ti pabor ti reyna, ket innalana isuna nga asawana; ket ngarud babaen ti panangallilawna, ken babaen ti tulong dagiti manangallilaw a katulonganna, nagun-odna ti pagarian; wen, nabigbig isuna nga ari iti intero a daga, kadagiti amin a tattao dagiti Lamanita, a buklen dagiti Lamanita ken dagiti Lemuelita ken dagiti Ismaelite, ken amin dagiti simmiasi kadagiti Nephita, manipud iti panagturay ni Nephi agingga iti agdama a panawen.

36 Ita dagitoy a simmiasi, nga addaan iti isu met laeng a pannursuro ken isu met laeng nga impormasion manipud kadagiti Nephita, wen, ta nasursuruan iti isu met laeng a pannakaammo iti Apo, nupay kasta, naidumduma daytoy nga isalaysay, saan a nagbayag kalpasan ti panagsiasida ad-adda a timmangkenda ken saanda nga agbabawi, ken naat-atapda, nadakdakes ken narungrungsotda ngem dagiti Lamanita—inramanna ti bagbagida kadagiti tradision dagiti Lamanita; panangpasakup iti kinasadut, ken amin a kita ti nakaro a seksual a tarigagay; wen, interamente a nalipatan iti Apo a Diosda.