ບົດທີ 48
ອະມາລີໄຄຢາຍຸຍົງໃຫ້ຊາວເລມັນຕໍ່ສູ້ກັບຊາວນີໄຟ—ໂມໂຣໄນຕຽມຜູ້ຄົນຂອງເພິ່ນໃຫ້ປ້ອງກັນອຸດົມການແຫ່ງຄຣິດສະຕຽນ—ເພິ່ນປິຕິຍິນດີໃນເສລີພາບ ແລະ ອິດສະລະພາບ ແລະ ເປັນຜູ້ຍິ່ງໃຫຍ່ຂອງພຣະເຈົ້າ. ປະມານ 72 ປີ ກ່ອນ ຄ.ສ.
1 ແລະ ບັດນີ້ເຫດການໄດ້ບັງເກີດຂຶ້ນຄື, ທັນທີທີ່ອະມາລີໄຄຢາໄດ້ຂຶ້ນຄອງອານາຈັກ ລາວກໍໄດ້ປຸກລະດົມໃຈຂອງຊາວເລມັນໃຫ້ຄຽດແຄ້ນໃຫ້ຜູ້ຄົນຂອງນີໄຟ; ແທ້ຈິງແລ້ວ, ລາວໄດ້ແຕ່ງຕັ້ງໃຫ້ມີຜູ້ເວົ້າກັບຊາວເລມັນຈາກຫໍສູງ, ຕ້ານກັບຊາວນີໄຟ.
2 ແລະ ລາວໄດ້ປຸກລະດົມໃຈຂອງພວກເຂົາໃຫ້ເປັນສັດຕູກັບຊາວນີໄຟດັ່ງນີ້, ເຖິງຂະໜາດທີ່ໃນທ້າຍປີທີສິບເກົ້າແຫ່ງການປົກຄອງຂອງຜູ້ຕັດສິນ, ລາວໄດ້ສຳເລັດແຜນການຂອງລາວມາເຖິງບັດນີ້, ແທ້ຈິງແລ້ວ, ເມື່ອລາວໄດ້ຖືກແຕ່ງຕັ້ງໃຫ້ເປັນກະສັດປົກຄອງຊາວເລມັນ, ລາວຈຶ່ງພະຍາຍາມທີ່ຈະປົກຄອງທົ່ວແຜ່ນດິນ, ແທ້ຈິງແລ້ວ, ລາວຢາກປົກຄອງຜູ້ຄົນທັງໝົດໃນທົ່ວແຜ່ນດິນ, ທັງຊາວເລມັນ ແລະ ຊາວນີໄຟນຳກັນ.
3 ສະນັ້ນ ລາວຈຶ່ງສຳເລັດແລ້ວຕາມແຜນການຂອງລາວ, ເພາະວ່າລາວໄດ້ເຮັດໃຫ້ໃຈຂອງຊາວເລມັນແຂງກະດ້າງ ແລະ ເຮັດໃຫ້ຈິດໃຈຂອງພວກເຂົາມືດມົນ, ແລະ ລາວໄດ້ຍຸຍົງໃຫ້ພວກເຂົາຄຽດແຄ້ນ, ເຖິງຂະໜາດທີ່ລາວໄດ້ເຕົ້າໂຮມທະຫານໄດ້ຢ່າງຫລວງຫລາຍເພື່ອຈະໄດ້ໄປສູ້ຮົບກັບຊາວນີໄຟ.
4 ຍ້ອນວ່າຈຳນວນທະຫານຢ່າງຫລວງຫລາຍຂອງລາວ, ລາວຈຶ່ງໄດ້ຕັ້ງໃຈໄວ້ວ່າ ລາວຈະເອົາຊະນະຊາວນີໄຟ ແລະ ຈະເອົາພວກເຂົາມາສູ່ຄວາມເປັນທາດ.
5 ແລະ ລາວໄດ້ແຕ່ງຕັ້ງຊາວໂຊຣຳໃຫ້ເປັນ ຫົວໜ້ານາຍທະຫານ, ເພາະວ່າພວກເຂົາມີຄວາມຮູ້ດີທີ່ສຸດກ່ຽວກັບກຳລັງພົນຂອງຊາວນີໄຟ, ແລະ ບ່ອນຕັ້ງກຳລັງຂອງພວກເຂົາ, ແລະ ເມືອງໃດທີ່ບໍ່ມີກຳລັງພຽງພໍ; ສະນັ້ນ ລາວຈຶ່ງໄດ້ແຕ່ງຕັ້ງພວກເຂົາໃຫ້ເປັນນາຍທະຫານຊັ້ນຫົວໜ້າເພື່ອບັງຄັບບັນຊາກອງທັບທະຫານຂອງລາວ.
6 ແລະ ເຫດການໄດ້ບັງເກີດຂຶ້ນຄື ພວກເຂົາໄດ້ເຄື່ອນຍ້າຍກອງທັບເຂົ້າໄປໃນຖິ່ນແຫ້ງແລ້ງກັນດານ ມຸ້ງໜ້າໄປຫາແຜ່ນດິນເຊຣາເຮັມລາ.
7 ບັດນີ້ເຫດການໄດ້ບັງເກີດຂຶ້ນຄື ຂະນະທີ່ອະມາລີໄຄຢາໄດ້ອຳນາດມາດ້ວຍກົນອຸບາຍ ແລະ ດ້ວຍຄຳຫລອກລວງຕ່າງໆ, ກົງກັນຂ້າມ, ໂມໂຣໄນໄດ້ ຕຽມຈິດໃຈຂອງຜູ້ຄົນໃຫ້ຊື່ສັດຕໍ່ພຣະຜູ້ເປັນເຈົ້າອົງເປັນພຣະເຈົ້າຂອງພວກເຂົາ.
8 ແທ້ຈິງແລ້ວ, ເພິ່ນໄດ້ສົ່ງເສີມກຳລັງກອງທັບຂອງຊາວນີໄຟ, ແລະ ໄດ້ສ້າງປ້ອມຍາມນ້ອຍ ຫລື ບ່ອນສະສົມກຳລັງຂຶ້ນຫລາຍແຫ່ງ; ໂດຍຄູນດິນຂຶ້ນອ້ອມຮອບເປັນຄູລ້ອມກອງທັບຂອງເພິ່ນໄວ້, ແລະ ສ້າງກຳແພງຫີນຂຶ້ນອ້ອມພວກທະຫານໄວ້, ພ້ອມທັງຮອບເມືອງ ແລະ ຊາຍແດນຂອງແຜ່ນດິນນຳອີກ; ແທ້ຈິງແລ້ວ, ເພິ່ນໄດ້ສ້າງກຳແພງຂຶ້ນໃຫ້ຮອບທົ່ວແຜ່ນດິນ.
9 ແລະ ຄ້າຍໃດທີ່ມີກຳລັງບໍ່ພຽງພໍ ເພິ່ນກໍໄດ້ວາງຈຳນວນທະຫານໄວ້ຢ່າງຫລວງຫລາຍ; ແລະ ເພິ່ນໄດ້ເສີມກຳລັງ ແລະ ໄດ້ເຮັດໃຫ້ແຜ່ນດິນຊຶ່ງຊາວນີໄຟເປັນເຈົ້າຂອງເຂັ້ມແຂງຂຶ້ນເລື້ອຍໆ.
10 ແລະ ເພິ່ນໄດ້ຕຽມພ້ອມຢູ່ສະເໝີເພື່ອວ່າຈະໄດ້ ສະໜັບສະໜູນເສລີພາບຂອງພວກເຂົາ, ແຜ່ນດິນຂອງພວກເຂົາ, ເມຍຂອງພວກເຂົາ, ແລະ ລູກຂອງພວກເຂົາ, ແລະ ສັນຕິສຸກຂອງພວກເຂົາ, ແລະ ເພື່ອວ່າພວກເຂົາຈະໄດ້ມີຊີວິດຢູ່ກັບພຣະຜູ້ເປັນເຈົ້າອົງເປັນພຣະເຈົ້າຂອງພວກເຂົາ, ແລະ ເພື່ອພວກເຂົາຈະໄດ້ຮັກສາສິ່ງທີ່ສັດຕູຂອງພວກເຂົາເອີ້ນວ່າ ອຸດົມການແຫ່ງຄຣິດສະຕຽນ.
11 ແລະ ໂມໂຣໄນເປັນຄົນແຂງແຮງ ແລະ ມີກຳລັງຫລາຍ; ແລະ ເພິ່ນເປັນຄົນ ສະຫລຽວສະຫລາດ; ແທ້ຈິງແລ້ວ, ເພິ່ນເປັນຄົນທີ່ບໍ່ປິຕິຍິນດີໃນການນອງເລືອດ; ແຕ່ເປັນຄົນທີ່ປິຕິຍິນດີໃນເສລີພາບ ແລະ ອິດສະລະພາບຂອງປະເທດຊາດຂອງຕົນ, ແລະ ເພື່ອວ່າພີ່ນ້ອງຂອງເພິ່ນຈະໄດ້ຫລີກເວັ້ນຈາກຄວາມເປັນທາດ ແລະ ຂ້ອຍຂ້າ;
12 ແທ້ຈິງແລ້ວ, ເພິ່ນເປັນຄົນທີ່ມີໃຈຊຶ່ງເຕັມໄປດ້ວຍຄວາມຂອບພຣະໄທພຣະເຈົ້າຂອງເພິ່ນ, ສຳລັບສິດທິພິເສດ ແລະ ພອນຕ່າງໆທີ່ພຣະອົງໄດ້ປະທານໃຫ້ແກ່ຜູ້ຄົນຂອງເພິ່ນ; ແລະ ເພິ່ນເປັນຄົນທີ່ອອກແຮງງານຢ່າງຂະຫຍັນຂັນແຂງ ເພື່ອ ຄວາມຜາສຸກ ແລະ ເພື່ອຄວາມປອດໄພຂອງຜູ້ຄົນຂອງເພິ່ນ.
13 ແທ້ຈິງແລ້ວ, ແລະ ເພິ່ນເປັນຄົນທີ່ໝັ້ນຄົງຢູ່ນຳສັດທາໃນພຣະຄຣິດ, ແລະ ເພິ່ນໄດ້ກ່າວ ຄຳສາບານໄວ້ວ່າ ເພິ່ນຈະປ້ອງກັນຜູ້ຄົນຂອງເພິ່ນ, ສິດຂອງເພິ່ນ, ແລະ ປະເທດຊາດຂອງເພິ່ນ, ແລະ ສາດສະໜາຂອງເພິ່ນ, ເຖິງແມ່ນວ່າເພິ່ນຈະສູນເສຍເລືອດເນື້ອຂອງເພິ່ນກໍຕາມ.
14 ບັດນີ້ຊາວນີໄຟໄດ້ຮັບການສິດສອນໃຫ້ປ້ອງກັນຕົວເອງຈາກສັດຕູ, ຈົນເຖິງການນອງເລືອດຖ້າຫາກຈຳເປັນ; ແທ້ຈິງແລ້ວ, ແລະ ພວກເຂົາໄດ້ຮັບການສິດສອນວ່າ ບໍ່ໃຫ້ຮຸກຮານຜູ້ໃດ, ແທ້ຈິງແລ້ວ, ບໍ່ໃຫ້ຍົກດາບຂຶ້ນເລີຍເວັ້ນເສຍແຕ່ຈະເປັນການຕໍ່ສູ້ສັດຕູ, ຍົກເວັ້ນແຕ່ຈະເປັນໄປເພື່ອປົກປ້ອງຊີວິດຂອງຕົນເອງເທົ່ານັ້ນ.
15 ແລະ ນີ້ຄືສັດທາຂອງພວກເຂົາ, ໂດຍການປະຕິບັດແບບນີ້ ພຣະເຈົ້າຈະເຮັດໃຫ້ພວກເຂົາຈະເລີນຮຸ່ງເຮືອງຢູ່ໃນແຜ່ນດິນ, ຫລື ອີກຄຳໜຶ່ງ, ຖ້າພວກເຂົາຊື່ສັດໃນການຮັກສາພຣະບັນຍັດຂອງພຣະເຈົ້າແລ້ວ ພຣະອົງຈະເຮັດໃຫ້ພວກເຂົາຈະເລີນຮຸ່ງເຮືອງຢູ່ໃນແຜ່ນດິນ; ແທ້ຈິງແລ້ວ, ຈະເຕືອນພວກເຂົາໃຫ້ອອກໜີໄປ, ຫລື ວ່າໃຫ້ຕຽມເພື່ອສົງຄາມ, ອີງຕາມຄວາມອັນຕະລາຍຂອງພວກເຂົາ;
16 ແລະ ພຣະເຈົ້າຈະເຮັດໃຫ້ເປັນທີ່ຮູ້ຈັກແກ່ພວກເຂົາອີກວ່າ ພວກເຂົາຄວນຈະໄປທາງໃດເພື່ອຕໍ່ສູ້ກັບສັດຕູຂອງພວກເຂົາ, ແລະ ໂດຍການກະທຳດັ່ງນີ້, ພຣະຜູ້ເປັນເຈົ້າຈະໄດ້ປົດປ່ອຍພວກເຂົາ; ແລະ ນີ້ຄືສັດທາຂອງໂມໂຣໄນ ແລະ ໃຈຂອງເພິ່ນປາບປື້ມໃນສິ່ງເຫລົ່ານັ້ນ; ບໍ່ແມ່ນໃນການນອງເລືອດ, ແຕ່ໃນການເຮັດຄວາມດີ, ໃນການປ້ອງກັນຜູ້ຄົນຂອງເພິ່ນ, ແທ້ຈິງແລ້ວ, ໃນການຮັກສາພຣະບັນຍັດຂອງພຣະເຈົ້າ, ແທ້ຈິງແລ້ວ, ແລະ ໃນການຕ້ານທານກັບຄວາມຊົ່ວຮ້າຍ.
17 ແທ້ຈິງແລ້ວ, ຂ້າພະເຈົ້າກ່າວຕາມຄວາມຈິງກັບພວກທ່ານວ່າ, ຖ້າຫາກຄົນທັງປວງໄດ້ເປັນມາແລ້ວ ແລະ ເປັນຢູ່, ແລະ ຈະເປັນຢູ່, ຄືກັນກັບໂມໂຣໄນ, ຈົ່ງເບິ່ງ, ອຳນາດຂອງນະລົກນັ້ນຈະສັ່ນສະເທືອນຕະຫລອດການ; ແທ້ຈິງແລ້ວ, ມານຈະບໍ່ມີອຳນາດເໜືອໃຈຂອງລູກຫລານມະນຸດເລີຍ.
18 ຈົ່ງເບິ່ງ, ເພິ່ນເປັນຄົນຄືກັນກັບອຳໂມນ, ລູກຊາຍຂອງໂມໄຊຢາ, ແທ້ຈິງແລ້ວ, ຄືກັນກັບລູກຊາຍຜູ້ອື່ນໆຂອງໂມໄຊຢາ, ແທ້ຈິງແລ້ວ, ແລະ ຄືກັນກັບແອວມາ ແລະ ພວກລູກຊາຍຂອງເພິ່ນນຳອີກ, ເພາະວ່າເຂົາເຈົ້າເຫລົ່ານັ້ນລ້ວນແລ້ວແຕ່ເປັນຄົນຂອງພຣະເຈົ້າທັງນັ້ນ.
19 ບັດນີ້ຈົ່ງເບິ່ງ, ຮີລາມັນ ແລະ ພີ່ນ້ອງຂອງເພິ່ນກໍບໍ່ໄດ້ຮັບໃຊ້ຜູ້ຄົນໜ້ອຍໄປກວ່າໂມໂຣໄນເລີຍ; ເພາະເຂົາເຈົ້າໄດ້ສັ່ງສອນພຣະຄຳຂອງພຣະເຈົ້າ, ແລະ ເຂົາເຈົ້າໄດ້ໃຫ້ບັບຕິສະມາໄວ້ກັບການກັບໃຈ ແກ່ຄົນທັງປວງທີ່ຍອມເຊື່ອຟັງຄຳເວົ້າຂອງເຂົາເຈົ້າ.
20 ແລະ ເຂົາເຈົ້າໄດ້ອອກໄປດັ່ງນີ້, ແລະ ຜູ້ຄົນໄດ້ ຖ່ອມຕົວຍ້ອນຄຳເວົ້າຂອງເຂົາເຈົ້າ, ເຖິງຂະໜາດທີ່ເຂົາເຈົ້າໄດ້ເປັນທີ່ຊົງ ໂປດປານຂອງພຣະຜູ້ເປັນເຈົ້າ, ແລະ ດັ່ງນັ້ນພວກເຂົາຈຶ່ງໄດ້ເປັນອິດສະລະຈາກສົງຄາມ ແລະ ຈາກການຂັດແຍ້ງໃນບັນດາພວກເຂົາເອງ, ແທ້ຈິງແລ້ວ, ເປັນເວລາເຖິງສີ່ປີ.
21 ແຕ່ວ່າຄືກັນກັບທີ່ຂ້າພະເຈົ້າໄດ້ເວົ້າໃນຕອນທ້າຍປີທີສິບເກົ້ານັ້ນ, ແທ້ຈິງແລ້ວ, ມັນມີສັນຕິສຸກໃນບັນດາພວກເຂົາເອງ, ພວກເຂົາໄດ້ຖືກບັງຄັບຢ່າງບໍ່ເຕັມໃຈໃຫ້ໄປຕໍ່ສູ້ກັບຊາວເລມັນພີ່ນ້ອງຂອງພວກເຂົາ.
22 ແທ້ຈິງແລ້ວ, ແລະ ໂດຍສະຫລຸບ, ສົງຄາມຂອງພວກເຂົາທີ່ເຮັດກັບຊາວເລມັນບໍ່ເຄີຍຢຸດລົງເລີຍເປັນເວລາຫລາຍປີ, ທັງທີ່ພວກເຂົາບໍ່ເຕັມໃຈຢາກເຮັດ.
23 ບັດນີ້, ພວກເຂົາ ເສຍໃຈທີ່ຕ້ອງຈັບອາວຸດຂຶ້ນຕໍ່ສູ້ກັບຊາວເລມັນອີກ, ເພາະວ່າພວກເຂົາບໍ່ພໍໃຈກັບການນອງເລືອດເລີຍ; ແທ້ຈິງແລ້ວ, ແລະ ນີ້ຍັງບໍ່ໝົດ—ພວກເຂົາເສຍໃຈທີ່ໄດ້ເປັນທາງສົ່ງພີ່ນ້ອງຂອງພວກເຂົາຢ່າງຫລວງຫລາຍອອກຈາກໂລກນີ້ໄປສູ່ໂລກນິລັນດອນ, ໂດຍບໍ່ໄດ້ຕຽມພ້ອມທີ່ຈະພົບກັບພຣະເຈົ້າຂອງພວກເຂົາເລີຍ.
24 ເຖິງຢ່າງໃດກໍຕາມ, ພວກເຂົາຈະບໍ່ຍອມເດັດຂາດທີ່ຈະສະລະຊີວິດຂອງຕົນໄປລ້າໆ, ແລະ ປ່ອຍໃຫ້ ເມຍຂອງພວກເຂົາ ແລະ ລູກຂອງພວກເຂົາຖືກຂ້າດ້ວຍຄວາມຮ້າຍກາດ ແລະ ຄວາມປ່າເຖື່ອນຂອງຄົນ ຊຶ່ງເຄີຍເປັນພີ່ນ້ອງກັນມາກ່ອນ, ແທ້ຈິງແລ້ວ, ຊຶ່ງເປັນຜູ້ທີ່ໄດ້ ແຍກອອກໄປຈາກສາດສະໜາຈັກ, ແລະ ໜີຈາກພວກເຂົາໄປເພື່ອຈະໄດ້ກັບມາທຳລາຍພີ່ນ້ອງຂອງຕົນ ໂດຍການເຂົ້າຮ່ວມກັບຊາວເລມັນ.
25 ແທ້ຈິງແລ້ວ, ພວກເຂົາທົນບໍ່ໄດ້ທີ່ພີ່ນ້ອງຂອງພວກເຂົາຈະປິຕິຍິນດີຢູ່ກັບເລືອດຂອງຊາວນີໄຟ ເພາະຄຳສັນຍາຂອງພຣະເຈົ້າທີ່ມີຢູ່ວ່າ ຕາບໃດທີ່ຍັງມີຄົນຮັກສາພຣະບັນຍັດຂອງພຣະເຈົ້າຢູ່ ເພາະຄຳສັນຍາຂອງພຣະຜູ້ເປັນເຈົ້າມີຢູ່ວ່າ ຖ້າຫາກພວກເຂົາຈະຮັກສາພຣະບັນຍັດຂອງພຣະອົງ ພວກເຂົາຈະຮຸ່ງເຮືອງຢູ່ໃນແຜ່ນດິນ.