ບົດທີ 25
ຄວາມຮຸກຮານຂອງຊາວເລມັນແຜ່ຂະຫຍາຍອອກໄປ—ລູກຫລານຂອງພວກປະໂລຫິດຂອງກະສັດໂນອາຕາຍດັ່ງທີ່ອະບີນາໄດໄດ້ທຳນາຍໄວ້—ຊາວເລມັນຫລາຍຄົນໄດ້ປ່ຽນໃຈເຫລື້ອມໃສ ແລະ ເຂົ້າມາຮ່ວມກັບຜູ້ຄົນຂອງອານໄທ-ນີໄຟ-ລີໄຮ—ພວກເຂົາເຊື່ອໃນພຣະຄຣິດ ແລະ ຮັກສາກົດຂອງໂມເຊ. ປະມານ 90–77 ປີ ກ່ອນ ຄ.ສ.
1 ແລະ ຈົ່ງເບິ່ງ, ບັດນີ້ເຫດການໄດ້ບັງເກີດຂຶ້ນຄື ຊາວເລມັນເຫລົ່ານັ້ນ ໄດ້ມີຄວາມຄຽດແຄ້ນທີ່ສຸດ ເພາະວ່າພວກເຂົາໄດ້ຂ້າພີ່ນ້ອງຂອງຕົນ; ສະນັ້ນພວກເຂົາຈຶ່ງສາບານວ່າຈະແກ້ແຄ້ນຊາວນີໄຟ; ແລະ ພວກເຂົາບໍ່ໄດ້ພະຍາຍາມຂ້າຜູ້ຄົນຂອງ ອານໄທ-ນີໄຟ-ລີໄຮ ອີກຕໍ່ໄປໃນເວລານັ້ນ.
2 ແຕ່ພວກເຂົາໄດ້ຍົກກອງທັບຂ້າມໄປໃນຊາຍແດນຂອງແຜ່ນດິນເຊຣາເຮັມລາ, ແລະ ເຂົ້າມາໂຈມຕີຜູ້ຄົນ ຊຶ່ງຢູ່ໃນແຜ່ນດິນອຳໂມນໄນຮາ ແລະ ທຳລາຍພວກເຂົາ.
3 ແລະ ຫລັງຈາກນັ້ນ, ພວກເຂົາໄດ້ມີການສູ້ຮົບກັບຊາວນີໄຟຫລາຍຄັ້ງ, ຊຶ່ງພວກເຂົາໄດ້ຖືກຂັບໄລ່ອອກໄປ ແລະ ຖືກຂ້າຕາຍ.
4 ແລະ ໃນບັນດາຊາວເລມັນທີ່ຖືກຂ້າຕາຍນັ້ນມີ ລູກຫລານຂອງອະມິວລອນ ແລະ ພີ່ນ້ອງຂອງລາວຜູ້ເປັນພວກປະໂລຫິດຂອງໂນອາ, ແລະ ພວກເຂົາເຫລົ່ານັ້ນເກືອບທັງໝົດ ຖືກຂ້າຕາຍດ້ວຍນ້ຳມືຂອງຊາວນີໄຟ;
5 ແລະ ພວກທີ່ຍັງເຫລືອຢູ່ນັ້ນໄດ້ໜີເຂົ້າໄປໃນຖິ່ນແຫ້ງແລ້ງກັນດານທາງຕາເວັນອອກ ແລະ ໄປຍາດແຍ່ງເອົາອຳນາດ ແລະ ສິດອຳນາດປົກຄອງຊາວເລມັນ, ຈຶ່ງເຮັດໃຫ້ຊາວເລມັນຫລາຍຄົນຖືກ ຂ້າຕາຍດ້ວຍໄຟ ເພາະຄວາມເຊື່ອຖືຂອງພວກເຂົາ—
6 ເພາະຫລັງຈາກທີ່ ພວກເຂົາຫລາຍຄົນໄດ້ຮັບການສູນເສຍຢ່າງໜັກ ແລະ ມີຄວາມທຸກນັ້ນຫລາຍ, ກໍເລີ່ມສຳນຶກໃນຄວາມຊົງຈຳເຖິງ ຄຳເວົ້າຂອງອາໂຣນ ແລະ ພີ່ນ້ອງຂອງລາວ ຊຶ່ງໄດ້ສັ່ງສອນພວກເຂົາໃນແຜ່ນດິນຂອງພວກເຂົາ; ສະນັ້ນ ພວກເຂົາຈຶ່ງເລີ່ມບໍ່ເຊື່ອຖືໃນ ຮີດຄອງປະເພນີຂອງບັນພະບຸລຸດຂອງພວກເຂົາ ແລະ ມາເຊື່ອຖືໃນພຣະຜູ້ເປັນເຈົ້າ, ແລະ ວ່າພຣະອົງໄດ້ປະທານອຳນາດອັນຍິ່ງໃຫຍ່ໃຫ້ແກ່ຊາວນີໄຟ; ແລະ ຫລາຍຄົນໃນພວກເຂົາຈຶ່ງໄດ້ປ່ຽນໃຈເຫລື້ອມໃສດັ່ງນີ້ໃນຖິ່ນແຫ້ງແລ້ງກັນດານ.
7 ແລະ ເຫດການໄດ້ບັງເກີດຂຶ້ນຄື ພວກທີ່ປົກຄອງທີ່ເຫລືອຢູ່ ຊຶ່ງເປັນລູກຫລານຂອງ ອະມິວລອນ ໄດ້ເຮັດໃຫ້ພວກເຂົາເຫລົ່ານັ້ນ ຕາຍ, ແທ້ຈິງແລ້ວ, ແມ່ນຄົນທັງໝົດທີ່ເຊື່ອຖືໃນເລື່ອງເຫລົ່ານີ້.
8 ບັດນີ້ການຕາຍນີ້ເປັນສາເຫດໃຫ້ພີ່ນ້ອງຂອງພວກເຂົາຫລາຍຄົນຖືກຍຸຍົງໃຫ້ຄຽດແຄ້ນ ແລະ ເລີ່ມມີການຜິດຖຽງກັນຂຶ້ນໃນຖິ່ນແຫ້ງແລ້ງກັນດານ; ແລະ ຊາວເລມັນເລີ່ມ ຕາມຂ້າລູກຫລານຂອງອະມິວລອນ ແລະ ພີ່ນ້ອງຂອງພວກເຂົາ ແລະ ເລີ່ມຂ້າພວກເຂົາ; ແລະ ພວກເຂົາກໍໄດ້ປົບໜີເຂົ້າໄປໃນຖິ່ນແຫ້ງແລ້ງກັນດານທາງຕາເວັນອອກ.
9 ແລະ ຈົ່ງເບິ່ງ ພວກເຂົາຖືກຊາວເລມັນຕາມຂ້າຈົນເຖິງມື້ນີ້. ດັ່ງນັ້ນຄຳເວົ້າຂອງອະບີນາໄດຈຶ່ງເຮັດໃຫ້ເກີດຄວາມຈິງຂຶ້ນມາແນວນີ້, ຊຶ່ງເພິ່ນໄດ້ເວົ້າໄວ້ກ່ຽວກັບລູກຫລານຂອງພວກປະໂລຫິດ ຜູ້ທີ່ເຮັດໃຫ້ເພິ່ນຕ້ອງໄດ້ຮັບຄວາມຕາຍດ້ວຍໄຟ.
10 ເພາະເພິ່ນໄດ້ເວົ້າກັບພວກເຂົາວ່າ: ສິ່ງໃດກໍຕາມທີ່ພວກເຈົ້າ ກະທຳຕໍ່ຂ້າພະເຈົ້າ ນີ້ຈະເປັນຮູບແບບຂອງສິ່ງທີ່ຈະມາເຖິງ.
11 ແລະ ບັດນີ້ອະບີນາໄດເປັນຄົນທຳອິດທີ່ຕ້ອງຮັບ ຄວາມຕາຍດ້ວຍໄຟ; ຍ້ອນວ່າຄວາມເຊື່ອຖືຂອງເພິ່ນໃນພຣະເຈົ້າ; ບັດນີ້ ນີ້ຄືສິ່ງທີ່ເພິ່ນໝາຍເຖິງຄື ຫລາຍຄົນຈະຕ້ອງໄດ້ຮັບຄວາມຕາຍດ້ວຍໄຟຄືກັນກັບທີ່ເພິ່ນໄດ້ຮັບ.
12 ແລະ ເພິ່ນໄດ້ເວົ້າກັບພວກປະໂລຫິດຂອງໂນອາວ່າ ລູກຫລານຂອງພວກເຂົາຈະເຮັດໃຫ້ຄົນເປັນຈຳນວນຫລວງຫລາຍທີ່ຈຳເປັນຕ້ອງຕາຍໃນວິທີດຽວກັບເພິ່ນ, ແລະ ວ່າພວກເຂົາຈະແຕກພັດພາກຈາກກັນໄປທົ່ວທີບ ແລະ ຖືກຂ້າຕາຍຄືກັນກັບແກະທີ່ບໍ່ມີຜູ້ລ້ຽງ, ຖືກຂັບໄລ່ໄປ ແລະ ຖືກສັດປ່າຂ້າຕາຍອີກ; ແລະ ບັດນີ້ຈົ່ງເບິ່ງ, ຄຳເວົ້າເຫລົ່ານີ້ໄດ້ປະກົດເປັນຄວາມຈິງແລ້ວ, ເພາະວ່າພວກເຂົາຖືກຊາວເລມັນຂັບໄລ່ໄປ ແລະຖືກລ່າ ແລະ ຖືກທຸບຕີ.
13 ແລະ ເຫດການໄດ້ບັງເກີດຂຶ້ນຄື ເມື່ອຊາວເລມັນເຫັນວ່າຕົນເອງເອົາຊະນະຊາວນີໄຟບໍ່ໄດ້ ພວກເຂົາຈຶ່ງໄດ້ກັບຄືນໄປຫາແຜ່ນດິນຂອງຕົນອີກ; ແລະ ຫລາຍຄົນໄດ້ຂ້າມມາຢູ່ໃນແຜ່ນດິນອິດຊະມາເອນ ແລະ ຢູ່ໃນແຜ່ນດິນນີໄຟ; ແລະ ໄດ້ລວມຕົວເຂົ້າກັບຜູ້ຄົນຂອງພຣະເຈົ້າ, ຊຶ່ງເປັນຜູ້ຄົນຂອງ ອານໄທ-ນີໄຟ-ລີໄຮ.
14 ແລະ ພວກເຂົາໄດ້ ຝັງອາວຸດແຫ່ງສົງຄາມຂອງພວກເຂົາໄວ້, ຄືກັນກັບພີ່ນ້ອງຂອງພວກເຂົາໄດ້ກະທຳໄປ, ແລະ ພວກເຂົາເລີ່ມເປັນຄົນຊອບທຳ; ແລະ ພວກເຂົາໄດ້ເດີນໃນທາງຂອງພຣະຜູ້ເປັນເຈົ້າ, ແລະ ໄດ້ຍຶດຖືທີ່ຈະຮັກສາພຣະບັນຍັດ ແລະ ຂໍ້ກຳນົດຂອງພຣະອົງ.
15 ແທ້ຈິງແລ້ວ, ແລະ ພວກເຂົາໄດ້ຮັກສາກົດຂອງໂມເຊ. ເພາະມັນເປັນການສົມຄວນທີ່ພວກເຂົາຕ້ອງຮັກສາກົດຂອງໂມເຊໄວ້, ເພາະຍັງບໍ່ສົມບູນທັງໝົດ. ແຕ່ເຖິງແມ່ນມີ ກົດຂອງໂມເຊ ພວກເຂົາຍັງໄດ້ມຸ້ງຫາການສະເດັດມາຂອງພຣະຄຣິດ ໂດຍຖືວ່າກົດຂອງໂມເຊເປັນ ແບບໜຶ່ງຂອງການສະເດັດມາຂອງພຣະອົງ, ແລະ ໂດຍເຊື່ອວ່າພວກເຂົາຕ້ອງຮັກສາການປະຕິບັດ ພາຍນອກເຫລົ່ານັ້ນໄວ້ຈົນເຖິງເວລາທີ່ພຣະອົງຈະເປັນທີ່ເປີດເຜີຍແກ່ພວກເຂົາ.
16 ບັດນີ້ພວກເຂົາບໍ່ຄິດວ່າ ຄວາມລອດຈະມາເຖິງໂດຍກົດຂອງໂມເຊ; ແຕ່ວ່າ ກົດຂອງໂມເຊມີໄວ້ເພື່ອໃຫ້ສັດທາຂອງພວກເຂົາໝັ້ນຄົງໃນພຣະຄຣິດ; ແລະ ພວກເຂົາຕັ້ງໝັ້ນໃນ ຄວາມຫວັງດ້ວຍສັດທາ, ຈົນເຖິງຄວາມລອດນິລັນດອນ, ໂດຍຫວັງໃນວິນຍານແຫ່ງການທຳນາຍ ຊຶ່ງກ່າວເຖິງສິ່ງທີ່ຈະມາເຖິງ.
17 ແລະ ບັດນີ້ຈົ່ງເບິ່ງ, ອຳໂມນ, ແລະ ອາໂຣນ, ແລະ ອອມເນີ, ແລະ ຮິມໄນ, ແລະ ພີ່ນ້ອງຂອງພວກເຂົາ ມີຄວາມປິຕິຍິນດີຢ່າງຍິ່ງ ເພາະຄວາມສຳເລັດທີ່ພວກເຂົາມີໃນບັນດາຊາວເລມັນ ໂດຍເຫັນວ່າພຣະຜູ້ເປັນເຈົ້າໄດ້ປະທານໃຫ້ພວກເຂົາຕາມ ຄຳອະທິຖານຂອງພວກເຂົາ ແລະ ວ່າພຣະອົງໄດ້ເຮັດໃຫ້ພຣະຄຳຂອງພຣະອົງ ປະກົດເປັນຈິງແກ່ພວກເຂົາຢ່າງຄົບຖ້ວນແລ້ວ.