1 Mo nao, i bin hapen se long twante mo sikis yia blong rul blong ol jaj ova long ol pipol blong Nifae, luk, taem we Ol Man blong Leman oli wekap long fas moning blong fas manis, luk, oli faenem se Amalekaea i ded long tenet blong hem; mo tu, oli luk se Tiankum i rere blong mekem faet wetem olgeta long dei ia.

2 Mo nao, taem we Ol Man blong Leman oli luk samting ia, oli fraet; mo oli lego plan blong olgeta blong maj i go long graon long Not, mo oli tanem raon wetem evri ami blong olgeta i go long bigtaon blong Myulek, mo oli traem blong lukaotem wan ples blong haed insaed long strong bigtaon blong olgeta.

3 Mo i bin hapen se Ol Man blong Leman oli jusum brata blong Amalekaea blong kam king ova long ol pipol; mo nem blong hem i Amoron; olsem ia nao king Amoron, brata blong king Amalekaea, oli jusum hem blong rul long ples blong brata blong hem.

4 Mo i bin hapen se hem i givim oda long ol pipol blong hem se oli mas holemtaet ol bigtaon ia, we oli bin tekem tru long fasin blong blad i ron; from we i no gat eni bigtaon we oli tekem we oli no lusum plante blad from.

5 Mo nao, Tiankum i luk se Ol Man blong Leman oli tingting strong blong holemtaet ol bigtaon ia we oli bin tekem, mo ol ples blong graon we oli bin tekem blong olgeta; mo tu, taem hem i luk bigfala namba blong olgeta, Tiankum i ting se i no nid blong hem i atakem olgeta insaed long sefhaos blong olgeta.

6 Be hem i putum ol man blong hem raonabaot, olsem we hem i stap mekem rere blong faet; yes, mo i tru we hem i stap mekem rere blong difendem hem bakegen long olgeta, hem i stanemap ol wol raonabaot mo mekem rere ol ples blong haed.

7 Mo i bin hapen se, hem i bin gohed olsem ia nao blong rere blong faet kasem taem we Moronae i sendem wan bigfala namba blong ol man blong mekem ami blong hem i kam moa strong.

8 Mo tu, Moronae i sendem ol oda long hem se hem i mas holemtaet ol prisena we oli foldaon long ol han blong hem; from we Ol Man blong Leman oli bin tekem plante prisena, nao hem i mas holemtaet ol prisena blong Ol Man blong Leman olsem wan praes blong olgeta we Ol Man blong Leman oli bin tekem olgeta.

9 Mo tu, hem i sendem ol oda long hem blong hem i mas mekem graon Plante i kam strong, mo mekem strong smolfala graon we i go long graon long Not, blong Ol Man blong Leman oli no tekem ples ia mo save gat paoa blong atakem olgeta long evri saed.

10 Mo Moronae i sendem long hem tu, hem i wantem se hem i fetful blong holemtaet pat blong graon ia, mo se hem i lukaotem evri janis blong atakem Ol Man blong Leman long pat blong graon ia, wetem evri paoa we hem i gat, blong sapos i gat janis hem i save tekembak bakegen, wetem trik o wetem ol narafala fasin, ol bigtaon ia we oli bin tekemaot long ol han blong olgeta; mo tu, se bae hem i mekem ol bigtaon raonabaot we Ol Man blong Leman oli no bin tekem olgeta, blong oli kam strong mo gat paoa.

11 Mo tu, hem i bin talem long hem, bae mi kam long yu, be luk, Ol Man blong Leman oli stap atakem mifala long ol boda blong graon kolosap long solwota blong Wes; mo luk, mi go agensem olgeta, from hemia, mi no save kam long yu.

12 Nao, king (Amoron) i bin aot long graon blong Sarahemla mo hem i talemaot long kwin long saed blong ded blong brata blong hem, mo hem i tekem wan bigfala namba blong ol man oli kam tugeta, mo oli maj i go agensem Ol Man blong Nifae long ol boda kolosap long solwota blong Wes.

13 Mo olsem ia nao hem i traem blong atakem Ol Man blong Nifae, mo blong tekemaot wan pat blong ol ami blong olgeta i go long pat blong graon ia, taem we hem i givim oda long olgeta we hem i livim i stap long ol bigtaon we hem i bin tekem, blong oli mas atakem Ol Man blong Nifae tu long ol boda kolosap long solwota blong Is, mo blong oli mas tekem ol graon blong olgeta wetem evri paoa we oli gat, folem paoa blong ol ami blong olgeta.

14 Mo olsem ia nao Ol Man blong Nifae oli stap long ol denja laef long en blong twante mo sikis yia blong rul blong ol jaj ova long ol pipol blong Nifae.

15 Be luk, i bin hapen long twante mo seven yia blong rul blong ol jaj, we Tiankum, folem oda blong Moronae—we i bin stanemap ol ami blong protektem ol Saot mo Wes boda blong graon, mo i statem maj blong hem blong go long graon Plante, blong hem i save helpem Tiankum wetem ol man blong hem blong tekem bakegen ol bigtaon we oli bin lusum—

16 Mo i bin hapen se Tiankum i kasem ol oda blong mekem wan atak long bigtaon blong Myulek, mo tekem bakegen sapos i save hapen.

17 Mo i bin hapen se Tiankum i mekem ol wok blong rere blong mekem wan atak long bigtaon blong Myulek, mo maj i go wetem ami blong hem agensem Ol Man blong Leman; be hem i luk se i no posibol blong hem i save winim olgeta, taem we oli stap biaen long ol strong wol blong olgeta; from hemia, hem i lego ol plan blong hem mo hem i gobak bakegen long bigtaon blong Plante, blong wet long Moronae blong kam, blong hem i save kasem paoa long ami blong hem.

18 Mo i bin hapen se Moronae i kam wetem ami blong hem long graon blong Plante, long en blong twante mo seven yia blong rul blong ol jaj ova long ol pipol blong Nifae.

19 Mo long stat blong twante mo eit yia, Moronae mo Tiankum mo plante long ol jif kapten oli holem wan kaonsel blong faet—wanem oli mas mekem blong mekem Ol Man blong Leman oli kamaot agensem olgeta blong faet; o blong oli save, long sam wei, trikim olgeta blong kamaot long ol ples blong ol strong sapot blong olgeta, blong oli save win ova long olgeta mo tekem bakegen bigtaon blong Myulek.

20 Mo i bin hapen se oli sendem ol embasi long ol ami blong Ol Man blong Leman, ol ami ia we oli protektem bigtaon blong Myulek, long lida blong olgeta, we nem blong hem i Jekob; oli wantem se hem i kamaot wetem ol ami blong hem blong mitim olgeta long ol flat ples bitwin tufala bigtaon. Be luk, Jekob, we hem i wan Man blong Soram, i no wantem blong kamaot wetem ol ami blong hem blong mitim olgeta long ol flat ples.

21 Mo i bin hapen se Moronae, i no gat hop blong mitim olgeta long wan ples we ol ami blong tugeta saed, i save gat sem janis blong faet, from hemia, hem i mekem wan narafala plan blong hem i save trikim Ol Man blong Leman blong kamaot long ol ples blong strong sapot blong olgeta.

22 From hemia, hem i mekem se Tiankum i mas tekem wan smol namba blong ol man mo maj i go daon kolosap long so blong solwota; mo Moronae mo ami blong hem, long naet, oli maj i go long waelples, long Wes blong bigtaon Myulek; mo olsem ia nao, long nekis dei, taem we ol gadman blong Ol Man blong Leman oli faenem Tiankum, oli ron mo talemaot long Jekob, lida blong olgeta.

23 Mo i bin hapen se, ol ami blong Ol Man blong Leman oli maj i go agensem Tiankum, wetem tingting se from ol namba blong olgeta bae oli winim Tiankum from smol namba blong hem. Mo taem we Tiankum i luk ol ami blong Ol Man blong Leman oli stap kamaot agensem hem, hem i stat blong tanem raon blong go daon kolosap long so blong solwota long Not.

24 Mo i bin hapen se taem we Ol Man blong Leman oli luk se hem i stat blong ronwe, oli harem gud mo oli stat blong ronem olgeta wetem fulap paoa. Mo taem we, olsem ia nao, Tiankum i stap lidim Ol Man blong Leman we oli stap ronem olgeta blong nating nomo, oli go longwe, luk, Moronae i givim oda se wan pat blong ami blong hem we i stap wetem hem bae oli mas maj i go insaed long bigtaon mo tekem bigtaon ia.

25 Mo olsem ia nao oli bin mekem, mo oli kilimded evriwan long olgeta we oli stap blong protektem bigtaon ia, yes, olgeta evriwan we oli no wantem blong lego ol tul blong faet blong olgeta.

26 Mo olsem ia nao Moronae i tekem bigtaon Myulek wetem wan pat blong ami blong hem, taem we hem i maj wetem ami blong hem we i stap go blong mitim Ol Man blong Leman taem we bae oli stop blong ronem Tiankum mo oli kambak bakegen.

27 Mo i bin hapen se Ol Man blong Leman oli ronem Tiankum kasem taem we oli kam kolosap long bigtaon Plante, mo afta, oli mitim Lihae mo wan smol ami, we oli stap blong protektem bigtaon Plante.

28 Mo nao luk, taem we ol jif kapten blong Ol Man blong Leman oli luk Lihae wetem ami blong hem we oli stap kam agensem olgeta, oli ronwe wetem tingting we i fasfas, oli fraet se maet oli no save kasem bigtaon Myulek bifo Lihae i save winim olgeta; from oli taed from maj blong olgeta, mo ol man blong Lihae oli gat ful paoa i stap.

29 Nao Ol Man blong Leman oli no bin save se Moronae i stap biaen long olgeta wetem ami blong hem; mo oli fraet nomo long Lihae mo ol man blong hem.

30 Nao Lihae i no bin wantem blong winim olgeta kasem taem we bae oli mitim Moronae mo ami blong hem.

31 Mo i bin hapen se bifo Ol Man blong Leman oli tanem raon i gobak, Ol Man blong Nifae oli raonem olgeta, ol man blong Moronae long wan saed, mo ol man blong Lihae long nara saed, olgeta evriwan ia oli fres mo oli fulap wetem paoa; be Ol Man blong Leman oli taed from longfala maj blong olgeta.

32 Mo Moronae i givim oda long ol man blong hem se oli mas atakem olgeta kasem taem we oli putumdaon ol tul blong faet blong olgeta.

33 Mo i bin hapen se Jekob, from we hem i bin lida blong olgeta, hem i wan Man blong Soram tu, mo from we hem i gat wan spirit blong no save lusum faet, hem i lidim Ol Man blong Leman i go long faet wetem kros we i tumas agensem Moronae.

34 From we Moronae i stap long rod we Ol Man blong Leman oli maj folem, nao Jekob i gat strong tingting blong kilimded olgeta, mo hem i katem rod blong hem blong go long bigtaon blong Myulek. Be luk, Moronae mo ol man blong hem oli moa strong; from hemia, oli no givim janis long fored blong Ol Man blong Leman.

35 Mo i bin hapen se oli faet, long tufala saed tugeta, wetem kros we i tumas; mo i gat plante we oli kilimded olgeta long tufala saed tugeta; yes, mo Moronae i kasem kil, mo Jekob, oli kilim hem i ded.

36 Mo Lihae i atakem olgeta long biaen blong olgeta wetem plante kros wetem ol strong man blong hem, mekem se Ol Man blong Leman we oli stap biaen oli putumdaon ol tul blong faet blong olgeta; mo ol narafala long olgeta, we tingting i fasfas tumas, oli no save se weaples blong go o weaples blong faet.

37 Nao Moronae i luk we tingting blong olgeta i fasfas, nao i talem long olgeta: “Sapos yufala i karem ol tul blong faet blong yufala i kam mo givim long mifala, luk bae mifala i stop blong mekem blad blong yufala i ron.”

38 Mo i bin hapen se taem we Ol Man blong Leman oli harem ol toktok ia, ol jif kapten blong olgeta, olgeta we oli no kilimded olgeta, oli kam fored mo oli sakem ol tul blong faet blong olgeta daon long ol leg blong Moronae, mo tu, oli givim oda long ol man blong olgeta se oli mas mekem semmak.

39 Be luk, i bin gat plante we oli no wantem; mo olgeta ia we oli no wantem putumdaon ol tul blong faet blong olgeta, oli tekem olgeta mo fasem olgeta, mo oli karemaot ol tul blong faet blong olgeta long olgeta, mo oli fosem olgeta blong maj wetem ol brata blong olgeta i go kasem graon Plante.

40 Mo nao namba blong ol prisena we oli tekem olgeta i bitim namba blong olgeta we oli bin kilimded olgeta, yes, i bitim olgeta we oli kilimded olgeta long tufala saed tugeta.