1 Na afei ɔbaa dɛ afe eduonu akron mu wɔ atsɛmbuafo aber do no, Ammoron somaa ma wɔkɔr Moroni hɔ kɛsee no dɛ ɔpɛ dɛ ɔdze n’adaduafo ba dze bɛgye nedze.

2 Na ɔbaa dɛ Moroni n’enyi gyee mbordo wɔ dɛm ebisadze yi ho, osiandɛ ɔpɛ dɛ edziban a ɔdze nyɛn Lamanfo adaduafo no, ɔdze nyɛn nankasa no nkorɔfo; na ɔpɛ so dɛ ne nsa kã nankasa no nkorɔfo ma wɔbɛkã ho ma no nsordaafo dɔr.

3 Afei Lamanfo no afa mbaa nye mbofra pii ndɔmmum na ɔbaa anaa abofra kor mpo nnyi Moroni n’adaduafo mu, anaadɛ adaduafo a Moroni afa hɔn no mu; dɛm ntsi Moroni hwehwɛɛ nyansakwan bi a ɔbɛfa do dze agye Nephifo adaduafo no pii dɛ mbrɛ obotum efi Lamanfo hɔ.

4 Dɛm ntsi ɔkyerɛɛw nwoma na ɔdze maa Ammoron n’akowaa kor noara a ɔdze nwoma brɛɛ Moroni no ma ɔdze kɛmaa no. Afei iyi nye nsɛm a ɔkyerɛwee dze kɛmaa Ammoron:

5 Hwɛ, Ammoron, makyerɛw wo biribi a ɔfa ɔkõ yi a erokõ tsia mo nkorɔfo yi, anaadɛ wo nuabanyin akõ etsia hɔn, na wo so esi nketse dɛ ebɔsɔw do wɔ no wu ekyir yi.

6 Hwɛ, mebɛkã biribi a ɔfa Nyankopɔn ne pɛrpɛrdzi ho, nye n’ebufuhyew nkrantsee no, dza ɔsensɛn wo do no, nna gyedɛ inu woho na efa wo nsordaafo fi ha dze hɔn kɔ homankasa hom nsaase do, anaadɛ asaase a ɔyɛ hom dze a ɔyɛ Nephi asaase no do.

7 Nyew, mebɛkã dɛm ndzɛmba yinom ho asɛm akyerɛ wo, sɛ ibotum ayɛ aso etsie a; nyew, merekã dɛm hɛl no a ɔda hɔ rotweɔn agye ewudzifo a wɔtsetse dɛ ɔwo nye wo nuabanyin no, nna gyedɛ inu woho na igyaa w’ewudzidze botae no, na enye wo nsordaafo no san hom ekyir kɔ homankasa hom asaase do.

8 Mbom dɛ apow dɛm ndzɛmba yinom, na akõ etsia Ewuradze no dɔm yi, dɛmara so na minyim dɛ ebɛyɛ so bio.

9 Na afei hwɛ, yɛayɛ krado rotweɔn hom; nyew, na gyedɛ esakyer wo su, annyɛ dɛm a ebɔtwe Nyankopɔn no a apow no no n’ebufuhyew aba wo do, ma ɔasɛɛ wo korakora mpo.

10 Mbom dɛ mbrɛ Ewuradze tse ase yi, hɛn nsordaafo bɛba wo do; nna gyedɛ hom san hom ekyir, annyɛ dɛm a ɔrennkyɛr na owu aba hom nkyɛn osiandɛ hɛn nkurow nye hɛn nsaase bɛda ho atsena hɔ ama hɛn, nyew, na yebosuo hɛn som nye hɛn Nyame dwuma mu yie.

11 Mbom hwɛ, ɔyɛ me dɛ merekã dɛm ndzɛmba yinom ho nsɛm kyerɛ wo kwa; anaadɛ ɔyɛ me dɛ eyɛ hɛl ba; dɛm ntsi medze mo nwoma yi aba ewiei a merekã kyerɛ wo dɛ meremmfa m’adaduafo nnsesã w’adaduafo, gyedɛ hom gye to mu dɛ hom dze banyin na ne yer na ne mba bɛma dze agye daduanyi kor; na sɛ dɛm nhyehyɛɛ yi hom bedzi do a, ɔno mebɛyɛ.

12 Na hwɛ, sɛ annyɛ iyi a, menye mo nsordaafo bɛba wo do; nyew, medze akodze bɛma me mbaa nye mo mbofra mpo, na mebɛba wo do, na mebɛkã wo do araa dze ekodu wankasa w’asaase do mpo, dza ɔyɛ hɛn egyapadze asaase a odzi kan no; nyew, na yɛdze bɔgya bɛhyɛ bɔgya ananmu, nyew, nkwa bɛhyɛ nkwa ananmu; na menye wo bɔkõ araa ekesi dɛ wɔbɛsɛɛ wo efi asaase yi enyi do.

13 Hwɛ, mowɔ m’ebufuw mu, na mo dɔm so dɛmara; hom reper dɛ hom boku hɛn, na hɛn dze yɛreper dɛ yɛbɔbɔ hɛnho ban. Mbom hwɛ, sɛ hom rohwehwɛ asɛɛ hɛn a hɛn so yɛbɛsɛɛ hom koraa; nyew, na yɛbɛgye hɛn asaase, hɛn egyapadze asaase a odzi kan no.

14 Afei medze mo nwoma aba ewiei. Emi nye Moroni; emi nye Nephifo hɔn banodzinyi no.

15 Afei ɔbaa dɛ Ammoron, ber a ne nsa kãa dɛm nwoma yi no, no bo fuwii; na ɔkyerɛɛw nwoma kor so dze kɛmaa Moroni, na dɛm nsɛm yi na ɔkyerɛwee:

16 Emi nye Ammoron, Lamanfo hɔn hen no; emi nye Amalickiah no a ikum no no nuabanyin. Hwɛ, mobɔtɔ no wer wɔ wo do, nyew, na menye mo nsordaafo bɛba wo do osiandɛ munnsuro w’ehunahuna no.

17 Na hwɛ, hom egyanom yɛɛ hɔn enuanom bɔn, na wotwaa hɔn edwoo gyee hɔn nsamu ahendzi ho kyefa a nna ɔyɛ hɔndze no.

18 Na afei hwɛ, sɛ hom dze hom akodze bogu famu, na hom dze homho abɛhyɛ hɔn a ahendzi no dzi wɔ hɔn no hɔn ase a, ɔno mebɛma mo nkorɔfo dze hɔn akodze egu famu na woegyaa dɛ wɔnye hom bɔkõ bio.

19 Hwɛ, hom ehunahuna emi na mo nkorɔfo; na mbom hwɛ, yennsuro hom ehunahuna no.

20 Naaso, mepen do enyigye mu dɛ yɛbɛsesa adaduafo dɛ mbrɛ erohwehwɛ ma yɛayɛ no, ama mesie m’edziban ama mo dɔm a wɔkõ no; na yɛbɔkõ ɔkõ bi a onnyiewiei, dɛ yɛbɛkã Nephifo ahyɛ hɛn tum ase anaadɛ yɛbɛhyew hɔn koraa.

21 Na dɛ ɔfa Nyame no a hom se yɛapow no no, hwɛ, yennyim obi a ɔtse dɛm; nna hom so hom nnyim obi a ɔtse dɛm; na mbom sɛ biribi tse dɛm wɔ hɔ dze a, hɛndze yennyim na mbom dɛ ɔno na ɔbɔɔ hɛn nye hom so.

22 Na sɛ ɔwɔ mu dɛ abɔnsam na hɛl wɔ hɔ a, hwɛ ana ɔnnkɛfa wo akɔ hɔ ma enye mo nuabanyin no a ikum no na akã dɛ ɔkɔ dɛm bea no do no akɛtsena bi a? Na mbom hwɛ dɛm ndzɛmba yinom mmfa ho.

23 Emi nye Ammoron, Zoram n’asenyi, nyia hom egyanom hyɛɛ no na wɔnye no fii Jerusalem bae no.

24 Na hwɛ afei, meyɛ Lamannyi ɔkokodurfo; hwɛ, na bɔn a wɔdze yɛɛ hɔn no ntsi na yɛrokõ dɛm ɔkõ yi dze agye ahendzi no kyɛfa no; na medze mo nwoma a merekyerɛw dze akɛma Moroni no aba ewiei.