1 Ita napasamak nga ad-adda a makapungtot ni Moroni idi naawatna daytoy a surat, gapu ta ammona a naan-anay ti pannakaammo ni Ammoron iti panangallilawna; wen, ammona nga ammo ni Ammoron a saan a nainkalintegan a gapu a makigubat isuna kadagiti tattao ni Nephi.

2 Ket kinunana: Kitaen, saanak a makisinnukat kadagiti balud ken ni Ammoron malaksid no isanudna ti panggepna, a kas inlanadko iti suratko; gapu ta saanko ipaay kenkuana a maaddaan pay iti ad-adu a bileg ngem iti addaan kenkuana.

3 Kitaen, ammok ti ayan ti lugar a bambantayan dagiti Lamanita kadagiti tattaok nga inalada kas balbalud; ket kas iti saan a panangipaay kaniak ni Ammoron iti suratko, kitaen, itedko kenkuana ti sigun kadagiti balikasko; wen, ikagumaak ti mangpapatay kadakuada agingga nga agapelada a maaddaanda iti kappia.

4 Ket ita napasamak nga idi maisao ni Moroni dagitoy a balikas, imbilinna a maaramid ti panagsukisok kadagiti taona, ta mabalin a makasarak kadakuada iti maysa a lalaki a kaputotan ni Laman.

5 Ket napasamak a nakasarakda iti maysa, a Laman ti naganna; ket maysa kadagiti katulongan ti ari a pinapatay ni Amalickiah.

6 Ita imbilin ni Moroni ken ni Laman ken ti bassit a bilang dagiti taona a masapul a mapan kadagiti guardia nga adda kadagiti Nephita.

7 Ita nabantayan dagiti Nephita iti siudad ti Gid; ngarud dinutokan ni Moroni ni Laman ket imbilinna a masapul a sumurot kenkuana ti bassit a bilang dagiti lallaki.

8 Ket idi rabiin napan ni Laman kadagiti guardia nga agbanbantay kadagiti Nephita, ket kitaen, nakitada nga umay isuna ket pinukkawanda; ngem kinunana kadakuada: Saankayo agbuteng; kitaen, maysaak a Lamanita. Kitaen, naglibaskami kadagiti Nephita, ket matmaturogdan; ket kitaen nakaalakami iti arakda ket intugotmi.

9 Ita idi nangngegan dagiti Lamanita dagitoy a balikas naragsakda nga inawat isuna; ket kinunada kenkuana: Itedmo kadakami dayta arakmo, tapno makainumkami; maragsakankami ta nakaitugotka iti arak gapu ta nabannogkami.

10 Ngem kinuna ni Laman kadakuada: Idulintayo daytoy araktayo agingga a mapantayo makigubat kadagiti Nephita. Ngem ad-adda a tinarigagayanda nga uminum iti arak gapu iti daytoy a sasao;

11 Ta, kinunada: Nabannogtayo, ngarud inumentayo ti arak, ket kalpasan iti apagbiit addanto maawattayo nga arak a rasiontayo, a mangpapigsa kadatayo a labanan dagiti Nephita.

12 Ket kinuna ni Laman kadakuada: Mabalinyo nga aramiden ti sigun iti tarigagayyo.

13 Ket napasamak a siwawayada a nangala iti arak; ket naimas daytoy iti panagramanda, ngarud nawaywayada pay a nangala; ket nasanger daytoy, ta naisagana a mapasanger.

14 Ket napasamak nga imminumda ken naragsakanda, ket kalpasan iti apagbiit nabartekda aminen.

15 Ket ita idi makita ni Laman ken dagiti taona a nabartekda aminen, ken nauneg ti turogda, nagsublida ken ni Moroni ket imbagada kenkuana amin a bambanag a napasamak.

16 Ket ita sigun daytoy iti plano ni Moroni. Ket insaganaan ni Moroni dagiti taona kadagiti armas ti pakigubat; ket napan isuna iti siudad ti Gid, bayat ti kinauneg a turog ken kinabartek dagiti Lamanita, ket inikkanna amin dagiti balud kadagiti armas a pakigubat, isu a naarmasanda amin;

17 Wen, uray pay dagiti babbai kadakuada, ken amin dagidiay annakda, a kas iti kaadu dagiti makabael nga agusar iti armas a pakigubat, idi naarmasan aminen ni Moroni dagiti balbalud; ket naaramid amin dagidiay a bambanag iti nauneg a kinaulimek.

18 Ngem no nariingda dagiti Lamanita, kitaen nabartekda ket mabalin koma a papatayen ida dagiti Nephita.

19 Ngem kitaen, saan a kastoy ti tarigagay ni Moroni; saanna a pagragsakan ti mangpatay wenno iti pammapatay, ngem pagragsakanna ti pannakaisalakan dagiti taona manipud iti pannakadadael; ket gapu iti daytoy a panggep mabalin a saan a maiyeg kenkuana ti saan a nainkalintegan, saanna a rauten dagiti Lamanita ken dadaelenna ida iti kinabartekda.

20 Ngem nagun-odna ti tarigagayna; agsipud ta naarmasanna dagiti nabalud a Nephita nga adda iti uneg ti pader ti siudad, ken naikkanna ida iti bileg tapno matagikua dagidiay paset nga adda iti uneg dagiti pader.

21 Ket kalpasanna binilinna dagiti tattao a kaduana nga umadayo kadakuada, ket palawlawanda dagiti soldado dagiti Lamanita.

22 Ita kitaen naaramid daytoy iti rabii, isu nga idi makariing dagiti Lamanita iti kabigatanna nakitada a napalawlawan ida dagiti Nephita iti ruar, ken naarmasan dagiti baludda iti uneg.

23 Ket iti kasta nakitada nga addaan iti bileg dagiti Nephita kadakuada; ket iti kadagitoy a kasasaad nakitada a saan a mainugot a makilabanda kadagiti Nephita; ngarud dinawat dagiti pangulo a kapitanda dagiti armasda a pakigubat, ket innalada ket impuruakda iti sakaanan dagiti Nephita, nga agpapakaasi.

24 Ita kitaen, daytoy ti tarigagay ni Moroni. Innalana ida a balud ti gubat, ket tinagikuana ti siudad, ken imbilinna a masapul a mawayawayaan amin dagiti balud, a Nephita; ket timmiponda kadagiti soldado ni Moroni, ket dakkel a pigsa ida iti soldadona.

25 Ket napasamak a binilinna dagiti Lamanita, nga innalana a balud, a masapul a rugianda ti agtrabaho iti pannakapapigsa kadagiti sarikedked iti aglawlaw ti siudad ti Gid.

26 Ket napasamak nga idi napatibkerda ti siudad ti Gid, sigun kadagiti tarigagayna, imbilinna a masapul a maipan dagiti baludna iti siudad ti Bountiful; ken binantayanna met dayta a siudad iti kasta unay a kinapigsa a puersa.

27 Ket napasamak nga inaramidda, nupay iti amin nga intriga dagiti Lamanita, a saluadan ken salakniban amin a balud nga innalada, ken kasta met a pagtalinaeden amin a daga ken ti gundaway a napasublida.

28 Ket napasamak a nangrugi manen ti panagballigi dagiti Nephita, ken mamasubli dagiti kalintegan ken karbenganda.

29 Namin-adu a pinanggep dagiti Lamanita a palawlawan ida iti rabii, ngem kadagitoy a panangpanggep adu a balud ti napukawda.

30 Ket namin-adu nga indiayada ti arakda kadagiti Nephita, tapno mabalinda a dadaelen ida babaen iti sabidong wenno iti pannakabartek.

31 Ngem kitaen, saan a nabannayat dagiti Nephita a manglagip iti Apo a Diosda iti daytoy a panawenda a panagrigrigat. Saanda matiliw kadagiti siloda; wen, saanda a nakiranud iti arakda, malaksid a naitedda nga immuna kadagiti balud a Lamanita.

32 Ket naannadda unay tapno awan ti sabidong a maited kadakuada; agsipud ta no masabidongan ti arakda ti Lamanita masabidongan met ti Nephita; ket iti kasta pinadasda amin nga arakda.

33 Ket ita napasamak a kasapulan ni Moroni nga agsagana a mangraut iti siudad ti Morianton; ta kitaen, napatibkerdagiti Lamanita, babaen ti panagtrabahoda, ti siudad ti Morianton agingga a nagbalinda a kasta unay ti kinapigsa a sarikedked.

34 Ket nagtultuloy ti panagisangpetda iti baro a puersa iti dayta a siudad, ken kasta met dagiti baro nga abasto.

35 Ket kasta ti panaggibus ti maikaduapulo ket siam a tawen a panagturay dagiti ukom kadagiti tattao ni Nephi.