1 Ket ita napasamak iti panangrugi ti maikatallopulo a tawen ti panagturay dagiti ukom, iti maikadua nga aldaw iti umuna a bulan, nakaawat ni Moroni iti surat manipud ken ni Helaman, a nangibaga kadagiti aramid dagiti tattao iti dayta a disso ti daga.

2 Ket dagitoy dagiti balikas nga insuratna, a kunana: Ay-ayatek unay a kabsatko, a Moroni, a kas iti Apo kasta met kadagiti panagrigrigat iti pannakigubatmi; kitaen, ay-ayatek a kabsatko, adda maysa a banag nga ibagak kenka maipanggep iti pannakigubatmi iti daytoy a paset ti daga.

3 Kitaen, dua ribu kadagiti lallaki nga annak dagidiay tattao nga inturong ni Ammon iti ruar ti daga ni Nephi—ita naammuam a dagitoy dagiti kaputotan ni Laman, nga inauna nga anak ti amami a ni Lehi;

4 Ita saan a kasapulan nga ibagak manen kenka ti maipapan kadagiti tradisionda wenno ti kinaawan pammatida, gapu ta ammom amin ti maipanggep kadagitoy a banag—

5 Ngarud umanay kaniakon nga ibagak kenka a dua ribu kadagitoy nga agtutubo a lallaki ti nangala kadagiti armasda a pakigubat, ket kayatda a siak ti agbalin a liderda; ket umaykami tapno depensaan ti pagilianmi.

6 Ket ita ammom met ti maipanggep iti katulagan nga inaramid dagiti ammada, a saanda nga alaen dagiti armasda a pakigubat a maibusor kadagiti kakabsatda tapno mangpapatay.

7 Ngem iti maikaduapulo ket innem a tawen, idi nakitada dagiti panagrigrigat ken panagsagsagabami para kadakuada, dandanida labsingen ti katulagan nga inaramidda ket alaenda dagiti armasda a pakigubat a mangidepensa kadakami.

8 Ngem saanko ipalubos nga aglabsingda iti daytoy a katulagan nga inaramidda, ta ipagarupko a papigsaennakami ti Dios, ta iti kasta saankami nga ad-adda nga agsagaba gapu iti pannakatungpal ti sapata nga inaramidda.

9 Ngem kitaen, daytoy ti maysa a banag a mabalin a maaddaankami iti naindaklan a pagragsakan. Ta kitaen, iti maikaduapulo ket innem a tawen, siak, ni Helaman, nagmartsaak kas lider dagitoy dua ribu nga agtutubo a lallaki nga agturong iti siudad ti Judea, tapno tulongan ni Antipus, a dinutokam a lider dagiti tattao iti dayta a paset ti daga.

10 Ket talaga a kinaduak ti dua ribu a lallaki nga annakko, (ta maikarida a maawagan a dagiti lallaki nga annak) iti soldado ni Antipus, ta iti daytoy a pagpigsaan ti nagragsakan unay ni Antipus; gapu ta kitaen, pinabassit dagiti Lamanita ti soldadona gapu ta napapatay ti adu a bilang ti tattaomi, daytoy ti gapuna nga agladingitkami.

11 Nupay kasta, mabalin a liwliwaenmi ti bagimi iti daytoy a kinapudno, a natayda para iti panggep ti pagilianda ken ti Diosda, wen, ket naragsakda.

12 Ket natengngel met dagiti Lamanita ti adu a balud, hepe a kapitanda amin, agsipud ta awan ti sabali nga inispalda a sibibiag. Ket ipagarupmi nga addada itan iti daytoy a tiempo iti daga ni Nephi; kasta no saanda napapatay.

13 Ket ita dagitoy dagiti siudad a nagun-od a matagikua dagiti Lamanita babaen ti panangpapatay ti nakaad-adu a maingel a tattaotayo:

14 Ti daga ti Manti, wenno ti siudad ti Manti, ken ti siudad ti Zeezrom, ken ti siudad ti Cumeni, ken ti siudad ti Antiparah.

15 Ket dagitoy dagiti siudad a tinagikuada idi simmangpetak iti siudad ti Judea; ket nasarakak ni Antipus ken dagiti taona nga agtartrabaho iti bilegda a mangsarikedked iti siudad.

16 Wen, ket naupayda iti bagi ken kasta met iti espiritu, gapu ta situtured a nakilabanda iti aldaw ken nagtrabahoda iti rabii tapno mataginayon dagiti siudadda; ket gapu iti daytoy nagsagabada kadagiti nakaro a rigrigat iti tunggal kita.

17 Ket ita determinadoda a mangparmek iti daytoy a lugar wenno matay; ngarud mabalin nga ipagarupmo a daytoy bassit a puersa nga inyegko, wen, dagidiay lallaki nga annakko, ket nangted kadakuada iti dakkel a namnama ken adu a ragsak.

18 Ket ita napasamak nga idi nakita dagiti Lamanita a nakaawat ni Antipus iti napigpigsa a puersa iti soldadona, napilitanda babaen kadagiti bilbilin ni Ammoron a saan nga umay tapno makigubat maibusor iti siudad ti Judea, wenno maibusor kadakami.

19 Ket iti kasta naparaburankami ti Apo; gapu ta no rinautdakami iti daytoy a pagkapuyanmi mabalin a napapatayda ti bassit nga soldadomi; ngem iti kasta napagtalinaed a natalgedkami manipud iti pannakadangran.

20 Binilin ida ni Ammoron a mangmantener kadagidiay siudad nga innalada. Ket kasta ti panaggibus ti maikaduapulo ket innem a tawen. Ket iti panangrugi ti maikaduapulo ket pito a tawen naisaganami ti siudadmi ken dagiti bagbagimi para iti panagdepensa.

21 Ita tinarigagayanmi nga umay mangraut kadakami dagiti Lamanita; gapu ta saanmi a tinarigagayan ti mangaramid iti panangraut kadakuada kadagiti sarikedkedda.

22 Ket napasamak a nangikabilkami kadagiti espia iti aglawlaw, tapno siputan dagiti panaggaraw dagiti Lamanita, tapno saanda a makaabante iti rabii wenno iti aldaw tapno mangaramid iti panangraut kadagiti dadduma nga akinamianan a siudadmi.

23 Gapu ta ammomi a saan nga umdas ti kinapigsa dagidiay a siudad a makilaban kadakuada; gapuna tinarigagayanmi, a no umabanteda kadakami, rautenmi ida iti likudanda, ket iti kasta maiturongmi ida iti likudan kabayatan a mararaut ida iti sanguanan. Impagarupmi a mabalinmi a parmeken ida; ngem kitaen, naupaykami iti daytoy a tarigagaymi.

24 Saanda a naitured nga umabante kadakami a kadua ti intero nga soldadoda, wenno inturedda iti sumagmamano a bilang ti soldadoda, ta amangan a no saan nga umdas ti puersada ket mapapatayda.

25 Saanda pay a naitured nga agmartsa a mapan rauten ti siudad ti Zarahemla; kasta met a saanda a naitured a bimmallasiw iti pangrugian ti karayan ti Sidon, nga agturong iti siudad ti Nephihah.

26 Ket gapu iti daytoy, agraman dagiti puersada, determinadoda a mangmentenar kadagidiay a siudad nga innalada.

27 Ket ita napasamak iti maikadua a bulan daytoy a tawen, naiyeg kadakami ti adu a probision manipud kadagiti amma dagidiay dua ribu a lallaki nga annakko.

28 Ket kasta met a naibaon ti dua ribu a soldado kadakami manipud iti daga ti Zarahemla. Ket gapu iti daytoy nakasaganakami nga addaan iti sangapulo ribu a soldado, ken dagiti probision para kadakuada, ken kasta met para kadagiti assawada ken annakda.

29 Ket dagiti Lamanita, iti kasta inaldaw a makitkitada nga umad-adu dagiti puersami, ken sumangpet dagiti probision para iti suportami, nangrugida nga agbuteng, ket nangrugida a dumarup, ta no mabalin mapasardengda ti panangawatmi kadagiti probision ken puersa.

30 Ita idi nakitami a nangrugi a madandanagan dagiti Lamanita iti daytoy a wagas, tinarigagayanmi ti mangipakat iti maysa nga estratehia a maipatungpal kadakuada; ngarud imbilin ni Antipus nga agmartsaak a kaduak dagiti babassit a lallaki nga annakko iti kaarruba a siudad, a kasla agbagbagkatkami kadagiti probision iti kaaarruba a siudad.

31 Ket agmartsakami iti asideg ti siudad ti Antiparah, a kasla mapankami iti labes ti siudad, kadagiti beddeng iti igid ti baybay.

32 Ket napasamak a nagmartsakami, a kasla adda kadakami dagiti probisionmi, tapno mapan iti dayta a siudad.

33 Ket napasamak a nagtuloy a nagmartsa ni Antipus a kaduana ti sumagmamano kadagiti soldadona, pinanawanna dagiti nabati a mangmantener iti siudad. Ngem saanna nga intuloy a nagmartsa agingga a nakapanawak a kadua ti bassit nga soldadoko, ken immasideg iti siudad ti Antiparah.

34 Ket ita, naipuesto ti kapigsaan nga soldado dagiti Lamanita iti siudad ti Antipa; wen, ti kaaduan.

35 Ket napasamak nga idi naipakaammo kadakuada babaen kadagiti espiada, immayda a kadua ti soldado ket nagmartsada tapno makilaban kadakami.

36 Ket napasamak a nakalibaskami iti sangoanda, nga agturong iti agpaamianan. Ket iti kasta inyadayomi ti kabilgan a buyot dagiti Lamanita;

37 Wen, uray pay iti kalalaingan a kaadayuna, isu nga idi makitada a kamkamatenda ida ti buyot ni Antipus, iti bilegda, saanda a nagpakanawan wenno nagpakanigid, ngem intuloyda ti panagmartsada nga agturong iti yanmi; ket, kas iti panangipapanmi, panggepda a mangpapatay kadakami sakbay a makamakam ida ni Antipus, ket daytoy tapno saan ida a mapalawlawan dagiti tattaomi.

38 Ket ita, idi nakita ni Antipus ti peggadmi, pinapartakanna ti panagmartsa ti buyotna. Ngem kitaen, rabiin idi; ngarud saandakami nakamakam, wenno nakamakam ida ni Antipus; ngarud nagkampokami para iti rabii.

39 Ket napasamak a sakbay ti bannawag iti agsapa, kitaen, kamkamatennakami dagiti Lamanita. Ita saan nga umdas ti bilegmi a makisuppiat kadakuada; wen, saanko ipalubos a matnag dagiti babassit a lallaki nga annakko kadagiti imada; ngarud intuloymi ti pannagmartsami, ket nagmartsakami a nagturong iti langalang.

40 Ita saanda nakaitured nga agpakanawan wenno agpakanigid ta amangan la ketdi a mapalawlawanda; kasta met a saannak nagpakanawan wenno nagpakanigid amangan la ketdi ta makamakamdak, ket saanmi ida madaeran, ngem mapapataykami, ket makapaglibasda; ket iti kasta nagmalmalem a nagtaraykami iti langalang, agingga a nasipngeten.

41 Ket ta manen napasamak nga, idi agbannawagen iti agsapa nakita dagiti Lamanita nga umas-asideg kadakami, ket linibasanmi ida.

42 Ngem napasamak a kinamatdakami iti saan nga adayo sakbay a nagsardengda; ket agsapa idin iti maikatlo nga aldaw ti maikapito a bulan.

43 Ket ita, no nalabsan man ida ni Antipus saanmi ammo, ngem kinunak kadagiti tattaok: Kitaen, saantayo ammo ngem nagsardengda ta panggepda a mapantayo kadakuada, tapno matiliwdatayo iti siloda;

44 Ngarud ania ti masaoyo, annakko, mapankayo kadi kadakuada a makidangadang?

45 Ket ita kunak kenka, patpatgek a kabsatko a Moroni, saannak pay nakakita iti kasta unay a kinatured, saan, uray pay kadagiti Nephita.

46 Ta kas iti panangawagko kadakuada a dagiti lallaki nga annakko (agsipud ta nakaub-ubbingda amin unay) kasta met a kinunada kaniak: Ama, kitaen adda kadakami ti Diosmi, ket saanna nga ipalubos a mataykami; ngarud mapankami; saanmi a papatayen dagiti kakabsatmi no isardengda ti mangriribuk kadakami; ngarud palubosandakami a mapan, ta amangan no parmekenda ti soldado ni Antipus.

47 Ita saanda pulos nakilaban, nupay kasta saanda nagbuteng iti ipapatay; ket ad-adda a pinanunotda ti libertad dagiti ammada ngem iti biagda; wen, nasursuruan ida dagiti innada, a no saanda nga agduadua, isalakanto ida ti Dios.

48 Ket insalaysayda kaniak dagiti balikas dagiti innada, a kunada: Saankami nga agduadua nga ammo dayta dagiti innami.

49 Ket napasamak a talaga a nagsubliak a kaduak ti dua ribuk a manglaban kadagitoy a Lamanita a nangkamat kadakami. Ket ita kitaen, nakamat dagiti soldado ni Antipus ida, ket nangrugi ti nakabutbuteng a gubat.

50 Agsipud ta nabannog ti soldado ni Antipus, gapu iti napaut a panagmartsada iti ababa unay a tiempo, dandanida a natiliw dagiti Lamanita; ket no saannak a nagsubli a kaduak ti dua ribuk nagun-odda koma ti panggepda.

51 Gapu ta napapatay ni Antipus babaen ti espada, ket adu kadagiti liderna, gapu iti pannakabannogda, a gapuanan ti kapartak ti panagmartsada—ngarud dagiti soldado ni Antipus, agsipud ta nariribukda gapu iti pannakapapatay dagiti liderda, nangrugida nga agsanud iti sanguanan dagiti Lamanita.

52 Ket napasamak a timmured dagiti Lamanita, ket rinugianda a kinamat ida; ket isu a sipipigsa a kamkamaten ida dagiti Lamanita idi rinaut ni Helaman ida iti likudanda a kaduana ti dua ribuna, ket rinugianda ti nakaro a panangpapatay kadakuada, isu a nagsardeng ti intero nga soldado dagiti Lamanita ket nagsublida a rauten ni Helaman.

53 Ita idi nakita dagiti tattao ni Antipus a tinallikudan ida dagiti Lamanita, inummongda dagiti soldadoda ket rinautda manen dagiti Lamanita iti likudanda.

54 Ket ita napasamak a dakami, a tattao ni Nephi, a tattao ti Antipus, ken siak a kaduak ti dua ribuk, talaga a pinalawlawanmi dagiti Lamanita, ket talaga a pinataymi ida; wen, agingga a napilitanda nga isuko kadagiti armasda a pakigubat ken kasta met dagiti bagbagida a kas balbalud iti gubat.

55 Ket ita napasamak nga idi insukoda ti bagbagida kadakami, kitaen, binilangko dagidiay agtutubo a lallaki a kaduak a nakilaban, ta mabutengak amangan no adu kadakuada ti napapatay.

56 Ngem kitaen, iti napalalo a ragsakko, awan ti uray maysa kadakuada ti naidasay iti daga; wen, ket nakilabanda a kasla addaanda iti pigsa ti Dios; wen, awan pay a pulos a tattao ti naammuan a nakilaban iti kasta a namilagruan a kinapigsa; ket iti kasta a naingel a kinabileg a rinautda kadagiti Lamanita, isu a talaga a napagbutengda ida; ket gapu iti daytoy insuko dagiti Lamanita ti bagbagida a kas balbalud iti gubat.

57 Ket gapu ta awan ti lugarmi para kadagiti baludmi, tapno malapdanmi a masalakan ida manipud kadagiti soldado dagiti Lamanita, ngarud pinagbalinmi a maipan ida iti daga ti Zarahemla, ken maysa a paset dagiti soldado a saan a napapatay ni Antipus, a kaduada; ket innalak ti nabati ken intiponko ida kadagiti agtutubok nga Ammonita, ket nagmartsakami a nagsubli iti siudad ti Juda.