1 Mo luk, nao i bin hapen se nekis stamba tingting i blong tekem bigtaon blong Mantae; be luk, i no gat wan rod we mifala i save lidim olgeta aot long bigtaon wetem ol smol grup blong mifala. From luk, oli tingbaot hemia we mifala i bin mekem bifo; from hemia, mifala i no save trikim olgeta blong oli aot long ol strong sapot blong olgeta.

2 Mo namba blong olgeta i moa bitim ami blong mifala, mekem se mifala i bin fraet blong go aot mo atakem olgeta long ol strong sapot blong olgeta.

3 Yes mo i bin gat nid se bae mifala i mekem ol man blong mifala oli lukaotem gud ol pat blong graon we mifala i bin tekembak blong mifala; from hemia, i gat nid blong mifala i mas wet, blong mifala i save kasem moa paoa i kam long graon blong Sarahemla, mo tu, wan niu saplae blong ol kaekae.

4 Mo i bin hapen se olsem ia nao mi sendem wan mesenja i go long gavna blong graon blong mifala, blong letem hem i save long ol problem blong ol pipol blong mifala. Mo i bin hapen se mifala i wet blong kasem ol kaekae mo paoa we i kam long graon blong Sarahemla.

5 Be luk, samting ia i bin helpem mifala smol nomo; from we Ol Man blong Leman tu oli kasem bigfala paoa evri dei mo plante kaekae tu; mo ol problem blong mifala i bin olsem ia nao long taem ia.

6 Mo Ol Man blong Leman oli bin aot oli kam agensem mifala long ol defren taem, oli bin wantem blong prapa spolem gud mifala tru long ol trik; be mifala i no save kam blong faet agensem olgeta, from ol ples blong haed blong olgeta mo ol strong sapot blong olgeta.

7 Mo i bin hapen se mifala i wet tru long ol had situesen ia blong wan spes blong plante manis, go kasem taem we kolosap bae mifala i ded from we mifala i no gat kaekae.

8 Be i bin hapen se mifala i kasem kaekae, we wan ami blong tu taosen man i karem i kam blong helpem mifala; mo hemia hem i help ia nomo we mifala i bin kasem, blong difendem mifala mo kantri blong mifala blong mekem se i no foldaon long ol han blong ol enemi blong mifala; yes, blong agensem wan enemi we oli fulap we man i no save kaontem.

9 Mo nao wanem we i mekem mifala i harem nogud, o se from wanem oli no bin sendem moa paoa long mifala, mifala i no save; from hemia, mifala i harem nogud, mo tu, mifala i fulap wetem fraet, se bae ol jajmen blong God oli kam agensem graon blong mifala long eni kaen wei, blong brekem daon mo prapa spolem gud mifala.

10 From hemia, mifala i kapsaetem tingting blong sol blong mifala long prea i go long God, blong hem i mekem mifala i strong mo tekemaot mifala long ol han blong ol enemi blong mifala, yes, mo tu, blong hem i givim paoa long mifala blong mekem se mifala i save holemtaet ol bigtaon blong mifala, mo ol graon blong mifala, mo ol samting blong mifala, blong sapotem ol pipol blong mifala.

11 Yes, mo i bin hapen se Lod, God blong yumi i soemaot long mifala se bae hem i tekemaot mifala; yes, inaf we i mekem se hem i toktok pis long sol blong mifala, mo hem i givim long mifala bigfala fet, mo i mekem mifala blong bae mifala i hop se tru long hem bae hem i sevem mifala.

12 Mo mifala i tekem fasin blong no save fraet wetem smol fos blong mifala we mifala i bin kasem, mo gat strong tingting blong winim ol enemi blong mifala, mo blong holemtaet ol graon blong mifala, mo ol samting blong mifala, mo ol waef blong mifala, mo ol pikinini blong mifala, mo stamba tingting blong fridom blong mifala.

13 Mo olsem ia nao mifala i bin go aot wetem evri paoa blong mifala agensem Ol Man blong Leman, we oli stap long bigtaon blong Mantae; mo mifala i stanemap ol tenet blong mifala kolosap long saed blong waelples, we i kolosap long bigtaon.

14 Mo i bin hapen se long tumoro blong hem, se taem we Ol Man blong Leman bae oli luk se mifala i stap long ol boda kolosap long waelples we i kolosap long bigtaon, bae oli sendem ol spae blong olgeta raonabaot mifala blong oli save faenemaot namba mo paoa blong ami blong mifala.

15 Mo i bin hapen se taem we oli luk se mifala i no strong, folem ol namba blong mifala, mo from oli bin fraet se bae mifala i stopem olgeta long sapot blong olgeta sapos oli no kam blong faet agensem mifala mo kilimded mifala, mo tu, oli ting se oli save prapa spolem gud mifala isi nomo wetem plante ami blong olgeta, from hemia, oli stat blong mekem rere blong kamaot agensem mifala blong faet.

16 Mo taem we mifala i luk se oli stap mekem rere blong kamaot agensem mifala, luk, mi mekem se Gid, wetem wan smol namba blong ol man, oli mas haedem olgeta long waelples, mo tu, se Tiamna mo wan smol namba blong ol man oli mas haedem olgeta tu long waelples.

17 Nao Gid mo ol man blong hem oli bin stap long raet saed mo ol narafala oli bin stap long lef; mo taem we oli haedem olgeta olsem ia, luk, mi bin stap nomo, wetem ol narafala ami blong mi, long sem ples ia we mifala i stanemap ol tenet blong mifala fastaem blong mekem rere long taem we bae Ol Man blong Leman oli kamaot blong faet.

18 Mo i bin hapen se Ol Man blong Leman oli bin kamaot wetem plante ami blong olgeta agensem mifala. Mo taem we oli kam mo oli kolosap blong atakem mifala wetem naef blong faet, mi mekem se ol man blong mi, olgeta we oli stap wetem mi, oli mas ronwe i go long waelples.

19 Mo i bin hapen se Ol Man blong Leman oli folem mifala wetem bigfala spid, from we oli wantem tumas blong kasem mifala blong oli save kilimded mifala; from hemia, oli folem mifala i go long waelples; mo mifala i pas kolosap long medel blong Gid mo Tiamna, inaf blong se Ol Man blong Leman oli no faenemaot olgeta.

20 Mo i bin hapen se taem we Ol Man blong Leman oli pas kolosap, o taem we ami i pas kolosap, Gid mo Tiamna oli girap long ol ples blong haed blong olgeta, mo oli blokem ol spae blong Ol Man blong Leman, blong mekem se bae oli no gobak long bigtaon.

21 Mo i bin hapen se taem we oli blokem olgeta, oli ron i go long bigtaon mo atakem ol gad we oli livim olgeta blong lukaot long bigtaon, inaf blong mekem se oli kilimded olgeta mo oli tekem bigtaon.

22 Nao hemia i bin hapen from we Ol Man blong Leman oli letem ful ami blong olgeta, be oli putum smol namba nomo blong ol gadman blong stap, mekem se Ol Man blong Nifae oli lidim olgeta oli go long waelples.

23 Mo i bin hapen se folem fasin olsem ia nao Gid mo Tiamna tufala i tekova long ol strong sapot blong olgeta. Mo i bin hapen se mifala i tekem rod blong mifala, afta we mifala i wokbaot plante long waelples i go long graon blong Sarahemla.

24 Mo taem we Ol Man blong Leman oli luk se oli stap maj i go long graon blong Sarahemla, oli bin fraet tumas, from oli fraet se i gat wan plan i stap blong lidim olgeta blong oli prapa lus olgeta; from hemia, oli stat blong ronwe i go long waelples bakegen, yes, mo tu, oli gobak long sem rod we oli bin kam long hem.

25 Mo luk, i bin naet mo oli stanemap ol tenet blong olgeta, from we ol jif kapten blong Ol Man blong Leman oli ting se Ol Man blong Nifae oli taed from maj blong olgeta; mo from we oli ting se oli bin lidim ful ami blong olgeta, from hemia nao, oli no bin tingting long saed blong bigtaon blong Mantae.

26 Nao i bin hapen se taem we i naet, mi mekem se ol man blong mi oli no mas slip, be oli mas maj i gogo long wan narafala rod i go long graon blong Mantae.

27 Mo from maj blong mifala i stap long naet taem, luk, long nekis dei mifala i stap long fored blong Ol Man blong Leman, mekem se mifala i kasem bigtaon blong Mantae bifo olgeta.

28 Mo olsem ia nao i bin hapen se, folem trik ia, mifala i tekem bigtaon blong Mantae mo i no gat blad i ron.

29 Mo i bin hapen se taem we ol ami blong Ol Man blong Leman oli kam kolosap long bigtaon, mo oli luk se mifala i rere blong mitim olgeta, oli sapraes tumas mo bigfala fraet i kasem olgeta, inaf blong mekem se oli ronwe i go long waelples.

30 Yes, mo i bin hapen se ol ami blong Ol Man blong Leman oli ronwe, oli aot long evri pat ia blong graon. Be luk, oli bin tekem wetem olgeta plante woman mo pikinini aot long graon.

31 Mo ol bigtaon ia we Ol Man blong Leman oli bin tekem, evriwan long olgeta long taem ia mifala i holem olgeta; mo ol papa blong mifala mo ol woman blong mifala mo ol pikinini blong mifala oli stap gobak long ol haos blong olgeta, olgeta evriwan, be i no olgeta ia we Ol Man blong Leman oli bin tekem olgeta olsem ol prisena mo oli tekem olgeta i go.

32 Be luk, ol ami blong mifala oli smol blong holemtaet wan bigfala namba blong ol bigtaon mo ol samting we oli bigfala.

33 Be luk, mifala i trastem God blong yumi we hem i bin givim win long mifala ova long ol graon ia, inaf blong mekem se mifala i kasem ol bigtaon ia mo ol graon ia, we oli bin blong mifala nomo.

34 Nao mifala i no save se from wanem gavman i no givim moa paoa long mifala, mo tu, ol man ia we oli bin kam long mifala oli no save from wanem we mifala i no kasem moa paoa.

35 Luk, mifala i no save se yufala i no gat sakses o no, mo sapos yufala nao i bin tekemaot ol fos i go long pat blong graon longwe; sapos i olsem, mifala i no wantem blong komplen.

36 Mo sapos i no olsem, luk, mifala i fraet se i gat sam rao long gavman, mekem se oli no sendem moa man blong helpem mifala; from mifala i save se oli moa plante bitim wanem olgeta i bin sendem.

37 Be, luk, i nomata—mifala i trastem se God bae i mekem mifala i kam fri, i nomata se ol ami blong mifala i no gat paoa, yes, mo i tekemaot mifala long ol han blong ol enemi blong mifala.

38 Luk, hemia i twante mo naen yia, long en blong hem, mo mifala i holem ol graon blong mifala, mo Ol Man blong Leman oli bin ronwe i go long graon blong Nifae.

39 Mo ol boe ia blong ol pipol blong Amon, we mi bin talem se oli gud tumas, i stap wetem mi long bigtaon blong Mantae; mo Lod i sapotem olgeta, yes, mo hem i lukaot gud long olgeta blong mekem se oli no ded wetem naef blong faet, inaf blong mekem se i no gat wan sol we i ded.

40 Be luk, oli bin kasem plante kil; be oli stanap strong long fridom ia, we tru long hem, God i mekem olgeta i fri; mo oli strong blong tingbaot Lod, God blong olgeta evri dei; yes, oli stap wokhad blong obei ol loa blong hem mo ol jajmen blong hem, mo ol komanmen blong hem oltaem; mo fet blong olgeta i strong long ol profesi long saed blong ol samting we bambae oli kam.

41 Mo nao, brata blong mi we mi lavem tumas, Moronae, bae Lod, God blong yumi we i bin pemaot yumi mo hem i bin mekem yumi fri, i lukaotem gud yu oltaem long ples blong hem; yes, mo bae hem i laekem pipol ia, go kasem we yufala i save gat sakses blong kasem evri samting we Ol Man blong Leman oli bin tekemaot long yumi, we i blong sapotem yumi. Mo nao, luk, mi endem leta blong mi. Mi mi Hileman, boe blong Alma.”