1 Ita napasamak iti maikatallopulo a tawen a panagturay dagiti ukom kadagiti tattao ni Nephi, kalpasan a naawat ni Moroni ken nabasana ti naggapu ken ni Helaman a surat, kasta unay ti rag-ona gapu iti pagimbagan, wen, ti kasta unay a balligi ni Helaman, iti pananggun-odna kadagidiay a daga a napukaw.

2 Wen, ket impakaammona kadagiti amin a taona, iti amin a daga iti aglawlaw iti dayta a paset nga ayanna, tapno agragsakda met.

3 Ket napasamak a dagus nga impatulodna ti maysa a surat ken ni Pahoran, a tartarigagayanna a rumbeng nga aguummong a sangsangkamaysa dagiti tattao tapno papigsaen ni Helaman, wenno dagiti soldado ni Helaman, iti kasta tapno nalaklaka a mamamtenerna dayta a paset ti daga a namilagruan a nagballigi ti pannakapaisublina.

4 Ket napasamak nga idi naipatulod ni Moroni daytoy a surat iti daga ti Zarahemla, rinugianna manen ti agplano tapno mabalin a magun-odna ti nabati kadagidiay a sanikua ken siudad a naala dagiti Lamanita manipud kadakuada.

5 Ket napasamak a kabayatan ti panagaramid ni Moroni kadagiti panagsagana a mangraut kadagiti Lamanita tapno makigubat, kitaen, rinaut dagiti Lamanita dagiti tattao ni Nephihah, a naummong a sangsangkamaysa manipud iti siudad ti Moroni ken ti siudad ti Lehi ken ti siudad ti Morianton.

6 Wen, immay ken nakitipon kadagiti Lamanita uray pay dagidiay napilitan a pumanaw manipud iti daga a Manti, ken manipud iti daga iti aglawlaw, iti daytoy a paset ti daga.

7 Ket agsipud ta kasta unay ti kaaduda, wen, ken inaldaw nga umaw-awatda iti puersa, rinautda dagiti tattao ni Nephihah babaen iti bilin ni Ammoron, ket talaga a rinugianda a papatayen ida iti nakaro a panangpapatay.

8 Ket nakaad-adu unay dagiti soldadoda isu a napilitan dagiti nabati kadagiti tattao ni Nephihah nga aglibas iti sanguananda; ket uray pay a napanda ken nakitiponda iti soldado ni Moroni.

9 Ket ita agsipud ta impagarup ni Moroni a nasken nga adda dagiti soldado a maipatulod iti siudad ti Nephihah, para mangtulong kadagiti tattao tapno mangmantener iti dayta a siudad, ket gapu ta ammoda a nalaklaka a lapdan ti pannasakup ti siudad kadagiti Lamanita ngem nga isubli daytoy manipud kadakuada, impagarupna a nalaka a mantenerenda dayta a siudad.

10 Ngarud tinaginayonna amin a puersana tapno mantenerenna dagidiay a lugar a naisublina.

11 Ket ita, kasta unay ti ladingit ni Moroni idi nakitana a napukaw ti siudad ni Nephihah, ket nangrugi nga agduadua, gapu iti kinadakes dagiti tattao, no saan a rumbeng a masakup ida dagiti kakabsatda.

12 Ita kastoy ti kasasaad dagiti amin a hepe a kapitanna. Nagduadua ken nagsiddaawda met gapu iti kinadakes dagiti tattao, ken gapu daytoy iti panagballigi dagiti Lamanita a turayan ida.

13 Ket napasamak a nakapungtot ni Moroni iti gobierno, gapu iti kinaawan pannakaseknanda maipanggep iti wayawaya ti pagilianda.