1 Ha ojehu ohaijey upe tetãmegua mburuvichápe, haʼéva Pahorán, ha koʼãva haʼe ñeʼẽ ohaivaʼekue, heʼívo: Péina ápe, amondo che kuatiañeʼẽ Pahorán-pe, tavaguasu Zarahemla-pe, haʼéva hue guasu ha mburuvicha upe tetã ári, ha avei mayma koʼã tavayguakuéra oiporavovaʼekuépe oisãmbyhy ha ombohape hag̃ua opa mbaʼe ko ñorairõguasu rehegua.

2 Péina ápe, che aguereko peteĩ mbaʼe haʼevaʼerã peẽme kondenasiõ raperã; péina ápe, peẽte voi peikuaa peñehenoihague pembyaty hag̃ua kuimbaʼekuéra, ha peʼarmavaʼerãha chupekuéra kysepuku reheve, ha simitárra, ha opáichagua árma ñorairõguasurã reheve, ha pemondovaʼerãha chupekuéra lamanita-kuéra rehe, opa tenda oikehápe hikuái ñane retãme.

3 Ha koʼág̃a péina ápe, che haʼe peẽme, chete, ha che ehersitokuéra avei, ha Helamán ha ijehersitokuéra, rohasákuri tuichaiterei jehasaʼasy; heẽ, jepe ñembyahýi, yʼuhéi, ha kaneʼõ, ha opa jeikoʼasy opaichaguáva.

4 Ha katu péina ápe, koʼãvante haʼérire opa mbaʼe rohasavaʼekue, ndorokaguairivaʼerãmoʼã ni norochiõivaʼerãmoʼã.

5 Ha katu péina ápe, tuichákuri jejuka ore tavayguakuéra apytépe; heẽ, miles hoʼa kysepuku rupi, ndaupeichaivaʼerãmoʼã, remeʼẽrire ore ehérsitope soldádo ha pytyvõ oikotevẽva. Heẽ, tuichákuri pende jeheja orendive g̃uarã.

6 Ha koʼág̃a péina ápe, roikuaase mbaʼérepa ko jeheja tuichaitereíva; heẽ, roikuaase mbaʼérepa ko peneñeñanduʼỹme ñeime.

7 Peimoʼã piko ikatuha peguapy pende apykajeguápe peteĩ apytuʼũ ñeñanduʼỹme ñeimépe, penderayhuʼỹhakuéra omosarambi aja ñemano pende jerére? Heẽ, ojuka aja hikuái miles pende joykeʼykuérape—

8 Heẽ, jepe umi ojeroviavaʼekue pemeʼẽtaha chupekuéra ñemoʼã, heẽ, penemoĩvaʼekue tenda ikatuháta guive peipytyvõ chupekuéra, heẽ, ikatútakuri pemondo ehérsito, pemombarete hag̃ua chupekuéra, ha pesalva hag̃ua miles chupekuéra ani hoʼa kysepukúpe.

9 Ha katu péina ápe, ndahaʼéi pévante—penegákuri chuguikuéra pende hiʼupykuéra, jepe heta oñorairõkuri ha omeʼẽkuri hekove oipotaitereígui ko tavayguakuéra ñeimeporã; heẽ, ha ojapókuri hikuái upéva omanombotaitévo ñembyahýigui, pende tuicha jeheja rupi hendivekuéra g̃uarã.

10 Ha koʼág̃a, che joykeʼykuéra ahayhuetéva—pejehayhuvaʼerãmoʼãguikuri; heẽ, ha pejepyʼapyvevaʼerãmoʼãkuri jesarekópe ko tavayguakuéra ñeimeporã ha rekosãso rehe; ha katu péina ápe, ndapejesarekóikuri hesekuéra upéicha rupi miles huguykuéra oguejýta pene akã ári ojerurévo vengánsa; heẽ, oikuaágui Tupã opa ijerureʼasykuéra, ha opa ijehasaʼasykuéra—

11 Péina ápe, peimoʼã piko ikatutaha peguapy pende apykajeguápe, ha Tupã pyʼaporã tuicháva rupi peẽ ikatútaraʼe ndapejapói mbaʼeve ha haʼe penemosãsóta? Péina ápe, peimoʼãramokuri upéva peimoʼãrei.

12 Peimoʼã piko, ojejukahague hetaite pende joykeʼykuéra hekokyʼágui hikuái? Che haʼe peẽme, peimoʼãramokuri upéva, peimoʼãrei; che haʼégui peẽme, oĩ heta hoʼavaʼekue kysepukúpe; ha péina ápe haʼe pene kondenasiõrã;

13 Ñandejára ohejágui hekojojáva ojejuka ihustísia ha ihuisiokuéra ou hag̃ua iñañáva ári; upévare ani peimoʼã umi hekojojáva oñehundiha ojejuka haguére chupekuéra; ha katu péina ápe, oike hikuái Ñandejára Itupã pytuʼúpe.

14 Ha koʼág̃a péina ápe, che haʼe peẽme, akyhyjeterei Tupã huísio oguejytaha ko tavayguakuéra ári, ndojesarekoietégui hikuái, heẽ, jepe ñane retã ñeisãmbyhyha jehejágui, ha noñangarekoietégui ijoykeʼykuérare, heẽ, umi omanovaʼekue rehe.

15 Ha ndahaʼéirire upe tekoñaña rupi oñemoñepyrũvaʼekue umi ñane akãme oĩ raẽvévare, ñandepuʼakavaʼerãmoʼãkuri ñande rayhuʼỹhakuérare ha péicha ndohupytyivaʼerãmoʼã hikuái puʼaka ñande ári.

16 Heẽ, ndahaʼéirire pe ñorairõguasu oñepyrũvaʼekue rupi ñande apytépe; heẽ, ndahaʼéirire umi rreipotaha rupi, ogueruvaʼekue hetaite tuguy ñeñohẽ ñande apytépe; heẽ, ára ñañorairõramoguare oñondivekuéra, ñambojoajúrire ñane mbarete jajapo haguéicha upe mboyve; heẽ, ha ndahaʼéirire pe puʼaka ha autorida oguerekosevaʼekuére ñande ári umi rreipotaha; hekojojárire hikuái ñande rekosãsorãme, ha ojoajúrire hikuái ñanendive, ha osẽrire hikuái ñande rayhuʼỹhakuéra rehe, ohupirangue ikysepukukuéra ñande rehe, ogueruvaʼekue hetaite tuguy ñeñohẽ ñande apytépe; heẽ, jahárire hiʼarikuéra Ñandejára mbarete reheve, ñamosarambivaʼerãmoʼãkuri ñande rayhuʼỹhakuérape, ojejapóta haguére, oñekumpliháicha iñeʼẽ.

17 Ha katu péina ápe, koʼág̃a lamanita-kuéra ou ñande ári, ojagarrávo ñane retã, ha ojuka hikuái ñande tavayguakuérape kysepukúpe, heẽ, ñane rembireko ha ñande raʼykuérape, ha ogueraha avei chupekuéra tekoʼapytĩme, ombohasaukávo opáichagua jeikoʼasy, ha péva upe tuicha tekoñaña oguerekóva umi ohupytyséva puʼaka ha autorida rupi, heẽ, jepe umi rreipotaha.

18 Ha katu mbaʼére piko che haʼetereivaʼerã ko mbaʼére? Ndajaikuaáigui noiméipa peẽvoi pehupytyse hína autorida. Ndajaikuaái noiméipa peẽvoi peñemoĩ pene retãre.

19 Térãpa napeñangarekói orerehe peimégui pe tetã mbytépe ha penemongora ñangarekoharakuéra, upévare ndapeguerukái oréve tembiʼu, ha avei kuimbaʼe romombarete hag̃ua ore ehérsito?

20 Penderesarái piko Ñandejára pende Tupã rembiapoukapykuéragui? Heẽ, penderesarái piko pende rukuéra ñeñapytymbýgui? Penderesarái piko hetaite jey ñañemosãsohague ñande rayhuʼỹhakuéra pógui?

21 Térã peimoʼã piko Ñandejára ñanemosãsotaha gueteri, jaguapy aja ñande apykajeguápe ha ndajaiporúi umi tembiporu Ñandejára omeʼẽvaʼekue ñandéve?

22 Heẽ, peguapýta piko ñeimereípe ojere aja penderehe milláres, heẽ, deséna de milláres, oguapyreíva hína avei, ha upe aja katu upe jerére tetã rembeʼýpe milláres hoʼa hína kysepukúpe, heẽ, ojekutu ha huguýva hína?

23 Peimoʼã piko Tupã heʼíta peẽ peimeha angaipaʼỹre peguapy aja ñemovãʼỹme ha pehecha koʼã mbaʼe? Péina ápe che haʼe peẽme, Nahániri. Koʼág̃a aipota penemanduʼa Tupã heʼihague pe váso ryepyraẽ oñemopotĩvaʼerãha, ha upéramo oñemopotĩtaha avei okáguio.

24 Ha koʼág̃a, napeñearrepentíriramo umi pejapovaʼekuégui, ha peñepyrũ pejesareko, ha pembouka oréve tembiʼu ha kuimbaʼekuéra, ha avei Helamán-pe, haʼe oñongatu hag̃ua umi tenda ñane retãmegua ojagarrajeyvaʼekue, ha ore rojagarrajey hag̃ua avei ore yvy rembyrekuéra koʼã tendápe, péina ápe iporã noroñorairõvéi lamanita-kuéra ndive romopotĩ mboyve ore váso ryepy, heẽ, pe ore retã ñeisãmbyhyha akã tuichakue jepeve.

25 Ha napepenáiramo ko che kuatiañeʼẽre, ha peje ha pehechauka chéve peteĩ espíritu tekosãsorã añeteguáva, ha peñehaʼã pemombarete ha pemoʼã ore ehérsito, ha pemeʼẽ chupekuéra tembiʼu okaru hag̃ua, péina ápe ahejáta che ehérsito atyʼimi isãsóva oñongatu hag̃ua ko ore retã pehẽngue, ha ahejáta Tupã mbarete ha jehovasa hiʼarikuéra, ani mbaʼevéichagua ambue puʼaka ikatu oñemoĩ hesekuéra—

26 Ha kóva ijerovia tuicha rupi, ha iñehaʼarõkuaa rupi ijehasaʼasykuérape—

27 Ha ajúta peẽme, ha ndaipóriramo pende apytépe oipotáva tekosãso, heẽ, jepe topytaraʼe peteĩ tekosãso pehẽngueʼimi, péina ápe amokyreʼỹta ñepuʼã pende apytépe, jepeve umi ohupytyséva puʼaka ha autorida omanomba peve.

28 Heẽ, péina ápe ndakyhyjéi pende puʼaka ni pende autoridágui, ha katu che Tupãgui che akyhyje; ha haʼe hembiapoukapýpe heʼiháicha che ajagarráva che kysepuku amoʼã hag̃ua che retã mbaʼéva, ha haʼe pene rembiapovai rupi rohasaha hetaite ñehundi.

29 Péina ápe ára og̃uahẽma, heẽ, ára hiʼag̃uíma, pembaʼapoʼỹramo pene retã rekosãsorã ha pene mitãnguéra rehe, pe hustísia kysepuku oguejýma pende ári; heẽ, ha hoʼáta pende ári ha og̃uahẽta peẽme penerundipaite peve.

30 Péina ápe, che ahaʼarõ pytyvõ pendehegui; ha ndapemboukáiramo oréve pytyvõ, péina ápe, che ajúta penderehe, jepe Zarahemla retãme, ha poikutúta kysepukúpe, ndapeguerekovéi peve puʼaka pejoko hag̃ua ko tavayguakuéra akãrapuʼã ore rekosãsorã.

31 Ha péina ápe, Ñandejára ndohejamoʼãigui peiko ha peñembohetave pende rekovaikuérape pehundi hag̃ua itavayguakuéra hekojojávape.

32 Péina ápe, peimoʼã piko Ñandejára peneñongatúta peẽme ha oúta huísio reheve lamanita-kuéra rehe, haʼéguikuri ituvakuéra jepokuaa ogueruvaʼekue pe ijehayhuʼỹkuéra, heẽ, ha ombotuichavékuri upéva umi osẽvaʼekue ñande apytégui, ha katu pende rembiapovaikuéra ou peẽ pehayhúgui yvoragua verapy ha mbaʼereikuéra?

33 Peikuaa pejapyharaha Tupã leikuéra, ha peikuaa pepyrũha hese pende pýpe. Péina ápe, Ñandejára heʼi chéve: Umi pehenoivaʼekue haʼe hag̃ua mburuvicha noñearrepentíriramo iñangaipa ha hembiapovaikuéragui, rehóta ñorairõme hesekuéra.

34 Ha koʼág̃a péina ápe, che, Moroni, añemyaña, pe konvénio ajapo haguéicha cheñeʼẽrendutaha che Tupã rembiapoukapykuérare; upévare aipota pejejoko Tupã ñeʼẽre, ha pembouka chéve pyaʼe pende hiʼupykuéragui ha pende kuimbaʼekuéragui, ha avei Helamán-pe.

35 Ha péina ápe, ndapejapóiramo péicha che ajúta penderehe pyaʼe; péina ápe, Tupã ndohejamoʼãigui romano ñembyahýigui; upévare haʼe omeʼẽta oréve pene rembiʼúgui, tahaʼe jepe kysepuku rupive. Koʼág̃a pehecháke pekumpli Tupã ñeʼẽ.

36 Péina ápe, che haʼe Moroni, pene mburuvicha guasu. Che ndahekái puʼaka, ha katu añehaʼã aity upéva. Che ndahekái yvóra terakuãporã, ha katu che Tupã verapy, ha che retã rekosãso ha ñeimeporã. Ha péicha che ambopaha che kuatiañeʼẽ.