1 Ket ita napasamak a naparegta ti puso ni Moroni idi naawatna daytoy a surat, ket napno iti kasta unay a ragsak gapu iti kinamatalek ni Pahoran, ta saan met a traidor iti wayawaya ken panggep ti pagilianna.

2 Ngem nagladladingit met iti kasta unay gapu iti kinadangkes dagidiay nangpatalaw ken ni Pahoran manipud iti tugaw–pangukoman, wen, iti kamaudianan gapu kadagidiay nagrebelde iti pagilianda ken kasta met iti Diosda.

3 Ket napasamak a nangala ni Moroni iti bassit a bilang kadagiti soldadona, sigun iti tarigagay ni Pahoran, ket imbilinna kada Lehi ken Teancum ti panangidaulo kadagiti nabati nga soldadona, ket nagmartsa nga agturong iti daga ti Gideon.

4 Ket intag-ayna ti wagayway ti libertad iti sadino man a lugar a simrekanna, ket nagun-odna ti aniaman a puersa a kabaelanna iti amin a panagmartsana nga agturong iti daga ti Gideon.

5 Ket napasamak a rinibu ti naguummong iti wagaywayna, ket innalada dagiti espadada para iti panangdepensa iti wayawayada, tapno saanda a maadipen.

6 Ket isu nga, idi naummong ni Moroni ti siasinoman a soldado a kabaelanna iti amin a panagmartsana, nakadanon iti daga ti Gideon; ket iti panangikaykaysana kadagiti puersana kadagidiay puersa ni Pahoran nagbalinda a nakapigpigsa unay, napigpigsa pay ngem dagiti soldado ni Pachus, nga ari kagidiay simmiasi a nangpatalaw kadagiti tattao para iti waywaya manipud iti daga ti Zarahemla ken nangtagikua iti daga.

7 Ket napasamak nga immabante da Moroni ken Pahoran a kaduada dagiti soldadoda iti daga ti Zarahemla, ket napanda a kontra iti siudad, ket sinabatda dagiti soldado ni Pachus, isu a naglalabanda.

8 Ket kitaen, napapatay ni Pachus ket natiliw dagiti soldadona a balbalud, ket naisubli ni Pahoran iti tugawna a pangukoman.

9 Ket inawat dagiti tattao ni Pachus ti pannakausigda, sigun iti linteg, ken kasta met a natiliw ken naibalud dagidiay tattao a-para iti ari; ket napapatayda sigun iti linteg; wen, napapatay dagidiay a tattao ni Pachus ken dagidiay tattao a-para iti ari, napapatay ti siasinoman a saan a mangala kadagiti armas para mangdepensa iti pagilianda, ngem makilaban kontra iti daytoy.

10 Ket isu a nagbalin a kasapulan a nainget a matungpal daytoy a linteg para iti kinatalged ti pagilianda; wen, ket siasinoman a maduktalan a mangilibak iti wayawayada ket dagus a napapatay sigun iti linteg.

11 Ket kasta a nagpatingga ti maikatallopulo a tawen ti panagturay dagiti ukom kadagiti tattao ni Nephi; napasubli da Moroni ken Pahoran ti kappia iti daga ti Zarahemla, kadagiti bukodda a tattao, naipatungpal ti ipapatay kadagidiay amin a saan a napudno iti panggep ti wayawaya.

12 Ket napasamak iti panangrugi ti tallopulo ket maysa a tawen ti panagturay dagiti ukom kadagiti tattao ni Nephi, dagus nga imbilin ni Moroni a masapul a maipatulod dagiti probision, ken kasta met a masapul a maibaon ti soldado a buklen ti innem a ribu a soldado ken ni Helaman, tapno makatulong kenkuana a mangtaginayon iti dayta a paset ti daga.

13 Ket imbilinna pay a masapul a maibaon ti soldado a buklen ti innem a ribu a soldado, nga addaan iti umdas a kaadu ti taraon kadagiti soldado da Lehi ken Teancum. Ket napasamak a naaramid daytoy tapno masarakedkeddan ti daga kontra kadagiti Lamanita.

14 Ket napasamak a nangibati da Moroni ken Pahoran iti dakkel a grupo dagiti soldado iti daga ti Zarahemla, nagmartsada a kadua ti dakkel a grupo dagiti soldado nga agturong iti daga ti Nephihah, determinadoda a parmeken dagiti Lamanita iti dayta a siudad.

15 Ket napasamak a bayat ti panagmartsada nga agturong iti daga, innalada ti dakkel a grupo dagiti soldado dagiti Lamanita, ket pinapatayda ti adu kadakuada, ket innalada dagiti probisionda ken dagiti armasda a pakigubat.

16 Ket napasamak kalpasan a naalada ida, imbilinda ida nga agaramid iti katulagan a saandanton nga usaren dagiti armasda a pakigubat kontra kadagiti Nephita.

17 Ket idi naaramidda iti daytoy a katulagan imbaonda ida a makipagnaed kadagiti tattao ti Ammon, ket agarup uppat a ribu ti bilangda a saan a napapatay.

18 Ket napasamak nga idi nabaonda ida intuloyda ti martsada nga agturong iti daga ni Nephihah. Ket napasamak nga idi nadanonda ti siudad ti Nephihah, impatakderda dagiti toldada kadagiti tanap ti Nephihah, nga asideg iti siudad ti Nephihah.

19 Ita tinarigagayan ni Moroni a rummuar dagiti Lamanita a makigubat kadakuada, kadagiti tanap; ngem gapu ta ammo dagiti Lamanita a kasta unay ti kinadakkel ti turedda, ken nakitada ti kinadakkel ti bilangda, ngarud saanda naitured ti rimmuar a makilaban kontra kadakuada; ngarud saanda nga immay nakigubat iti dayta nga aldaw.

20 Ket idi dimteng ti rabii, rimmuar ni Moroni iti kasipngetan ti rabii, ket immuli iti tuktok ti pader tapno matakutan no ania a paset ti siudad ti nagkampoan ti soldado dagiti Lamanita.

21 Ket napasamak nga addada iti daya, iti asideg ti pagserkan; ket matmaturogda amin. Ket ita nagsubli ni Moroni iti soldadona, ket imbilina a masapul nga isaganada a dagus dagiti napigsa a tali ken agdan, a maibaba manipud iti tuktok ti pader nga agturong iti makin-uneg a paset ti pader.

22 Ket napasamak nga imbilin ni Moroni a masapul nga agmartsa dagiti soldanona ket ulienda ti tuktok ti pader, ket bumabada iti dayta a paset ti siudad, wen, iti laud, a sadiay saan a nagkampo dagiti soldado dagiti Lamanita.

23 Ket napasamak a nakababada amin iti siudad iti rabii, babaen kadagiti napigsa a tali ken agdanda; isu nga iti kabigatanna addada amin iti uneg dagiti pader ti siudad.

24 Ket ita, idi nakariing dagiti Lamanita ket nakitada nga adda dagiti soldado ni Moroni iti uneg dagiti pader, kasta unay ti butengda, isu a talaga a naglibasda iti pagruaran.

25 Ket ita idi nakita ni Moroni nga agliblibasda iti sanguananna, imbilinna dagiti soldadona a masapul a kamatenda ida, ket adu ti pinapatayda, ken pinalawlawanda ti dadduma, ket imbaludda ida; ket naglibas dagiti nabati kadakuada iti daga ti Moroni, nga adda kadagiti beddeng iti igid ti baybay.

26 Iti kasta nagun-od da Moroni ken Pahoran ti pannakatagikua ti siudad ni Nephihah nga awan ti pannakapukaw ti maysa a kararua; ket adu kadagiti Lamanita ti napapatay.

27 Ita napasamak nga adu kadagiti Lamanita a balud ti nagtarigagay a makitipon kadagiti tattao ni Ammon ken agbalin a nawaya a tattao.

28 Ket napasamak a kas iti kaadu kadagiti nagtarigagay ti naipaayan ida sigun kadagiti tarigagayda.

29 Ngarud, talaga a nakitipon amin dagiti balud dagiti Lamanita kadagiti tattao ni Ammon, ket nangrugida a nagtrabaho iti kasta unay, agsukay iti daga, agpatubo iti amin a kita ti bukbukel, ken dagiti arban ken dagiti pangen ti tunggal kita; ket isu a nabang-aran dagiti Nephita manipud iti nadagsen unay a dagensenda; wen, isu a nabang-aranda manipud kadagiti amin a balud dagiti Lamanita.

30 Ita napasamak a ni Moroni, kalpasan a nagun-odna ti panangtagikua iti siudad ni Nephihah, kalpasan a naala iti adu a balud, a nangkissay kadagiti soldado dagiti Lamanita, ken kalpasan a napasubli ti adu kadagiti Nephita a naala a balud, a nangpapigsa iti soldado ni Moroni iti kasta unay; ngarud napan ni Moroni iti daga ti Lehi manipud iti daga ti Nephihah.

31 Ket napasamak nga idi nakita dagiti Lamanita nga umay makilaban ni Moroni kontra kadakuada, nagbutengda manen ket naglibasda iti sanguanan ti soldado ni Moroni.

32 Ket napasamak a kinamat ida ni Moroni ken ti soldadona kadagiti nadumaduma a siudad, agingga a sinabat ida da Lehi ken Teancum; ket naglibas dagiti Lamanita manipud ken da Lehi ken Teancum, uray agingga kadagiti beddeng iti igid ti baybay, agingga a nakadanonda iti daga ti Moroni.

33 Ket naummong amin dagiti soldado dagiti Lamanita, isu nga addada amin iti maymaysa a grupo iti daga ti Moroni. Ita ni Ammoron, ti ari dagiti Lamanita, adda met kadakuada.

34 Ket napasamak a nagkampo da Moroni ken Lehi ken Teancum a kaduada dagiti soldadoda iti aglawlaw dagiti beddeng ti daga ni Moroni, isu a napalawlawan dagiti Lamanita kadagiti beddeng babaen ti let-ang iti abagatan, ken kadagiti beddeng babaen ti let-ang iti daya.

35 Ket iti kasta talaga a nagkampoda gapu ta rabiin. Ta kitaen, nabannog met dagiti Nephita ken dagiti Lamanita gapu iti kinaatidog ti martsada; ngarud saanda a nasolbar ti aniaman nga estratehia iti rabii, malaksid ken ni Teancum; ta kasta unay ti pungtotna ken ni Ammoron, isu nga imbilangna a ni Ammoron, ken ni Amalickiah a lalaki a kabsatna, ti pakaigapuan iti daytoy nakaro ken napaut a gubat iti nagbaetanda ken dagiti Lamanita, a nakaigapuan ti nakaad-adu a gubat ken pammapatay, wen, ken kasta unay a panagbisin.

36 Ket napasamak nga iti pungtot ni Teancum talaga a napan iti kampo dagiti Lamanita, ket bimmaba manipud iti rabaw dagiti pader ti siudad. Ket napan isuna iti nadumaduma a lugar nga adda intugotna a tali, isu a nasarakanna ti ari; ket talaga a tinirona isuna iti pika, a simmarut iti asideg ti pusona. Ngem kitaen, talaga a riniing ti ari dagiti katulonganna sakbay a natay, isu a kinamatda ni Teancum, ket pinatayda.

37 Ita napasamak a kasta unay ti ladingit da Lehi ken ni Moroni idi naammuanda a natayen ni Teancum; ta kitaen, maysa a lalaki isuna a situtured a nakilaban para iti pagilianna, wen, maysa a pudno a gayyem iti libertad; ket nagsagaba iti nakaad-adu a nakaro unay a rigrigat. Ngem kitaen, natayen isuna, ken pimmanawen iti daytoy a daga.

38 Ita napasamak a nagmartsa ni Moroni iti kabigatanna, ket nadanonna dagiti Lamanita, iti kasta talaga a pinatayda ida iti nakaro a pammapatay; ket talaga a napatalawda ida iti ruar ti daga; ket talaga a naglibasda, uray la nga iti kasta saanda a nagsubli iti dayta a tiempo a makilaban kontra kadagiti Nephita.

39 Ket kasta ti panaggibus ti tallopulo ket maysa a tawen ti panagturay dagiti ukom kadagiti tattao ni Nephi; ket iti kasta naaddaanda kadagiti gubat, ken pammapatay, ken panagbisin, ken panagrigat, iti las-ud ti adu a tawen.

40 Ket adda dagiti pammapatay, ken panagsususik, ken panagsusupiat, ken amin a kita dagiti kinadangkes kadagiti tattao ni Nephi; nupay kasta para kadagiti nalinteg a pagimbagan, wen, gapu kadagiti kararag dagiti nalinteg, naisalakanda.

41 Ngem kitaen, gapu iti kasta unay a kinapaut ti gubat iti nagbaetan dagiti Nephita ken dagiti Lamanita adu ti nagbalin a natangken, gapu iti kasta unay ti kinapaut ​​ti gubat; ket adu ti limmukneng gapu kadagiti rigrigatda, isu a talaga a nagpakumbabada iti sangunanan ti Dios, uray pay iti kaunggan ti kinapakumbaba.

42 Ket napasamak a kalpasan a nasarekedkeddan ni Moroni dagidiay paset ti daga a naparang unay kadagiti Lamanita, agingga nga umdasen ti pigsada, nagsubli isuna iti siudad ti Zarahemla; ket kasta met a nagsubli ni Helaman iti lugar a tawidna; ket adda manen naipasdek a kappia kadagiti tattao ni Nephi.

43 Ket inyawat ni Moroni ti panangituray kadagiti soldadona kadagiti ima ti lalaki nga ananka, a Moronihah ti naganna; ket nagretiro iti bukodna a balay tapno busbosenna ti nabatbati nga aldawna a sikakapia.

44 Ket nagsubli ni Pahoran iti tugawna a pangukom; ket inawat manen ni Helaman ti responsibilidad a mangikasaba kadagiti tattao ti balikas ti Dios; ta gapu iti adu unay a gubgubat ken panagsususik nagbalin a kasapulan ti agaramid manen iti pagannurotan iti simbaan.

45 Ngarud, napan da Helaman ken dagiti kakabsatna, ket talaga nga indeklarada ti balikas ti Dios nga addaan iti adu a bileg para iti pannakakombinsir ti adu a tattao iti kinadangkesda, a nakaigapuan ti panagbabawida kadagiti basbasolda ken pannakabuniagda para iti Apo a Diosda.

46 Ket napasamak a talaga nga impasdekda manen ti simbaan ti Dios, iti intero a daga.

47 Wen, ket naaramid ti pagannurotan maipanggep iti linteg. Ket napili dagiti ukomda, ken dagiti hepe nga ukomda.

48 Ket nangrugi manen a rimmang-ay dagiti tattao ni Nephi iti daga, ket nangrugida nga umadu ken pimmigsa manen iti kasta unay iti daga. Ket nangrugida a bimmaknang iti kasta unay.

49 Ngem iti laksid ti kinabaknangda, wenno pigsada, wenno ti kinarang-ayda, saan a napangato ti panagkitada kadagiti bagbagida; saan met a nabannayat a manglagip iti Apo a Diosda; ngem talaga a nagpakumbabada iti kasta unay iti sanguananna.

50 Wen, talaga a nalagipda no kasano ti kinapateg dagiti bambanag nga inaramid ti Apo para kadakuada, ta insalakanna ida manipud iti ipapatay, ken manipud iti singgalut, ken manipud kadagiti pagbaludan, ken manipud iti amin a kita ti panagrigat, ken insalakanna ida manipud kadagiti ima dagiti kabusorda.

51 Ken talaga a nagtultuloy a nagkararagda iti Apo a Diosda, isu a binendisionan ida ti Apo, sigun iti balikasna, isu a talaga a pimmigsa ken rimmang-ayda iti daga.

52 Ket napasamak a naaramid amin dagitoy a bambanag. Ket natay ni Helaman, iti maikatallopulo ket lima a tawen ti panagturay dagiti ukom kadagiti tattao ni Nephi.