1 Mo nao i bin hapen se taem we Moronae i bin kasem leta ia, hem i bin harem gud, mo hem i bin fulap long glad we i bigwan tumas, from fasin blong Pahoran blong stap fetful, from se hem i no wan man blong salem fridom mo stamba tingting blong kantri blong hem i go long han blong enemi blong hem.

2 Be tu, hem i bin krae sore tumas from nogud fasin blong olgeta we oli bin ronemaot Pahoran long jea blong jajmen, yes, blong endem, from olgeta ia we oli bin go agensem kantri blong olgeta, mo tu, God blong olgeta.

3 Mo i bin hapen se Moronae i bin tekem wan smol namba blong ol man, folem tingting blong Pahoran, mo hem i bin givim raet blong ami blong hem i go long han blong Lihae mo Tiankum, mo hem i bin maj i go long graon blong Gidion.

4 Mo hem i bin stanemap flag blong fridom long eni ples we hem i bin go insaed, mo hem i bin kasem eni fos we hem i save kasem long evri maj blong hem i go long graon blong Gidion.

5 Mo i bin hapen se plante taosen i bin kam tugeta long flag blong hem, mo oli bin tekem ol naef blong olgeta blong faet blong lukaotem gud fridom blong olgeta, blong oli no save kam slef.

6 Mo olsem ia nao, taem we Moronae i bin tekem i kam tugeta eni man we hem i save tekem long ful maj blong hem, hem i bin kam long graon blong Gidion; mo taem we hem i bin mekem ol ami blong hem mo blong Pahoran oli kam wan, oli bin kam strong tumas, go kasem we oli moa strong long ol man blong Pakas, we hem i bin king blong olgeta ia we oli pulaot we oli bin ronemaot ol friman long graon blong Sarahemla mo oli bin tekem graon.

7 Mo i bin hapen se Moronae mo Pahoran tufala i bin go daon wetem ol ami blong tufala long graon blong Sarahemla, mo oli bin go aot agensem bigtaon ia, mo oli bin mitim ol man blong Pakas, inaf blong mekem se oli bin kam blong faet.

8 Mo luk, oli bin kilimded Pakas mo oli bin tekem ol man blong hem olsem ol prisena, mo oli bin putum Pahoran long jea blong jajmen blong hem bakegen.

9 Mo ol man blong Pakas i bin kasem kot blong olgeta, folem loa, mo tu, olgeta king-man ia we oli bin putum olgeta long kalabus; mo oli bin panisim olgeta folem loa; yes, ol man ia blong Pakas mo ol king-man ia, eni man we i no bin wantem tekem ol tul blong faet blong lukaotem gud kantri blong olgeta, be i bin wantem blong faet agensem, oli bin kilim olgeta i ded.

10 Mo olsem ia nao i bin kam impoten se Ol Man blong Nifae oli obei strong long loa ia, from fasin blong kantri blong olgeta i stap sef; yes, mo eni man we oli bin faenem se hem i tanem baksaed long fridom blong olgeta, oli bin panisim hem kwik taem folem loa.

11 Mo olsem ia nao teti yia blong rul blong ol jaj ova long ol pipol blong Nifae i bin en; Moronae mo Pahoran tufala i bin putumbak pis long graon blong Sarahemla, wetem ol pipol blong olgeta nomo, mo oli bin kilimded olgeta evriwan we oli no bin sapotem stamba tingting blong fridom.

12 Mo i bin hapen long stat blong teti mo wan yia blong rul blong ol jaj ova long ol pipol blong Nifae, Moronae i bin mekem kwik taem se oli sendem ol kaekae, mo tu, wan ami blong sikis taosen man bae i go long Hileman, blong helpem hem blong holemtaet pat blong graon blong hem.

13 Mo tu, hem i bin mekem se oli sendem wan ami blong sikis taosen man, wetem kaekae we inaf i go long ol ami blong Lihae mo Tiankum. Mo i bin hapen se Moronae i bin mekem olsem ia blong mekem graon i kam strong blong agensem Ol Man blong Leman.

14 Mo i bin hapen se Moronae mo Pahoran, tufala i livim wan bigfala namba blong ol man long graon blong Sarahemla, tufala i tekem maj blong tufala wetem wan bigfala namba we oli ol man i go long graon blong Nifaeha, from we oli tingting strong blong winim Ol Man blong Leman long bigtaon ia.

15 Mo i bin hapen se taem we oli stap maj i go long graon, oli tekem wan bigfala namba we oli ol man, blong Ol Man blong Leman, mo oli kilimded plante long olgeta, mo oli tekem ol kaekae blong olgeta, mo ol tul blong faet blong olgeta.

16 Mo i bin hapen se afta we oli tekem olgeta, oli mekem olgeta blong mekem wan kavenan blong oli nomo tekem ol tul blong olgeta blong faet agensem Ol Man blong Nifae.

17 Mo taem we oli mekem kavenan ia, oli sendem olgeta blong go stap wetem ol pipol blong Amon, mo namba blong olgeta i kolosap fo taosen we oli no bin kilimded olgeta.

18 Mo i bin hapen se taem we oli sendem olgeta oli gowe, oli gohed long maj blong olgeta i go long graon blong Nifaeha. Mo i bin hapen se taem we oli kam long bigtaon blong Nifaeha, oli stanemap ol tenet blong olgeta long ol flat ples blong Nifaeha, we i kolosap long bigtaon blong Nifaeha.

19 Nao Moronae i bin wantem se Ol Man blong Leman oli kamaot blong faet agensem olgeta, long ol flat ples ia; be Ol Man blong Leman, oli save se oli gat fasin blong gat strong paoa long tingting, mo oli stap luk bigfala namba blong olgeta, nao from hemia, oli bin fraet blong kamaot agensem olgeta; from hemia, oli no bin kam blong faet long dei ia.

20 Mo taem we naet i kam, Moronae i go aot long tudak blong naet, mo hem i klaem antap blong wol blong spae blong faenemaot wanem pat blong bigtaon nao Ol Man blong Leman oli stap kamp wetem ami blong olgeta.

21 Mo i bin hapen se oli stap long Is, kolosap long get; mo olgeta evriwan i stap slip. Mo nao Moronae i gobak long ami blong hem, mo hem i mekem se oli mekem rere kwiktaem ol strong rop mo ol lada, blong oli putum i go daon long antap blong wol i go daon long insaed pat blong wol.

22 Mo i bin hapen se Moronae i bin mekem se ol man blong hem i mas maj i go aot mo kam long antap blong wol, mo letem olgeta i go daon insaed long pat ia blong bigtaon, yes, long Wes, long ples we Ol Man blong Leman i no bin kam wetem ol ami blong olgeta.

23 Mo i bin hapen se olgeta evriwan i letem olgeta i go daon insaed long bigtaon long naet, oli yusum ol strong rop blong olgeta mo ol lada blong olgeta; olsem ia nao, taem we moning i kam, olgeta evriwan i stap insaed long ol wol blong bigtaon.

24 Mo nao, taem we Ol Man blong Leman oli wekap mo luk se ol ami blong Moronae oli bin stap insaed long ol wol, oli bin fraet tumas, inaf blong mekem se oli bin ronwe i go tru long get.

25 Mo nao taem we Moronae i bin luk se oli stap ronwe long fored blong hem, hem i bin mekem se ol man blong hem oli mas maj i go agensem olgeta, mo oli bin kilimded plante, mo oli bin raonem plante narafala, mo oli bin tekem olgeta olsem ol prisena; mo ol narafala we oli bin stap oli bin ronwe i go long graon blong Moronae, we i bin stap long ol boda kolosap long so blong solwota.

26 Olsem ia nao Moronae mo Pahoran tufala i bin tekem bigtaon blong Nifaeha, mo i no bin gat wan sol blong olgeta we i lus; mo i bin gat plante long Ol Man blong Leman we oli bin kilimded olgeta.

27 Nao i bin hapen se plante long Ol Man blong Leman we oli bin prisena i bin wantem blong joenem ol pipol blong Amon mo kam wan fri pipol.

28 Mo i bin hapen se olgeta evriwan we i bin wantem, long olgeta, Moronae mo Pahoran tufala i bin givim folem olsem we oli bin wantem.

29 From hemia, evri prisena blong Ol Man blong Leman oli joenem ol pipol blong Amon, mo oli stat blong wok tumas, blong wok long graon, planem evri defren kaen sid, mo fidim ol buluk mo ol grup blong ol animol blong evri kaen; mo olsem ia nao Ol Man blong Nifae oli harem se wan samting we i hevi bigwan long olgeta i nomo hevi; yes, inaf blong mekem se oli harem se wan hevi samting long olgeta i nomo hevi from evri prisena blong Ol Man blong Leman i nomo gat.

30 Nao i bin hapen se Moronae, afta we hem i kasem bigtaon blong Nifaeha, hem i tekem plante prisena, we i daonem ol namba blong ol ami blong Ol Man blong Leman tumas, mo afta we hem i tekembak plante long Ol Man blong Nifae we oli bin tekem olsem ol prisena, we samting ia i bin mekem ami blong Moronae i kam strong tumas; from hemia, Moronae i aot long graon blong Nifaeha i go long graon blong Lihae.

31 Mo i bin hapen se taem we Ol Man blong Leman oli luk se Moronae i stap kam agensem olgeta, oli fraet bakegen mo oli ronwe long ami blong Moronae.

32 Mo i bin hapen se Moronae mo ami blong hem i folem olgeta long wan bigtaon i go long narafala bigtaon, kasem taem we Lihae mo Tiankum tufala i mitim olgeta; mo Ol Man blong Leman oli ronwe long Lihae mo Tiankum, go kasem daon long ol boda kolosap long so blong solwota, kasem taem we oli kam long graon blong Moronae.

33 Mo ol ami blong Ol Man blong Leman, evriwan oli kam tugeta, inaf blong mekem se oli kam tugeta long wan grup long graon blong Moronae. Nao Amoron, king blong Ol Man blong Leman, hem tu i stap wetem olgeta.

34 Mo i bin hapen se Moronae mo Lihae mo Tiankum oli bin kam wetem ol ami blong olgeta raonabaot long ol boda blong graon blong Moronae, inaf blong mekem se oli raonem Ol Man blong Leman long ol boda kolosap long waelples long Saot, mo long ol boda kolosap long waelples long Is.

35 Mo olsem ia nao oli bin kamp blong naet. From luk, Ol Man blong Nifae mo Ol Man blong Leman tu, oli taed from bigfala maj ia; from hemia, oli no jusum blong mekem eni trik long naet taem be Tiankum nomo i mekem; from we hem i kros tumas long Amoron, inaf blong mekem se hem i luk se Amoron, mo Amalekaea brata blong hem, tufala nao i mekem se i gat faet ia we i bigwan mo i gohed bitwin olgeta mo Ol Man blong Leman, we samting ia i mekem se i gat plante faet mo blad i ron, yes, mo plante hadtaem blong kasem kaekae.

36 Mo i bin hapen se Tiankum long kros blong hem, i go insaed long kamp blong Ol Man blong Leman, mo i letem hem i go daon ova long ol wol blong bigtaon. Mo hem i go wetem wan rop, long wan ples i go long narafala ples, kasem taem we hem i faenem king; mo hem i sakem wan spia long hem, we i stikim hem kolosap long hat. Be luk, king i wekemap ol wokman blong hem bifo hem i ded, inaf blong mekem se oli folem Tiankum mo kilim hem i ded.

37 Mo i bin hapen se taem we Lihae mo Moronae tufala i save se Tiankum i ded tufala i harem nogud tumas; from luk, hem i wan man we i faet strong from kantri blong hem, yes, wan tru fren long fridom; mo hem i safa fulap, plante hadtaem we i tumas i bitim mak. Be luk, hem i ded, mo go long rod ia blong ded blong wol.

38 Nao i bin hapen se Moronae i maj i go nomo long nekis dei, mo i kam agensem Ol Man blong Leman, inaf blong mekem se oli kilimded olgeta long wan bigfala fasin blong kilimded man; mo oli ronemaot olgeta long graon; mo oli ronwe, mekem se oli no gobak long taem ia agensem Ol Man blong Nifae.

39 Mo olsem ia nao teti mo wan yia blong ol rul blong ol jaj ova long ol pipol blong Nifae i bin en; mo olsem ia nao oli gat ol faet, mo ol blad i ron, mo hadtaem blong kasem kaekae, mo hadtaem, blong wan taem blong plante yia.

40 Mo i bin gat ol fasin blong kilimded man, mo ol rao, mo ol fasin blong pulaot, mo ol kaen fasin blong nogud fasin long medel blong ol pipol blong Nifae; be from gud blong olgeta we oli stret mo gud, yes, from ol prea blong olgeta we oli stret mo gud, oli bin stap laef yet.

41 Be luk, from faet we i longfala mo i tumas bitwin Ol Man blong Nifae mo Ol Man blong Leman plante i kam stronghed, from faet we i longfala tumas; mo plante we hat blong olgeta i kam sofsof from ol hadtaem blong olgeta, inaf blong mekem se oli putum tingting blong olgeta i stap daon long fored blong God, i go kasem fasin blong tingting i stap daon we i daon olgeta.

42 Mo i bin hapen se afta we Moronae i mekem ol pat ia blong graon we oli moa open long Ol Man blong Leman oli kam strong, kasem taem we oli strong inaf, hem i gobak long bigtaon blong Sarahemla; mo tu, Hileman i gobak long ples blong hem we i kam long ol papa; mo oli stanemap pis wan taem bakegen long medel blong ol pipol blong Nifae.

43 Mo Moronae i givim raet blong lidim ol ami blong hem i go long ol han blong boe blong hem we nem blong hem i Moronaeha; mo hem i gobak long haos blong hem bakegen blong hem i save spenem ol dei blong laef blong hem we i stap yet, long pis.

44 Mo Pahoran i gobak long jea blong jajmen blong hem; mo Hileman i tekem long hem bakegen blong prij long ol pipol toktok blong God; from plante faet mo ol rao hem i mekem se i gat nid blong i gat wan oda i mas stap bakegen long jos.

45 From hemia, Hileman mo ol brata blong hem oli go aot mo oli talemaot toktok blong God wetem plante paoa blong winim tingting blong plante pipol long saed blong fasin nogud blong olgeta, we i mekem se oli sakem ol sin blong olgeta, mo oli kasem baptaes long Lod, God blong olgeta.

46 Mo i bin hapen se oli stanemap bakegen jos ia blong God, truaot long evri graon.

47 Yes, mo oli mekem ol rul long saed blong loa. Mo oli jusum ol jaj blong olgeta, mo ol jif jaj blong olgeta.

48 Mo ol pipol blong Nifae oli stat blong kam antap gud bakegen long graon, mo oli stat blong kam plante mo blong kam strong tumas bakegen long graon. Mo oli stat blong kam rij tumas.

49 Be i nomata long ol rij blong olgeta, o long paoa blong olgeta, o long ol sakses blong olgeta, oli no leftemap olgeta i go antap long hae tingting blong ae blong olgeta; mo oli no slo blong tingbaot Lod, God blong olgeta; be oli putum tingting blong olgeta i stap daon bigwan long fored blong hem.

50 Yes, oli tingbaot ol bigfala samting we Lod i bin mekem long olgeta, we hem i bin sevem olgeta aot long ded, mo aot long ol rop, mo aot long ol kalabus, mo aot long evri kaen hadtaem, mo hem i bin sevem olgeta aot long ol han blong ol enemi blong olgeta.

51 Mo oli prea long Lod, God blong olgeta oltaem, inaf blong mekem se Lod i blesem olgeta, folem ol toktok blong hem, mekem se oli kam strong mo oli kam antap gud long graon.

52 Mo i bin hapen se evri samting ia i bin hapen. Mo Hileman i kasem ded, long teti mo faef yia blong rul blong ol jaj ova long ol pipol blong Nifae.