1 Ket napasamak iti panangrugi ti maikatallopulo ket innem a tawen ti panagturay dagiti ukom kadagiti tattao ni Nephi, a tinagikua ni Shiblon dagidi sagrado a bambanag a naited ken ni Helaman babaen ken ni Alma.

2 Ket nalinteg a tao isuna, ket talaga a sililinteg a nagbiag iti presensia ti Dios; ket inkagumaanna ti agtultuloy nga agaramid iti naimbag, a mangtungpal kadagiti bilbilin ti Apo a Diosna; ken kasta met ti inaramid ti lalaki a kabsatna.

3 Ket napasamak a natay met ni Moroni. Ket kasta ti panaggibus ti maikatallopulo ket innem a tawen a panagturay dagiti ukom.

4 Ket napasamak nga iti maikatallopulo ket pito a tawen ti panagturay dagiti ukom, adda dakkel a grupo dagiti soldado, uray nga agdagup iti lima ribu ket uppat a gasut a soldado, agraman dagiti assawada ken dagiti annakda, ti pimmanaw manipud iti daga ti Zarahemla a nagturong iti daga nga agpaamianan.

5 Ket napasamak a ni Hagoth, gapu ta maysa a kasta unay ti panagusiuso a tao, ngarud napan ket nangaramid ti nakadakdakkel unay a barko, kadagiti beddeng ti daga ti Bountiful, nga asideg ti daga a Desolation, ket pinalayagna daytoy iti laud a baybay, nga asideg ti akikid a paset ti daga nga agturong iti daga nga agpaamianan.

6 Ket kitaen, adu dagiti Nephita a simrek iti dayta ken naglayag nga addaan iti adu a probision, ken kasta met ti adu a babbai ken ubbing; ket nagturongda iti agpaamianan. Ket kasta ti naggibusan ti maikatallopulo ket pito a tawen.

7 Ket iti maikatallopulo ket walo a tawen, nangaramid daytoy a tao kadagiti dadduma a barko. Ket talaga a nagsubli met ti immuna a barko, ket ad-adu pay a tattao ti simrek iti daytoy; ket nangalada met iti adu a probision, ket nagturongda manen iti daga nga agpaamianan.

8 Ket napasamak nga awan pulos iti damag maipapan kadakuada. Ket impagarupmi a nalmesda iti kaadalman ti baybay. Ket napasamak a talaga a naglayag ti maysa pay a sabali a barko; ket saanmi nga ammo no sadino ti napananna.

9 Ket napasamak nga iti daytoy a tawen adu a tattao ti napan iti daga nga agpaamianan. Ket kasta ti naggibusan ti maikatallopulo ket walo a tawen.

10 Ket napasamak iti maikatallopulo ket siam a tawen ti panagturay dagiti ukom, natay met ni Shiblon, ket napan ni Corianton iti daga nga agpaamianan babaen iti maysa a barko, tapno mangipan kadagiti probision kadagiti tattao a napan iti dayta a daga.

11 Ngarud nagbalin a kasapulan para ken ni Siblon nga italek dagidiay sagrado a bambanag, sakbay ti ipapatayna, iti lalaki nga anak ni Helaman, a naawagan iti Helaman, a naawagan iti nagan ti amana.

12 Ita kitaen, amin dagidiay a kitikit nga adda iti panangaywan ni Helaman ket naisurat ken naipatulod kadagiti annak ti tattao iti intero a daga, malaksid kadagidiay masapul a saan a mailatak a paspaset nga imbilin ni Alma.

13 Nupay kasta, masapul a mataginayon a sagrado dagitoy a bambanag, ken maited manipud iti maysa a henerasion agingga iti sabali; ngarud, iti daytoy a tawen, naitalek dagitoy ken ni Helaman, sakbay ti ipapatay ni Shiblon.

14 Ket napasamak met iti daytoy a tawen nga adda sumagmamano a simmiasi a napan kadagiti Lamanita; ket nagargarida manen nga agpungtot kadagiti Nephita.

15 Ket kasta met iti daytoy met laeng a tawen napanda a kadua ti adu nga soldado tapno makigubat kontra kadagiti tattao ni Moronihah, wenno kontra iti soldado ni Moronihah, nga iti kasta naabakda ken napasanudda manen kadagiti bukodda a daga, a nagsagaba iti adu a napapatay.

16 Ket kasta ti naggibusan ti maikatallopulo ket siam a tawen a panagturay dagiti ukom kadagiti tattao ni Nephi.

17 Ket kasta ti naggibusan ti pakaammo ni Alma, ken ni Helaman a lalaki nga anakna, ken kasta met ni Shiblon, nga anakna.