Alma

Buk blong Momon

Ol Samting we Oli Stap Insaed
Fas Toktok mo Ol Witnes
Fas Nifae
Seken Nifae
Jekob
Inos
Jerom
Omnae
Ol Toktok blong Momon
Mosaea
Alma
Hileman
Tri Nifae
Fo Nifae
Momon
Ita
Moronae

Alma

Japta 1
Nehor i tijim ol giaman doktrin, i stanemap wan jos, i statem fasin blong giaman pris mo i kilim Gidion i ded—Oli kilim Nehor i ded from hem i brekem ol loa—Fasin blong giaman pris mo fasin blong givim hadtaem i spred i go long ol pipol—Olgeta pris oli lukaotem mo helpem olgetawan bakegen, ol pipol oli lukaotem gud olgeta we oli pua mo Jos i kam antap gud. Raonabaot 91–88 B.K.B.
Japta 2
Amlisae i lukaotem wan wei blong hem i kam king mo voes blong ol pipol i no wantem hem—Olgeta we oli folem hem oli mekem hem i kam king—Olgeta laen blong Amlisae oli mekem faet long Ol Man blong Nifae mo oli lus—Ol ami blong Ol Man blong Leman mo Ol Man blong Amlisae oli joen tugeta mo oli lus—Alma i kilim Amlisae i ded. Raonabaot 87 B.K.B.
Japta 3
Ol Man blong Amlisae oli bin putum wan mak long olgeta folem toktok ia we i stap long profesi—Ol Man blong Leman oli bin kasem strong nogud tok from oli bin gat fasin blong go agens—Ol man oli mekem ol strong nogud tok blong olgeta i kambak long olgeta bakegen—Ol Man blong Nifae oli winim wan moa ami blong Ol Man blong Leman. Raonabaot 87–86 B.K.B.
Japta 4
Alma i baptaesem plante taosen man we oli jenisim laef—Rabis fasin i go insaed long Jos mo Jos i no save gohed blong gro—Nifaeha i kam jif jaj—Alma, olsem hae pris, i givim taem blong hem long seves blong God. Raonabaot 86–83 B.K.B.
Japta 5
Blong kasem fasin blong sevem man, ol man oli mas sakem sin mo obei ol komanmen, oli mas bon bakegen, oli mas klinim ol klos blong olgeta tru long blad blong Kraes, oli mas putum tingting blong olgeta i stap daon mo oli mas stopem fasin ia blong gat hae tingting mo wantem samting blong narafala man, mo mekem ol wok blong stret mo gud fasin—Gudfala Man blong Lukaot long Ol Sipsip i singaotem ol pipol blong Hem—Olgeta we oli mekem ol wok we oli nogud oli ol pikinini blong devel—Alma i talem testemoni blong hem se doktrin blong hem i tru mo i givim oda long ol man blong sakem sin—Ol nem blong olgeta we oli stret mo gud bae oli raetemdaon olgeta long buk blong laef. Raonabaot 83 B.K.B.
Japta 6
Oli klinim Jos long Sarahemla mo oli putum long oda—Alma i go long Gidion blong prij. Raonabaot 83 B.K.B.
Japta 7
Bae Meri i bonem Kraes i kam long wol—Bae Hem i tekemaot ol rop blong ded mo tekem ol sin blong ol pipol blong Hem—Olgeta we oli sakem sin, oli kasem baptaes, mo obei ol komanmen, bae oli kasem laef we i no save finis—Fasin blong stap doti i no gat ples insaed long kingdom blong God—Ol man oli mas gat fasin ia blong putum tingting i stap daon, fet, hop mo bigfala lav. Raonabaot 83 B.K.B.
Japta 8
Alma i prij mo i baptaesem ol pipol long Melek—Oli no wantem hem long Amonaeha mo hem i aot—Wan enjel i talem long hem blong gobak mo taltalemaot fasin blong sakem sin long ol pipol—Amulek i akseptem hem, mo tufala i prij long Amonaeha. Raonabaot 82 B.K.B.
Japta 9
Alma i givim oda long ol pipol blong Amonaeha blong sakem sin—Lod bae i sore plante long Ol Man blong Leman long ol las dei—Sapos Ol Man blong Nifae oli sakem laet ia, bae Ol Man blong Leman oli kilim olgeta oli ded—Pikinini blong God kolosap bae i kam nao—Bae hem i pemaot olgeta ia we oli sakem sin, kasem baptaes, mo gat fet long nem blong Hem. Raonabaot 82 B.K.B.
Japta 10
Lihae i kamaot long laen blong Manase—Amulek i talembak oda blong enjel se bae hem i lukaotem Alma—Ol prea blong olgeta we oli stret mo gud i mekem Lod i no spolem ol pipol—Ol loya mo ol jaj we oli no stret mo oli no gud, oli statem wok ia we bae i prapa spolem gud evriwan long ol pipol. Raonabaot 82 B.K.B.
Japta 11
Oli putumaot fasin blong Ol Man blong Nifae blong yusum mane—Amulek i rao wetem Siesrom—Kraes bae i no sevem ol pipol wetem ol sin blong olgeta we i stap yet—Olgeta ia nomo we oli kasem kingdom blong heven bae Lod i sevem olgeta—Evri man bae i girap long ded wetem wan bodi we i nomo save ded—I no gat ded afta Laef Bakegen long Ded. Raonabaot 82 B.K.B.
Japta 12
Alma i toktok long Siesrom—God i save givim ol sikret blong Hem long olgeta nomo we oli stap fetful—God i jajem ol man folem ol tingting blong olgeta, ol bilif, ol toktok, mo ol wok blong olgeta—Ol nogud man bae oli harem nogud long ded blong spirit—Laef ia blong wol i wan ples blong tes—Plan blong fasin blong pemaot man hem i mekem se laef bakegen long ded i hapen, mo tru long fet, man i kam klin aot long ol sin—Man we i sakem sin i save kasem sore tru long Wan Stret Pikinini Ia Nomo. Raonabaot 82 B.K.B.
Japta 13
Oli bin singaotem ol man blong kam hae pris from fet blong olgeta i bigwan tumas mo ol wok blong olgeta oli gud—Ol hae pris oli mas tijim ol komanmen—Tru long stret mo gud fasin God i mekem olgeta oli kam klin aot long ol sin mo oli go insaed long kingdom blong Lod—Melkesedek i wan long olgeta ia—Ol enjel oli stap talemaot ol gudfala nius long evri ples long graon—Bae oli talemaot se Kraes bae i kam taem bae i hapen. Raonabaot 82 B.K.B.
Japta 14
Oli putum Alma mo Amulek long kalabus mo oli faetem tufala—Oli bonem olgeta we oli biliv mo oli sakem ol tabu skripja i go long faea—Olgeta ia we oli ded from bilif blong olgeta, Lod i akseptem olgeta long glori—Ol wol blong kalabus oli brok mo oli foldaon—Lod i mekem Alma mo Amulek oli go fri, mo olgeta ia we oli givim hadtaem long tufala, wol blong kalabus i kilim olgeta oli ded. Raonabaot 82–81 B.K.B.
Japta 15
Alma mo Amulek, tufala i go long Saedom mo stanemap wan jos—Alma i mekem Siesrom i kam oraet bakegen, hem i joenem Jos—Plante oli kasem baptaes, mo Jos i kam antap gud—Alma mo Amulek, tufala i go long Sarahemla. Raonabaot 81 B.K.B.
Japta 16
Ol Man blong Leman oli prapa spolem gud ol pipol blong Amonaeha—Soram i lidim Ol Man blong Nifae blong winim Ol Man blong Leman—Alma mo Amulek mo plante moa oli prijim toktok—Oli tijim se afta Kraes i laef bakegen long ded, bae Hem i kamkamaot long Ol Man blong Nifae. Raonabaot 81–77 B.K.B.
Japta 17
Ol boe blong Mosaea oli gat spirit blong profesi mo blong revelesen—Oli go long plante defren wei blong talemaot toktok long Ol Man blong Leman—Amon i go long graon blong Ismael mo i kam wokman blong King Lamonae—Amon i sevem ol grup blong ol animol blong king mo i kilimded nogud ol enemi blong hem long wota blong Sibas. Ol ves 1–3, raonabaot 77 B.K.B.; ves 4, raonabaot 91–77 B.K.B.; mo ol ves 5–39, raonabaot 91 B.K.B.
Japta 18
King Lamonae i ting se Amon hem i Bigfala Spirit—Amon i tijim king long saed blong olsem wanem God i mekem wol, long saed blong ol wok blong God wetem ol man, mo fasin blong pemaot man we i kam tru long Kraes—Lamonae i biliv mo i foldaon long graon olsem se hem i ded. Raonabaot 90 B.K.B.
Japta 19
Lamonae i kasem laet blong laef we i no gat en mo i luk Ridima—Evriwan insaed long haos blong hem i luk wan spesel drim, mo plante oli luk ol enjel—Lod i sevem Amon tru long wan merikel—Hem i baptaesem plante mo i stanemap wan jos long medel blong olgeta. Raonabaot 90 B.K.B.
Japta 20
Lod i sendem Amon long Midonae blong mekem ol brata blong hem we oli stap long kalabus oli go fri—Amon mo Lamonae tufala i mitim papa blong Lamonae, we i king blong ful graon—Amon i fosem olfala king blong letem ol brata blong hem oli go fri. Raonabaot 90 B.K.B.
Japta 21
Eron i tijim Ol Man blong Amalekae long saed blong Kraes mo Atonmen blong Hem—Oli putum Eron mo ol brata blong hem long kalabus long Midonae—Afta oli mekem olgeta oli go fri, oli tij long ol haos blong prea mo oli helpem plante blong jenisim laef blong olgeta—Lamonae i givim fridom blong relijin, long ol pipol we oli stap long graon blong Ismael. Raonabaot 90–77 B.K.B.
Japta 22
Eron i tijim papa blong Lamonae long saed blong Kriesen, Foldaon blong Adam, mo plan blong fasin blong pemaot man, tru long Kraes—King mo evri man insaed long haos blong hem i jenisim laef blong olgeta—Oli eksplenem olsem wanem oli seraotem graon bitwin Ol Man blong Nifae mo Ol Man blong Leman. Raonabaot 90–77 B.K.B.
Japta 23
Oli talemaot ofisol toktok long pablik se oli fri blong biliv long God o no biliv long God—Ol Man blong Leman long ol seven graon mo ol bigtaon oli jenisim laef blong olgeta—Oli singaotem olgeta bakegen Ol Man Antae-Nifae-Lihae mo oli fri long strong nogud tok—Ol Man blong Amalekae mo Ol Man blong Amulon oli sakemaot trutok. Raonabaot 90–77 B.K.B.
Japta 24
Ol Man blong Leman oli kam agensem ol pipol blong God—Ol Man Antae-Nifae-Lihae oli hapi long Kraes mo ol enjel oli visitim olgeta—Oli jusum blong kasem ded be i no blong faet blong difendem laef blong olgeta—Moa Man blong Leman oli jenisim laef blong olgeta. Raonabaot 90–77 B.K.B.
Japta 25
Fasin blong Ol Man blong Leman blong atakem ol man i hapen moa olbaot—Ol pikinini blong ol pris blong Noa oli ded olsem we Abinadae i bin profesae—Plante Man blong Leman oli jenisim laef blong olgeta mo joenem ol pipol blong Antae-Nifae-Lihae—Oli biliv long Kraes mo holem loa blong Moses. Raonabaot 90–77 B.K.B.
Japta 26
Amon i presem Lod—Ol fetful man oli kam strong moa tru long Lod, mo hem i givim save long olgeta—Tru long fet, ol man oli save tekem plante taosen sol oli kam blong sakem sin—God i gat evri paoa mo i haremsave evri samting. Raonabaot 90–77 B.K.B.
Japta 27
Lod i givim oda long Amon blong lidim Ol Man blong Antae-Nifae-Lihae blong go long wan sef ples—Taem we Amon i mitim Alma, glad blong hem i karemaot paoa blong hem—Ol Man blong Nifae oli givim long Ol Man blong Antae-Nifae-Lihae graon blong Jerson—Oli singaotem olgeta ol pipol blong Amon. Raonabaot 90–77 B.K.B.
Japta 28
Ol Man blong Leman oli lus long wan bigfala faet—Plante ten taosen oli ded—Oli putum ol nogud man long wan ples blong bigfala harem nogud we i no gat en long hem; olgeta we oli stret mo gud oli kasem wan glad we i neva gat en. Raonabaot 77–76 B.K.B.
Japta 29
Alma, i wantem blong taltalemaot strong long ol man blong oli sakem sin, wetem paoa blong enjel—Lod i givim ol tija long evri kantri—Alma i presem wok blong Lod mo long sakses blong Amon mo ol brata blong hem. Raonabaot 76 B.K.B.
Japta 30
Koriho, we i wan man we i agensem Kraes, i stap jikim Kraes, Atonmen, mo spirit blong profesi—Hem i tijim se i no gat God, man i no foldaon, i no gat panis from sin, mo i no gat Kraes—Alma i testifae se Kraes bae i kam mo se evri samting i stap soem se i gat wan God—Koriho i askem wan saen mo God i mekem hem i no save toktok—Devel i kam long Koriho olsem wan enjel mo i talem long hem wanem blong talem—Oli purumbut long Koriho mo hem i ded. Raonabaot 76–74 B.K.B.
Japta 31
Alma i lidim wan misin blong karembak Ol Man blong Soram we oli nomo wantem folem jos—Olgeta Man blong Soram oli talem se oli no save Kraes, oli biliv long wan giaman wei blong singaotem man long wok, mo oli stap wosip wetem ol sem prea—Ol misinari oli fulap wetem Tabu Spirit—Glad blong Kraes i kavremap ol plante hadtaem we oli gat. Raonabaot 74 B.K.B.
Japta 32
Alma i tijim ol puaman we ol hadtaem blong olgeta i mekem tingting blong olgeta i stap daon—Fet hem i wan hop long ol samting we yumi no luk, be oli tru—Alma i testifae se ol enjel oli stap givhan long ol man, ol woman, mo ol pikinini—Alma i komperem trutok long wan sid—Sid ia oli mas planem mo lukaotem gud—Afta hem i gro i kam wan bigfala tri, mo long tri ia, man i save kasem frut blong laef we i no save finis. Raonabaot 74 B.K.B.
Japta 33
Sinos i tijim se ol man oli mas prea mo wosip long evri ples, mo se God bae i tekemaot ol jajmen from Pikinini blong Hem—Sinok i tijim se sore i kam from Pikinini—Long waelples, Moses i leftemap wan saen blong Pikinini blong God. Raonabaot 74 B.K.B.
Japta 34
Amulek i testifae se trutok i stap long Kraes, we i mekem fasin blong sevem man i hapen—Sapos i no gat wan atonmen i hapen, evri man oli mas ded—Evri loa blong Moses i poen i go long sakrifaes blong Pikinini blong God—Plan we i no save finis blong fasin blong pemaot man, i stanap long fet mo fasin blong sakem sin—Prea from ol blesing long saed blong laef ia mo long saed blong spirit—Laef ia i taem blong ol man oli rere blong mitim God—Yu mas wokhad blong sevem yuwan wetem respek long fes blong God. Raonabaot 74 B.K.B.
Japta 35
Prijing blong trutok i prapa spolem gud giaman wok blong Ol Man blong Soram—Oli aotem olgeta we oli bin jenisim laef, we afta oli joenem ol pipol blong Amon long Jerson—Fasin nogud blong ol pipol i mekem Alma i harem nogud. Raonabaot 74 B.K.B.
Japta 36
Alma i testifae long Hileman abaot jenis long laef blong hem afta we hem i bin luk wan enjel—Hem i bin harem nogud long ol soa blong wan sol we devel i stap kontrolem; hem i bin prea long nem blong Jisas, mo afta hem i bin bon long God—Sol blong hem i bin fulap long glad we i swit—Hem i bin luk plante grup blong ol enjel oli stap presem God—Plante man we oli jenisim laef oli testem mo luk semmak olsem we hem i bin testem mo luk. Raonabaot 74 B.K.B.
Japta 37
Ol buk we oli bin mekem wetem bras mo ol narafala skripja, oli sevem i stap blong tekem ol sol oli kam long fasin blong sevem man—Oli bin prapa spolem gud Ol Man blong Jared from fasin nogud blong olgeta—Ol sikret strong promes mo ol kavenan blong olgeta, oli no mas soemaot long ol pipol—Toktok wetem Lod long evri samting we yu mekem—Olsem we Liahona i bin lidim Ol Man blong Nifae, toktok blong Kraes tu i lidim ol man oli go long laef we i no save finis. Raonabaot 74 B.K.B.
Japta 38
Ol Man blong Soram oli bin givim hadtaem long Siblon from hem i gat stret mo gud fasin—Fasin blong sevem man i stap long Kraes, we i laef mo laet blong wol—Kontrolem ol strong filing blong yu. Raonabaot 74 B.K.B.
Japta 39
Sin blong slip olbaot wetem man o woman, i wan rabis sin—Ol sin blong Korianton i blokem Ol Man blong Soram blong kasem trutok—Fasin blong Kraes blong pemaot man, i blong olgeta tu we oli bin fetful mo oli bin bon bifo Kraes i pemaot man. Raonabaot 74 B.K.B.
Japta 40
Kraes i mekem fasin blong laef bakegen long ded i kam long evri man—Ol dedman we oli stret mo gud oli go long paradaes mo ol nogud man oli go long bigfala tudak blong wet long dei we bae oli laef bakegen long ded—Evri samting bae i kambak tugeta bakegen long stret fasin mo wei blong olgeta we i stret evriwan long taem blong Laef Bakegen long Ded. Raonabaot 74 B.K.B.
Japta 41
Long Laef Bakegen long Ded, ol man oli kam blong stap hapi blong taem we in no gat en, o blong stap harem nogud blong taem we i no gat en—Fasin nogud i neva bin fasin blong stap glad—Ol man we oli laekem ol samting blong bodi nomo, God i no stap wetem olgeta long wol—Long fasin blong putumbak ol samting, evri man i kasem bakegen ol fasin mo ol samting we oli bin kasem long laef long wol. Raonabaot 74 B.K.B.
Japta 42
Laef long wol i wan taem blong tes blong mekem se man i save sakem sin mo givim seves long God—Foldaon i karem ded blong bodi mo spirit long evri man—Fasin blong pemaot man i kam tru long fasin blong sakem sin—God Hemwan nomo i pem praes from ol sin blong wol—Fasin blong sore hem i blong olgeta we oli sakem sin—Evri narafala man oli mas kasem jastis blong God—Fasin blong sore i kam from Atonmen—God i sevem olgeta nomo we oli sakem sin tru. Raonabaot 74 B.K.B.
Japta 43
Alma mo ol boe blong hem oli prijim trutok—Ol Man blong Soram mo ol pipol we oli agensem Ol Man blong Nifae oli kam olsem Ol Man blong Leman—Ol Man blong Leman oli mekem faet agensem Ol Man blong Nifae—Moronae i givim ol klos blong faet long Ol Man blong Nifae—Lod i soemaot long Alma, plan blong faet blong Ol Man blong Leman—Ol Man blong Nifae oli difendem ol haos, ol fridom, ol famli, mo relijin blong olgeta—Ol ami blong Moronae mo Lihae oli raonem Ol Man blong Leman. Raonabaot 74 B.K.B.
Japta 44
Moronae i givim oda long Ol Man blong Leman blong mekem wan kavenan blong pis sapos no bae oli prapa spolem gud olgeta—Serahemna i no agri long tingting ia, mo faet i gohed bakegen—Ol ami blong Moronae oli winim Ol Man blong Leman. Raonabaot 74–73 B.K.B.
Japta 45
Hileman i bilivim ol toktok blong Alma—Alma i talemaot profesi blong foldaon blong Ol Man blong Nifae—Hem i blesem mo i sakem wan strong nogud tok blong panisim graon—Maet Spirit i bin tekem Alma i go antap, semmak olsem Moses—Fasin blong pulaot i gro insaed long Jos. Raonabaot yia 73 B.K.B.
Japta 46
Amalekaea i plan blong kam king—Moronae i leftemap taetol blong fridom—Hem i kampen long ol man blong difendem gud relijin blong olgeta—Ol tru man blong biliv ol pipol oli singaotem olgeta Ol Kristin Man—Wan long olgeta laen blong Josef we oli stap laef yet bae God i sevem olgeta—Amalekaea mo ol man blong pulaot oli ronwe oli go long graon blong Nifae—Olgeta we oli no sapotem fridom oli kilimded olgeta. Raonabaot 73–72 B.K.B.
Japta 47
Amalekaea i yusum fasin blong giaman, blong kilim man i ded, mo sikret plan blong kam king blong Ol Man blong Leman—Ol Man blong Nifae we oli bin pulaot oli moa nogud mo prapa wael bitim Ol Man blong Leman. Raonabaot 72 B.K.B.
Japta 48
Amalekaea i mekem Ol Man blong Leman oli go agensem Ol Man blong Nifae—Moronae i mekem rere ol man blong hem blong difendem stamba tingting blong Ol Kristin man—Hem i glad long fasin blong kam fri, mo long fridom, mo hem i wan strong man blong God. Raonabaot 72 B.K.B.
Japta 49
Ol Man blong Leman we oli stap kam blong mekem faet oli no save tekem ol strong bigtaon blong Amonaeha mo Noa—Amalekaea i sakem wan strong nogud tok agensem God mo hem i promes blong dring blad blong Moronae—Hileman mo ol brata blong hem oli gohed blong mekem Jos i kam strong moa. Raonabaot 72 B.K.B.
Japta 50
Moronae i mekem ol graon blong Ol Man blong Nifae oli kam strong moa—Oli wokem plante niu bigtaon—Ol faet mo fasin blong prapa spolem gud man oli hapen long Ol Man blong Nifae long ol dei blong fasin nogud mo rabis sin blong olgeta—Tiankum i winim Morianton mo ol man blong hem we oli bin pulaot long Ol Man blong Nifae—Nifaeha i ded, mo boe blong hem, Pahoran, i tekem jea blong jajmen. Raonabaot 72–67 B.K.B.
Japta 51
Ol king-man oli lukaotem blong jenisim loa mo putum wan king—Pahoran mo ol friman, voes blong ol pipol i sapotem olgeta—Moronae i fosem ol king-man blong difendem kantri blong olgeta, o, sapos no bae oli ded—Almalekaea mo Ol Man blong Leman oli kasem plante bigtaon we oli strong—Tiankum i faet agensem ol ami blong Ol Man blong Leman we oli kam blong tekova, mo hem i kilimded Amalekaea insaed long tenet blong hem. Raonabaot 67–66 B.K.B.
Japta 52
Amoron i tekem ples blong Amalekaea olsem king blong Ol Man blong Leman—Moronae, Tiankum, mo Lihae oli lidim Ol Man blong Nifae long wan faet we oli winim agensem Ol Man blong Leman—Ol Man blong Nifae oli tekem bigtaon blong Myulek bakegen, mo Ol Man blong Nifae oli kilimded Jekob we hem i wan Man blong Soram. Raonabaot 66–64 B.K.B.
Japta 53
Ol Man blong Nifae oli yusum Ol prisena Man blong Leman blong mekem bigtaon Plante i kam strong—Ol fasin blong pulaot long Ol Man blong Nifae i mekem Ol Man blong Leman i win plante—Hileman i lidim ol tu taosen yang boe blong ol pipol blong Amon. Raonabaot 64–63 B.K.B.
Japta 54
Amoron mo Moronae oli toktok blong agri blong jenjenisim ol prisena—Moronae i askem strong se Ol Man blong Leman oli mas kamaot mo stopem ol atak blong olgeta blong kilim man i ded—Amoron i askem strong se Ol Man blong Nifae oli mas putumdaon ol tul blong faet blong olgeta mo kam anda long rul blong Ol Man blong Leman. Raonabaot 63 B.K.B.
Japta 55
Moronae i talem no, blong jenjenisim ol prisena—Ol Man blong Nifae oli mekem ol gadman blong Ol Man blong Leman oli drong, mo oli mekem ol prisena oli go fri—Ol Man blong Nifae oli tekem bigtaon blong Gid mo i no gat blad i ron. Raonabaot 63–62 B.K.B.
Japta 56
Hileman i sendem wan leta i go long Moronae, hem i talemaot fasin blong faet we oli gat wetem Ol Man blong Leman—Antipas mo Hileman tufala i kasem wan bigfala win ova long Ol Man blong Leman—Ol tu taosen yang boe blong Hileman oli faet wetem paoa blong merikel, mo i no gat wan long olgeta i ded. Ves 1, raonabaot 62 B.K.B.; ol ves 2–19, raonabaot 66 B.K.B.; mo ol ves 20–57, raonabaot 65–64 B.K.B.
Japta 57
Hileman i talem storian blong olsem wanem oli tekem Antipara mo olsem wanem Ol Man blong Leman oli givap mo afta oli difendem Kumenae—Ol yang Man blong Amon blong hem oli faet strong; olgeta evriwan oli kasem kil, be i no gat wan we oli kilim i ded—Gid i ripotem ol fasin blong kilimded ol man mo ronwe blong ol prisena blong Ol Man blong Leman. Raonabaot 63 B.K.B.
Japta 58
Hileman, Gid, mo Tiamna i tekem bigtaon blong Mantae tru long wan trik—Ol Man blong Leman oli kamaot—God i sevem ol boe blong Ol Man blong Amon long taem we oli stanap strong blong difendem fridom mo bilif blong olgeta. Raonabaot 63–62 B.K.B.
Japta 59
Moronae i askem Pahoran blong mekem ol fos blong Hileman i kam strong—Ol Man blong Leman i tekem bigtaon blong Nefaeha—Moronae i kros long gavman. Raonabaot 62 B.K.B.
Japta 60
Moronae i komplen long Pahoran long saed blong fasin blong gavman blong no lukaot gud long ol ami—Lod i letem ol nogud man oli kilimded olgeta we oli stret—Ol Man blong Nifae oli mas yusum evri paoa blong olgeta mo wei blong olgeta blong sevem olgeta long ol enemi blong olgeta—Moronae i wonem gavman blong faet agensem hem sapos gavman i no givim help long ol ami blong hem. Raonabaot 62 B.K.B.
Japta 61
Pahoran i tokbaot, fasin blong girap agensem mo tok strong agensem gavman, long Moronae—Ol king-man oli tekem Sarahemla mo oli joenem Ol Man blong Leman—Pahoran i askem help long saed blong ami blong go agensem ol man blong toktok agensem. Raonabaot 62 B.K.B.
Japta 62
Moronae i maj blong go helpem Pahoran long graon blong Gidion—Ol king-man we oli no wantem blong lukaotem gud kantri blong olgeta blong oli kilimded olgeta—Pahoran mo Moronae tufala i tekembak Nifaeha—Plante Man blong Leman oli joenem ol pipol blong Amon—Tiankum i kilimded Amoron, mo hem tu, Ol Man blong Leman oli kilim hem i ded—Ol Man blong Nifae oli ronemaot Ol Man blong Leman long graon, mo oli stanemap pis—Hileman i gobak long seves mo bildimap Jos. Raonabaot 62–57 B.K.B.
Japta 63
Siblon mo afta Hileman i tekem ol tabu histri—Plante long Ol Man blong Nifae oli go long graon long Not—Hagot i bildim ol sip, we oli sel i go aot long solwota blong Wes—Moronaeha i winim Ol Man blong Leman long faet. Raonabaot 56–52 B.K.B.

Printim

I tekem tu ol haelaet mo anda laen

Saenin blong yusum

I tekem ol futnot tu