Ŋwed Enos

1 Sese, edikem ete ami, Enos, sia ŋkɔfiɔkde nte ke ete mi ekedi edinen eren owo—koro enye ama ekpep mi ke usem esie, ŋko ye ntunɔ ye item Jehovah—ndien ekɔm enyene enyiŋ Abasi mi ke ntak oro—

2 Ndien ami nyɔdɔhɔ mbufo eŋwan emi ami ŋkaŋwanade ke iso Abasi, mbemiso ami mbɔ erifen ke mme idiɔk ŋkpɔ mi.

3 Sese, ami ŋkeka nditop mme unam ikɔt ke ikɔt; ndien mme ikɔ emi ami ŋkesiwakde ndikop nte ete mi etiŋde abaŋa nsinsi uwem, ye idaresit mme ndisana owo, oduk mi ke ata esit.

4 Ndien biɔŋ ɔdɔŋ ukpɔŋ mi; ndien ami ŋtɔŋɔ edɔŋ ke iso Andibot mi, nyuŋ nseme nnɔ enye ke ɔkpɔsɔŋ akam ye ebeŋe mbaŋa ukpɔŋ mi; ndien ke ofuri usen ke ami ŋkeseme nnɔ enye; iŋ, ndien ke ini eyo okutde ami mma ŋkaiso mmenere uyo mi ke enyɔŋ man esim mme heaven.

5 Ndien uyo edi ɔnɔ mi, ete: Enos, efen mme idiɔk ŋkpɔ fo enɔ fi, ndien eyediɔŋ fi.

6 Ndien ami, Enos, mma mfiɔk nte ke Abasi ikemeke ndisu nsu; ke ntre, ema emen idiɔk ŋkpɔ mi efep.

7 Ndien ami ndɔhɔ nte: Jehovah, enam didie?

8 Ndien enye ɔdɔhɔ mi ete: Ke ntak mbuɔtidem fo ke Christ, emi afo akananam mukopke akpa unyuŋ ukwe. Ndien ediwak isua ebe efep mbemiso enye ediyarare idem esie ke obukidem; ke ntre, ka, mbuɔtidem fo amanam fi okop nsɔŋidem.

9 Ndien, edikem ete ke ini emi ami ŋkopde mme ikɔ emi ami ntɔŋɔ ndinyene udɔŋ mbaŋa unwam nditɔ eka mi, mme Nephite; ke ntre, ami mma ŋwaŋa ofuri esit mi nnɔ Abasi mbaŋa mmɔ.

10 Ndien ke ini ami nkaŋwanade ke spirit, sese, uyo Jehovah afiak oduk ke esit mi, ete: Ami nyedise nditɔ eka fo nte asaŋade ye ifik mmɔ ke ndinim ibet mi. Ami mɔnɔ mmɔ isɔŋ emi, ndien enye edi edisana isɔŋ; ndien ami nsuŋike enye ibɔhɔke edi ke ntak ukwaŋ-ŋkpɔ; ke ntre, ami nyese nditɔ eka fo nte ami ŋkɔdɔhɔde; ndien mme ndudue mmɔ ke ami ndida nsuhɔre ndi ye ndutuhɔ ke ibuot mmɔ.

11 Ndien ke ini ami, Enos, mma ŋkokop mme ikɔ emi, mbuɔtidem mi ɔtɔŋɔ nditre ndiyek ke Jehovah; ndien ami mbɔŋ akam nnɔ enye ye ediwak anyan eŋwan mbaŋa nditɔ eka mi, mme Lamanite.

12 Ndien edikem ete ke ini ami mma ŋkɔbɔŋ akam nyuŋ nnam utom ye ofuri ifik, Jehovah ɔdɔhɔ mi ete: Ami nyanam nnɔ fi nte asaŋade ye mme udɔŋ fo, ke ntak mbuɔtidem fo.

13 Ndien idahaemi sese, emi ekedi udɔŋ emi ami nkenyenede nto enye—nte ke edieke edide ete, ke ikɔt mi, mme Nephite, ana eduɔ eduk ke ndudue, ndien ke baba ntak ndomo kiet esobo mmɔ, ndien mme Lamanite owo isoboke, ete ke Jehovah Abasi eyetim ŋwed ikɔt mi, mme Nephite, enim, tutu edieke edidide ke odudu edisana ubɔk esie, man eda edi ke usen ke iso enɔ mme Lamanite, ete, ke ekeme ndidi ke, ekeme ndida erinyaŋa nsɔk mmɔ—

14 Koro idahaemi mme eŋwan nnyin ekedi ikpikpu kabaŋa ndida mmɔ mfiak nsin ke mbuɔtidem akpanikɔ. Ndien mmɔ etomo ke iyaresit mmɔ ete, edieke ekande, mmɔ eyesobo mme ŋwed nnyin ye nnyin, ŋko ye kpukpru ido mme ete nnyin.

15 Ke ntre, sia ami mfiɔkde nte ke Jehovah Abasi ekeme nditim mme ŋwed nnyin nnim, ami nseme nnɔ enye kpukpru ini, koro enye ama ɔdɔhɔ mi ete: Ŋkpɔ ekededi emi afo edibeŋede ye mbuɔtidem, enimde ete ke iyɔbɔ ke enyiŋ Christ, afo ɔyɔbɔ enye.

16 Ndien ami mma nyene mbuɔtidem, ndien ami nseme nnɔ Abasi nte yak enye etim mme ŋwed oro enim; ndien enye odiomi ye ami ete ke imɔ iyada mmɔ isɔk mme Lamanite ke ekem ini esie.

17 Ndien ami, Enos, mma mfiɔk nte ke eyedi nte asaŋade ye ediomi emi enye anamde; ke ntre ukpɔŋ mi ama enyene emem.

18 Ndien Jehovah ɔdɔhɔ mi ete: Mme ete fo ŋko eyom ŋkpɔ emi eto mi; ndien eyenam enɔ mmɔ nte asaŋade ye mbuɔtidem mmɔ; koro mbuɔtidem mmɔ eketie nte okuo.

19 Ndien idahaemi edikem ete ami, Enos, nsaŋa ke ufɔt ikɔt Nephi, ntiŋ nte prophet mbaŋa mme ŋkpɔ emi edidide, nyuŋ ntie ntiense mbaŋa mme ŋkpɔ emi ami ŋkokopde nyuŋ ŋkutde.

20 Ndien ami ntie ntiense nte ke mbon Nephi ema esin ifik eyom ndifiak nnim mme Lamanite ke itie mbuɔtidem akpanikɔ ye Abasi. Edi mme utom nnyin ekedi ikpikpu; usua mmɔ ama ɔsɔŋ, ndien edi idiɔk edu mmɔ akada mmɔ usuŋ tutu mmɔ ekabare edi mbon ikɔt, ye mbon obom, ye mbon afai, eyɔhɔ ye ukpono ndem ye ndek; eda mme unam emi unam efen omumde man ata nte udia; eduŋ ke mme tent, enyuŋ eyo ke ikɔt ye ibio ikpa-unam ke isin mmɔ enyuŋ efat idet ibuot mmɔ; ndien ifiɔk utom mmɔ ekedi ke utigha, ye ke ikua, ye ke ekudi. Ndien ediwak mmɔ idiaha ŋkpɔ ndomo kiet ibɔhɔke edi ndisi unam; ndien mmɔ ofuri ofuri ini eyom ndisobo nnyin.

21 Ndien edikem ete ikɔt Nephi ema etibi isɔŋ, enyuŋ etɔ kpukpru oruk mkpasip, ye mfri, ye mme ufene enaŋ, ye mme ufene eke kpukpru oruk ufene kutɔ kutɔ, ye mme ebot, ye mme ebot ikɔt, ŋko ye ediwak enaŋ mbakara.

22 Ndien ata ediwak prophet ema edu ke otu nnyin. Ndien mme owo ekedi mbon nsɔŋ ibuot, emi ɔkɔsɔŋde ŋkpɔ ndiŋwaŋa.

23 Ndien ŋkpɔ ndomo kiet ikiduhe ibɔhɔke ata nsɔŋɔ ŋkpɔ, ndikwɔrɔ nyuŋ ntiŋ nte prophet mbaŋa mme ekɔŋ, ye mme eneni, mme nsobo, ye nditi mmɔ kpukpru ini mbaŋa mkpa, ye ini nsinsi, ye mme ubiere ikpe ye odudu Abasi, ye kpukpru ŋkpɔ emi—ndidemere mmɔ kpukpru ini ete enim mmɔ ke uteŋe Jehovah. Ami ndɔhɔ ke ŋkpɔ ndomo kiet ikiduhe ibɔhɔke mme ŋkpɔ emi, ye utiŋ ikɔ emi akaŋwaŋade ata eti eti, ndikpan mmɔ ndisɔp nsuhɔre nduk ke nsobo. Ndien ntem ke ami ŋkewet mbaŋa mmɔ.

24 Ndien ami mma ŋkut mme ekɔŋ ke ufɔt mme Nephite ye mme Lamanite ke eyo mi.

25 Ndien edikem ete ami ntɔŋɔ ndisɔŋ, ndien isua ikie ye ata ye duop ye usuk-kiet ama ebe efep tɔŋɔ ke ini emi ete nnyin Lehi ɔkɔkpɔŋde Jerusalem.

26 Ndien ami ŋkut nte ke ana ami nsɔp ŋsuhɔre ŋka udi mi, ndien odudu Abasi odu ye ami man ami ŋkwɔrɔ nyuŋ ntiŋ nte prophet nnɔ mbon emi, nyuŋ ntiŋ ikɔ nte asaŋade ye akpanikɔ emi odude ke Christ. Ndien ami metiŋ enye ke ofuri eyo mi, nyuŋ ndaresit ke enye ŋkan eke ererimbot.

27 Ndien ami nsɔp ŋka ebiet nduɔk-odudu mi, emi edide ye Andifak mi; koro mɔfiɔk nte ke enye ami nyɔduɔk odudu. Ndien ami ndaresit ke usen emi eke mkpa mi edisinede uwem emi mkpa miduhe, ŋyuŋ nda ke iso esie; ke ini oro ke ami ndikut iso esie ye inemesit, ndien enye ɔyɔdɔhɔ mi ete: Tiene mi, afo emi ediɔŋde, ebiet odu emi enimde enɔ fi ke mme ufɔk Ete mi. Amen.