1 Ndien idahaemi edikem ete mme isua ama ebe efep, owo kiet edi ke ufɔt mbon Nephi, emi enyiŋ esie ekedide Sherem.

2 Ndien edikem ete enye ɔtɔŋɔ ndikwɔrɔ ikɔ ke ufɔt mme owo, ye ndidɔhɔ mmɔ ete ke ikpinaha Christ odu. Ndien enye ɔkwɔrɔ ediwak ŋkpɔ emi ekedide nnem-inua ɔnɔ mme owo; ndien enye anam emi man enye abiat ukpep-ŋkpɔ Christ.

3 Ndien enye esin ifik anam utom man enye ada mme esit owo ɔwɔrɔ, tutu ete enye ama ada ediwak esit ɔwɔrɔ; ndien ke ntak emi enye ɔkɔfiɔkde ete ami, Jacob, mma nyene mbuɔtidem ke Christ emi anade nte edi, enye etim oyom ufaŋ ete imɔ idi itiene mi.

4 Ndien enye ama enyene ifiɔk ŋwed, tutu enye ama enyene ifiɔk emi ɔfɔnde ama kabaŋa usem mbon oro; ke ntre, enye ekeme enyene ɔkpɔsɔŋ nnem-inua, ye ɔkpɔsɔŋ odudu utiŋ-ikɔ, nte asaŋade ye odudu satan.

5 Ndien enye enyene idorenyin ndinam mi mkpuhɔde mbuɔtidem, isehe ediwak ediyarare ye ediwak ŋkpɔ emi ami ŋkokutde mbaŋa mme ŋkpɔ emi; koro ami ke akpanikɔ mma ŋkut mme angel, ndien mmɔ ema enam utom enɔ mi. Ndien ŋko, ami mma ŋkop uyo Jehovah nte etiŋde ikɔ ɔnɔ mi ke ata ikɔ, ke ini ke ini; ke ntre, ami nkemeke ndiyek.

6 Ndien edikem ete enye edi etiene mi, ndien ke utɔ usuŋ emi ke enye eketiŋ ikɔ ɔnɔ mi, ete: Eyen eka mi Jacob, ami metim nyom ufaŋ man ami ntiŋ ikɔ nnɔ fi; koro ami mokop ndien nyuŋ mfiɔk nte ke afo ama asaŋa eti eti, ndikwɔrɔ se afo okotde gospel, mme ukpep-ŋkpɔ Christ.

7 Ndien ke afo amada ediwak mbon emi ɔwɔrɔ man mmɔ ekwaŋa nnen nnen usuŋ Abasi, unyuŋ unimke ibet Moses emi edide nnen nnen usuŋ; onyuŋ akabare ibet Moses esin ke ukpono enye emi emi afo ɔdɔhɔde ete ke eyedi ke ediwak isua ikie ke iso. Ndien idaha emi sese, ami, Sherem, ndɔhɔ fi nte ke emi edi isuŋi; koro owo ndomo kiet ifiɔkke mme ŋkpɔ oro; koro enye ikemeke nditiŋ mbaŋa mme ŋkpɔ emi edidide. Ndien ntem ke Sherem ekeneni eneni ye ami.

8 Edi sese, Jehovah Abasi ama aŋwaŋa Spirit esie esin ke ukpɔŋ mi, tutu ete ami ŋtimere enye ke kpukpru mme ikɔ esie.

9 Ndien ami ndɔhɔ enye nte: Ndi afo ama akaŋ Christ emi edidide? Ndien enye ɔdɔhɔ ete: Edieke anade nte Christ odu, ami ndikaŋke enye; edi ami mɔfiɔk nte ke Christ iduhe, ŋko ke ikiduhe, ndien ke tutu amama ididuhe.

10 Ndien ami ndɔhɔ enye nte: Ndi afo ɔmɔbuɔt idem ke mme ŋwed Abasi? Ndien enye ɔdɔhɔ ete, Iŋ.

11 Ndien ami ndɔhɔ enye nte: Ke ntre mmɔ iŋwaŋake fi; koro ke akpanikɔ mmɔ etie ntiense ebaŋa Christ. Sese, ami ndɔhɔ fi nte ke baba prophet ndomo kiet iwetke, inyuŋ itiŋke nte prophet, ibɔhɔke mmɔ etiŋ ebaŋa Christ emi.

12 Ndien emi idihe kpukpru—eyarade enye enɔ mi, koro ami mokop nyuŋ ŋkut; ndien eyarade enye ŋko enɔ mi ke odudu Edisana Spirit; ke ntre, ami mɔfiɔk nte ke edieke usio-isop miduhe ke kpukpru owo ana etak.

13 Ndien edikem ete enye ɔdɔhɔ mi ete: Wut mi idiɔŋɔ ke odudu Edisana Spirit emi, emi anamde fi ɔfiɔk ediwak ŋkpɔ.

14 Ndien ami ndɔhɔ enye nte: Nso ke ami ndi man ami ndomo Abasi nte owut fi idiɔŋɔ ke ŋkpɔ emi afo ɔfiɔkde ke edi akpanikɔ? Edi afo ayakaŋ enye, ke ntak emi afo edide eke satan. Edi, idihe uduak mi ke edinam; edi edieke Abasi edimiade fi, yak oro edi idiɔŋɔ ɔnɔ fi ete ke enye enyene odudu, ke heaven ye ke ererimbot; ye ŋko, ke Christ eyedi. Ndien uduak fo, O Jehovah, ke edinam, idihe ekim.

15 Ndien edikem ete ke ini ami, Jacob, mma ŋketiŋ mme ikɔ emi, odudu Jehovah odoro enye ke idem, tutu ete enye ɔduɔ ke isɔŋ. Ndien edikem ete ke enɔ enye udia ke ufaŋ ediwak usen.

16 Ndien edikem ete enye ɔdɔhɔ mme owo ete: Eboho kiet ŋkpɔŋ, koro ami nyakpa; ke ntre, ami nyom nditiŋ ikɔ nnɔ mme owo mbemiso ami mkpa.

17 Ndien edikem ete ke ŋkpɔŋ otu owo eboho kiet; ndien enye etiŋ ikɔ iŋwaŋ-iŋwaŋ ɔnɔ mmɔ onyuŋ akaŋ mme ŋkpɔ emi enye ekekpepde mmɔ, onyuŋ enyime Christ, ye odudu Edisana Spirit, ye mme angel asaŋa utom.

18 Ndien enye etiŋ ikɔ iŋwaŋ-iŋwaŋ ɔnɔ mmɔ, ete ke ekedi odudu satan akabiaŋa enye. Ndien enye etiŋ abaŋa hell, ye nsinsi uwem, ye nsinsi ufen.

19 Ndien enye ɔdɔhɔ ete: Ami mfehe ndik nte ke menam idiɔk ŋkpɔ emi minyeneke edifen, koro mosu nsu nnɔ Abasi; koro ami makaŋ Christ, nyuŋ ndɔhɔ nte ke mɔbuɔt idem ke mme ŋwed Abasi; ndien ke akpanikɔ mmɔ etie ntiense ebaŋa enye. Ndien ke ntak emi ami nsude nsu ntem nnɔ Abasi ami ntim mfehe ndik nte itie mi ɔyɔdiɔk eti eti; edi ami nyarade nnɔ Abasi.

20 Ndien edikem ete ke ini enye ama eketiŋ mme ikɔ emi enye ikemeke itiŋ ikan oro, ndien enye ayak spirit esie.

21 Ndien ke ini otu owo ekekutde ete ke enye eke etiŋ mme ŋkpɔ emi ke ini enye okoyomde ndiyak ukpɔŋ esie, idem ama akpa mmɔ ata eti eti; tutu odudu Abasi edidoro mmɔ ke idem, ndien ama akan mmɔ ndien mmɔ eduɔ ke isɔŋ.

22 Idahaemi, ŋkpɔ emi ama enem mi, Jacob, koro ami ŋkebeŋe enye nto Ete emi okodude ke heaven; koro enye ama okop eseme mi onyuŋ ɔbɔrɔ akam mi.

23 Ndien edikem ete ke ema efiak enim emem ye ima Abasi ke ufɔt mme owo; ndien mmɔ eduŋɔre mme ŋwed Abasi, inyuŋ ikpaŋke utɔŋ aba inɔ mme ikɔ idiɔk owo emi.

24 Ndien edikem ete ke ema eyom ediwak usuŋ ndikpuhɔre nyuŋ mfiak nnim mme Lamanite ke itie ifiɔk mbaŋa akpanikɔ; edi kpukpru ekedi ikpikpu, koro mmɔ ekedaresit ke mme ekɔŋ ye uduɔk iyip, ndien mmɔ ema enyene nsinsi usua enɔ nnyin, nditɔ eka mmɔ. Ndien mmɔ eyom ke odudu ubɔk mmɔ ndisobo nnyin ofuri ofuri ini.

25 Ke ntre, ikɔt Nephi ema esɔŋɔ ye mmɔ ye mme ubɔkmmɔ, ye ke ofuri odudu mmɔ, ebuɔt idem ke Abasi ye itiat edinyaŋa mmɔ; ke ntre, mmɔ eka iso edi, mme andikan mme asua mmɔ.

26 Ndien edikem ete ami, Jacob, ntɔŋɔ ndisɔŋ; ndien ŋwed mbon emi koro ekenimde ke mme usan ŋwed efen emi Nephi ekewetde, ke ntre, ami metre ndiwet ŋwed emi, nyuŋ ndɔhɔ nte ke ami mewet nte ifiɔk mi edide, ke ndidɔhɔ nte ke ini ama ebe ye nnyin, ndien ŋko ke uwem nnyin ama ebe efep nte eketie nte ndap ɔnɔ nnyin, koro nnyin ikidide ikpɔŋ ye mbon uteŋe, mbon eke eyode, emi ebinde esio ke Jerusalem, emi emanade ke ukut, ke wilderness, nditɔ eka enyuŋ esuade, emi ekedide ntak mme ekɔŋ ye mme eneni; ke ntre, nnyin ima iseme ke ofuri eyo nnyin.

27 Ndien ami, Jacob ŋkut nte ke ami nyɔsɔp ndi ŋsuhɔre ŋka udi mi; ke ntre, ami ndɔhɔ eyen mi Enos: Bɔ mme ŋwed emi. Ndien ami ndɔhɔ enye mme ŋkpɔ emi eyen eka mi Nephi ɔkɔnɔde mi uyo ete nnam, ndien enye ama ɔwɔŋɔ nsukibuot ɔnɔ mme uyo emi. Ndien ami metre uwet ŋkpɔ mi ke usan emi, uwet ŋkpɔ emi edide ekpiri; ndien okot ŋwed mɔkɔm unyɔŋ, ye idorenyin nte ke mme nditɔ eka mi eyekot mme ikɔ mi. Nditɔ eka, adieu.