1 Idahaemi sese, edikem ete ami, Jacob, ke mma ŋkanam ediwak utom nnɔ ikɔt mi ke ikɔ, (ndien ami nkeme ndiwet ekpri mme ikɔ mi, ke ntak ɔsɔŋde ndikap mme ikɔ nnyin ke mme usan) ndien nnyin imɔfiɔk ite ke mme ŋkpɔ emi nnyin iwetde ke mme usan ena esuhɔ;

2 Edi mme ŋkpɔ ekededi emi nnyin iwetde ke ŋkpɔ ndomo kiet ibɔhɔkeŋ edi ke mme usan ana atak onyuŋ osop; edi nnyin imikeme ndiwet mme ikɔ ifaŋ ke mme usan, emi edinɔde nditɔ nnyin, ko ye ndima nditɔ eka nnyin, ekpri adaŋa ifiɔk mbaŋa nnyin, mme mbaŋa mme ete mmɔ—

3 Idahaemi ke ŋkpɔ emi ke nnyin idara; ndien nnyin isin ifik inam utom ndimiŋ mme ikɔ emi ke mme usan, ye idorenyin ite ke ndima nditɔ eka nnyin ye nditɔ nnyin eyebɔ mmɔ ye esit ekɔm, enyuŋ ese mmɔ man mmɔ ekpep ye idara inyuŋ idige ye mfuhɔ, inyuŋ idige ke ndek, kabaŋa mme akpa ete ye eka mmɔ.

4 Koro, ke ntak emi ke nnyin iwet mme ŋkpɔ emi, man mmɔ efiɔk ete ke nnyin ima ifiɔk Christ, inyuŋ inyene idorenyin ibaŋa ubɔŋ esie isua ikie mbemiso edidi esie; ndien idige nnyin ke idem nnyin ikpɔŋ ikinyene idorenyin ibaŋa ubɔŋ esie, edi ŋko kpukpru mme ndisana prophet emi ekebemde nnyin iso edu.

5 Sese, mmɔ ema ebuɔtidem ke Christ enyuŋ ekpono Ete ke enyiŋ esie, ndien ŋko nnyin ikpono Ete ke enyiŋ esie. Ndien ke ntak emi nnyin inim mbet Moses, koro enye owutde ukpɔŋ nnyin enye; ndien ke ntak emi enam enye asana ɔnɔ nnyin ke nnen nnen ido, kpa nte ekebukde enɔ Abraham ke wilderness ete osuk ibuot ɔnɔ mme uyo Abasi ke ndiwa eyen esie Isaac, emi edide mbiet Abasi ye Ikpɔŋ-ikpɔŋ Eyen emi Enye Obonde.

6 Ke ntre, nnyin iduŋɔde mme prophet, ndien nnyin inyene ediwak ediyarade ye spirit prohecy; ndien ke inyenede kpukpru mme ntiense emi nnyin inyene idorenyin, ndien mbuɔtidem nnyin inyeke, tutu ete ke nnyin ke akpanikɔ ikeme inɔ uyo ke enyiŋ Jesus ndien mme eto esuk ibuot enɔ nnyin, mme mme obot, mme mme mbufut inyang.

7 Edi, Jehovah Abasi owut nnyin mmem idem nnyin man nnyin ifiɔk ite ke edi ke mfɔn esie, ye akamba nsuhɔre idem esie nnɔ nditɔ owo, ke nnyin inyene odudu ndinam mme ŋkpɔ emi.

8 Sese, akwa ye utibe edi mme utom Jehovah. Didie ke akak ndiduŋɔde mme utuŋɔ ndedibe ŋkpɔ esie; ndien owo ikemeke idiɔŋɔ kpukpru usuŋ esie. Ndien owo ndomo kiet ifiɔkke mme usuŋ esie ibɔhɔke eyarare enye enɔ enye; ke ntre, nditɔ eka, ekuse mme ediyarade Abasi ke ndek.

9 Koro sese, ke odudu ikɔ esie ke owo ekedi ke iso isɔŋ, isɔŋ emi ekebotde ke odudu ikɔ esie. Ke ntre, edieke Abasi ekemede etiŋ ikɔ ndien ererimbot odu, onyuŋ etiŋ ikɔ ndien ebot owo, O ndien, ntak emi mikemeke inɔ isɔŋ uyo, mme utom mme ubɔk esie ke iso esie, nte asaŋade ye uduak ye ekikere esie.

10 Ke ntre, nditɔ eka, ekuyom ndinɔ Jehovah item, edi ebɔ item eto ubɔk esie. Koro sese, mbufo ke idem mbufo emefiɔk ete ke enye ɔnɔ item ke ifiɔk, ye ke nnen nnen, ye akwa mbɔm, kabaŋa kpukpru mme utom esie.

11 Ke ntre, ndima nditɔ eka, ekpe emem ye enye eto usio isop Christ, Ikpɔŋ-ikpɔŋ Eyen esie emi Enye Obonde, ndien mbufo ebɔ ediset ke mkpa, nte asaŋade ye odudu ediset ke mkpa emi odude ke Christ, ndien eda mbufo nte mme akpa mfri Christ enɔ Abasi, ke enyenede mbuɔtidem, enyuŋ ebɔde eti idorenyin ubɔŋ ke enye mbemiso enye ayarare idem esie ke obukidem.

12 Ndien idahaemi, ndima, ekukpa idem ete ke ami metiŋ mme ŋkpɔ emi nnɔ mbufo; ndien ntak mitiŋke ibaŋa usio isop Christ, enyuŋ enyene ifiɔk emi ɔfɔnde ama ke enye, man enyene ifiɔk ediset ke mkpa ye ererimbot emi edidide?

13 Sese, ndima nditɔ eka, enye emi etiŋde nte prophet, yak enye etiŋ nte prophet aŋwaŋa mme owo; koro spirit etiŋde akpanikɔ inyuŋ isuhu-nsu. Ke ntre, enye etiŋ abaŋa mme ŋkpɔ nte mmɔ edide, ye mme ŋkpɔ nte mmɔ edidide; ke ntre, eyarade mme ŋkpɔ emi enɔ nnyin iŋwaŋ-iŋwaŋ, ke ntak edinyaŋa ukpɔŋ nnyin. Edi sese, idige nnyin ikpɔŋ idi ntiense ibaŋa mme ŋkpɔ emi; koro Abasi ŋko amaetiŋ mmɔ ɔnɔ mme prophet ke eset.

14 Edi sese, mme Jew edi mbon nsɔŋ ibuot; ndien mmɔ esin mme ikɔ emi enamde aŋwaŋa, enyuŋ ewot mme prophet, enyuŋ eyom mme ŋkpɔ emi miŋwaŋake mmɔ. Ke ntre, ke ntak mmɔ edide nnan, nnan emi ekedide ke ekesede ebe utit mbuba, mmɔ ana eduɔ; koro Abasi emen iŋwaŋ-iŋwaŋ esie ɔkpɔŋ mmɔ, onyuŋ ɔnɔ mmɔ ediwak ŋkpɔ emi miŋwaŋake mmɔ, koro mmɔ enyenede udɔŋ enɔ enye. Ndien ke ntak emi mmɔ enyenede udɔŋ enɔ enye Abasi anam enye, man mmɔ eduɔ.

15 Ndien idahaemi ami, Jacob, edi Spirit ada mi usuŋ nditiŋ nte prophet; koro ami mfiɔk nto mme edinam Spirit emi odude ke ami, nte ke ntak iduɔ mme Jew mmɔ eyesin itiat emi anade nte mmɔ ebɔp man enyene itiat idak isɔŋ emi ɔfɔnde.

16 Edi sese, nte asaŋade ye mme ŋwed Abasi, itiat emi eyekabare edi akwa, ye akpatre, ye ŋkukure itiat idak isɔŋ emi ɔfɔnde, emi mme Jew ekemede ndibɔp.

17 Ndien idahaemi, ndima mi, edinam didie ete mmɔ emi, ke ini ema ekesin itiat idak isɔŋ emi ɔfɔnde, eyekan ebɔp ke enye, man enye akabare edi etubom inuk.

18 Sese, ndima nditɔ eka mi, ami nyenam mbufo efiɔk ndedibe ŋkpɔ emi; edieke ami mmenamke, ke ntak ndomo kiet, enyek idem ebaŋa iwuk mi ke Spirit, enyuŋ eduɔ ke ntak udɔŋ mi mbaŋa mbufo.