1 Edi sese, ami, Jacob, nyetiŋ ikɔ nnɔ mbufo emi edide ndisana ke esit. Ese Abasi ye ntiŋ enyin, ebɔŋ akam enɔ enye ye akamba mbuɔtidem, ndien enye ɔyɔdɔŋ mbufo esit ke mme ukut mbufo, ndien enye eyekpe ubɔk abaŋa mbufo, onyuŋ ɔnɔ nnen nnen ido ɔsuhɔre odoro mbon emi eyomde ndisobo mbufo ke idem.

2 O kpukpru mbufo emi edide ndisana ke esit, emenere ibuot mbufo enyuŋ ebɔ edinem ikɔ Abasi, enyuŋ edia usɔrɔ ke ima esie; koro mbufo emekeme, edieke ekikere mbufo ɔsɔŋde, ke nsinsi.

3 Edi, ɔyɔdɔdiɔk, ɔyɔdɔdiɔk, ɔnɔ mbufo emi midige ndisana ke esit, emi edehede mfin emi ke iso Abasi; koro ibɔhɔke mbufo ekabare esit esuŋi isɔŋ ke ntak mbufo; ndien mme Lamanite, emi mideheke nte mbufo, edi esuŋi mmɔ ye idiɔk isuŋi, eyemia mbufo tutu esim nsobo.

4 Ndien ini kɔsɔsɔp edi, ete ibɔhɔke mbufo ekabare esit mmɔ eyenyene isɔŋ inyene mbufo, ndien Jehovah Abasi ayada mme nnen nnen owo ɔwɔrɔ ke otu mbufo.

5 Sese, mme Lamanite nditɔ eka mbufo, emi mbufo esuade ke ntak ndek mmɔ ye isuŋi emi esimde ikpɔk idem mmɔ, edi nnen nnen ekan mbufo; koro mmɔ ifreke ibet Jehovah, emi ekenɔde ete nnyin—ete yak mmɔ enyene ibɔhɔke ŋwan kiet, ndien iban esa mmɔ ekunyene ndomo kiet, ndien yak ekunam mme use ke otu mmɔ.

6 Ndien idahaemi, ibet emi mmɔ ekpeme ndinim; ke ntre, ke ntak ndikpeme emi, ke ndinim ibet emi, Jehovah Abasi idisoboke mmɔ, edi eyenyene mbɔm abaŋa mmɔ; ndien usen kiet mmɔ eyedi mbon emi ediɔŋde.

7 Sese, mme ebe mmɔ ema iban mmɔ, ndien iban mmɔ ema mme ebe mmɔ; ndien mme ebe ye iban mmɔ ema nditɔ mmɔ; ndien unana mbuɔtidem mmɔ ye usua mmɔ kabaŋa mbufo edi ke ntak ukwaŋ-ŋkpɔ mme ete mmɔ; ke ntre, didie ke mbufo efɔn ekan mmɔ, ke iso akwa Andibot mbufo?

8 O nditɔ eka mi, ami mfehe nte ke mibɔhɔke mbufo ekabare esit ebaŋa idiɔk ŋkpɔ mbufo ke ikpɔk idem mmɔ ayafia akan eke mbufo, ke ini edidade mbufo ye mmɔ idi ke iso ebekpo Abasi.

9 Ke ntre, ibet ke ami nnɔ mbufo, emi edide ikɔ Abasi, nte mbufo ekusuŋi mmɔ aba ke ntak obubit ikpɔk idem mmɔ; ŋko mbufo ekusuŋi mmɔ ke ntak ndek mmɔ; edi mbufo eyeti ndek mbufo, enyuŋ eti ete ke ndek mmɔ ekedi ke ntak mme ete mmɔ.

10 Ke ntre, mbufo eyeti nditɔ mbufo, nte mbufo ekenamde esit mmɔ efuhɔ ke ntak uwut-ŋkpɔ emi mbufo enimde ke iso mmɔ; ndien ŋko, eti ete ke mbufo emekeme, ke ntak ndek mbufo, ndida nditɔ mbufo nsin ke nsobo, ndien edori mme idiɔk ŋkpɔ mmɔ ke ibuot mbufo ke akpatre usen.

11 O nditɔ eka mi, ekpaŋutɔŋ ekop mme ikɔ mi, edemere mme odudu ukpɔŋ mbufo; enyeŋe idem mbufo man mbufo edemere ke idap mkpa; enyuŋ etat idem mbufo ke ubiak hell man mbufo ekudi mme angel unɔ satan, emi edibinde isin ke mkpɔdiɔhɔ ikaŋ ye brimstone emi edide ɔyɔhɔ mkpa iba.

12 Ndien idahaemi ami, Jacob, mma ntiŋ ediwak ŋkpɔ efen nnɔ ikɔt Nephi, ŋkpan mmɔ kabaŋa use ye obukpo ido, ye kpukpru utɔ idiɔk ŋkpɔ, ndɔhɔ mmɔ mbaŋa enyene ndik utip mmɔ.

13 Ndien mbak kiet ke mbak ikie ke abaŋa mbon emi, emi eketɔŋɔde ndiwak idahaemi, Jacob ikemeke ndiwet ke mme usan emi; edi ewet ediwak edinam mmɔ ke mme akamba usan, ye mme ekɔŋ mmɔ, ye mme eneni mmɔ, ye mme ukara ndidem mmɔ.

14 Ekot mme usan emi mme usan Jacob, ndien ekenam mmɔ ke ubɔk Nephi. Ndien ami ntre nditiŋ mme ikɔ emi.