Ing Libru Nang Enos

1 Lawan, milyari a aku, i Enos, balu ku a ing tata ku metung yang makatuliran a tau — uling tiruanan na ku king keang salita, at king pamanese mu naman at pamanamanu na ning Guinu — at nuan ya ing lagiu ning kakung Dios uli na niti —

2 At sabian ku keka ing pamakilaban a gewa ku king arapan ning Dios, bayu ku tinggap ing kapatawaran kareng kakung kasalanan.

3 Lawan, meko ku para mangasung animales king kasukalan; at ding amanung madalas kung daramdaman a sasabian nang tata ku tungkul keng alang anggang bie, at ding tula da ring santo, limbug lang malalam king pusu ku.

4 At ing kaladua ku meranup ya; at siniklaud ku arapan ning Miglalang ku, at minaus ku kea king masikan a panalangin at pamakisabi para keng sarili kung kaladua; at kilub ning metung a aldo minaus ku kea; wa, at anyang datang ing bengi sikan ke pa ing siwala ku a iti miras karing banua.

5 At karin dinatang ya ing siwala kaku, a sasabing: Enos, ding kasalanan mu mipatawaran la, at mipanuanan ka.

6 At aku, i Enos, balu ku ing Dios e makapaglaram; anya, ing kasalanan ku milako ngan.

7 At sinabi ku: Guinu, makananung milyari ini?

8 At sinabi na kaku: Uli ning kasalpantayanan mu kang Cristo, a kanita, emu pa man dimdam o ikit. At dakal a banua pa ing milabas bayu na ipakit ing sarili na king laman; anya pin, mako na ka, ing kasalpantayanan mu yang migpakayap keka.

9 Ngeni, milyari a anyang dimdam ko rening amanu megumpisa kung mignasa para keng kapakanan da reng kanakung kapatad, ding Nephite; anya tigtug ke ing mabilug kung kaladua king Dios para karela.

10 At kabang makilaban ku king espiritu, lawan, ing siwala ning Guinu dinatang yang pasibayu king kaisipan ku, a sasabing: Bisitan ko ring kapatad mu agpang keng pamagsikap da keng pamamintu kareng kautusan ku. Biniye ke karela ining labuad, at banal yang labuad; at eke isumpa maliban mu king uli ning karokan; anya pin, bisitan ko ring kekang kapatad agpang keng asabi ku keka; at ding karelang kasalanan ibili keng maki kalungkutan karing karelang sariling buntuk.

11 At kaibat ku, i Enos, a dimdam dening amanu, ing kasalpantayanan ku megumpisa yang tumibe king Guinu; at menalangin ku kea king dakal a makabang pamakilaban para kareng kakung kapatad, ding Lamanite.

12 At milyari a kaibat kung menalangin at megobra king mitmung pamagsikap, ing Guinu sinabi na kaku: Ibiye ko keka agpang king kaburian mu, uli ning kekang kasalpantayanan.

13 At ngeni makiramdam, oini ing buri kung inawad ku kea — nung malyari iti, a ding tau ku, ding Nephite, mikasala la, at king nanu mang paralan mesira la,at ding Lamanite ela dapat masira, a ing Guinung Dios misalikut yang kasulatan da reng kakung tau, ding Nephite; anggiyang iti king kapamilatan na ning upaya ning keang banal a gamat, ing lunto ya king daratang a panaun kareng Lamanite a nung sakali, bang midala la king kaligtasan —

14 Uling ngeni ing pamakilaban tamu ala lang ulaga para ibalik la king tutung kasalpantayanan. At susumpa la king mua da, nung malyari, siran do ring kekatamung kasulatan at itamu, at ding kaugalian da mu naman reng kekatamung ninunu.

15 Anya pin, aku, balu ku a ing Guinung Dios aingat no reng kekatamung kasulatan, minaus ku keang alang patad, uling sinabi na kaku: Nanumang bage ing adwan mu king kasalpantayanan, maniwala kang tanggapan mu king lagiu nang Cristo, tanggapan mu iti.

16 At atin kung kasalpantayanan, at minaus ku king Dios a ingatan no ding kasulatan; at mengaku ya kaku a ibiye no kareng Lamanite king keang panaun a makatakda.

17 At aku, i Enos, balu ku iti agpang king pangakung gewa na; anya pin, ing kaladua ku migpainawa ya.

18 At ing Guinu sinabi na kaku: Ding ninunu mu inawad da naman kaku iting bage; at tanggapan da iti agpang king kasalpantayanan da; uling ing kasalpantayanan da kalupa ning keka.

19 At ngeni milyari a aku, i Enos, minta ku kareng tau nang Nephi, manula kareng bage daratang, at magpatutu kareng bage dimdam ku at ikit.

20 At patutuanan ku a ding tau nang Nephi migsikap lang mayap bang ibalik la ring Lamanite king tutung kasalpantayanan king Dios. Dapot ing pamagsikap mi alang kabaldugan; ing karelang mua e malyaring miyalilan, at mipatnubayan la king marok dang ugali a meging mabangis la, at mabagsik, at mawa king dayang tau, mitmu king pamanyamba kareng dios-diosan at karinatan; mamangan kareng animales a manyila; manuknangan kareng tolda, at maglagalag king ilang, makabahag lang balat ning animal king balakang, at ding buntuk da kalbu la; at ing karelang galing atiu keng pana, at keng ispada, at keng palakul. At dakal karela ing e mengan maliban mu nung sagiwa yang karne; at ala lang tuknang manintun para siran da kami.

21 At milyari a ding tau nang Nephi serul de ing gabun, at migpatubung miyaliwang klasing butil, at bunga, at kawan, at kawan da reng dakal a klasing baka, kambing, malyap a kambing, at makanian mu naman dakal a kabayu.

22 At masyadu lang dakal deng propeta kekami. At ding tau masyadu lang meging masias a buntuk, at masakit mintindi.

23 At ala nang aliwang bage nung e king masyadung kagaspangan, pamanaral at pamanula keng labanan a daratang, at pamisalangsangan, at pamaglasak, at alang patad a pamagpaganaka keng kamatayan, at ing kaba ning alang angga, at ding kayatulan at ing upaya ning Dios, at dening eganaganang bage — palagi dong guguluan ba lang palaging mikatakut king Guinu. Sasabian kung alang kulang karing bage, at masyadung maragul a kamalinawan da ring salita, ing makapatuknang karela king mabilis a pangasira. At king paralan a iti sinulat ku tungkul karela.

24 At menakit kung labanan pilatan da ring Nephite at ding Lamanite king pamandalan da ring kakung aldo.

25 At milyari a megumpisa kung metua, at ing dinalan at pitumpulu at siyam a banua ing milabas ibat anyang ing tata tamung Lehi meko ya Jerusalem.

26 At ikit ku a malapit nakung dapat kuldas king kakung kutkutan, bilang mitakda king kapamilatan ning upaya ning Dios a dapat kung ituru at manula karening taung deni, at sabian ing amanu agpang king katutuan a atiu kang Cristo. At sinabi ku iti king anggang aldo ku, at metula ku kareti migit king eganagana king yatu.

27 At aku king malaguang panaun munta ku king lugal a kakung pipagpainawan, nung nukarin akayabe ke ing kakung Manatbus; uling balu ku kea ku painawa. At metula ku king aldo potang ing pangamortal ku mibili ya king pangaimortal, at talakad king keang arapan, at kanita akit ke ing keang lupa a ating tula, at sabian na kaku: Munta ka kaku, ikang nuan, ating lugal a makasadia keka karing mansiyon na ning kakung Ibpa. Amen.