1 At milyari a ing atlungpulu at apat a banua milabas ya, at makanian mu naman ing atlungpulu at lima, at lawan ding alagad nang Jesus mitalakad lang pisamban nang Cristo karing anggang labuad a makapadurut. At nung makananu la karakal ding minta karela, at tutu lang sinisi karing karelang kasalanan, mebiniag la king lagiu nang Jesus, at tinanggap la namang Espiritu Santo.

2 At milyari king katlungpulu at anam a banua, ding tau mibalik la ngan lub king Guinu, king anggang lupa na ning gabun, ding pareung Nephite at Lamanite, at e mika pamipate at labanan busal da, at balang tau mekiutus lang makatuliran king metung at metung.

3 At pare-pareu ing anggang bage busal da; uli na niti e mika makualta at kalulu, alipan at malaya, dapot meging malaya la ngan, at tatanggap king makabanuang kalam.

4 At milyari a ing katlungpulu at pitung banua milabas mu naman, at misundu ing kapayapan king labuad.

5 At mika dakila at makapagmulalang obra a gewa da ring alagad nang Jesus, angga king ila pepakayap dala ding masakit, at pepatalakaran dala ding mete, at gewa da ing pile lumakad ya, at ing bulag manakit ya, at ing maklak makaramdam ya; at ding anggang klasing milagru gewa da busal da ring anak da ring tau, ala lang gewang milagru maliban mu nung e king lagiu nang Jesus.

6 At makanian lang milabas ding atlungpulu’t walung banua, at makanian mu naman ding atlungpulu’t siam a banua, at ing apat a pulu at metung, at ing apat a pulu at adua, wa, anggiyang anggang apat a pulu at siam a banua milabas ya, at makanian mu naman ing limangpulu at metung, at ing limangpulu at adua; wa, at anggiyang anggang limangpulu at siam a banua milabas ya.

7 At ing Guinu pepaunlad nalang lubus king gabun; wa, angga king mitalakad lang siudad pasibayu nung nukarin la ding siudad a mesilab.

8 Wa, anggiyang itang dakilang siudad a Zarahemla karelang gewang mitalakad pasibayu.

9 Dapot dakal lang siudad a mengalbug, at ing danum mitas king lugal a ibatan da; uli na niti, deting siudad e nala makapibalik.

10 At ngeni, lawan, milyari a ding tau nang Nephi meging masikan la, at malagua lang lubus merakal, at meging lubus malagu at makalugud a tau.

11 At mekiasawa la, at papakiasawa. At mipanuanan agpang karing dakal a pangaku a ing Guinu gewa na karela.

12 At e nala linakad king pamamintu karing merapat a tuntunan na ning batas nang Moises, dapot memintu la karing kautusan a karelang tinggap ibat king karelang Guinu at karelang Dios, susundu ing pamagayunu at pamanalangin, at king pamipulung dang abe-abe madalas para pareung manalangin at makiramdam king amanu na ning Guinu.

13 At milyari a alang pamipate busal da ring tau, karing anggang labuad; dapot mika maragul a milagrung megawa busal da ring alagad nang Jesus.

14 At milyari a ing pitungpulu at metung a banua milabas ya, at ing pitungpulu at aduang banua mu naman, wa, at king malaguang salita, anggang ing pitungpulu at siam a banua milabas ya; wa, anggiyang ing dinalan a banua milabas ya, at ding alagad nang Jesus a keang pinili, minta nala ngan king paraiso ning Dios, maliban mu karing atlu a manenaya, at mika aliwang alagad a miordinan a kalibe da, at makanian mu naman dakal king salinlahi a ita ding mengamate.

15 At milyari a alang pamipate king labuad, uli na ning lugud ning Dios a atiu karing pusu da ring tau.

16 At alang pamangandiria, o pamipate. ni kaguluan, ni pamaglandi, ni pamaglaram, ni pamakamate, ni nanumang klasing kalibian; at siguradu ala nang mas matulang tau busal ding anggang tau a melalang king gamat ning Dios.

17 Alang mapanako, o makamate, ni mika Lamanite, ni nanumang klasing grupu; dapot misasanmetung la, ding anak nang Cristo, at tagapagmana na ning kayarian ning Dios.

18 At nanung pamagpanuan ing miras karela! Uling ing Guinu gewa nang penuanan nala karing anggang karelang gawa; wa, angga king nuan at maunlad la anggang ing dinalan at apulung banua milabas ya; at ing mumunang salinlahi ibat kang Cristo milabas ya, at alang pamipate karing anggang labuad.

19 At milyari a i Nephi, ya a misalikut king tauling kasulatan a ini, (at selikut ne karing lamina nang Nephi) mete ya, at ing keang anak a i Amos selikut ne iti king keang lugal; at selikut ne mu naman karing lamina nang Nephi.

20 At selikut nala king walungpulu at apat a banua, at atin pa mu ring kapayapan king labuad, maliban king ditak a parti da ring tau a meko king pisamban at inaus da ing karelang sariling Lamanite; anya pin megumpisa na namang mika Lamanite pasibayu king labuad.

21 At milyari a i Amos mete ya naman, (at ita dinalan at siam a pulu’t apat a banua ibat king pamaniatang nang Cristo) at ing keang anak a i Amos selikut nala ding kasulatan king keang pamaningat; at selikut ne mu naman karing lamina nang Nephi; at iti misulat ya naman king libru nang Nephi, a yapin ing librung ini.

22 At milyari a aduang dalan a banua ing milabas; at ing kaduang salinlahi mengamate la maliban karing mapilan.

23 At ngeni aku, i Mormon, magnasa ku a dapat yung abalu a ding tau merakal la, angga king ila kinalat la karing anggang lupa na ning labuad, at ila meging lubus lang makualta, uli na ning karelang panganuan keng pibandian kang Cristo.

24 At ngeni, kening aduang dalan at metung a banua megumpisa busal da detang meging mapagmaragul, anti ing pamaniulud mangamal a imalan, at ding anggang klasing mangalagung perlas, at ding mangamal a bage king yatu.

25 At ibat king panaun a ita e nala mipare-pareu karing karelang pibandian at kabiayan busal da.

26 At megumpisa lang mepitna king uri; at megumpisa lang mitalakad pisamban para karing karelang sarili bang makinabang, at megumpisa deng ilingad ing tutung pisamban nang Cristo.

27 At milyari a kaibat nang milabas ning aduang dalan at apulung banua dakal lang pisamban king labuad; wa, dakal lang pisamban king labuad a sasabing balu de i Cristo, at makanian man karelang lilingad ding maragul a parti ning keang ebanghelio, angga king tinggap dala ding anggang klasing karokan, at biniye itang banal kea a nung kaninu ita mibawal uli na ning e pangakarapatdapat.

28 At iting pisamban lubus yang merakal uli na ning karokan, at uli na ning upaya nang Satanas a mekatalan karing karelang pusu.

29 At pasibayu, ating aliwang pisamban a maglingad kang Cristo, at liligaligan de ing tutu nang pisamban Cristo, uli na ning karelang kapakumbaban at ning karelang pamaniwala kang Cristo; at linibak dala uli da ring marakal a milagru a megawa busal da.

30 Nung makanian ginamit lang upaya at karapatan karing alagad nang Jesus a menenaya karela, at inugse dala king sukulan; dapot king upaya na ning amanu ning Dios, a atiu karela, ding sukulan mepitna la king adua, at ding alagad meko lang gagawang mangaragul a milagru busal da.

31 Makanian man, at sumangid da deting anggang milagru, ding tau pepasias dala ding karelang pusu, at pignasan dalang paten, anti ding Judio king Jerusalem pignasan deng paten i Jesus, agpang king keang amanu.

32 At inugse dala karing hornung api, at linual lang e menasakit.

33 At inugse dala naman karing lungga da ring mangabangis a animal, dapot mekialung la karing mangabangis a animal anti ing metung a anak mekialung ya king cordero; at linual la ibat king busal da, e menasakit.

34 Makanian man ding tau pepasias dala ding karelang pusu, uling mipatnubayan la karing dakal a sacerdote at mapanlinlang a propeta bang italakad ding marakal a pisamban at bang gawan ding anggang klasing karokan. At pemarug dala ding tau nang Jesus; dapot ding tau nang Jesus ela minablas memarug. At anya migpalbug la king kelan kapaniwalan at karokan, banua banua, anggiyang anggang ing aduang dalan at atlungpulung banua milabas ya.

35 At ngeni milyari iting banuang iti, wa kilub ning aduang dalan at atlungpulu’t metung a banua, mika maragul a pamikakawani karing tau.

36 At milyari a king banuang ini linto la ding tau a meyaus Nephite, at tutu lang maniwala kang Cristo; at busal da atin detang mayayaus a Lamanite-Jacobite, at Josephite, at Zoramite;

37 Anya pin ding tutung maniwala kang Cristo, o ding tutung sasamba kang Cristo, (busal da ila ding atlung alagad nang Jesus a dapat manaya) meyaus lang Nephite, at Jacobite, at Josephite, at Zoramite.

38 At milyari a ila a tinanggi king ebanghelio meyaus lang Lamanite, at Lemuelite, at Ismaelite, at ila e la migpalbug king kelan kapaniwalan, dapot kusa lang sinalangsang laban king ebanghelio nang Cristo, at tiru dala ding karelang anak a e la dapat maniwala, anggiyang anti ding karelang ninunu, ibat king umpisa, limbug la.

39 At iti uli ning karokan at makasumaming gawa da ring karelang ninunu, anti anyang minuna. At mituruanan lang mua karing anak ning Dios, anggiyang anti ding Lamanite mituruanan lang mua karing anak nang Nephi ibat king umpisa.

40 At milyari a aduang dalan at apat a pulu’t apat a banua milabas ya, at deti ila ding bage milyari karing tau. At ing mas marok nang parti ding tau meging mas masikan ya, at meging lubus mas marakal kesa karing tau ning Dios.

41 At sindu da pa mu rin ing pamanalakad dang pisamban karing karelang sarili, at piniblasan dala king anggang klasing maulagang bage. At kanita ing aduang dalan at limangpulung banua milabas ya, at makanian mu naman ing aduang dalan at anam a pulung banua.

42 At milyari a ing marok nang parti ding tau megumpisa neng pasibayung gawan ding makasalikut nang pamaniumpa at pamakipagsabuatan nang Gadianton.

43 At makanian mu naman ding tau a meyaus tau nang Nephi megumpisa lang meging mapagmaragul king karelang pusu, uli na ning karelang maragul a pibandian, at meging mapagmaragul la naman anti ding karelang kapatad, ding Lamanite.

44 At ibat king panaun a ini ding alagad megumpisa lang melungkut para karing kasalanan ning yatu.

45 At milyari a anyang ing atlung dalan a banuang milabas ya, ding pareung tau nang Nephi at ding Lamanite meging lubus lang marok ing metung kalupa ning metung.

46 At milyari a ding mapanako nang Gadianton mikalat la karing anggang lupa ning labuad; at alang mayap maliban mu karing alagad nang Jesus. At gintu at pilak misalikut la king kasaganan, at memisali la king anggang klasi ning kalakal.

47 At milyari a kaibat ning atlung dalan at limang banua milabas ya, (at ding tau menatili la king karokan) i Amos mete ya; at ing keang kapatad, i Ammaron, selikut nala ding kasulatan king lugal na.

48 At milyari a anyang ing atlung dalan at aduang pulung banua milabas ya, i Ammaron, bilang inutusan na ning Banal a Espiritu, selikut nala ding kasulatan a banal — wa, anggiyang ding anggang banal a kasulatan a mipamana ibat king metung a salinlahi angga king metung a salinlahi, a sagradu — anggiyang angga king atlung dalan at aduangpulung banua ibat king pamaniatang nang Cristo.

49 At sininup nala deti angga king Guinu, bang deti mibalik lang pasibayu karing mitagan na ning bale nang Jacob, agpang karing ula at pangaku na ning Guinu. At anya pin iti ing wakas ning kasulatan nang Ammaron.