Ing Libru Nang Mormon
Kapitulu 1
I Ammaron tiru ne i Mormon agpang karing sagradung kasulatan — Ing labanan megumpisa pilatan da ring Nephite at Lamanite — Ding Atlung Nephite leko dala — Ing karokan, kelan kapaniwalan, pamanula, at pamangulam menibabo.
1 At ngeni aku, i Mormon, gagawa kung kasulatan da ring bage a kakung ikit at dimdam, at ausan deng Ing Libru nang Mormon.
2 At king panaun a sininup nalang Ammaron ding kasulatan angga king Guinu, minta ya kanaku, (aku bilang apulung banua king idad, at megumpisa kung mebiasa anggiyang makananu mu agpang king paralan ning pangabiasa da ring kakung tau) at i Ammaron sinabi na kaku: Akakit ku metung kang anak a seriosu at malaguang makaintindi.
3 Nung makanian, potang ika manga aduang pulu’t apat na kang banua buri ku a ika dapat mu lang ganakan ding bage a kekang ikit agpang karing taung deni; at potang ika keta na kang idad a ita, munta ka king labuad ning Antum, king bunduk-bundukan a mayaus Shim; at karin kula sininup angga king Guinu ding anggang banal a dinukit agpang karing taung deni.
4 At makiramdam, kuanan mu la ding lamina nang Nephi king kekang sarili, at ding mitagan keka lang lakuan king lugal nung nukarin la; at idukit mu la karing lamina nang Nephi ding anggang bage a kekang apansin agpang karing taung deni.
5 At aku, i Mormon, bilang apu nang Nephi, (at ing lagiu nang tata ku Mormon) aganaka kula ding bage a inutus na kakung Ammaron.
6 At milyari a aku, bilang labing metung a banua, dela nakung tata ku king labuad papuntang paroba, anggiyang king labuad ning Zarahemla.
7 Ing anggang lupa ning labuad kinatmu yang bale, at ding tau meging kasing dakal da nala ding balas king dagat.
8 At milyari a king banuang ini megumpisang mikalabanan pilatan da ring Nephite, a kebilangan da ring Nephite at ding Jacobite at ding Josephite at ding Zoramite; at ing labanang ini pilatan da ring Nephite, at ding Lamanite at ding Lemuelite at ding Ismaelite.
9 Ngeni ding Lamanite at ding Lemuelite at ding Ismaelite meyaus lang Lamanite, at ding aduang grupu ila ding Nephite at ding Lamanite.
10 At milyari a ing labanan megumpisa busal da karing angganan ning Zarahemla, keta king danuman ning Sidon.
11 At milyari a ding Nephite mekatipun lang maragul a bilang ding tau, anggang king maigit king bilang a atlungpulung libu. At milyari a king pareung banuang ini mika bilang la namang labanan, nung nukarin ding Nephite simbut dala ding Lamanite at apate dala ding dakal karela.
12 At milyari a ding Lamanite inurung dala ding karelang planu, at mika kapayapan king gabun; at ing kapayapan menatili kilub ning manga apat a banua, a alang tinulung daya.
13 Dapot ing karokan menibabo king lupa ning labuad, angga king ing Guinu kinua nala ding kaluguran nang alagad, at ing pamangawang milagru at pamipakayap mituknang uli na ning karokan da ring tau.
14 At alang kalam ibat king Guinu, at ing Espiritu Santo e minta anggiyang kaninu, uli na ning karelang karokan at kelan kapaniwalan.
15 At aku, bilang labinglimang banua idad at bilang bagiang maki seriosung kaisipan, uli na niti pintalan naku ning Guinu, at tikman at abalu ku ing kayapan nang Jesus.
16 At migsikap kung menaral karing taung deni, dapot ing asbuk ku mitikum ya, at mibawalan kung manaral karela; uling tutu seria dang linaban king Dios; at ding kaluguran a alagad leko dala king labuad, uli na ning karelang karokan.
17 Dapot menatili ku busal da, dapot mibawalan kung manaral karela, at uli na ning kasiasan ning karelang pusu ing labuad misumpa ya king uli da.
18 At dening Gadianton a mapanako, a atiu busal da ring Lamanite, memugad la king labuad, angga king ding manuknangan karin megumpisa dalang sininup ding karelang pibandian king yatu; at meging mataluras la, uling ing Guinu simpa ne ing labuad, bang e dala atalan, ni apanatiling pasibayu.
19 At milyari a ating manula, at mangkukulam, at magos; at ing upaya ning metung a marok megawa ya karing anggang lupa ning labuad, anggiyang angga king pamanupad karing amanu nang Abinadi, at makanian mu naman i Samuel ing Lamanite.