1 At ngeni, magsalita ku naman tungkul karetang e maniwala kang Cristo.

2 Kukutang ku kekayu, maniwala kayu kaya king aldo ning kekayung dalo-kukutang ku kekayu, potang ing Guinu datang ya, wa, anggiyang ketang dakilang aldo potang ing yatu abe-abe yang milulun antimong metung a librung lulun, at ding sangkap ning yatu malaso la king sobrang pali, wa, ketang dakilang aldo ita potang midala kayu bang talakad king arap ning Cordero ning Dios-kanita sabian yu kayang alang Dios?

3 Kanita kekayu ya kayang isundung ilingad i Cristo, o kekayu ya kayang alawe ing Cordero ning Dios? Balayu kaya a manuknangan kayung kayabe na lalam ning beluan ding kekayung kasalanan? Balayu kaya a maging matula kayung manuknangan kayabe nitang banal a Pangatau, potang ding kekayung kaladua kakatmu lang takut king kabaluan ning kasalanan a kekayu lang inabusu ding keang kautusan?

4 Lawan, sasabian ku kekayu a igit kayung maging kalulu para manuknangan kayabe ning metung a banal at makatarungang Dios, lalam ning kabaluan karing kekayung kadinatan king arap na, kesa king manuknangan kayung kayabe ding misumpang kaladua king infierno.

5 Uling lawan, potang midala kayu bang akit ing kekayung kalubasan king arap ning Dios, at makanian mu naman ing glorya ning Dios, at ing kabanalan nang Jesucristo, sindian ne ing baya ning e mapatdang api kekayu.

6 O kanita ikayung alang kapaniwalan, mibalik kayu king Guinu; manangis masikan king Ibpa king lagiu nang Jesus, a malyaring mayakit kayung alang musing, malinis, dalise, at maputi, alinis na ning daya ning Cordero, ketang dakila at tauling aldo.

7 At misan pa sasabian ku kekayu a tatanggi karing pamipatilip ning Dios, at sasabing deta meyari nala, a alang pamipatilip, ni pamanula, ni kalam, ni pamipakayap, ni pamagsalita karing amanu, ni pamipalino karing amanu;

8 Lawan sasabian ku kekayu, ya a maglingad kareting bage ene balu ing ebanghelio nang Cristo; wa, ene abasa ing banal a kasulatan; at nung abasa ne man, e nala aintindian.

9 Uling e wari ababasa tamu a ing Dios ya naman napun, ngeni, at angga king angga, at kea alang pamialiwa ni alino ning pamagbayu?

10 At ngeni, nung aisip yu king kekayung sarili ing metung a dios a manaliwa, at nung kaninu ating alino ning pamagbayu, kanita aisip yu kaya king kekayung sarili ing metung a dios a e metung a Dios ding milagru.

11 Dapot lawan, ipakit ke kekayu ing metung a Dios ding milagru, anggiyang ing Dios nang Abraham, at ing Dios nang Isaac, at ing Dios nang Jacob; at iti ya namang Dios a linalang king banua at king yatu, at ding anggang bage a atiu kareta.

12 Lawan, lelangan ne i Adam, at kang Adam dinatang ing pangabagsak ning tau. At uli na ning pangabagsak ning tau dinatang ya i Jesucristo, anggiyang ing Ibpa at ing Anak; at uli nang Jesucristo dinatang ing pangayatbus ning tau.

13 At uli na ning pangayatbus ning tau, a dinatang king kapamilatan nang Jesucristo, abalik dala king arapan ning Guinu, wa, keni nung kesanu ding anggang tau meyatbus la, uling ing kamatayan nang Cristo ing papalyari king pamanyubling mie ibat king alang kapupusang pamanudtud, nung nukaring pamanudtud ding anggang tau gisingan dala king kapamilatan ning upaya ning Dios potang ding trumpeta tigtig la; at lumual la, pareung malati at maragul, at ding eganagana talakad la king arap ning keang ukuman, bilang meatbus at mekalag ibat king alang anggang gapus ning kamatayan, nung sanung kamatayan metung yang pansamantalang kamatayan.

14 At kanita datang ing pamanatul na ning Banal a Metung karela; at kanita datang ing panaun a ya a marinat maging marinat ya pa mu rin; at ya a mayap maging mayap ya pa mu rin; ya a masaya maging masaya ya pa mu rin; at ya a malungkut maging malungkut ya pa mu rin.

15 At ngeni, O ikayu ngan a minisip king kekayung sarili ing metung a dios a e makagawang milagru, kutnan da kayu, deting anggang bage milabas nala, a kakung asabi? Ing kapupusan dinatang na? Tutu sasabian ku kekayu, Ali; at ing Dios e tinuknang maging Dios da ring milagru.

16 Lawan, e wari ding bage gewa ning Dios makapagmulala la karing kekatamung mata? Wa, at ninu ing makaintindi karing makapagmulalang gawa ning Dios?

17 Ninu ing sumabi a ita e milagru a king kapamilatan ning keang amanu ing banua at ing yatu melalang la; at king kapamilatan ning upaya ning keang amanu ing tau melalang ya ibat king alikabuk ning yatu; at king kapamilatan ning keang amanu ding milagru megawa la?

18 At ninu ing sumabi a i Jesucristo e ginawang marakal a mayupayang milagru? At mika marakal a mayupayang milagrung megawa king kapamilatan da ring gamat da ring alagad.

19 At nung ating milagrung megawa kanita, bakit ing Dios tinuknang yang maging metung a Dios da ring milagru at maging metung pa mu ring e mibabayu Pangatau? At lawan, sasabian ku kekayu e mibabayu; nung sakali man tuknang yang maging Dios; at e tutuknang maging Dios, at metung yang Dios da ring milagru.

20 At ing sangkan nung bakit tinuknang yang gagawang milagru busal da ring anak da ring tau uli ning ila mikutkut la king kelan kapaniwalan, at meko king ustung dalan, at ede kilala ing Dios a dapat dang pagtiwalan.

21 Lawan, sasabian ku kekayu a ninumang maniwala kang Cristo, a alang pamikakunu, nanuman ing aduan na king Ibpa king lagiu nang Cristo mipagkalub kea; at ing pangakung ini para karing eganagana ya, anggiyang angga karing sepu na ning yatu.

22 Uling lawan, anya pin sasabian nang Jesucristo, ing Anak ning Dios, karing keang alagad a dapat malakuan, wa, at makanian mu naman karing keang anggang alagad, king panamdam da ring keraklan: Munta kayu king kabilugan ning yatu, at ituru ye ing ebanghelio king balang tau;

23 At ya a maniwala at mebiniag miligtas ya, at ya a e maniwala misumpa ya;

24 At deting tanda tuki la karing maniwala-king lagiu ku itabi dala ding demonyu; magsalita la karing bayung amanu; talan lang ubingan; at nung minum lang nanumang makamateng bage e makapanasakit karela; ipatung dala ding karelang gamat karing masakit at kumayap la;

25 At ninuman ing maniwala king kakung lagiu, a alang pamikakunu, kea patunayan kula ding anggang kakung amanu, anggiyang angga karing sepu na ning yatu.

26 At ngeni, lawan, ninu ing makasalangsang karing gawa ning Guinu? Ninung makalingad karing keang amanu? Ninung salangsang laban king mayupayang sikanan na ning Guinu? Ninung manamak karing gawa ning Guinu? Ninung manamak karing anak nang Cristo? Lawan, ikayu ngang manamak karing gawa ning Guinu, uling mangapamulala kayu at mangamate.

27 O nung makanian e kayu manamak, at e kayu mangapamulala, dapot makiramdam karing amanu na ning Guinu, at maniawad king Ibpa king lagiu nang Jesus king nanumang bage a kekayung kailangan. E kayu mikakunu, dapot maging mapaniwala, at magumpisa anti anyang minunang panaun, at lumapit king Guinu king anggang pusu mu, at pagsadian ing kekang sariling kaligtasan a maki takut at pamanigalgal king arap na.

28 Maging biasa karing aldo ning kekayung pagsubuk; lubasan yu ing kekayung sarili karing anggang kadinatan; e kayu maniawad, a gisanan yu mu king kekayung pamagnasa, dapot maniawad a maki katatagan a eda augun, a eda kayu atuksu, dapot sumuyu kayu king tune at mabie Dios.

29 Lawan a e kayu mebiniag e karapatdapat; siguraduan a e kayu tatanggap king sacramentu nang Cristo e karapatdapat; dapot lawan a gagawan yu ing anggang bage king pangakarapatdapat, at gawan iti king lagiu nang Jesucristo, ing Anak ning mabie Dios; at nung gawan yu iti, at makapibata angga king kapupusan, e kayu mitabi.

30 Lawan, magsalita ku kekayu a balamu aku magsalita ku ibat karing mete; uling balu ku mibiye la kekayu ding kakung amanu.

31 E yu ku atulan uli na ning kakung kakulangan, ni ing kakung ibpa, uli ning keang kakulangan, ni detang sinulat bayu ya; dapot magpasalamat king Dios a pepabalu nala kekayu ding kekaming kakulangan; bang makabalu kayung igit a kabiasnan kesa kekami kanita.

32 At ngeni, lawan, asulat mi ya iting kasulatan agpang king kekaming kabaluan, karing letrang mayayaus busal mi ing mibayung Ehipto, a mipasa at kekaming binayu, agpang king paralan ning kekaming pamagsalita.

33 At nung ding kekaming lamina meging ustu la dagul dapat sinulat kami king Hebreo; dapot ding Hebreo binayu mi la naman; at nung mekasulat kami king Hebreo, kanita lawan, e kayu mika kakulangan king kekaming kasulatan.

34 Dapot ing Guinu balunala ding bage a kekaming sinulat, at makanian mu naman alang aliwang taung makibalu king kekaming salita; at uli na ning alang aliwang taung makibalu king kekaming salita, uli na niti, mekapagsadia yang paralan para king pamipalino kareta.

35 At deting bage misulat la bang ding kekaming imalan alinis mi la ibat king daya da ring kekaming kapatad, a mikutkut king kelan kapaniwalan.

36 At lawan, deting bage a pignasan mi tungkul karing kekaming kapatad, wa, anggiyang ing karelang pamagbalik king kabaluan kang Cristo, agpang la karing panalangin da ring anggang santo a manuknangan king labuad.

37 At sana ing Guinung Jesucristo ipagkalub na a ding karelang panalangin mipakibatan la agpang king karelang kasalpantayanan; at sana ing Dios Ibpa ganakan ne ing pangaku a keang gewa king bale ning Israel; at sana panuanan nala angga king angga, king kapamilatan ning kasalpantayanan king lagiu nang Jesucristo. Amen.