1 At ngeni, makiramdam, magsalita ku karing mitagan da ring taung deni a miligtas, nung paintulutan ning Dios a ibiye karela ding kakung amanu, bang abalu da ing tungkul karing bage da ring karelang ninunu; wa, aku magsalita ku kekayu, ikayung mitagan na ning bale ning Israel; at deti ila ding amanung kakung sasabian:

2 Pakibaluan yu a ikayu ibat kayu king bale ning Israel.

3 Pakibaluan yu a dapat kayung sumisi, o e kayu miligtas.

4 Pakibaluan yu a dapat yu lang ibili ding kekayung armas ning giyera, at e na kayu tumula king pamanulu ning daya, at e yu nala pasibayung tatalnan, maliban mu nung iutus ning Dios kekayu.

5 Pakibaluan yu a dapat kayung mika beluan karing kekayung ninunu, at sumisi karing anggang kekayung kasalanan at karokan, at maniwala kang Jesucristo, a ya ing Anak ning Dios, at ya pete de ring Judio, at king upaya ning Ibpa tinikdo yang pasibayu, nung nukarin ikua na ing tagumpe laban king kutkutan; at kea mu naman ing sugat ning kamatayan milako ya.

6 At keang pepalyarian ing pamanyubling mie na ning mete, nung nukarin ing tau dapat yang mibangun para tikdo king arap ning keang piukuman.

7 At keang pepalyarian ing pangayatbus na ning yatu, nung nukarin ya a meakit a alang kasalanan king arap na king aldo ning pamanatul mibiye kea ing manuknangan king arapan ning Dios king keang kayarian, magkantang alang tuknang a papuri kayabe ding koro king babo, angga king Ibpa, at angga king Anak, at angga king Espiritu Santo, a metung a Dios, king masayang kabilian a alang kapupusan.

8 Nung makanian sumisi, at mabinyag king lagiu nang Jesus, at talan king ebanghelio nang Cristo, a misadia king arapan yu, e mu kabud king kasulatan a ini dapot makanian mu naman king kasulatan a datang angga karing Gentil ibat karing Judio, a yang kasulatan a manibat karing Gentil angga kekayu.

9 Uling lawan, ini misulat ya para king kapagnasan a maniwala kayu kanita; at nung maniwala kayu kanita maniwala kayu naman kanini; at nung maniwala kayu kanini abalu yu ing tungkul karing kekayung ninunu, at makanian mu naman ding makapagmulalang gawa a megawa king upaya ning Dios busal da.

10 At abalu yu naman a ikayu mitagan da kayu ring apu nang Jacob; nung makanian makabilang kayu busal ding tau ning mumunang pangaku; at nung maniwala kayu kang Cristo, at mabinyag, mumuna king danum, kaibat king api at king Espiritu Santo, a tutukian ing alimbawa ning kekatamung Tagapagligtas, agpang kanita a inutus na kekatamu, iti makakayap kekayu king aldo ning pamanatul. Amen.