Te Puka a Enosa

1. I na, kua kite au, ko Enosa, i toku ra metua tane, e tangata tuatua tika aia; e nana oki au i apii ki tona reo, e i te kite e te ako a te Atua ra. Kia akameitakiia oki te ingoa o toku Atua no te reira.

2. E akakite atu au kia kotou i te kukumianga taku i rave i mua i te aroaro o te Atua, i mua ake i orongaia mai ei kiaku te mataraanga o taku au ara.

3. I na, i aere ana au e kimi aere i te au manu taae i roto i te vaorakau; kua akamaara meitaki au i roto i toku ngakau i te au tuatau taku i akarongo i tuatua putuputuia e toku metua no te ora mutu kore e te mataora o te aronga tapu ra.

4. Kua kaki iora toku ngakau, tuturi iora au ki raro ki mua i Tei Anga iaku nei, e kua kapiki ua atura au kiaia ma te pure maata i te pati anga atu i te meitaki no toku uaorai vaerua; e kua kapiki atu rai au kiaia e ope akera te ao, i na, e aiai iora, kua akateitei ua atu rai au i toku reo ki runga ra, e tae rava atu ki te rangi ra.

5. Kua tae maira tetai reo kiaku ra, i te na ko anga mai e, E Enosa, kua akakoreia taau au ara, e ka akameitakiia koe.

6. Kua kite oki au ko Enosa e, kare e rauka i te Atua te tuatua i te tuatua pikikaa, no reira i orei keiaʼi taku au ara.

7. Kua tuatua atura au, E te Atu, i akapeea i raukaʼi te reira?

8. Tuatua maira aia kiaku, no te akarongo i te Mesia tei kore koe i akara ana e kare oki koe i akarongo ana i tona reo.

9. E teianei, kia akarongo akera au i teianei au tuatua, tupu iora toku inangaro kia ora katoa toku ra au taeake, koia oki te ngati Niphai, no reira i kapiki atu ei au ma toku ririnui katoa ki te Atua no ratou.

10. Te pera ra au i te pureanga i roto i te Vaerua, i na, kua tae akaou maira te reo o te Atu ki roto i toku ngakau, na ko maira, E aroa au i toou au taeake mei tei tau i to ratou maroiroi i te akono i taku ra au akaueanga. Kua oronga atu au i teia enua no ratou; e e enua tapu oki ïa, e kare au e taumaa i te reira, mari ra, no te angaanga viivii; e teianei, e akaapa au i toou au taeake mei taku oki i tuatua ra; e e tuku au i ta ratou au ara ki runga i to ratou upoko e kia tumatetenga ratou.

11. E kia akarongo akera au ko Enosa i te reira au tuatua, tupu iora toku akarongo i te Atua ei mea ngaueue kore ra; e maata toku pure anga atu kiaia ma toku ririnui katoa no toku ra au taeake koia oki te ngati Lamana ra.

12. E kia angaanga pakari atu au i te pure, kua tuatua maira te Atu kiaku, no toou akarongo i orongaʼi au kia koe i taau i inangaro ra.

13. E teianei, i na, ko te mea oki teia taku i inangaro iaia; mei te mea e inga toku ra iti tangata ko te ngati Niphai i te ara, e e akapouia oki, e mei te mea kare e akapouia te ngati Lamana, kia akono te Atu ra ko te Atua ma te mana o tona rima, i te akapapaanga tuatua o toku iti tangata, ko te ngati Niphai ra; kia akakiteia mai te reira ki te ngati Lamana a tetai tuatau a muri ake, peneiake ko te aratakiia mai ratou ki te ora.

14. E teianei, kua puapinga kore ta matou angaanga i te akaokianga mai ia ratou ki te akarongo tika ra. E kua tao ratou ma te riri e, me ka rauka ia ratou, e akakore ratou ia matou e to matou au akapapaanga tuatua e te au peu katoa oki i tukuia mai e to matou ra ui tupuna.

15. I na, kua kite ana au e, ka rauka i te Atua kia akono i to matou au akapapaanga tuatua, i kapiki atu ei au kiaia ra ma te tukumoe kore; i tuatua ana oki aia kiaku e, ko te mea taau e pati na roto i te ingoa o te Mesia ra ma te akarongo, e ma te irinaki e ka rauka taau, e rauka ïa ia koe.

16. E akarongo oki toku, e kua kapiki atura au ki te Atua kia akono aia i te au akapapaanga tuatua ra, e kua papau aia i te koreromotu kiaku ra, ko tei na ko mai e, ka akakite mai aia i te reira ki te ngati Lamana i tona ra tuatau tau.

17. E kua kite iora au ko Enosa e, ka tupu te reira mei tei tau i te koreromotu tana i papau maira, no reira, kua au toku ngakau.

18. Kua tuatua maira te Atu kiaku ra e, i pati ana oki toou au metua kiaku i te reira; e rauka oki ta ratou mei tei tau i to ratou akarongo; kua aite oki to ratou akarongo i toou.

19. E kua aere akera au ko Enosa i rotopu i te iti tangata o Niphai i te totouanga i te au mea e tupu a muri atu, e i te akakiteanga atu i te au mea taku i kite e taku i akarongo ra.

20. E te akakite atu nei au e, i tamata pakari ana te ngati Niphai i te akaoki i te ngati Lamana ki roto i te akarongo tika i te Atua ra. Kua puapinga kore ra ta matou tamataanga; kua mou ta ratou makitakita, e kua aratakiia ratou e to ratou uaorai tu kino, i riro ei ratou ei aronga taae, e te rotoriri, e te kaki toto; e te ki oki i te viivii e te akamorianga i te au idolo ma te kai i te au manu taae; i noo ua ana ratou i roto i te puakapa e i ori aere ua ratou na roto i te metepara ma te kakau poto ua tei tatuaia ki to ratou taukupu, e kua varuia to ratou upoko. Tei te ana, e te koke, e te toki to ratou kite. E maata ratou, kare e apinga ke ta ratou e kai, mari ra, ko te kiko mata; e kua titau ua atu rai ratou ia matou e ta.

21. Kareka ra, te ngati Niphai, kua tanu ratou i te enua, e kua tanu i te au tu ua mei te sitona e te au tu ua rakau, e kua angai i te au anana mamoe, e te au tu puakatoro, e te au puakanio, e te au puakanio taae, e te au oroenua e manganui.

22. E manganui oki te au peroveta i rotopu ia matou. Kua ketaketa oki te ngakau o te au tangata, e ma te rauka ngatā kia marama.

23. Kare atu e ravenga mari ra te tuatua akamataku maata, e te akoanga e te totouanga i te au tamaki, e te māro, e te au mate mamaata; e te akakite putuputu i te mate, e te roa o te ao mutu kore ra, e te au utunga e te mana o te Atua, e teianei au mea katoa e akaaraʼi ia ratou kia noo ratou ma te mataku i te Atua. Te tuatua nei au e, kare atu e ravenga, mari ra, ko teianei au mea, e te tuatua papu, e tāpū ia ratou i te aerenga viviki ki te mate. Te pera ua nei au i te tata ia ratou ra.

24. Kua kite au i te tamakianga o te ngati Niphai e te ngati Lamana i toku puke rā i te oraanga nei.

25. Pakari akera au, e kua ope oki e okotai anere e itu ngauru ma iva mataiti mei te tuatau i akaruke mai ei to matou metua ko Lihai ia Ierusalema ra.

26. E kua kite iora au e, te vaitata nei te rā e mate ei au; i uruia au i te mana o te Atua kia ako e kia totou ki teianei iti tangata, e kia akakite i te tuatua mei tei tau i te tuatua mou a te Mesia ra. Kua ako au i te reira i toku puke rā, e kua maata toku mataora i te reira i to te au mea o teianei ao.

27. E aere vave au ki toku akangaroianga, tei ko ïa i toku Akaora; e kua kite ua oki au e ka akangaroi au i ko iaia. E mataora oki au i te rā e riro ei toku kopapa pe ua nei ei kopapa pe kore, ka tu ei au ki mua iaia ra; ei reira au e kite atu ei i tona mata ma te rekareka; e tuatua maira oki aia kiaku e, Ka aere mai ana kiaku nei, e ao toou e kua akonoia tetai ngai noou i te are o toku Metua ra. Amene.