1. E kia ope akera te toru ngauru ma a, e te toru ngauru ma rima o te mataiti, kua oti te au pipi a Iesu i te akatupu i te akonoanga a te Mesia ki te au enua e takapini ua ake. E te au tangata ravarai tei aere mai kia ratou ma te tataraara i ta ratou au ara, kua bapetizoia ratou na roto i te ingoa o Iesu, e kua rauka ia ratou te Vaerua Tapu.

2. E tae akera ki te toru ngauru ma ono o te mataiti, kua ariu te katoatoaanga o te tangata ki te Atu, i runga i te tua o te enua, mei te ngati Niphai e te ngati Lamana, kare rava e pekapeka e e tauetono to ratou tetai ki tetai, e kua tika tetai ki tetai.

3. E kua akonoia ta ratou au apinga na ratou katoatoa, e kare oki e tangata apinga nui, kare oki e putaua i rotopu ia ratou, kare oki e tuikaa, kare e rangatira, mari ra, kua noo au ua ratou, ma te rave mai i te meitaki mei te rangi mai.

4. E kua ope katoa te toru ngauru ma itu o te mataiti i te noo au ua anga i te enua.

5. E manganui tikai te au akairo tei raveia e te au pipi a Iesu, kua akaora i te maki, kua akatu i tei mate, kua aere ua te pirikoki, kua kite te matapo, kua rongo te turi, e tetai atu au akairo ta ratou i rave i rotopu i te au tamariki a te tangata, e kare rava ratou i rave i teia au semeio, mari ua ra na roto i te ingoa o Iesu Mesia.

6. E ope akera te toru ngauru ma varu o te mataiti, e te toru ngauru ma iva te a ngauru ma tai, te a ngauru ma rua, ae, e tae ua atu ki te a ngauru ma iva o te mataiti, e te rima ngauru ma tai, e rima ngauru ma rua, e tae ua atu ki te rima ngauru ma iva o te mataiti.

7. E kua akamanuia iora te Atu ia ratou i runga i te enua nei e kua patu akaou iora ratou i te au oire i ka ana i te ai.

8. I na, kua patu akaou ratou i te oire ko Zarahemela.

9. I na oki, e manganui te au oire tei ngaromia ki raro, e kua riro mai taua ngai ra ei vai, no reira, kare atura i rauka akaou kia akaouia.

10. E teianei, i na, kua tupu tikai te maroiroi o te au tangata o te ngati Niphai, e kua viviki oki te uanga, e te tau rekareka e te manea.

11. E te akaipoipoia ratou ra, e te orongaia ra kia akaipoipoia, e kua akameitakiia, no te au taputou e manganui tei orongaia mai e te Atu kia ratou.

12. Kare atura ratou i rave akaou i te au ravenga e te au angaanga oroa o te ture a Mose, kua rave ra ratou i te au akaueanga tei rauka mai ia ratou mei te Atu to ratou Atua ma te rave i te akakoreanga kai e te pure, ma te putuputu mai ki te ngai okotai, kia pure, e kia akarongo i te tuatua a te Atua.

13. Kare rava e tauetono anga i rotopu i te au tangata i roto i te enua katoatoa, mari ua ra, ko te au semeio tei raveia e te au pipi a Iesu.

14. E kia ope akera te itu ngauru ma tai o te mataiti, e te itu ngauru ma rua, te meitaki ua ra, e tae ua atu ki te itu ngauru ma iva, e ope katoa akera te anere o te mataiti, e kua ope katoatoa te au pipi a Iesu i te aere atu ki te paradaiso o te Atua, mari ua ko te toko toru te ka noo mai, kua ikiia oki tetai au pipi ei mono ia ratou e manganui katoa to taua uki ra tei mate.

15. Kare rava e pekapeka i roto i te enua, no te maata i te aroa o te Atua tei noo ki roto i te ngakau o te au tangata.

16. E kare rava e manako vareae e mārō anga, e maniania, akaturi, pikikaa, ta tangata, e tetai atu au mea kikino, no reira, kare atura e au tangata, mataora atu ia ratou i rotopu i te au tangata tei angaia e te rima o te Atua.

17. Kare oki e keikeia, kare e ta tangata, kare oki e ngati Lamana me kore ra, tetai ua atu ngati. Kua okotai tikai ratou, ko te au tamariki a te Mesia, e e au tama mua o te basileia o te Atua.

18. E ao tikai to ratou, kua akameitaki tikai te Atu ia ratou i te au mea ravarai ta ratou i rave, kua akameitakiia ratou, e kua topa akera e tai anere e tai ngauru o te mataiti. Kua ope akera te uki mua mei te Mesia ra, e kare rava e akatupuanga pekapeka i roto i te au enua i reira.

19. E ko Niphai, ko tei akono i teia au akapapaanga nei, (Kua tata rai aia ki runga i te au papa a Niphai) kua mate aia, e na tana tamaiti rai na Amosa i akono i te reira, kua tata aia ki runga i ta Niphai au papa.

20. E kua akono aia e varu ngauru ma ā mataiti, te vai rai te au i te enua nei, mari ua ra, ko tetai au tangata ua, tei patoi i te akonoanga, e kua rave i te ingoa o te ngati Lamana no ratou, no reira, e ngati Lamana akaou ki runga i te enua.

21. E tae akera ki te anere e iva ngauru ma ā o te mataiti mei te aere anga mai o te Mesia, e kua mate a Amosa e na tana tamaiti na Amosa i akono i te au akapapaanga, e kua tata rai aia ki runga i te au papa a Niphai e kua tata katoa aia ki roto i te puka a Niphai, koia oki teia puka nei.

22. E ope akera e rua anere mataiti, e ope katoa iora te rua o te uki, mari ua ko tetai toko iti ua.

23. E teianei, ko au ko Momoni, te anoano nei kia kite kotou e, kua uua tikai teia au tangata, e kua pararauare atu ki te orau o te enua, e kua apinga nui tikai ratou, no to ratou manuia maata i roto i te Mesia.

24. E teianei kia tae ki te rua anere ma tai o te mataiti, kua akamata te ngakau parau i rotopu ia ratou, koia oki i te aao anga i te au kakau moni mamaata, e te au poe memeitaki e tetai au apinga manea o teianei ao.

25. E i taua tuatau rai, kare atura ta ratou au apinga i akonoia na ratou katoatoa.

26. E kua akamata iora i te vavai ia ratou ki te au pupu tataki tai, e kua akamata oki i te akatu are pureanga no ratou uaorai, kia rauka te puapinga, e kua akamata i te patoi atu i te akonoanga tika a te Mesia.

27. E kia ope akera te rua anere e tai ngauru o te mataiti, kua maata te au akonoanga i runga i te enua, e manganui te au akonoanga tei manako e, kua kite ratou i te Mesia, e i na, kua akaruke ratou i te au tuanga maata o tana evangelia, e kua ariki i te au mea kikino, e te oronga ra oki i te mea tapu ki te aronga tau kore, ko tei araiia no to ratou tau kore.

28. Kua viviki tikai te tupu anga o teia au akonoanga, no te au mea viivii oki, e no te mana oki o Satani, tei mou i to ratou ngakau.

29. Te vai katoa ra tetai akonoanga ke tei akakore i te Mesia, e kua takinga kino i te akonoanga tika a te Mesia no to ratou tu akaaka e to ratou akarongo i te Mesia, e kua akavaavaa atu ia ratou, no te au semeio e manganui tei raveia ki rotopu ia ratou.

30. No reira, kua rave ratou i te mana e te au tikaanga ki runga i te au pipi a Iesu tei noo ki rotopu ia ratou, e kua uri atu ratou ia ratou ki roto i te are tapekaanga, ina ra, na roto i te mana o te tuatua a te Atua tei vai ki roto ia ratou, kua ngaangaa te are tapekaanga i rotopu, e kua aere atu ratou kia rave i te au semeio ki rotopu i te au tangata.

31. Ina ra, e no atu rai teia au semeio e manganui kua akaketaketa rai i to ratou ngakau, e kua akamata kia ta ia ratou, mei ta te ngati Iuda rai i Ierusalema tei tamata kia ta ia Iesu, no tana tuatua.

32. Kua titiri atu ratou ia ratou ki roto i te umu ai kaka e kua aere mai ratou ki vao, kare e ngai i kino.

33. E kua uri atu ia ratou ki roto i te vaarua o te manu taae e kua kangakanga ratou ma te au manu taae, mei te tamariki e kanga i te punua mamoe, e kua aere mai ratou mei roto mai i te au manu taae, kare e kino.

34. Kua akaketaketa ra to ratou ngakau, no te mea, kua aratakiia oki ratou e te au taunga e te au peroveta pikikaa kia akatuia tetai au akonoanga e manganui, e kia rave i te au tu kino ravarai. E kua papaki atu ratou i te au tangata o Iesu, kare rava te au tangata o Iesu i arapaki ua atu ia ratou. E kua noo ua ratou i roto i te akarongo kore, e te kino maata i tera mataiti ki tera mataiti, ope ua atu te rua anere e toru nguaru o te mataiti.

35. E teianei, kia tae ki te rua anere e toru ngauru ma tai o te mataiti, kua tupu tetai ngaangaa anga maata i rotopu i te au tangata.

36. Kua tu mai tetai au tangata tei karangaia e ngati Niphai e, e arongo akarongo tikai ratou i te Mesia, e i rotopu ia ratou tetai pāpāki tei karangaia e ngati Lamana, e ngati Iakoba, e ngati Iosepha, e e ngati Zoroma.

37. No reira ko te aronga akarongo tikai i te Mesia, e te aronga akamori tika i te Mesia, (tei rotopu ia ratou nga pipi toko toru a Iesu tei noo mai) koia te ngati Niphai, te ngati Iakoba, te ngati Iosepha, e te ngati Zoroma.

38. E ko te aronga e patoi i te evangelia, e ngati Lamana ïa, e te ngati Lemuela, e te ngati Isemaela kare ratou i noo ma te akarongo kore ua, ina ra, kua patoi pakari tikai ratou i te evangelia a te Mesia, e kua ako atu i ta ratou au tamariki auraka kia akarongo atu ia ratou, mei ta to ratou au metua i rave mei mua mai.

39. E no te kino oki, e te rikarika o to ratou ai metua, mei te akamata anga. Kua apii oki i ta ratou au tamariki kia makitakita atu i te tamariki a te Atua, mei ta te ngati Lamana oki, tei apii atu ki ta ratou au tamariki kia makitakita i te tamariki a Niphai, mei te akamataanga mai.

40. E kia ope nga mataiti e rua anere e a ngauru ma a, ko te tu rai ïa o te tangata. E kua tupu mai te tuanga kino rava o te tangata ki te maroiroi, e kua maata atu ratou, i to te au tangata o te Atua.

41. E te patu ua ra ratou i tetai au are pure no ratou uaorai e kua akamanea i te reira ki te au tu apinga manea ravarai. E kua ope iora te rua anere e rima ngauru o te mataiti e te rua anere e ono ngauru o te mataiti.

42. E ko te tuanga kino maata o te tangata, kua akamata akaou ratou i te akatu akaou i te taputou ngaro a te pupu o Katianetona.

43. E kua akamata katoa te au tangata tei karangaia ratou e ngati Niphai i te akaparau i roto i to ratou ngakau, no tei apinga nui ia ratou e kua ngakau parau mei to ratou ai taeake te ngati Lamana.

44. E mei teia tuatau nei kua akamata te au pipi i te taitaia no te au ara a to te ao nei.

45. E kia ope te toru anere o te mataiti, kua kino te au tangata o Niphai e te ngati Lamana, kua aiteite ua tetai ki tetai.

46. E kua oora ua te anana keikeia o Katianetono ki runga i te tua o te enua, kare rava e tangata tuatua tika, mari ua ra, ko te au pipi a Iesu Kua akaputu oki ratou i te auro e te ario kia maata, e kua oko oki ratou i te au mea e okoia ra.

47. E ope akera te toru anere ma rima o te mataiti (te noo ua ra te au tangata i roto i te kino) kua mate iora a Amosa e na tona teina ko Amarona i akono i te au akapapaanga.

48. E kia ope akera nga mataiti e toru anere e rua ngauru, kua akaueia maira a Amarona e te Vaerua Tapu kia uuna i te au papa tapu, pouroa te au akapapaanga tapu tei orongaia mai mei tera uki ki tera uki, koia oki te au mea tapu, e tae rava mai ki te toru anere e rua ngauru o te mataiti mei te aereanga mai o te Mesia.

49. E kua uuna oki aia i te reira ki te Atua ra, e kia riro akaou mai ki te toenga o te ngutuare o Iakoba kia tau ki te totou e te taputou a te Atu. Ko te openga oki teia i te akapapaanga a Amarona.