Te Puka a Iaroma

1. E teianei, i na, te tata atu nei au ko Iaroma i tetai manga tuatua, mei tei tau i te akaueanga a toku ra metua ko Enosa, kia tataia to matou akapapaanga anau anga.

2. E no te mea, e au papa meangiti teia, e kua tataia oki teianei au mea ei meitaki no to matou au taeake, ko te ngati Lamana ra, no reira e tata au i tetai, kare ra au e tata i te au mea no toku au totouanga, e te au eeuanga. Eaa atu tetai taku ka tata i ta toku au metua i tata ra? Kare ainei ratou i akakite mai i te ravenga o te ora? Te tuatua atu nei au kia kotou, Ae; e kua rava te reira iaku.

3. I na, e mea tau kia maata te angaanga i rotopu i teianei iti tangata, no te paketaketa o to ratou ngakau, e no te taringa turi, e no te poiri o to ratou manako, e no to ratou tu marokiakia; ina ra, kua aroa maata te Atu ia ratou, e kare aia i akapou ia ratou i runga i te tu o te enua ra.

4. E manganui ra te au tangata i rotopu ia matou, ko tei rauka i te au eeuanga e manganui; kare oki ratou katoatoa i ketaketa i te ngakau. E te aronga ngakau ketaketa kore e te akarongo ra, tei ia ratou te Vaerua Tapu, ko tei apii i te tamariki a te tangata nei, mei tei tau i to ratou akarongo.

5. E teianei, i na, kua ope akera e rua anere mataiti, e kua maata te ngati Niphai ki runga i te enua nei. I akono ana ratou i te ture a Mose, e te sabati oki kia tapu ïa i te Atu. Kare ratou i tao. Kare oki ratou i akaviivii i te ingoa o te Atua. E e mea pakari rava te au ture o te enua.

6. E kua pararauare ratou ki runga i te maata o te enua, e kua pera katoa te ngati Lamana. E kua maata rava ratou i to te ngati Niphai; e kua inangaro ua ratou kia ta ia matou, e kua inu oki ratou i te toto o te au puaka ra.

7. E kua aere putuputu mai ratou kia tamaki mai kia matou, i te ngati Niphai oki, kareka ra, to matou au ariki e to matou au arataki, e au tangata ririnui i te akarongo i te Atu, e kua apii ratou i te au aerenga a te Atu; no reira kua tamaki matou i te ngati Lamana e kua tuaru atu matou ia ratou ki vao i to matou au enua, e kua akamata matou i te paruru i to matou au oire e to matou enua ipukarea katoa.

8. E kua maata roa matou e kua pararauare oki matou ki runga i te tua o te enua, e kua apinga nui matou i te auro, e te ario e te au apinga oko maata, e te au apinga rakau manea, e te au are, e te au apinga angaanga, e te auri, e te kapa, e te veo e te auri meitaki rava, i te maanianga i te au tu apinga angaanga katoa e arote ei i te enua ra, e te au apinga tamaki; koia oki te kakao koikoi, e te pute kakao, e te korare rikiriki e te korare maata e te au apinga e tau no te tamaki atu.

9. E no te mea kua akateateamamaoia matou kia aravei i te ngati Lamana, kare ratou i manuia i te tamakianga ia matou. Kua akatikaia rai te tuatua a te Atua i tana i tuatua ki to matou ra ai tupuna, i te na ko anga mai e, me ka akono kotou i taku au akaueanga, ka puapinga ia kotou i te enua nei.

10. Kua tuatua akamataku atura te au peroveta a te Atua ki te iti tangata o Niphai, mei tei tau i te tuatua a te Atua, i te na ko anga e, kia kore ratou e akono i te au akaueanga, e inga ra ratou i te ara, e akapouia atu ratou i te enua ra.

11. E teianei, kua angaanga pakari te au peroveta e te au taunga e te au puapii, i te akamaroiroi anga ma te akakoromaki maata, i te iti tangata kia akono; e i te apiianga i te ture a Mose, e te tumu i orongaia mai ei te reira ra, e i te apiianga atu ia ratou kia akara ki mua ki te Mesia, e kia akarongo iaia i te ka tae mai, mei te mea tei ko nei rai aia i teianei. E kua pera ratou i te apii ia ratou.

12. E no ta ratou akapera anga atu, kare ratou i pou i runga i te enua, kua puta oki te ngakau tangata i ta ratou tuatua, ko tei akamaroiroi ua atu rai ia ratou kia tataraara.

13. E kua ope e rua anere e toru ngauru ma varu mataiti; e te vai ra te tamaki, e te māro, e te pekapeka, i te maataanga o taua tuatau ra.

14. Kare atura au, ko Iaroma e tata, e meangiti oki te au papa nei. Ina ra, e aku au taeake, ka rauka ia kotou kia tatau i te au papa ke a Niphai; i na oki, tei runga i te reira i kotikotiiaʼi te akapapaanga tuatua o to matou au tamaki, te tataanga oki a te ui ariki, koia oki ta ratou i akaue kia tataia ra.

15. E teianei, te tuku atu nei au i teianei au papa ki roto i te rima o taku tamaiti, ko Omoni, kia akonoia mei tei tau i te au akaueanga a toku ai metua.