1 Ao e a koro bukina bwa Teeti, are kanoan Eta—bwa Eta e a tia ni mate n te rongo, ma kaain batana ni kabane ma ti Teeti—ngaia are Teeti e a waaki ni manga kamatoaia te botanaomata ae a tia ni kariaia ni mate.

2 Ao e a koro bukina bwa Teeti e bon uringa tiringakia ana bakatibu, ao e bon katea te abanuea ae raoiroi; bwa e uringa are e a tia ni karaoia te uea n uotia Iareta ma tarina rinanon te marawa; ao e bon nakonako ni kawain te Uea; ao e karikiia natina mwaane ao aine.

3 Ao ana karimoa te mwaane, are arana Teeti, e bon kaitara; ma e ngae n anne e bon oreaki Teeti iroun te tia iraa, ibukin korakoran kaubwaina are e a karika te rau riki nakon tamana.

4 Ao e a koro bukina bwa tamana e katei kaawa aika a mwaiti iaon te aba, ao aomata a moanna ni kabuta te aba. Ao Teeti e maiu ni karokoa ae e a rang kara; ao e a karika Ribwakite. Ao e mate, ao e uea Ribwakite n onea mwiina.

5 Ao e a koro bukina bwa Ribwakite e aki karaoa ae eti i matan te Uea, bwa a bon mwaiti buuna ma buuna ni kewe, ao e anganiia aomata uotaia ae rawawata; eng, e bon anai aia angabwai aika a korakora; ao man te angabwai ao e katei kateitei aika a mwawawa.

6 Ao e katea ana kaintokanuea ae rianako tamaroana: ao e katei nne ni kaikain aika a mwaiti; ao ane e rawa n angabwai ao e bon tewenakoa nako nanon te nne ni kaikain; ao e tua bwa a na teimatoa ni beku ibukin maiuia; ao ane e rawa ni mwakuri e tua bwa e na tiringaki.

7 Ngaia are e bon karekei ana bwai aika a karaoaki ni kabane, eng, ana koora e bon tua bwa e na katamaroaki man te nne ni kaikain; ao aekan bwaai nako ake a karaoaki aika a tamaroa e bon tua bwa a na karaoaki man te nne ni kaikain. Ao e a koro bukina bwa e bon karawawataia aomata ma ana waaki ni kabekaau ao ana mwakuri aika bati n ribaki.

8 Ao ngke e a tia n tautaeka i nanon te maan ae abwi ma uoua te ririki a bon teirake aomata ni kaitara; ao e a manga boo te buaka n te aba, n te aro are e a tiringaki Ribwakite, ao a kakioaki nako kanoana man te aba.

9 Ao e a koro bukina bwa i mwin te maan ae bati te ririki, Morianton, (are kanoan Ribwakite) e ikotiia ana taanga ni buaka aika kaaina taan kakioaki nako, ao a mwananga ni buakaniia aomata; ao e karekea te tautaeka i aon kaawa aika a mwaiti; ao e a rikirake ni korakora te buaka, ao e waki i nanon te maan ae ririki aika a mwaiti; ao e karekea te tautaeka i aon te aba ni kabuta, ao e a bon karikiia bwa te uea i aon te aba ni kabuta.

10 Ao ngke e a tia ni bon karikia bwa te uea e kabebetea uotaia aomata, n te aro are e a karekea tangirakina irouia aomata, ao a bon kabiria bwa aia uea.

11 Ao e karaoa ae raoiroi nakoia aomata, ma tiaki nakoina ibukina bwa e bati ana waaki ni kabekaau; ngaia are e a kararoaki nako mai i matan te Uea.

12 Ao e a koro bukina bwa e katei kaawa Morianton aika a mwaiti, ao a rikirake ni korakora kaubwaia aomata i aan ana tautaeka, n aron aia kateitei, aia koora ao aia tirewa, ao n aia wiita ake a uniki, ao n aia nanai ni man, ma aia ikota ni man, ao ni bwaai ni kabane ake a tia ni kaokaki nakoia.

13 Ao Morianton e maiu ni karokoa ae e a rangi ni kara, ao e karika Kim; ao Kim e tautaeka i mwin tamana; ao e tautaeka i nanon waniua te ririki ao e a mate tamana. Ao e a koro bukina bwa Kim e bon aki tautaeka i nanon te raoiroi, ngaia are e bon aki tangiraki iroun te Uea.

14 Ao tarina e bon teirake ni kaitara, are ngaia are e a uotia ni kaburea; ao e bon tiku ni kabureaki i nanon ana bong ni kabane; ao e karikia natina mwaane ao aine i nanon ana tai ni kabureaki, ao i nanon ana tai ni kara ao e karika Rewi; ao e a mate.

15 Ao e a koro bukina bwa e bon beku Rewi i nanon te kabureaki i mwin maten tamana, i nanon te maan ae abwi ma uoua te ririki. Ao e karaoa te buaka ni kaitara uean te aba, are ngaia are e a reke irouna te abanuea.

16 Ao ngke e a tia ni karekea te abanuea irouna e bon karaoa ae eti i matan te Uea; ao a bon rikirake aroia aomata n te aba; ao e bon maiu ni karokoa ae e a kara, ao e karikia natina mwaane ao aine; ao e karika naba Korom, are e bon kabiria bwa e na uea i mwina.

17 Ao e a koro bukina bwa Korom e bon karaoa ae raoiroi i matan te Uea ni kabanea ana bong; ao e karikiia natina mwaane ao aine aika a mwaiti; ao i mwin nooran boong aika a mwaiti irouna ao e bon mate, n aekaia kaain te aonaba ni kabane; ao Kiti e tautaeka i mwina.

18 Ao e a koro bukina bwa Kiti e mate naba, ao e tautaeka Riibu i mwina.

19 Ao e a koro bukina bwa Riibu e bon karaoa naba ae raoiroi i matan te Uea. Ao i nanon ana bong Riibu ao a tiringaki naeta aika a kamamate. Ngaia are a bon nako nakon te aba i maiaki, bwa a na kakaea kanaia aomata ake kaain te aba, bwa e a kaonaki te aba ni manin te buakonikai. Ao Riibu bon te tia kaeman ae korakora naba.

20 Ao a katea te kaawa ae korakora n te aba ae wariki, n te tabo are e kamaenakoaki iai te aba n taari.

21 Ao a bon kawakina te aba are e nako maiaki bwa te rereua ibukin te tabo ni kaeman. Bwa e onrake te aba are i meang irouia aomata.

22 Ao e bon korakora marurungiia, ao a bobwai ma ni kaboonakoi bwaai ma n iokinibwai imarenaia, bwa e aonga n reke aia raka.

23 Ao a bon mwakuria te ooa n aekana nako, ao a karaoa te koora, te tirewa, te biti, ao te buraati, ma aekan nako te biti; ao a bon kenna mai aan tano; ngaia are a bon kawaerakei bwariko n tano aika a bati bwa a aonga ni karekea te ooa, te koora, te tirewa, te biti, ao te kaobwa. Ao a karaoi aekan nako bwaai aika a karaoaki n te bai.

24 Ao bon iai aia tirika, ma rinen aika a raoiroi rarangaki; ao a karaoi aekan nako te kunnikai, bwa aonga ni kunnikaia ma ni karabaniia.

25 Ao a bon karaoi aekan bwaai ni mwakuri nako bwa aonga n ribana te aba, bwa a na kamaraua te tano ao n ununiki, n riko uaanikai ao n urua te tano, ao n ororea te wiita.

26 Ao a bon karaoi bwaai ni mwakuri n aekaia nako are a bon mwakuri iai ma aia man.

27 Ao a bon karaoi bwaai ni buaka n aekaia nako. Ao a bon karaoi mwakuri n aekaia nako aika bwaai aika a kamimi aron mwakuriaia.

28 Ao bon akea riki te botanaomata ae e kakabwaiaki ma ni karikirakeaki aroia iroun te Uea riki nakoia. Ao a bon mena n te aba ae rine i buakoia aaba ni kabane, bwa e a bon tia n taekinna te Uea.

29 Ao e a koro bukina bwa Riibu e bon maeka i nanon ririki aika a mwaiti, ao e karikiia natina mwaane ao aine; ao e karika naba Eatom.

30 Ao e a koro bukina bwa Eatom e tautaeka i mwin tamana. Ao ngke e a tia Eatom n tautaeka i nanon te maan ae uabwi ma aua te ririki, nooria, e a bon anaaki te abanuea mai irouna. Ao e beku i nanon te tautoronaki i nanon ririki aika a mwaiti, eng, ni karokoa banen ana bong.

31 Ao e karika Eta, ao Eta e maiu i nanon te tautoronaki i nanon ana bong ni kabane. Ao Eta e bon karika Aaron, ao Aaron e maeka i nanon te tautoronaki i nanon ana bong ni kabane; ao e karika Aminikata, ao Aminikata e maeka naba i nanon te tautoronaki i nanon ana bong ni kabane; ao e karika Koriantam, ao Koriantam e maeka i nanon te tautoronaki i nanon ana bong ni kabane; ao e karika Koom.

32 Ao e a koro bukina bwa Koom e kairiia nako te mwaiti ae iteran te abanuea. Ao e tautaeka i aoia te mwaiti ae iteran te abanuea i nanon abwi ma aua te ririki; ao e nako ni buaka ni kaitara te uea, are Amikite, ao a buaka i nanon te maan ae ririki aika a mwaiti, ao i nanon te tai anne ao Koom e tokanikai iaon Amikite, ma ni karekea te tautaeka i aoia nikiraia kaain te abanuea.

33 Ao i nanon ana bong Koom ao bon iai taan kamwarua n te aba; ao a katotong babaire ni kawai, ma ni karaoi berita n aekaia kaina ngkoa, ma n ukoukora riki kamaunan te abanuea.

34 Ngkai Koom e bon un ni kaaitaraia i nanon te tai ae bati; ma e ngae n anne, e bon aki teimatoa ni kaaitaraia.