1 Ac tukun ma inge Shez, suc sie ke tahk in sucu lal Heth—tuh Heth el tuh misac ke srwacl in mongo sac, ac sucu nuhkwewa lal sahyacl Shez—ohinge, Shez el muhtwacwacack in sifilpac muhsaheack sie un mwet kweoklacna.

2 Ac tukun ma inge Shez el tuh esam kuhnausyucklac luhn pahpah tuhmwacl, ac el tuh muhsaheack sie tohkohsrahi suwohswohs; tuh el esam ma Leum El tuh oruh in usacluh Jared ac tamuhlwel lal in sahslah ke meoa loal; ac el tuh fahsr ke inkacnek luhn Leum, ac el oraclah wen ac acn.

3 Ac wen mahtuh se emet nahtuhl, suc inel pa Shez, el tuh akuhkuhin laenuhl; ne ohinge, Shez el tuh srihngihlyuck ke poun sie mwet pihsrapasr, ke srihpen kahsruhp yohk lal, ma sifilpac use mislac nuh sin pahpah tuhmwacl.

4 Ac tukun ma inge pahpah tuhmwacl tuh muhsaheack siti pucspucs fin acn ah, ac mwet uh sifilpac muhtwacwacack in maelihk fin acn ah nohfohn. Ac Shez el tuh moul sun matwac na mahtuh; ac el oracllah Riplakish. Ac el misac, ac Riplakish el kol aholuhl.

5 Ac tukun ma inge Riplakish el tiacna oruh ma suc pwacye ye muhtuhn Leum, tuh oasr muhtwacn pucspucs kiyacl ac muhtwacn kuhlwacnsap lal, ac tuh fihliyac nuh fin pihsen mwet uh ma upac; ahok, el tuh tax elos ke molin tax yohk; ac ke tax ingacn el tuh muhsaheack lohm luhlahp pucspucs.

6 Ac el tuh muhsaheack nuh sel sie tron na kahto; ac el tuh muhsaheack nien srohoh pucspucs, ac el suc sruhnga moli tax el tohlwacng nuh ke nien srohoh; ac el suc tiac kuh in moli tax el tohlwacng nuh ke nien srohoh; ac el oraclah tuh elos in orekma pacl nuhkwewa nuh ke mwe kahsruh lalos; ac el suc sruhnga orekma el oruh tuh elan acnwucki.

7 Ohinge el tuh eis orekma na wo nuhkwewa lal, ahok, finne kol wolacna lal el oraclah in ahknwacsnwacsyeyuck ke nien srohoh; ac kain in orekma kuh muhsah nuhkwewa el tuh oruh in orek lun nien srohoh. Ac tukun ma inge el tuh ahkkweokye mwet uh ke orek kosro ac ma sruhngwacyuck lal.

8 Ac ke el tuh kol ke lusen yac angngaul ac luo mwet uh tuh tuyak ke fohs in laenuhl; ac muhtwacwacack in sifilpac oasr mweun fin acn uh, yohkna oruh Riplakish el tuh acnwucki, ac tahk in sucu lal tuh lihsyucklac liki acn ah.

9 Ac tukun ma inge tukun lusen yac pucspucs, Morianton, (el sie mwet ke tahk in sucu lal Riplakish) el oracni nuh sie sie un mwet mweun ma sruhngwacyuck, ac elos som ac mweun nuh sin mwet uh; ac el eislah kuh fin siti pucspucs; ac mweun uh arulacna upaclah, ac tuh sun lusen yac pucspucs; ac el tuh eislah kuh fin acn ah nohfohn, ac tuh oakiyac elan sifacna tohkohsrah fin acn ah nohfohn.

10 Ac tukun el oakiyac tuh elan sifacna tohkohsrahlac ah el tuh ahkfihsrwacsryelah ma toasr luhn mwet uh, ke ohiyac inge el tuh luhngkihnyuck ke muhtuhn mwet uh, ac elos tuh akmuhsraellah in tohkohsrah lalos.

11 Ac el tuh oruh nuhnuhnkuh suwohs nuh sin mwet uh, tuhsruhk tiac nuh sel sifacna ke srihpen orek kosro pucspucs lal; ohinge el tuh lihsyucklac liki ye muhtuhn Leum.

12 Ac tukun ma inge Morianton el muhsaheack siti pucspucs, ac mwet uh arulacna kahsruhpi ye kolyuck lal, kwewana ke lohm, ac ke kol ac selfuh, ac ke kap grain, ac ke un sip, ac un kosro, ac ma suc tuh sifilpac fohlohkihnyuckyak nuh selos.

13 Ac Morianton el tuh moul sun matwac na mahtuh, ac na el oracllah Kim; ac Kim el tuh ahol pahpah tuhmwacl in kol; ac el tuh kol ke lusen yac alkosr, ac pahpah tuhmwacl misac. Ac tukun ma inge Kim el tiacna kol ke suwohswohs, ohinge el tiacna luhngkihnyuck sin Leum.

14 Ac tamuhlwel lal tuh tuyak in akuhkuhin laenuhl, ohinge el tuh usacllah nuh in srohoh; ac el tuh muhta na srohoh ke lusen moul lal nohfohn; ac el oraclah wen ac acn in srohoh, ac ke matwac mahtuh lal el oracllah Levi; na el misac.

15 Ac tukun ma inge Levi el tuh kuhlwacnsap in srohoh tukun misac luhn pahpah tuhmwacl, ke lusen yac angngaul ac luo. Ac el tuh orek mweun lain tohkohsrah luhn acn uh, ohinge el eislah nuh sel sifacna tohkohsrahi.

16 Ac tukun el eislah nuh sel sifacna tohkohsrahi uh el tuh oruh ma pwacye ye muhtuhn Leum; ac mwet uh tuh kapkapwack fin acn uh; ac el tuh moul sun matwac mahtuh wo, ac el oraclah wen ac acn; ac el oacyacpac oracllah Corom, suc el akmuhsraelah tohkohsrah in aholuhl.

17 Ac tukun ma inge Corom el tuh oruh ma wo ye muhtuhn Leum ke lusen moul lal nohfohn; ac el tuh oswelah wen ac acn pucspucs; ac tukun el tuh moul liye lwen pucspucs el misac, oacna nuh sin mwet nuhkwewa fin facluh; ac Kish el kol aholuhl.

18 Ac tukun ma inge Kish el oacyacpac misac, ac Lib el kol aholuhl.

19 Ac tukun ma inge Lib el oacyacpac tuh oruh ma wo ye muhtuhn Leum. Ac ke lusen pacl lal Lib serpent pwacsin ah tuh kuhnausyucklac. Ohinge elos tuh som nuh ke acn ma oan nuh epang, in sruh mongo nwacn mwet fin acn uh, tuh acn ah afihnyucklac ke kosro innimac. Ac Lib el oacyacpac eklac sie mwet wo ke sruh kosro.

20 Ac elos muhsaheack sie siti luhlahp ke sisken acn ohsrihksrihk fin acn uh, ke sisken acn se ma meoa uh srwaclihk acn uh.

21 Ac elos tuh karuhnguhnwacng acn ma oan nuh epang ah in sie innimac, in sruh kosro. Ac acn ah nohfohn ma oan nuh lacfahl acir ah afihnyucklac ke mwet.

22 Ac elos tuh arulacna etuh orekma, ac elos tuh moul ac kuhka ac ayaol kuhfa sie sin siepac, tuh elos in kuh in kapkapwack.

23 Ac elos tuh orekma ke kain in ohr nuhkwewa, ac elos tuh orek kol, ac selfuh, ac osra, ac prahs, ac kain in osra nuhkwewa; ac elos tuh puhkanwack ma inge liki fohk uh; ohinge, elos tuh puhkanwack tohktohk luhlahp ke fohk uh in eis ohr, kol, ac selfuh, ac osra, ac copper. Ac elos tuh oruh kain in orekma wo nuhkwewa.

24 Ac tuh oasr silk lalos, ac nuknuk srihk in muhta; ac elos tuh oraclah kain in nuknuk nuhkwewa, tuh elos in kuh in nuknuk afuhnlah kohflohfohl lalos.

25 Ac elos tuh oraclah kain in kuhfa nuhkwewa in pihkihn fohk uh, kwewana in puhkanwack ac in tahknwelihk, in kosrwacni ac in pakiyac, ac oacyacpac in srwaclihk.

26 Ac elos tuh oraclah kain in kuhfa in orekma nuhkwewa ma elos orekmakihn nuh ke kosro muhna in orekma lalos.

27 Ac elos tuh oraclah kain in kuhfa in mweun nuhkwewa. Ac elos tuh oraclah kain in orekma arulacna usrnguck nuhkwewa.

28 Ac wacngihn un mwet kuh in ahkinsewowoyeyuck yohk luhkwelos, ac ahkkapyeyuck yohk liki na ke poun Leum. Ac elos muhta ke sie acn ma wolacna liki acn nuhkwewa, tuh Leum el fahk ma inge.

29 Ac tukun ma inge Lib el tuh moul ke lusen yac pucspucs, ac oraclah wen ac acn; ac el oacyacpac oracllah Hearthom.

30 Ac tukun ma inge Hearthom el kol ahol pahpah tuhmwacl. Ac ke Hearthom el kol ke lusen yac longoul ac ahkosr, liye, tohkohsrahi uh tuh itucklac luhkwel. Ac el kuhlwacnsap ke lusen yac pucspucs ke srohoh, ahok, finne ke lusen moul luhlah lal nohfohn.

31 Ac el oracllah Heth, ac Heth el muhta in srohoh ke lusen moul lal nohfohn. Ac Heth el oracllah Aaron, ac Aaron el muhta in srohoh ke lusen moul lal nohfohn; ac el oracllah Amnigaddah, ac Amnigaddah el oacyacpac muhta in srohoh ke lusen moul lal nohfohn; ac el oracllah Coriantum, ac Coriantum el muhta in srohoh ke lusen moul lal nohfohn; ac el oracllah Com.

32 Ac tukun ma inge Com el kohllah tahfuhn tohkohsrahi uh. Ac el kol fin tahfuhn tohkohsrahi uh ke lusen yac angngaul ac luo; ac el som mweun lainuhl tohkohsrah, Amgid, ac elos mweun ke lusen yac pucspucs, ke pacl ma Com el eislah kuh facl Amgid, ac eislah kuh fin acn luhlah ke tohkohsrahi.

33 Ac ke pacl lal Com muhtwacwacack in oasr mwet pihsrapasr fin acn uh; ac elos orekmakihn plwacn mahtuh, ac oruh olweacng in fahsr tukun ohiyac luhn mwet mahtuh met ah, ac sifilpac suk in kuhnahoslah tohkohsrahi.

34 Inge Com el tuh acnwuck laenuhlos yohk; ne ohinge, el tiacna kuhtanguhloslac.