1 Ac ke pacl lal Com oasr mwet pahluh pucspucs oacyacpac tuhkuh, ac palye kuhnausyucklac luhn mwet fokoko elos fin tiac auliyak, ac forlah nuh sin Leum, ac fuhlweack ahkmas ac ma koluk lalos.

2 Ac tukun ma inge mwet pahluh elos tuh sruhngwacyuck sin mwet uh, ac elos kahinglac nuh yohrohl Com in karihngihnyuckyang, tuh mwet uh suk in kuhnaosuhloslac.

3 Ac elos pahluh nuh sel Com ke ma pucspucs; ac el ahkinsewowoyeyuck ke lusen moul luhlah lal nohfohn.

4 Ac el moul sun matwac na mahtuh wo, ac el oracllah Shiblom; ac Shiblom el kol aholuhl. Ac tamuhlwel lal Shiblom el akuhkuhin laenuhl, ac muhtwacwacack in oasr sie mweun na upac se fin acn ah nohfohn.

5 Ac tukun ma inge tamuhlwel lal Shiblom el oruh tuh mwet pahluh nuhkwewa suc palye kuhnausyucklac luhn mwet uh in acnwucki;

6 Ac oasr fohs luhlahp se fin acn ah nohfohn, tuh elos fahkwack lah sie selngawi upac ac tuhkuh nuh fin acn uh, ac oacyacpac nuh fin mwet uh, ac tuh oasr sie kuhnausyucklac luhlahp inmahsrlolos, ma soenna orek ohinge fin facluh, ac sri lalos ac tohktohkwack infohk uh fin acn uh elos fin tiac auliyak ke ma koluk lalos.

7 Ac elos tiac porongo puhsrwen Leum, ke srihpen u koluk lalos; ohinge muhtwacwacack in oasr mweun ac fohs fin acn ah nohfohn, ac oacyacpac oasr sracl in mongo ac mas pucspucs, yohkna oruh oasr sie kuhnausyucklac luhlahp, ma soenna etweyuck fin facluh; ac ma inge nuhkwewa sikyak ke pacl lal Shiblom.

8 Ac mwet uh muhtwacwacack in auliyak ke ma koluk lalos; ac yohkna ke elos tuh oruh Leum El pahkotwen nuh selos.

9 Ac tukun ma inge Shiblom el acnwucki, ac Seth el utucklac srohoh, ac tuh muhta in srohoh ke lusen moul lal nohfohn.

10 Ac tukun ma inge Ahah, wen nahtuhl, el tuh eis tohkohsrahi; ac el tuh kol fin mwet uh ke lusen moul lal nohfohn. Ac el tuh oruh kain in ma koluk nuhkwewa ke pacl lal, suc el tuh oruh ahksohrohryeyacn srah yohk; ac puh lusen moul lal.

11 Ac Ethem, el sie tahk in sucu lal Ahah, el tuh eis tohkohsrahi; ac el oacyacpac tuh oruh ma koluk ke lusen moul lal.

12 Ac tukun ma inge ke pacl lal Ethem oasr mwet pahluh pucspucs tuhkuh, ac sifilpac palye nuh sin mwet uh; ahok, elos tuh palye lah Leum El ac kuhnaosuhloslac liki facluh elos fin tiac auliyak ke ma koluk lalos.

13 Ac tukun ma inge mwet uh ahkkwekweye insiaclos, ac tiacna porongo nuh ke kahs lalos; ac mwet pahluh elos ahsorack ac som liki inmahsrlon mwet uh.

14 Ac tukun ma inge Ethem el tuh oruh nuhnuhnkuh ke ohiyac koluk ke lusen moul lal nohfohn; ac el oracllah Moron. Ac tukun ma inge Moron el tuh kol aholuhl; ac Moron el tuh oruh ma koluk ye muhtuhn Leum.

15 Ac tukun ma inge oasr sie lainyuck sikyak inmahsrlon mwet uh, ke srihpen u lukmac ma tuh muhsahiyuckyak in eis kuh ac ma kahsruhp; ac oasr sie mwet fokoko suc tuyak inmahsrlolos ke ma koluk, ac som mweun nuh sel Moron, suc el tuh kuhtanglah tahfuh tohkohsrahi; ac el tuh karuhnguhnwacng tahfuh tohkohsrahi uh ke lusen yac pucspucs.

16 Ac tukun ma inge Moron el tuh kuhtanguhllah, ac tuh sifilpac eislah tohkohsrahi uh.

17 Ac tukun ma inge oasr siepac mwet fokoko tuyak; ac el tahk in sucu luhn tamuhlwel lal Jared.

18 Ac tukun ma inge el tuh kuhtanguhllah Moron ac eislah tohkohsrahi uh; ohinge, Moron el tuh muhta in srohoh ke lusen moul luhlah lal nohfohn; ac el oracllah Coriantor.

19 Ac tukun ma inge Coriantor el tuh muhta in srohoh ke lusen moul lal nohfohn.

20 Ac ke pacl lal Coriantor oasr mwet pahluh pucspucs suc oacyacpac tuhkuh, ac palye ma yohk srihpac ac wolacna, ac luti ke auliyak nuh sin mwet uh, ac elos fin tiac auliyak Leum God El ac oruh nuhnuhnkuh in laenuhlos nuh ke kuhnausyucklac lalos;

21 Ac tuh Leum God El ac suhpwaclah kuh use siepacna un mwet in muhta fin acn uh, ke kuh Lal, oacna ke El tuh use pahpah tuhmwaclos.

22 Ac elos tuh sruhnga nohfohn kahs luhn mwet pahluh, ke srihpen u lukmac ac ma koluk sruhngwacyuck lalos.

23 Ac tukun ma inge Coriantor el oracllah Ether, na el misac, el muhta na in srohoh ke lusen moul lal nohfohn.